Chʼol 38
Nakamsiik li xb’eenil aj raqol aatin
Eb’ li maa’us aj winq ak okenaqeb’ choq’ aj raqol aatin sa’ xb’eeneb’ laj Nefita. Ke’xk’e tojb’a-maak sa’ xb’eeneb’ li tiikeb’ xch’ool, a’b’an ink’a’ li wankeb’ xmaa’usilal.
Ra lix ch’ool laj Nefi naq kiril xnaab’alil li maa’usilal sa’ xyanq li tenamit.
Sa’ jun li kutan yoo chi tijok sa’ xb’een li najt xteramil kab’l li wan sa’ li rawimq. Li awimq a’an nach’ wan rik’in li nimb’e li naxik sa’ jun k’ayil sa’ Tzarahemla.
Eb’ li ani yookeb’ chi nume’k sa’ li nimb’e ke’rab’i naq laj Nefi yoo chi tijok. Ke’xch’utub’ rib’ li tenamit chi tub’tu, ut ke’xpatz’ rib’ k’a’ut naq wan xnimal xrahil xch’ool laj Nefi.
Naq laj Nefi kirileb’ li tenamit, kixye naq ra lix ch’ool xb’aan xmaa’usilaleb’ a’an. A’an kixye reheb’ naq te’xjal xk’a’uxl.
A’an kixtijeb’ naq wi ink’a’ te’xjal xk’auxl, eb’ li xik’ neke’ilok reheb’ te’xmaq’ li rochocheb’ ut lix tenamiteb’, ut li Qaawa’ ink’a’ tixtenq’aheb’ chi pleetik rik’ineb’ li xik’ neke’ilok reheb’.
Laj Nefi kixye naq eb’ laj Nefita nanumta lix maakeb’ chiruheb’ laj Lamanita xb’aan naq k’utb’ileb’ lix taqlahom li Dios chiruheb’ laj Nefita, a’b’an ink’a’ yookeb’ chixpaab’ankileb’.
A’an kixye naq wi eb’ laj Nefita ink’a’ te’xjal xk’a’uxl, te’sache’q.
Junjunq reheb’ laj raqol aatin aj maakeb’ wankeb’ aran. Ke’raj naq li tenamit te’xk’e tojb’a-maak sa’ xb’een laj Nefi xb’aan naq ki’aatinak re xjitb’aleb’ a’an ut lix chaq’rab’eb’.
Wankeb’ li tenamit li ke’wan sa’ aatin rik’ineb’ aj raqol aatin aj maakeb’. Ke’wan ajwi’ li ke’xpaab’ laj Nefi; a’aneb’ ke’xnaw naq a’an jun profeet ut yaal naxye.
Laj Nefi kixye reheb’ li tenemit naq ak ke’xpo’resi xch’ool rik’in li Dios, ut naq chi seeb’ taachalq li tojb’a-maak sa’ xb’eeneb’ wi ink’a’ te’xjal xk’a’uxl.
Laj Nefi kixye reheb’ li tenamit naq te’xik chixsik’b’al li xb’eenil aj raqol aatin. Yokyooq sa’ xkik’el, kamsinb’il xb’aan li riitz’in, li naxsik’ xk’ulb’al xna’aj.
Oob’eb’ li winq reheb’ ke’alinak chirilb’al li xb’eenil aj raqol aatin. Ink’a’ ke’xpaab’ naq laj Nefi a’an jun xprofeet li Dios.
Naq ke’ril laj Seetzoram, li xb’eenil aj raqol aatin, yokyo sa’ xkik’el, ke’t’ane’ chi ch’och’ xb’aan lix xiw. Anajwan ke’xnaw naq laj Nefi a’an jun profeet.
Eb’ lix moos laj Seetzoram ak ke’xtaw naq kamsinb’il ut ke’alinak chixyeeb’al re li tenamit. Naq ke’sutq’i chaq, ke’xtaw li oob’ chi winq li t’anenaqeb’ chi ch’och’ aran.
Eb’ li tenamit ke’xk’oxla naq eb’ li oob’ chi winq ke’kamsink re laj Seetzoram.
Ke’xtz’apeb’ sa’ tz’alam li oob’ chi winq ut chirix a’an ke’xtaqla xjek’inkil jun aatin sa’ li tenamit naq kamsinb’il laj raqol aatin ut naq eb’ li ke’kamsin re wankeb’ sa’ tz’alam.
Wulajaq chik, eb’ li tenamit xkoheb’ sa’ li na’ajej b’ar wi’ taamuqe’q li xb’eenil aj raqol aatin. Eb’ laj raqol aatin li ke’wan sa’ li rawimq laj Nefi ke’xpatz’ b’ar wankeb’ li oob’ chi winq.
Eb’ laj raqol aatin ke’xpatz’ xk’amb’aleb’ chaq li oob’ chi winq li jitb’ileb’ jo’ aj kamsinel.
Eb’ li jitb’ileb’ jo’ aj kamsinel, a’aneb’ li oob’ chi winq li ke’alinak chaq sa’ li rawimq laj Nefi toj rik’in laj raqol aatin.
Eb’ li oob’ chi winq ke’xye naq ke’xtaw li xb’eenil aj raqol aatin, yokyo sa’ xkik’el, jo’ chanru kixye chaq laj Nefi. Toja’ ut naq eb’ laj raqol aatin ke’xjit laj Nefi naq kixtaqla junaq chixkamsinkil laj Seetzoram.
Rik’in naq ak neke’xnaw naq laj Nefi a’an jun profeet, eb’ li oob’ chi winq ke’wech’ok rik’ineb’ laj raqol aatin, a’b’an ink’a’ ke’raj ab’ink. Ke’xtaqla naq taab’ak’e’q laj Nefi.
Eb’ laj raqol aatin ke’xyeechi’i tumin re laj Nefi, ut naq ink’a’ taakamsiiq wi tixye naq xk’uub’ xna’leb’ re xkamsinkil li xb’eenil aj raqol aatin.
Laj Nefi kixye reheb’ laj raqol aatin naq te’xjal xk’a’uxl chirix lix maa’usilaleb’. Toja’ ut naq kixye reheb’ naq te’xik rik’in laj Seantum, li riitz’in laj Seetzoram.
Laj Nefi kixye naq te’xpatz’ re laj Seantum wi a’an ut laj Nefi ke’xk’uub’ xna’leb’ re xkamsinkil laj Seetzoram. Laj Nefi kixye naq laj Seantum tixye reheb’ naq ink’a’.
Toja’ ut naq eb’ laj raqol aatin te’xpatz’ re laj Seantum ma kixkamsi li ras. Laj Seantum tixchaq’b’e wi’chik naq ink’a’, a’b’an eb’ laj raqol aatin te’xtaw li kik’ chiru xmaril lix b’aatal.
Laj Nefi kixye naq laj Seantum taasiksotq, ut taasaqpetz’o’q li rilob’aal, toja’ ut naq tixch’olob’ naq a’an kixkamsi li ras.
Eb’ laj raqol aatin xkoheb’ sa’ rochoch laj Seantum, ut chixjunil kik’ulman jo’ chanru kixye chaq laj Nefi reheb’. Laj Nefi ut li oob’ chi winq ke’ach’ab’aak.
Naq yookeb’ chi xik li tenamit, junjunq reheb’ ke’xye naq laj Nefi a’an profeet; ke’wan jalan chik li ke’yehok re naq a’an jun dios. Laj Nefi xko’o sa’ rochoch, chi toj ra xch’ool chirix lix maa’usilaleb’.