Chʼol 14
Laj Abinadi ut li rey aj Noe
Moko chaab’il rey ta laj Noe, jo’ chanru kiwan chaq lix yuwa’. A’an aj maak ut ink’a’ ki’ab’in chiruheb’ lix taqlahom li Dios.
Kixteneb’ sa’ xb’eeneb’ lix tenamit naq te’xk’e re a’an jun raqal li riyajeb’ nak’uxman, lix ketomq, lix oor, ut lix plaat.
Li rey aj Noe kixb’aanu a’in xb’aan naq a’an aj q’em. Kixteneb’ sa’ xb’eeneb’ laj Nefita chixk’eeb’al re chixjunil li ajb’il ru re xnumsinkil lix kutan.
Kixxaqab’eb’ aj tij aj maak ruuchileb’ li chaab’il aj tij li xaqab’anb’ileb’ chaq xb’aan lix yuwa’. Eb’ aj tij aj maak a’in ke’xtzoleb’ li tenamit re te’maakob’q.
Li rey aj Noe kixk’e chi kab’lamank naab’aleb’ li kab’l chaq’aleb’ ru, jo’ jun nimla reyil ochoch rik’in jun li k’ojarib’aal. Eb’ li kab’l utz’u’ujinb’ileb’ rik’in oor, plaat, ut che’ terto xtz’aq.
Li rey aj Noe kixrahi ru li b’ihomal li kixmaq’ chiruheb’ li tenamit. A’an rochb’eeneb’ laj tij ke’xnumsi lix kutan sa’ ruk’b’al li viin ut sa’ xb’aanunkil li maak.
Li Dios kixtaqla jun profeet sa’ lix tenamit laj Noe, laj Abinadi xk’ab’a’. Laj Abinadi kixtijeb’ naq wi ink’a’ te’xjal xk’a’uxl, te’k’ame’q raj chi moosil xb’aaneb’ laj Lamanita.
Naq li rey aj Noe kirab’i li aatin kixye chaq laj Abinadi, kijosq’o’. Kixtaqlaheb’ winq re naq te’xk’am laj Abinadi sa’ li reyil ochoch re taaruuq tixkamsi.
Kik’ame’ laj Abinadi chiru li rey. Li rey aj Noe ut eb’ laj tij ke’xpatz’ naab’aleb’ li patz’om re. Ke’xyal xsachb’al xna’leb’ re naq taachape’q sa’ raatin.
Laj Abinadi moko kiwan ta xxiw chixsumenkil lix patz’omeb’. Kixnaw naq li Dios tixtenq’a. Eb’ aj tij sachsookeb’ xch’ool chirix li kixchaq’b’e laj Abinadi.
Li rey aj Noe kijosq’o’ ut kixtaqlaheb’ laj tij chixkamsinkil laj Abinadi. Laj Abinadi kixye reheb’ naq wi wi te’xch’e’, li Dios tixkamsiheb’.
Li Santil Musiq’ej kixkol rix laj Abinadi re naq tixchoy xyeeb’al li kiraj li Qaawa’ naq tixye. Li rilob’aal laj Abinadi kilemtz’un ru. Eb’ aj tij ke’xxuwa xch’e’b’al.
Rik’in lix wankilal li Dios, laj Abinadi kiraatinaheb’ chirix lix maa’usilaleb’. Kixyaab’asi reheb’ lix taqlahom li Dios.
Kixye reheb’ naq li Jesukristo taayo’laaq sa’ li ruchich’och’. Li Jesus kixk’e chi ruhank li jalok k’a’uxlej, li wakliik chi yo’yo, ut li wank rik’in li Dios.
Laj Abinadi kixye reheb’ li tenamit naq te’xjal xk’a’uxl ut te’xpaab’ li Jesukristo malaj ut ink’a’ te’kole’q.
Li rey aj Noe ut chixjunileb’ laj tij ink’a’ ke’raj xpaab’ankil li raatin laj Abinadi; yal jun ajwi’ li kixpaab’ li raatin. Laj Noe kixye reheb’ laj tij naq te’xkamsi laj Abinadi. Ke’xb’ak’ ut ke’xtz’ap sa’ tz’alam.
Li jun aj tij li kixpaab’ li raatin laj Abinadi, a’an laj Alma xk’ab’a’. Kixpatz’ re li rey aj Noe naq taarach’ab’ laj Abinadi.
Li rey kijosq’o’ rik’in laj Alma ut kixtaqla risinkil chaq sa’ xyanqeb’. Toja’ naq kixtaqlaheb’ lix moos re te’xkamsi. Laj Alma ki’eelelik chiruheb’ ut kixmuq rib’, jo’kan naq eb’ li moos ink’a’ ke’xtaw.
Chirix xnumsinkil oxib’ kutan sa’ tz’alam, laj Abinadi kik’ame’ wi’chik chiru li rey aj Noe. Li rey kixye re laj Abinadi naq taarisi li aatin kixye chaq chirix a’an ut lix tenamit.
Li rey aj Noe kixye re laj Abinadi naq wi ink’a’ taarisi chixjunil li aatin kixye chaq, taakamsiiq.
Laj Abinadi kixnaw naq kixye chaq li yaal. Kiwan xch’ool chi kamk chiru risinkil li aatin li kitaqlaak wi’ chixyeeb’al xb’aan li Dios.
Li rey aj Noe kixtaqlaheb’ laj tij naq te’xkamsi laj Abinadi. Eb’ a’an ke’xb’ak’, ke’xraple, ut ke’xk’at toj reetal naq kikam. Naq toj maji’ nakam, laj Abinadi kixye re li rey aj Noe naq a’an ajwi’ taakamq rik’in xam.
Junjunq reheb’ laj Nefita ke’xpo’resi xch’ool rik’in li rey aj Noe ut ke’xyal xkamsinkil. Li teep aj pleet reheb’ laj Lamanita ke’chal ajwi’ re xpleetinkil li rey ut eb’ li ke’taaqen re.
Li rey ut eb’ li ke’taaqen re ke’eelelik chiruheb’ laj Lamanita, a’b’an eb’ laj Lamanita ke’xtaweb’ ut ke’ok chixkamsinkileb’. Li rey kixye reheb’ lix moos naq te’xkanab’eb’ lix junkab’al ut te’eeleliq.
Naab’aleb’ li winq ink’a’ ke’raj eelelik. Eb’ a’an ke’chape’ xb’aaneb’ laj Lamanita.
Lix k’ihaleb’ li winq li ke’eelelik rochb’een li rey aj Noe ke’raho’ xch’ool. Ke’raj sutq’iik re xtenq’ankil li rixaqileb’ ut lix kok’aleb’ ut lix tenamiteb’.
Li rey aj Noe ink’a’ kiraj naq eb’ li winq te’sutq’iiq rik’ineb’ lix junkab’al. Kixtaqlaheb’ naq te’kanaaq rik’in a’an.
Eb’ li winq ke’josq’o’ rik’in li rey aj Noe. Ke’xk’at toj reetal nak kikam, jo’ chanru ajwi’ li profeetil aatin kixye chaq laj Abinadi. Toja’ naq ke’sutq’i chaq rik’ineb’ lix junkab’al.