Chʼol 23
Laj Ammon: Jun xnimal ru moos
Laj Ammon xko’o sa’ li ch’och’ Ismael. Naq ki’ok sa’ li tenamit, eb’ laj Lamanita ke’xb’ak’ ut ke’xk’am chiru li rey, laj Lamoni.
Laj Ammon kixye re li rey aj Lamoni naq kiraj kanaak sa’ xyanqeb’ laj Lamanita. Kisaho’ sa’ xch’ool laj Lamoni ut kixtaqlaheb’ lix moos naq te’xhit lix b’ak’leb’ laj Ammon.
Laj Ammon kixye naq a’anaq raj jun reheb’ lix moos li rey. Li rey kixtaqla chixk’aak’alenkileb’ lix ketomq.
Sa’ jun li kutan, naq laj Ammon ut junjunq chik li moos yookeb’ chixtiikisinkileb’ li ketomq sa’ xna’aj li ha’, junjunqeb’ laj Lamanita aj elq’ ke’xjek’iheb’ li ketomq ut ke’xyal relq’ankileb’.
Eb’ li moos li wankeb’ rik’in laj Ammon ke’xuwak. Li rey aj Lamoni ak kixkamsi chaq jalaneb’ chik lix moos xb’aan naq ke’jek’iik chaq lix ketomq xb’aaneb’ laj elq’ a’an.
Laj Ammon kixnaw naq rik’in a’an taaruuq chixk’utb’al lix wankil li Qaawa’ re xk’amb’aleb’ ru xch’ooleb’ laj Lamanita. Toja’ naq te’rab’i li aatin tixk’ut.
Laj Ammon kixye reheb’ li moos naq wi te’xch’utub’eb’ wi’chik li jek’inb’il ketomq, li rey ink’a’ tixkamsiheb’.
Laj Ammon ut xkomoneb’ chik li moos ke’xtaweb’ li ketomq sa’ junpaat ut ke’xb’eresiheb’ wi’chik sa’ xna’aj li ha’.
Ke’sutq’iik wi’chik laj elq’ aj Lamanita. Laj Ammon kixye reheb’ xkomoneb’ chik li moos naq te’xk’aak’ale li ketomq naq a’an tixpleetiheb’ aj elq’.
Eb’ laj elq’ aj Lamanita ink’a’ ke’xxuwa ru laj Ammon. Ke’xk’oxla naq moko ch’a’aj ta xkamsinkil.
Kiwan lix wankil li Dios rik’in laj Ammon. Kixkuteb’ chi pek ut kixkamsi junjunq reheb’, jo’kan naq ke’chal xjosq’il xkomoneb’ chik laj elq’.
Ke’xsik’ xkamsinkil laj Ammon rik’ineb’ lix tenleb’ che’, a’b’an rajlal sut naq jun aj elq’ kixtaqsi lix tenleb’ che’ re xsak’b’al laj Ammon, a’an kixch’ot li ruq’. Ke’xuwak laj elq’, ut ke’eelelik.
Eb’ li moos ke’xk’am chiru li rey aj Lamoni li uq’ej li ke’ch’ote’ chaq ut ke’xye resil li k’a’ru kixb’aanu chaq laj Ammon.
Kisach xch’ool li rey xb’aan xnimal xwankil laj Ammon. A’an kiraj rilb’al laj Ammon, a’b’an kiwan xxiw xb’aan naq kixk’oxla naq laj Ammon a’an li Xnimal ru Musiq’ej.
Naq laj Ammon xko’o chirilb’al, li rey aj Lamoni ink’a’ kixnaw k’a’ raj ru tixye re. Ink’a’ ki’aatinak chiru xnumik jun hoor.
Li Santil Musiq’ej kixk’e chixnaw laj Ammon li k’a’ru yoo chixk’oxlankil li rey. Laj Ammon kixch’olob’ re naq maawa’ a’an li Xnimal ru Musiq’ej. Yal winq a’an.
Li rey kixyeechi’i re laj Ammon chixjunil li k’a’ru taaraj wi tixye k’a’ chi wankilal kiroksi re xq’axb’aleb’ ru laj elq’ ut re xnawb’al lix k’oxlahom li rey.
Laj Ammon kixye naq ka’ajwi’ kiraj naq li rey aj Lamoni tixpaab’ li k’a’ru tixye. Li rey kixye naq tixpaab’ chixjunil li k’a’ru tixye laj Ammon re.
Laj Ammon kixpatz’ re li rey aj Lamoni ma naxpaab’ naq wan jun li Dios. Li rey kixye naq a’an naxpaab’ naq wan jun li Xnimal ru Musiq’ej.
Laj Ammon kixye naq li Xnimal ru Musiq’ej a’an li Dios, naq a’an kiyiib’ank re chixjunil li k’a’aq re ru wan sa’ choxa ut sa’ li ch’och’, ut naq a’an naxnaw chixjunil lix k’oxlahom li winq.
Laj Ammon kixye naq eb’ li winq ke’yo’ob’tesiik jo’ chanru xjalam-uuch li Dios. Kixye ajwi’ naq li Dios kixb’oq chaq chixk’utb’al li evangelio chiru laj Lamoni ut lix tenamit.
Laj Ammon kiroksiheb’ li loq’laj hu re xtzolb’al li rey aj Lamoni chirix li yo’ob’tesink, chirix laj Adan, ut chirix li Jesukristo.
Li rey aj Lamoni kixpaab’ li raatin laj Ammon ut kitijok re naq taakuye’q xmaak. Toja’ naq kit’ane’ chi ch’och’ chanchan naq kamenaq.
Eb’ li moos ke’xk’am li rey rik’in li rixaqil ut ke’xyokob’ chiru jun li ch’aat. Chirix xnumik wiib’ kutan, eb’ li moos ke’xk’oxla naq kamenaq ut ke’xk’e xch’ool chixmuqb’al.
Li rixaqil li rey ink’a’ kixpaab’ naq kamenaq lix b’eelom. Rab’ihom chaq resil li xnimal ru xwankil laj Ammon, ut kixpatz’ re naq tixtenq’a li rey.
Laj Ammon kixnaw naq laj Lamoni wan rub’el lix wankil li Dios. Kixye re li rixaqil li rey aj Lamoni naq sa’ li kutan wulaj taawakliiq wi’chik.
Kikana li rixaqil chixk’atq lix ch’aat laj Lamoni chiru chixjunil li q’ojyin. Wulajaq chik laj Lamoni kiwakli ut kixye naq rilom chaq li Jesukristo. Li rey ut li rixaqil li rey ke’nujak rik’in li Santil Musiq’ej.
Laj Lamoni kixtzoleb’ lix tenamit chirix li Dios ut li Jesukristo. Chixjunileb’ li ke’paab’ank ke’xjal xk’a’uxl chirixeb’ lix maak ut ke’kub’e xha’.