Chʼol 5
Li b’eek chiru li yamyookil ch’och’
Laj Nefi ut eb’ li ras ke’sutq’i aran Jerusalen. Ke’xye re laj Ismael k’a’ru kiraj li Qaawa’ naq tixb’aanu. Laj Ismael kixpaab’ raatineb’, ut a’an ut lix junkab’al ke’xchap xb’e rochb’eeneb’ li ralal laj Lehi.
Naq toj yookeb’ chi b’eek sa’ li yamyookil ch’och’, laj Laman ut laj Lemuel ut junjunq reheb’ lix junkab’al laj Ismael ke’xpo’resi xch’ool. Ke’raj sutq’iik chaq Jerusalen.
Laj Nefi kixjultika reheb’ laj Laman ut laj Lemuel chixjunil li xb’aanuhom chaq li Qaawa’ choq’ reheb’. Kixye reheb’ naq chiwanq xnimal lix paab’aaleb’. Ke’chal xjosq’il rik’in laj Nefi, a’b’anan ink’a’ ke’sutq’i chaq Jerusalen.
Moqon, laj Nefi, eb’ li ras, ut laj Tzoram ke’sumla rik’ineb’ lix rab’in laj Ismael.
Li Qaawa’ kixye re laj Lehi naq tixchap wi’chik xb’e. Wulajaq chik eq’la, laj Lehi kixtaw jun t’ort’ookil ch’iich’ bronce, li Liahona xk’ab’a’, chire lix muheb’aal t’ikr. Li ch’iich’ naxk’ut li b’e tento te’xik wi’ chiru li yamyookil ch’och’.
Lix junkab’al laj Lehi ke’xch’utub’ li tzakemq ut li jar paay chi iyaj ut ke’xk’am lix muheb’aal t’ikr. Ke’b’eek chiru li yamyookil ch’och’ chiru xnumik k’iila kutan, xtaaqenkil li k’utb’il chiruheb’ xb’aan li Liahona.
Naq ke’b’eek, laj Nefi ut eb’ li ras ke’roksi tzimaj ut roq li tzimaj re xyoob’al li tzakemq.
Kitoqe’ lix tzimaj laj Nefi, kawil ch’iich’ okenaq chaq, ut lix tzimajeb’ li ras sachsookeb’ lix metz’ew. Ink’a’ ke’ru chixkamsinkileb’ li xul, jo’kan naq chixjunileb’ wankeb’ xtz’okajik. Laj Laman ut laj Lemuel kinumta xjosq’ileb’.
Laj Nefi kixyiib’ jun li che’il tzimaj ut kixpatz’ re lix yuwa’ toj b’ar taaxik chi yohob’k. Laj Lehi kixk’ul xb’eresinkil chiru li Liahona. Laj Nefi kixtaaqe li k’utb’il chaq sa’ li t’ort’ookil ch’iich’ ut kixtaweb’ junjunq li xul.
Li Liahona kik’anjelak ka’ajwi’ naq lix junkab’al laj Lehi ke’paab’an , ke’xyal xq’e, ut ke’ab’in.
Laj Nefi kisutq’i chaq rik’in li xul li kixtaw chaq. Saheb’ xch’ool chixjunileb’ xb’aan naq ke’wan xtzakemq. Ke’raho’ xch’ool xb’aan lix josq’ileb’, ut ke’b’antioxin chiru li Dios xb’aan li osob’tesihom ke’xk’ul.
Jwal ch’a’aj li b’eek. Chi kok’ aj xsa’ lix junkab’al laj Lehi ke’lub’, ke’tz’okaak, ut ke’chaqik re. Laj Ismael kikam ut ke’raho’ xch’ool lix rab’in. Ke’xwech’i rix laj Lehi.
Ke’wech’in ajwi’ Laj Laman ut laj Lemuel. Ink’a ke’xpaab’ naq li Qaawa’ ki’aatinak rik’in laj Nefi. Ke’raj xkamsinkil laj Lehi ut laj Nefi ut sutq’iik aran Jerusalen.
Lix yaab’ xkux li Qaawa’ kiraatinaheb’ laj Laman ut laj Lemuel. Kixye reheb’ naq me’josq’o’ rik’in laj Lehi ut laj Nefi. Laj Laman ut laj Lemuel ke’xjal xk’a’uxl.
Lix junkab’al laj Lehi ke’xchap wi’chik lix ch’a’ajkil b’e. Li Dios kixtenq’aheb’ ut kixkawob’resiheb’. Ke’yo’la li kok’al. Laj Lehi ut li xSariah ke’wan wiib’ chik li ralal, laj Jakob ut laj Jose xk’ab’a’eb’.
Chirix naq ke’b’eek chiru li yamyookil ch’och’ chiru waqxaqib’ chihab’, lix junkab’al laj Lehi ke’wulak chire li palaw. Aran ke’xtaw li ru che’ ut xya’al kab’. Naab’alil ke’xye re li na’ajej.