Toko 10
Ny fahagagana voalohany tao amin’ny Fiangonana
Aprily 1830
Tamin’ny alahady 11 aprily 1830 ny fivorian’ny Fiangonana manaraka. Ankoatra ireo mpikamban’ny Fiangonana dia maro ireo olona hafa nanatrika ilay fivoriana.
Nampianatra ny filazantsaran’i Jesoa Kristy i Oliver Cowdery. Nino an’i Oliver ny sasany tamin’ireo olona ka naniry ny hiditra ho mpikamban’ny Fiangonana. Natao batisa izy ireo taorian’ilay fivoriana.
Tsy tian’i Satana hiditra ho mpikamban’ny Fiangonana ny olona ka niezaka ny tsy hampahazo aina azy ireo izy. Iray tamin’ireo olona ireo i Newel Knight.
Nangatahin’i Joseph mba hivavaka nandritra ny fivoriana iray i Newel, dia niteny i Newel fa hanao izany.
Tsy tian’i Satana hivavaka i Newel. Rehefa nandeha tany amin’ilay fivoriana i Newel dia nilaza izy fa natahotra ny hanao vavaka amin’ny feo mafy.
Ny ampitso marainan’izay dia nandeha tany an’ ala i Newel Knight mba hanao vavaka samirery. Niezaka nivavaka i Newel, saingy tsy tian’i Satana hanao izany izy, dia tsy afaka niteny izy. Nanjary narary sy natahotra izy, ka nandeha nody.
Natahotra momba azy ny vadin’i Newel ka nangataka an’i Joseph Smith mba hanampy. Nampiasa ny fisoronana i Joseph hitsofan-drano an’i Newel sy handroahana an’i Satana. Nihasalama i Newel rehefa vita ilay tsodrano. Natao batisa izy taty aoriana.