1 Sa simbahan may duha ka pagkapari, ang Pagkapari ni Melquisedec kag Pagkapari ni Aaron nga nagalakip sang Pagkapari nga Levinhon.

2 Kon ngaa ang una gintawag nga Pagkapari ni Melquisedec bangod nga si Melquisedec isa ka dungganon kaayo nga mataas nga pari.

3 Antes sang iya panahon gintawag ini nga Balaan nga Pagkapari suno sa Paagi sang Anak sang Dios.

4 Apang bangod sa pagrespeto ukon pagtahod sa ngalan sang Labing Gamhanan nga Persona, agud likawan ang masami kaayo nga pagsulit-sulit sang iya ngalan, sila, ang simbahan sang una nga panahon naghingalan sinang pagkapari sunod kay Melquisedec ukon ang Pagkapari ni Melquisedec.

5 Ang tanan nga iban pa nga mga awtoridad ukon mga palangakoan sa simbahan mga dugang sa sining pagkapari.

6 Apang may duha ka sahi ukon mayor nga mga bahin—ang isa amo ang Pagkapari ni Melquisedec, kag ang isa naman amo ang Pagkapari ni Aaron ukon Pagkapari nga Levinhon.

7 Ang palangakoan sang elder nalakip sa idalom sang pagkapari ni Melquisedec.

8 Ang Pagkapari ni Melquisedec ang nagakapot sang kinamatarong sang pangulohan, kag may gahum kag awtoridad sa tanan nga palangakoan sa simbahan sa bilog nga katuigan sang kalibutan, sa pagdumala sa mga butang nga espirituhanon.

9 Ang Pangulohan sang Mataas nga Pagkapari, suno sa paagi ni Melquisedec, may kinamatarong sa paghikot sa tanan nga palangakoan sa simbahan.

10 Ang mga mataas nga pari suno sa paagi sang Pagkapari ni Melquisedec may kinamatarong sa paghikot sa ila kaugalingon nga tawag sa idalom sang direksyon sang pangulohan, sa pagdumala sa mga butang nga espirituhanon, kag amo man sa palangakoan sang elder, pari (sang paagi nga Levinhon), manunudlo, deacono, kag miyembro.

11 Ang isa ka elder may kinamatarong sa paghikot bilang bulos sa iya kon wala ang mataas nga pari.

12 Ang mataas nga pari kag elder dapat magdumala sa mga butang nga espirituhanon suno sa mga kasugtanan kag mga kasugoan sang simbahan; kag may kinamatarong sila sa paghikot sa tanan sining palangakoan sang simbahan kon wala sing mas mataas nga mga awtoridad.

13 Ang ika-duha nga pagkapari gintawag nga Pagkapari ni Aaron bangod ginhatag ini kay Aaron kag sa iya kaliwatan sa tanan nila nga henerasyon.

14 Kon ngaa gintawag ini nga mas manubo nga pagkapari bangod nga dugang ini sa mas mataas ukon sa Pagkapari ni Melquisedec, kag may gahum sa paghatag sang panggwa nga mga ordinansa.

15 Ang obispado ang pangulohan sining pagkapari, kag ang nagakapot sang mga yabi ukon awtoridad sini.

16 Wala sang tawo ang may legal nga kinamatarong sa sining palangakoan, sa pagkapot sang mga yabi sining pagkapari luwas nga tunay sia nga kaliwat ni Aaron.

17 Apang, bangod ang isa ka mataas nga pari sang Pagkapari ni Melquisedec may awtoridad sa paghikot sa tanan nga mas manubo nga mga palangakoan, makahikot sia sa palangakoan sang obispo kon wala sing makita nga tunay nga kaliwat ni Aaron, basta gintawag sia kag ginpain kag gin-ordinan sa sining gahum sa idalom sang mga kamot sang Pangulohan sang Pagkapari ni Melquisedec.

18 Ang gahum kag awtoridad sing mas mataas ukon Pagkapari ni Melquisedec amo ang pagkapot sang mga yabi sang tanan nga espirituhanon nga mga bugay sang simbahan—

19 Sa pag-angkon sang pribilihiyo sa pagbaton sang mga misteryo sang ginharian sang langit, sa pagbukas sang kalangitan sa ila, sa pagpakig-angot sa kabilogan nga pagtipon kag simbahan sang Panganay, kag sa pagpangalipay sa pagpakig-upod kag presensya sang Dios nga Amay, kag ni Jesus nga manugpatunga sang bag-o nga kasugtanan.

20 Ang gahum kag awtoridad sing mas manubo ukon Pagkapari ni Aaron amo ang pagkapot sang mga yabi sang pag-alagad sang mga anghel, kag sa paghatag sang panggwa nga mga ordinansa, sang nasulat nga kasugoan, sang bunyag sang paghinulsol para sa kapatawaran sang mga sala suno sa mga kasugtanan kag mga kasugoan.

21 Kinahanglan may mga pangulo ukon nagapangulo nga mga opisyales nga halin sa ukon ginpili halin sa sinang gin-ordinan sa nagkalain-lain nga mga palangakoan sa sining duha ka pagkapari.

22 Halin sa Pagkapari ni Melquisedec, tatlo ka Nagapangulong Mataas nga Pari nga ginpili sang Korum sang Dose ka Apostoles, nga ginpili kag gin-ordinan sa sinang palangakoan, kag ginsakdag paagi sa pagsalig, pagtuo, kag pangamuyo sang simbahan, nagatapo sang korum sang Pangulohan sang Simbahan.

23 Ang dose nga nagabiyahe nga mga miyembro sang konseho ginatawag nga mangin Dose ka Apostoles ukon espesyal nga mga saksi sang ngalan ni Cristo sa bilog nga kalibutan—gani lain sila sa iban nga mga opisyales sa simbahan parte sa mga tulumanon sang ila mga tawag.

24 Kag nagatapo sila sang korum nga pareho sing awtoridad kag gahum sang tatlo ka pangulo nga nasambit.

25 Ang Sitenta ginatawag man sa pagwali sang ebanghelyo, kag mangin espesyal nga mga saksi sa mga Gentil kag sa bilog nga kalibutan—gani lain sila sa iban nga mga opisyales sa simbahan parte sa mga tulumanon sang ila mga tawag.

26 Kag nagatapo sila sang korum nga pareho sing awtoridad sa Dose ka espesyal nga mga saksi ukon mga Apostoles nga nasambit sa ibabaw.

27 Kag ang tagsa ka desisyon nga himuon sing bisan diin sining mga korum kinahanglan paagi sa lubos nga nagaugyon nga tingug sang mga ini; nga ang tagsa ka miyembro sa tagsa ka korum kinahanglan nagatugot sa ila mga desisyon agud mahimo ang ila mga desisyon nga may pareho nga gahum ukon awtoridad sa isa kag isa—

28 Ang mayorya mahimo magtapo sang korum kon ang mga sirkumstansya nagahimo nga imposible para sa tanan nga miyembro sang korum nga magtambong—

29 Magluwas kon amo sini ang sitwasyon, ang ila mga desisyon wala nagakadapat sa pareho nga pagpakamaayo sa desisyon sang korum sang tatlo ka pangulo sang dumaan nga panahon, nga gin-ordinan suno sa paagi ni Melquisedec, kag nangin matarong kag balaan nga mga tawo.

30 Ang mga desisyon sining mga korum ukon bisan diin sini sa ila dapat himuon sa bug-os nga pagkamatarong, sa pagkabalaan, kag pagpaubos sang tagipusuon, pagkalulo kag pagkamainantuson, kag sa pagtuo, kag kaayo, kag ihibalo, pagpugong sang kaugalingon, pagpaumod, pagkadiosnon, mahigugmaon nga paghiliutod kag pagkamaluluy-on;

31 Bangod ang promisa amo nga kon ining mga butang nagabugana sa ila indi sila mangin di-mabungahon sa pagkilala sa Ginuo.

32 Kag kon bisan ano nga desisyon sining mga korum ang ginahimo sa pagkadi-matarong, sarang ini dal-on sa atensyon sang pangkabilogan nga pagtipon sang nagkalain-lain nga mga korum nga nagatapo sang espirituhanon nga mga awtoridad sang simbahan; indi gani indi maapela ang ila desisyon.

33 Ang Dose ang Nagabiyahe nga Nagapangulong Mataas nga Konseho nga magahikot sa ngalan sang Ginuo sa idalom sang direksyon sang Pangulohan sang Simbahan, suno sa institusyon sang langit; nga magapauswag sang simbahan, kag magadumala sang tanan nga butang nga may kahilabtanan sini sa tanan nga nasyon, una sa mga Gentil kag ika-duha sa mga Judio.

34 Ang Sitenta dapat maghikot sa ngalan sang Ginuo sa idalom sang direksyon sang Dose ukon sang nagabiyahe nga mataas nga konseho sa pagpauswag sang simbahan kag sa pagdumala sang tanan nga butang nga may kahilabtanan sini sa tanan nga nasyon, una sa mga Gentil kag dayon sa mga Judio—

35 Kag ang Dose ginapadala nga nagakapot sang mga yabi sa pagbukas sang puwertahan paagi sa pagbantala sang ebanghelyo ni Jesucristo, kag una sa mga Gentil kag dayon sa mga Judio.

36 Ang lokal nga mataas nga mga konseho sa mga estaka sang Sion nagatapo sang korum nga pareho sing awtoridad sa korum sang pangulohan ukon sa nagabiyahe nga mataas nga konseho tuhoy sa tanan nila nga desisyon sa mga butang nga may kahilabtanan sa simbahan.

37 Ang mataas nga konseho sa Sion nagatapo sang korum nga pareho sing awtoridad sa mga konseho sang Dose sa mga estaka sang Sion tuhoy sa tanan nila nga desisyon sa mga butang nga may kahilabtanan sa simbahan.

38 Responsibilidad sang nagabiyahe nga mataas nga konseho nga magtawag sa Sitenta kon kinahanglan nila sang bulig agud maghikot sa nagkalain-lain nga mga tawag para sa pagwali kag paghatag sang ebanghelyo imbes sang iban pa.

39 Responsibilidad sang Dose sa tanan nga dalagko nga mga sanga sang simbahan nga mag-ordin sang mga evangelista kon ipahayag sa Dose kon sin-o sila paagi sa rebelasyon—

40 Ang paagi sining pagkapari ginpahamtang nga ipasa halin sa amay pakadto sa anak, kag kinamatarong ini sang tunay nga mga kaliwat sang pinili nga kaliwatan kon kay sin-o ginhimo ang mga promisa.

41 Ini nga paagi ginpahamtang sang panahon ni Adan, kag ginpasa paagi sa linahe sa masunod nga paagi:

42 Halin kay Adan pakadto kay Set nga gin-ordinan ni Adan sa edad nga sisenta’y-nuebe anyos, kag ginpakamaayo niya tatlo ka tuig antes sia (si Adan) napatay, kag nagbaton sang promisa sang Dios paagi sa iya amay nga ang iya kaliwat ang mangin pinili sang Ginuo, kag pagaamligan sila tubtob sa katapusan sang duta;

43 Bangod perpekto sia (si Set) nga tawo, kag ang iya dagway kaanggid gid sang dagway sang iya amay sa bagay nga daw pareho sia sa iya amay sa tanan nga butang, kag makilal-an ang kinalain sa iya paagi lamang sa iya edad.

44 Gin-ordinan si Enos sa edad nga isa ka gatos kag treinta’y-kwatro anyos kag apat ka bulan paagi sa kamot ni Adan.

45 Ang Dios nagpanawag kay Cainan sa kamingawan sang nagaedad sia kwarenta anyos; kag gintabo niya si Adan sa iya pagpanglakaton padulong sa lugar nga Sedolamak. Nagaedad sia ochenta’y-siyete anyos sang nabaton niya ang iya ordinasyon.

46 Si Mahalalel nagaedad apat ka gatos kag nobenta’y-sais anyos kag pito ka adlaw sang gin-ordinan sia paagi sa kamot ni Adan nga nagpakamaayo man sa iya.

47 Si Jared duha ka gatos katuig ang edad sang gin-ordinan sia paagi sa kamot ni Adan nga nagpakamaayo man sa iya.

48 Si Enoc beynte-singko anyos sang gin-ordinan sia paagi sa kamot ni Adan; kag sisenta’y-singko sia kag ginpakamaayo ni Adan.

49 Kag nakita niya ang Ginuo, kag naglakat sia upod sa iya, kag yara pirme sa iya atubang; kag naglakat sia upod sa Dios tatlo ka gatos kag sisenta’y-singko ka tuig nga kon sayuron apat ka gatos kag treinta anyos sia sang ginbag-o ang iya dagway.

50 Si Metusela isa ka gatos katuig ang edad sang gin-ordinan sia paagi sa kamot ni Adan.

51 Si Lamec treinta’y-dos anyos sang gin-ordinan sia paagi sa kamot ni Set.

52 Si Noe napulo ka tuig ang pangidaron sang gin-ordinan sia paagi sa kamot ni Metusela.

53 Tatlo ka tuig antes napatay si Adan, gintawag niya sanday Set, Enos, Cainan, Mahalalel, Jared, Enoc, kag Metusela nga mga mataas nga pari tanan upod ang nabilin sang iya kaliwat nga matarong sa kapatagan sang Adan-ondi-Aman, kag didto ginhatag sa ila ang iya katapusan nga pagpakamaayo.

54 Kag ang Ginuo nagpakita sa ila, kag nagtindog sila kag ginpasidunggan si Adan, kag gintawag sia nga Miguel, ang prinsipe, ang arkanghel.

55 Kag ang Ginuo naghatag sang kasulhay kay Adan, kag nagsiling sa iya: Ginpahamtang ko ikaw sa ulohan; madamo nga nasyon magahalin sa imo, kag prinsipe ikaw sa ila tubtob sa wala’y katapusan.

56 Kag nagtindog si Adan sa tunga sang kongregasyon; kag bisan pa nagasiyoktot sia sa katigulangon bangod puno sia sang Balaan nga Espiritu, nagtagna sia kon ano ang magkalatabo sa iya kaliwat tubtob sa pinakaulihi nga henerasyon.

57 Ining mga butang nasulat tanan sa libro ni Enoc, kag pagapamatud-an sa husto nga tion.

58 Tulumanon man sang Dose nga mag-ordin kag magpahamtang sa kahusay sang tanan nga iban pa nga mga opisyales sang simbahan suno sa rebelasyon nga nagasiling:

59 Parte sa simbahan ni Cristo sa duta sang Sion, dugang sa mga layi sang simbahan parte sa opisyal nga mga buluhaton sa simbahan—

60 Sa pagkamatuod, ginasiling ko sa inyo, siling sang Ginuo sang mga Kasoldadohan, kinahanglanon sang nagapangulo nga mga elder nga magpanguna sa sinang mga nagakapot sang palangakoan sang elder;

61 Kag mga pari man nga magpangulo sa sinang mga nagakapot sang palangakoan sang pari;

62 Kag mga manunudlo man nga magpangulo sa sinang mga nagakapot sang palangakoan sang manunudlo, sa amo man nga paagi, kag amo man ang mga deacono—

63 Gani, halin sa deacono tubtob sa manunudlo, kag halin sa manunudlo tubtob sa pari, kag halin sa pari tubtob sa elder, sing tinag-isaisa sa pareho nga paagi sa pagpili sa ila, suno sa mga kasugtanan kag mga kasugoan sang simbahan.

64 Dayon magasunod ang Mataas nga Pagkapari nga amo ang labing importante sa tanan.

65 Gani, kinahanglanon nga may isa nga pilion halin sa Mataas nga Pagkapari nga magpangulo sa pagkapari, kag dapat tawgon sia nga Pangulo sang Mataas nga Pagkapari sang Simbahan;

66 Ukon, sa iban nga pulong, ang Nagapangulong Mataas nga Pari sa Mataas nga Pagkapari sang Simbahan.

67 Nga halin sa amo man matigayon ang paghatag sang mga ordinansa kag mga pagpakamaayo sa simbahan paagi sa pagtakdong sang mga kamot.

68 Gani, ang palangakoan sang obispo indi pareho sa sini; kay ang palangakoan sang obispo para pagdumala sang tanan nga butang nga dutan-on;

69 Apang, ang bishop kinahanglan pilion halin sa Mataas nga Pagkapari luwas lang kon tunay sia nga kaliwat ni Aaron.

70 Kay luwas lang kon tunay sia nga kaliwat ni Aaron indi sia mahimo magkapot sang mga yabi sang sinang pagkapari.

71 Apang, ang isa ka mataas nga pari nga suno sa paagi ni Melquisedec mahimo painon nga magdumala sang mga butang nga dutan-on nga may ihibalo sang mga ini paagi sa Espiritu sang kamatuoran;

72 Kag agud man mangin hukom sa Israel, maghimo sang buluhaton sang simbahan, magpungko sa paghukom sang mga nakasala base sa testimonya nga ipresentar sa iya suno sa mga layi, sa bulig sang iya mga manuglaygay nga iya ginpili ukon pagapilion sa mga elder sang simbahan.

73 Ini ang tulumanon sang bishop nga indi tunay nga kaliwat ni Aaron apang naordinan sa Mataas nga Pagkapari suno sa paagi ni Melquisedec.

74 Gani mangin hukom sia, bisan pa pangkabilogan nga hukom sa mga pumuluyo sang Sion ukon sa estaka sang Sion, ukon sa bisan ano nga sanga sang simbahan kon diin sia pagapainon sa sining pag-alagad tubtob nga ang mga dulonan sang Sion mapasangkad kag magakinahanglan nga may iban pa nga obispo ukon mga hukom sa Sion ukon sa iban nga lugar.

75 Kag kon may pilion nga iban pa nga mga obispo magahikot sila sa amo man nga palangakoan.

76 Apang ang tunay nga kaliwat ni Aaron may legal nga kinamatarong sa pangulohan sining pagkapari, sa mga yabi sining pag-alagad, sa paghikot sa palangakoan sang obispo nga wala sang mga manuglaygay magluwas lang kon ang Pangulo sang Mataas nga Pagkapari suno sa paagi ni Melquisedec makasohan, sa pagpungko bilang hukom sa Israel.

77 Kag ang desisyon sing bisan diin sining mga konseho mangin suno sa kasugoan nga nagasiling:

78 Sa liwat, sa pagkamatuod, ginasiling ko sa inyo, ang pinakaimportante nga buluhaton sang simbahan, kag ang pinakamabudlay nga mga kaso sang simbahan, kon may yara sang indi komporme sa desisyon sang obispo ukon mga hukom, ihatag ini kag ipasaka sa konseho sang simbahan sa presensya sang Pangulohan sang Mataas nga Pagkapari.

79 Kag ang Pangulohan sang konseho sang Mataas nga Pagkapari magaangkon sang gahum sa pagtawag sing iban pa nga mga mataas nga pari bisan pa dose, nga magbulig bilang mga manuglaygay; kag gani ang Pangulohan sang Mataas nga Pagkapari kag ang iya sini mga manuglaygay magaangkon sang gahum sa paghimo sang desisyon base sa testimonya suno sa mga layi sang simbahan.

80 Kag pagkatapos sining desisyon indi na ini dapat pag-ipahanumdum pa sa Ginuo; kay ini ang pinakamataas nga konseho sang simbahan sang Dios, kag ang magapangibabaw nga desisyon parte sa mga pagbinaisay sa mga butang nga espirituhanon.

81 Wala sing bisan sin-o nga tawo nga miyembro sang simbahan nga makalikaw sa sining konseho sang simbahan.

82 Kag kon ang Pangulo sang Mataas nga Pagkapari makasala, pagahukman sia sang pangkabilogan nga konseho sang simbahan nga dapat buligan sang dose ka manuglaygay sang Mataas nga Pagkapari;

83 Kag ang ila desisyon sa iya ulo dapat magtapos sang tanan nga pagbinaisay parte sa iya.

84 Gani, wala sang makalikaw sa hustisya kag mga layi sang Dios agud nga ang tanan nga butang mahimo sa husto nga paagi kag sing sinsero sa iya panulok suno sa kamatuoran kag pagkamatarong.

85 Kag sa liwat, sa pagkamatuod ginasiling ko sa inyo, ang tulumanon sang pangulo sa palangakoan sang deacono amo ang magpangulo sa dose ka diacono, nga magpungko sa konseho upod sa ila, kag magtudlo sa ila sang ila tulumanon nga ginapalig-on sing espirituhanon ang isa kag isa, suno sa ginpahayag nga nagakasanto sa mga kasugtanan.

86 Kag sa amo man ang tulumanon sang pangulo sa palangakoan sang mga manunudlo amo ang magpangulo sa beynte-kwatro ka manunudlo, kag magpungko sa konseho upod sa ila, kag magtudlo sa ila sang mga tulumanon sang ila palangakoan, nga ginpahayag suno sa mga kasugtanan.

87 Kag ang tulumanon sang pangulo sa Pagkapari ni Aaron amo ang magpangulo sa kwarenta’y-otso ka pari, kag magpungko sa konseho upod sa ila, kag magtudlo sa ila sang mga tulumanon sang ila palangakoan, nga ginpahayag suno sa mga kasugtanan—

88 Ini nga pangulo dapat obispo; kay isa ini sang mga tulumanon sining pagkapari.

89 Sa liwat, ang tulumanon sang pangulo sa palangakoan sang mga elder amo ang magpangulo sa nobenta’y-sais ka elder, kag magpungko sa konseho upod sa ila, kag magtudlo sa ila suno sa mga kasugtanan.

90 Ini nga pangulohan lain sa sina sang sitenta, kag ginplano para sa sinang wala nagabiyahe sa bilog nga kalibutan.

91 Kag sa liwat, ang tulumanon sang Pangulo sang palangakoan sang Mataas nga Pagkapari amo ang magpangulo sa bilog nga simbahan, kag mangin pareho kay Moises—

92 Tan-awa, yari ang kaalam; huo, ang mangin manugpanan-aw, manugpahayag sang rebelasyon, taglubad, kag propeta nga may tanan nga dulot sang Dios nga iya ginhatag sa ulo sang simbahan.

93 Kag suno ini sa panan-awan nga nagapakita sang pag-organisar sang Sitenta nga dapat may yara sila sing pito ka pangulo nga magpangulo sa ila, nga napili halin sa grupo sang sitenta;

94 Kag ang ika-pito nga pangulo sining mga pangulo dapat magpangulo sa anum;

95 Kag ining pito ka pangulo dapat magpili sing dugang nga sitenta wala’y labot sang una nga sitenta sa diin sila nalakip, kag dapat pangulohan sila;

96 Kag amo man nga dapat magpili sila sing dugang nga sitenta tubtob sa pito ka pilo sang sitenta kon ginakinahanglan sa pagpangabudlay sa ulubasan.

97 Kag ining sitenta dapat mangin nagabiyahe nga mga alagad una sa mga Gentil kag amo man sa mga Judio.

98 Apang ang iban nga mga opisyales sang simbahan nga wala nalakip sa Dose, ukon sa Sitenta wala sang responsibilidad nga magbiyahe sa tanan nga nasyon kundi dapat magbiyahe suno sa itugot sang ila mga sirkumstansya bisan pa nga nagakapot sila sing pareho kataas kag kagamhanan nga mga palangakoan sa simbahan.

99 Gani, karon patun-a ang tagsa ka tawo sang iya tulumanon, kag pahikota sa palangakoan sa diin sia ginpili sa bug-os nga katutum.

100 Sia nga matamad indi makabig nga nagakaangay nga magtindog sa atubang sang Dios, kag sia nga wala nagatuon sang iya tulumanon kag nagapakita sang iya kaugalingon nga indi bagay sa kahamuot sang Ginuo indi makabig nga nagakaangay nga magtindog sa atubang sang Dios. Kag gani amo sini. Amen.