Seksyon 96
Rebelasyon nga ginhatag kay Joseph Smith nga Propeta nga nagapakita sang pagpahamtang sang siyudad ukon estaka sang Sion sa Kirtland, Ohio sang ika-4 sang Hunyo 1833, bilang sulundan sang mga Santos sa Kirtland. Nabaton ini sa tion sing isa ka komperensya sang mga mataas nga pari, kag ang mayor nga topiko nga ginhambalan amo ang pagpanagtag sing pila ka mga duta nga kilala bilang uma nga ginapanag-iyahan sadto anay ni Pete French ukon French farm nga iya na karon sang Simbahan malapit sa Kirtland. Bangod indi maghisugot sa komperensya kon sin-o ang magadumala sang uma, nag-ugyon ang tanan nga magpamangkot sa Ginuo parte sining butang.
1, Ang Estaka sang Sion sa Kirtland dapat pabakuron; 2–5, Ang obispo dapat magpanagtag sang mga panublion para sa mga Santos; 6–9, Si John Johnson dapat mangin miyembro sang united order.
1 Tan-awa, ginasiling ko sa inyo, yari ang kaalam sa diin mahibaloan ninyo kon ano ang himuon parte sining butang kay nagakaigo para sa akon nga ining estaka nga ginpahamtang ko para sa kusog sang Sion dapat pabakuron.
2 Karon, ipadumala sa akon alagad nga si Newel K. Whitney ang lugar nga ginsambit ninyo sa diin ginaplano ko nga ipatukod ang akon balaan nga balay.
3 Kag sa liwat, ipatunga ini sa mga lote para sa kaayohan sang mga nagatinguha sa pag-angkon sang mga panublion suno sa kaalam ninyo nga magahinambalanay sa konseho sa pagdesisyon parte sini.
4 Karon, siguroha nga atubangon ninyo ining butang, kag inang bahin nga kinahanglanon para sa kaayohan sang akon order, para sa katuyoan sang pagpahayag sang akon pulong sa mga anak sang katawhan.
5 Kay tan-awa, sa pagkamatuod ginasiling ko sa inyo, ini ang labing nagakaigo para sa akon, nga ipahayag ang akon pulong sa mga anak sang katawhan para sa katuyoan nga mapahumok ang mga tagipusuon sang mga anak sang katawhan para sa inyo kaayohan. Kag gani amo sini. Amen.
6 Kag sa liwat, sa pagkamatuod ginasiling ko sa inyo, kaalam kag nagakaigo para sa akon nga ang akon alagad nga si John Johnson nga ang iya halad ginbaton ko, kag ang iya mga pangamuyo ginpamatian ko, nga sa iya ginahatag ko ang promisa sang kabuhi nga wala’y katapusan kon tumanon niya ang akon mga kasugoan sugod subong—
7 Kay kaliwat sia ni Jose kag umalambit sang mga bugay sang promisa nga ginhimo sa iya mga amay—
8 Sa pagkamatuod ginasiling ko sa inyo, nagakaigo para sa akon nga mangin miyembro sia sang united order agud makabulig sia sa pagpahayag sang akon pulong sa mga anak sang katawhan.
9 Gani, ordinan ninyo sia sa sining pagpakamaayo, kag tinguhaan niya sing matutum nga dulaon ang kautangan nga yara sa balay nga ginsambit ninyo agud makapuyo sia diri. Kag gani amo sini. Amen.