Seksyon 54
Rebelasyon nga ginhatag paagi kay Joseph Smith nga Propeta kay Newel Knight sa Kirtland, Ohio sang ika-10 sang Hunyo 1831. Ang mga miyembro sang Simbahan nga nagapuyo sa Thompson, Ohio indi mag-ugyonay parte sa mga pamangkot nga angot sa pagkonsagrar sang mga pagkabutang. Nangin maathag ang ila pagkamaiyaiyahon kag pagkadalok. Pagkatapos sang iya misyon sa mga Shakers (tan-awa sa introduksyon sang seksyon 49), ginguba ni Leman Copley ang iya kasugtanan nga ikonsagrar ang iya malapad nga uma bilang lugar nga panublion sang mga Santos nga nagaabot halin sa Colesville, New York. Bangod sini, nagpalapit si Newel Knight (lider sang mga miyembro nga nagapuyo sa Thompson) kag iban pa nga mga elder sa Propeta nga nagapamangkot kon ano ang himuon. Nagpamangkot ang Propeta sa Ginuo kag nakabaton sining rebelasyon nga nagasugo sa mga miyembro sa Thompson nga bayaan ang uma ni Leman Copley kag maglakat sa Missouri.
1–6, Ang mga Santos kinahanglan magtuman sang kasugtanan sang ebanghelyo agud makaangkon sang kaluoy; 7–10, Kinahanglan sila magpadayon sa pihak sang mga pag-antos.
1 Tan-awa, ini ang siling sang Ginuo, ang Alfa kag ang Omega, ang ginsuguran kag ang katapusan, sia nga ginlansang para sa mga sala sang kalibutan—
2 Tan-awa, sa pagkamatuod, sa pagkamatuod, ginasiling ko sa imo Newel Knight, alagad ko, dapat mangin matutum ka sa palangakoan nga akon ginhatag sa imo.
3 Kag kon luyag sang imo mga kauturan nga makapalagyo sa ila mga kaaway, pahinulsola sila sang tanan nila nga sala, kag mangin matuod-tuod nga mapainubuson kag mahinulsulon sa akon atubang.
4 Kag bangod ginguba ang kasugtanan nga ginhimo nila sa akon, gani nangin wala ini sing pulos kag wala sing epekto.
5 Kag kalisud sa iya nga naghimo sining sala kay mas maayo pa kuntani para sa iya nga nalumos sia sa kadalumon sang dagat.
6 Apang bulahan sila nga nagtuman sang kasugtanan kag sang kasugoan kay makaangkon sila sang kaluoy.
7 Karon, maglakat na kag magpalagyo sa sining duta agud nga indi kamo pag-atakihon sang inyo mga kaaway; kag maglakat, kag magpili sang luyag ninyo nga mangin inyo lider, kag magbayad para sa inyo.
8 Kag gani maglakat kamo sa mga rehiyon pa-weste, pakadto sa duta sang Missouri, pakadto sa mga dulonan sang duta sang mga Lamanhon.
9 Kag pagkatapos sang inyo pagpanglakaton, tan-awa, ginasiling ko sa inyo, magpangita kamo sang palangabuhian pareho sang kinaandan sa mga tawo tubtob nga mahanda ko ang isa ka lugar para sa inyo.
10 Kag sa liwat, magpadayon sa pihak sang mga pag-antos tubtob nga magkari ako; kag tan-awa, magakari ako sing madasig, kag magadala ako sang padya, kag sila nga una nagpangita sa akon makasalapo sang kapahuwayan sa ila mga kalag. Kag gani amo sini. Amen.