Seksyon 48
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-10 sang Marso 1831. Ang Propeta nagpamangkot sa Ginuo parte sa pamaagi sa pag-angkon sang mga duta para sa puluy-an sang mga Santos. Isa ini ka importante nga butang bangod sang pagsaylo sang mga miyembro sang Simbahan halin sa este nga mga bahin sang Estados Unidos agud tumanon ang sugo sang Ginuo nga magtipon sila sa Ohio (tan-awa sa mga seksyon 37:1–3; 45:64).
1–3, Ang mga Santos sa Ohio dapat magpakigbahin sang ila mga duta sa ila mga kauturan sa Simbahan; 4–6, Ang mga Santos dapat magbakal sang mga duta, magtukod sang siyudad, kag magsunod sang laygay sang ila nagapangulo nga mga opisyales.
1 Kinahanglanon nga magpabilin kamo sa sini nga tion sa inyo mga ginapuy-an suno sa nagakaigo sa inyo mga sirkumstansya.
2 Kag kon may yara kamo sang mga duta, dapat kamo magpakigbahin sini sa mga kauturan sa Simbahan nga halin sa este;
3 Kag kon wala kamo sang mga duta, pabakla sila sa sini nga tion sa sinang mga rehiyon sa palibot suno sa nagakaigo para sa ila kay kinahanglanon nga may yara sila sang mga lugar nga puy-an sa sini nga tion.
4 Kinahanglanon gid nga supton ninyo ang tanan nga kwarta nga sarang ninyo masupot, nga maangkon ninyo ang tanan nga sarang ninyo maangkon sa pagkamatarong, agud nga sa pag-abot sang panahon makasarang kamo sa pagbakal sang duta bilang panublion bisan pa ang siyudad.
5 Ang lugar indi pa pag-ipahibalo subong; apang pagkatapos nga ang inyo mga kauturan sa Simbahan mag-abot halin sa este may yara dapat sing pila ka mga lalaki nga pilion, kag ihatag sa ila nga mahibaloan ang lugar ukon ipahibalo ini sa ila.
6 Kag pilion sila nga magbakal sang mga duta, kag sugdan ang pagpasad sang siyudad; kag dayon magasugod kamo sa pagtipon upod ang inyo mga panimalay, ang tagsa ka tawo suno sa iya panimalay, suno sa iya mga sirkumstansya, kag ginahatag sa iya sang pangulohan kag sang obispo sang simbahan suno sa mga layi kag mga kasugoan nga inyo nabaton, kag mabaton pagkatapos sini. Kag gani amo sini. Amen.