Seksyon 34
Rebelasyon nga ginhatag paagi kay Joseph Smith nga Propeta kay Orson Pratt sa Fayette, New York sang ika-4 sang Nobyembre 1830. Si Brother Pratt nagaedad sing disenuebe anyos sadto nga tion. Nahaylo kag nabunyagan sia sang una pa lang niya nga nabatian ang ginpanumbalik nga ebanghelyo nga ginawali sang iya magulang nga lalaki nga si Parley P. Pratt, anum ka semana antes nabaton ining rebelasyon. Nabaton ang ini nga rebelasyon sa balay ni Peter Whitmer Sr.
1–4, Ang mga tampad mangin mga anak sang Dios paagi sa Pagbayad-Sala; 5–9, Ang pagwali sang ebanghelyo nagahanda sang alagyan para sa Ika-duha nga Pagkari; 10–12, Ang propesiya nagaabot paagi sa gahum sang Balaan nga Espiritu.
1 Orson, anak ko, dungga kag pamatii kag tan-awa kon ano ang ihambal nakon sa imo; ako, nga Ginuong Dios, nga si Jesucristo nga imo Manunubos;
2 Ang kasanag kag ang kabuhi sang kalibutan; kasanag nga nagasilak sa kadulom kag ang kadulom indi makahangop sini;
3 Nga naghigugma gid sang kalibutan sa bagay nga ginhatag niya ang iya kaugalingon nga kabuhi agud nga ang tanan nga magpati sa iya mangin mga anak sang Dios. Gani, ikaw akon anak;
4 Kag bulahan ka bangod nagtuo ka;
5 Kag mas bulahan ka pa gid bangod gintawag ka nakon sa pagwali sang akon ebanghelyo—
6 Sa pagbayaw sang imo tingug pareho sa tunog sang trumpeta nga malawig kag mabaskog, kag sa pagwali sang paghinulsol sa makasasala kag batinggilan nga henerasyon, agud ihanda ang alagyan sang Ginuo para sa iya ika-duha nga pagkari.
7 Kay tan-awa, sa pagkamatuod, sa pagkamatuod, ginasiling ko sa imo, ang tion malapit na nga magakari ako sa panganod upod sang gahum kag dako nga himaya.
8 Kag mangin isa ka dako nga adlaw ang tion sang akon pagkari, kay magakurog sa kahadlok ang tanan nga nasyon.
9 Apang antes inang dako nga adlaw mag-abot, ang adlaw magabaylo sa kadulom, kag ang bulan sa dugo; kag ang mga bituon magadumili sang ila pagsilak, kag may pila nga magakalataktak, kag dalagko nga mga kalaglagan ang matabo sa mga malain.
10 Karon, ibayaw ang imo tingug kag indi magpugong sa paghambal kay ang Ginuong Dios naghambal; gani, magpropesiya kag ihatag ini paagi sa gahum sang Balaan nga Espiritu.
11 Kag kon tampad ka, tan-awa, kaupod mo ako tubtob nga magkari ako—
12 Kay sa pagkamatuod, sa pagkamatuod, ginasiling ko sa imo, magakari ako sing madasig. Ako ang imo Ginuo kag imo Manunubos. Kag gani amo sini. Amen.