Seksyon 24
Rebelasyon nga ginhatag kanday Joseph Smith nga Propeta kag Oliver Cowdery, sa Harmony, Pennsylvania, sang Hulyo 1830. Bisan nga wala pa apat ka bulan ang nagligad humalin sa pag-organisar sang Simbahan, nangin mabaskog ang pagpanghingabot, kag ang mga lideres nagkinahanglan kon kaisa nga magpalayo sa mga tawo agud mangin luwas. Ang masunod nga tatlo ka rebelasyon ginhatag sa sini nga tion sa pagpabakod, paglaygay, kag pagtudlo sa ila.
1–9, Si Joseph Smith gintawag sa paglubad, pagwali, kag pagpaathag sang balaan nga mga kasulatan; 10–12, Si Oliver Cowdery gintawag sa pagwali sang ebanghelyo; 13–19, Ang layi ginpahayag parte sa mga milagro, mga sumpa, pagtaktak sang yab-ok sa mga tiil, kag paglakat nga wala sang pitaka ukon balalonan.
1 Tan-awa, gintawag ka kag ginpili sa pagsulat sang Libro ni Mormon, kag sa pag-alagad para sa akon; kag ginluwas ko ikaw halin sa imo mga pag-antos, kag ginsugo ka gani naluwas ka halin sa tanan mo nga kaaway, kag naluwas ka halin sa mga gahum ni Satanas kag halin sa kadulom!
2 Apang, indi ko mapalampasan ang imo mga paglapas; apang, maglakat kag sugod subong indi na magpakasala.
3 Tumana sing maayo ang imo palangakoan; kag pagkatapos nga matamnan mo ang imo kaumahan kag amligan ang mga ini, magkadto sing gilayon sa simbahan nga yara sa Colesville, Fayette, kag Manchester, kag sapopohon ka sang mga ini; kag pakamaayohon ko sila sing espirituhanon kag dutan-on;
4 Apang kon indi ka nila pagbatonon, mapadala ako sa ila sang sumpa imbes sang pagpakamaayo.
5 Kag padayona ang pagtawag sa Dios sa akon ngalan, kag pagsulat sang mga butang nga ihatag sa imo sang Manugpasulhay, kag pagpaathag sang tanan nga balaan nga mga kasulatan sa mga miyembro sang simbahan.
6 Kag ihatag sa imo sa mismo nga tion kon ano ang imo ipahayag kag isulat, kag dapat pamatian nila ini, ukon indi gani mapadala ako sa ila sang sumpa imbes sang pagpakamaayo.
7 Kay dapat ihatag mo ang lubos mo nga pag-alagad sa Sion; kag sa sini magaangkon ka sang kusog.
8 Magpadayon sa pihak sang mga pag-antos, kay makaangkon ka sing madamo sini; apang batasa ang mga ini, kay, yari karon, ako kaupod mo sa gihapon, bisan pa tubtob sa katapusan sang imo nga mga adlaw.
9 Kag indi ka makaangkon sang kusog sa dutan-on nga mga pagpangabudlay kay indi ini ang imo tawag sa pag-alagad. Hikota ang imo tawag kag maangkon mo ang imo kinahanglanon sa pagtuman sing maayo sang imo palangakoan, kag sa pagpaathag sang tanan nga balaan nga mga kasulatan, kag padayona ang pagtakdong sang mga kamot kag pagkompirma sang mga miyembro sang simbahan.
10 Kag ang imo utod (sa simbahan) nga si Oliver dapat magpadayon sa pagdala sang akon ngalan sa kalibutan, kag amo man sa simbahan. Kag dapat ipahayag niya ang tanan nga iya masarangan bilang pagsuporta sang akon buluhaton; kag yari karon, ako kaupod niya sa gihapon tubtob sa katapusan.
11 Paagi sa akon magaangkon sia sang himaya, kag indi paagi sa iya kaugalingon, sa kaluya man ukon sa kabakod, sa pagkaulipon man ukon kahilwayan;
12 Kag sa tanan nga tion, kag sa tanan nga lugar, pagabuksan niya ang iya baba kag ipahayag ang akon ebanghelyo pareho sa tingug sang trumpeta, sa adlaw kag gab-i. Kag hatagan ko sia sang kusog nga wala mahibaloi sang katawhan.
13 Indi magpangayo sang mga milagro luwas kon suguon ko kamo, luwas sa pagpanabug sang mga yawa, pag-ayo sang mga nagamasakit, kag batok sa dalitan nga mga man-og, kag batok sa makamamatay nga mga hilo;
14 Kag ining mga butang indi ninyo paghimuon, luwas kon pangayuon ini sa inyo sang mga maluyag sini agud nga matuman ang balaan nga mga kasulatan; kay himuon ninyo ang suno sa sinang nasulat.
15 Kag kon sa diin man nga lugar kamo magsulod, kag indi nila kamo pagbatonon sa akon ngalan, magbilin kamo sang sumpa imbes sang pagpakamaayo paagi sa pagtaktak sang yab-ok sa inyo mga tiil batok sa ila bilang testimonya, kag pagtinlo sang inyo mga tiil sa inyo alagyan.
16 Kag matabo ini nga kon sin-o man nga magpadapat sang ila mga kamot sa inyo paagi sa pagpanakit, magasugo kamo nga sakiton sila sa akon ngalan; kag, tan-awa, sakiton ko sila suno sa inyo mga pulong, sa akon kaugalingon nga natalana nga tion.
17 Kag kon sin-o man ang magkaso sa imo pagahukman sang layi.
18 Kag indi ka magdala sang pitaka ukon balalonan, ukon mga sungkod, ukon duha ka kunop, kay ang simbahan magahatag sa imo sa eksakto nga oras sang imo kinahanglanon nga mga pagkaon kag mga biste, kag mga sapatos kag kwarta, kag balalonan.
19 Kay gintawag ka sa pagpanapas sang akon ulubasan sa lapnagon nga pagpanapas, huo, bisan pa sa katapusan nga tion; huo, kag amo man ang tanan nga imo gin-ordinan, kag himuon nila ini bisan pa suno sa sining sulundan. Amen.