Seksyon 39
Rebelasyon nga ginhatag paagi kay Joseph Smith nga Propeta kay James Covel sa Fayette, New York sang ika-5 sang Enero 1831. Si James Covel nga nangin isa ka ministro sang relihiyon nga Methodist sing mga kwarenta ka tuig nagpakighisugot sa Ginuo nga tumanon niya ang bisan ano nga sugo nga ihatag sang Ginuo sa iya paagi kay Joseph nga Propeta.
1–4, Ang mga Santos may gahum nga mangin mga anak sang Dios; 5–6, Ang pagbaton sang ebanghelyo nagapakita sang pagbaton kay Cristo; 7–14, Si James Covel ginsugo nga magpabunyag kag magpangabudlay sa ulubasan sang Ginuo; 15–21, Ang mga alagad sang Ginuo dapat magwali sang ebanghelyo antes sang Ika-duha nga Pagkari; 22–24, Ang inang mga nagabaton sang ebanghelyo pagatiponon sa katuigan kag wala’y katapusan.
1 Dungga kag pamatii ang tingug niya nga halin sa bug-os nga wala’y katapusan tubtob sa bug-os nga wala’y katapusan, ang Dakong Jehova nga si Jesucristo—
2 Ang kasanag kag ang kabuhi sang kalibutan; kasanag nga nagasilak sa kadulom kag ang kadulom indi makahangop sini;
3 Ang amo man nga nagkari sa kasagsagan sang panahon sa akon kaugalingon nga katawhan, kag ang akon kaugalingon nga katawhan wala nagbaton sa akon;
4 Apang sa tanan nga nagbaton sa akon, ginhatag ko ang gahum nga mangin akon mga anak; kag sa amo man ihatag ko sa tanan nga magbaton sa akon ang gahum nga mangin akon mga anak.
5 Kag sa pagkamatuod, sa pagkamatuod, ginasiling ko sa imo nga sia nga nagabaton sang akon ebanghelyo nagabaton sa akon; kag sia nga wala nagabaton sang akon ebanghelyo wala nagabaton sa akon.
6 Kag ini ang akon ebanghelyo—paghinulsol kag bunyag paagi sa tubig, kag dayon magasunod ang bunyag sang kalayo kag sang Balaan nga Espiritu nga amo ang Manugpasulhay nga nagapahayag sang tanan nga butang, kag nagatudlo sang mahidaeton nga mga butang sang ginharian.
7 Kag karon, tan-awa, ginasiling ko sa imo James, alagad ko, nakita ko ang imo mga buhat kag nakakilala ako sa imo.
8 Kag sa pagkamatuod ginasiling ko sa imo, ang imo tagipusuon subong matarong sa akon panulok sa sini nga tion; kag, tan-awa, ginhatag ko ang dalagko nga mga pagpakamaayo sa imo ulo;
9 Apang, nakabatyag ka sang dako nga kasubo kay ginsikway mo ako sing madamo nga beses bangod sang bugal kag mga pagkabalaka parte sa kalibutanon nga mga butang.
10 Apang, tan-awa, nag-abot na ang mga adlaw sang imo kahilwayan, kon magpamati ka sa akon tingug nga nagasiling sa imo: Magtindog kag magpabunyag, kag manghugas sang imo mga sala nga nagapanawag sa akon ngalan, kag mabaton mo ang akon Espiritu, kag ang pagpakamaayo nga tuman ka dako nga wala mo pa matilawan.
11 Kag kon himuon mo ini, ginhanda ko ikaw para sa mas dako nga buluhaton. Magawali ka sang kabug-osan sang akon ebanghelyo nga ginpadala ko sa sining ulihing mga adlaw, ang kasugtanan nga ginpadala ko agud bawion ang akon katawhan nga amo ang panimalay sang Israel.
12 Kag matabo ini nga makaangkon ka sang ikasarang kag awtoridad; makaangkon ka sang dako nga pagtuo, kag makaupod mo ako kag ihanda ko ang alagyan para sa imo.
13 Gintawag ka sa pagpangabudlay sa akon ulubasan, kag sa pagpauswag sang akon simbahan, kag sa pagpahanabo sang Sion agud nga magkasadya ini sa mga bungyod kag mag-uswag.
14 Tan-awa, sa pagkatuod, sa pagkamatuod, ginasiling ko sa imo, wala ka gintawag nga maglakat sa mga rehiyon sa este, kundi gintawag ka nga maglakat sa Ohio.
15 Kag bangod ang akon katawhan magatipon sang ila mga kaugalingon sa Ohio, nagtigana ako sang pagpakamaayo nga wala pa matilawan sang mga anak sang katawhan, kag igabubo ini sa ila mga ulo. Kag halin didto magalakat sila sa tanan nga nasyon.
16 Tan-awa, sa pagkamatuod, sa pagkamatuod, ginasiling ko sa inyo nga ang mga tawo sa Ohio nagapangamuyo sa akon sa dako nga pagtuo bangod nagahunahuna sila nga punggan ko ang akon kamot sa paghukom sang mga nasyon, apang indi ko mabawi ang akon pulong.
17 Gani, sugdi sa inyo ikasarang kag magtawag sang matutum nga mga nagapangabudlay sa akon ulubasan agud nga mapangtapsan ini sa katapusan nga tion.
18 Kag sa bagay nga maghinulsol sila kag magbaton sang kabug-osan sang akon ebanghelyo, kag mangin balaan, punggan ko ang akon kamot sa paghukom.
19 Gani, maglakat nga nagasinggit sa mabaskog nga tingug nga nagasiling: Ang ginharian sang langit malapit na; nga nagasinggit: Hosana! bulahan ang ngalan sang Labing Mataas nga Dios.
20 Maglakat kag magbunyag paagi sa tubig kag ihanda ang alagyan sa akon para sa tion sang akon pagkari;
21 Kay ang tion malapit na; wala sang tawo ang nakahibalo sang adlaw ukon sang oras; apang pat-od nga magaabot ini.
22 Kag sia nga nagabaton sining mga butang nagabaton sa akon; kag pagatiponon sila sa akon sa katuigan kag wala’y katapusan.
23 Kag sa liwat, matabo ini nga sa tanan nga inyo bunyagan sa tubig, itakdong ninyo ang inyo mga kamot, kag mabaton nila ang dulot sang Balaan nga Espiritu, kag paabuton ang mga tanda sang akon pagkari, kag makilala ako.
24 Tan-awa, magakari ako sing madasig. Kag gani amo sini. Amen.