Seksyon 22
Rebelasyon nga ginhatag paagi kay Joseph Smith nga Propeta sa Manchester, New York sang ika-16 sang Abril 1830. Ini nga rebelasyon ginhatag sa Simbahan bilang resulta sing pila nga nabunyagan sa iban nga relihiyon nga naghandum nga magbuylog sa Simbahan nga indi na pagbunyagan liwat.
1, Ang bunyag isa ka bag-o kag wala’y katubtuban nga kasugtanan; 2–4, Kinahanglanon ang bunyag nga ginahikot sang may nagakaigo nga awtoridad.
1 Tan-awa, ginasiling ko sa inyo nga ang tanan nga daan nga mga kasugtanan ginpatapos ko paagi sining butang; kag ini isa ka bag-o kag wala’y katubtuban nga kasugtanan bisan pa inang halin sa ginsuguran.
2 Gani, bisan pa nga ang isa ka tawo mabunyagan sing isa ka gatos ka beses wala ini pulos sa iya, kay indi kamo makasulod sa makitid nga puwertahan bangod sa layi ni Moises, kag indi man bangod sa inyo patay nga mga binuhatan.
3 Kay bangod sa inyo patay nga mga binuhatan nga ginapauswag ko ining katapusan nga kasugtanan kag ining simbahan sa akon, bisan pa pareho sa dumaan nga panahon.
4 Karon, magsulod kamo sa puwertahan suno sa akon ginsugo, kag indi pagtinguhai ang paglaygay sa inyo Dios.