Seksyon 61
Rebelasyon nga ginhatag paagi kay Joseph Smith nga Propeta sa pangpang sang Missouri River, McIlwaine’s Bend sang ika-12 sang Agosto 1831. Sa ila pagbalik sa Kirtland, nagbiyahe ang Propeta kag napulo ka elder sa suba sang Missouri nga sakay sa mga bangka. Sa ika-tatlo nga adlaw sang pagbiyahe, madamo nga peligro ang ila naagihan. Nakita ni Elder William W. Phelps, sa isa ka panan-awon sa kasanag sang adlaw, ang manuglaglag nga nagasakay sa gahum sa ibabaw sang mga katubigan.
1–12, Ang Ginuo nagmando sing madamo nga kahalitan sa mga katubigan; 13–22, Ang mga katubigan ginsumpa sang apostoles nga si Juan, kag ang manuglaglag nagasakay sa ibabaw sini; 23–29, Pila ka mga tawo may gahum sa pagsugo sa mga katubigan; 30–35, Ang mga elder dapat magpanglakaton sing tagduha-duha kag magwali sang ebanghelyo; 36–39, Dapat sila maghanda para sa pagkari sang Anak sang Tawo.
1 Tan-awa, kag dungga ang tingug niya nga may tanan nga gahum, sia nga halin sa wala’y katubtuban tubtob sa wala’y katubtuban, ang Alfa kag ang Omega, ang ginsuguran kag ang katapusan.
2 Tan-awa, sa pagkamatuod ini ang siling sang Ginuo sa inyo, O kamo nga mga elder sang akon simbahan nga nagtipon sa sini nga lugar, napatawad na ang inyo mga sala, kay ako, nga Ginuo, nagapatawad sang mga sala, kag maluluy-on sa sinang mga nagakumpisar sang ila mga sala nga may mapainubuson nga mga tagipusuon;
3 Apang sa pagkamatuod ginasiling ko sa inyo nga indi kinahanglanon para sining bilog nga grupo sang akon mga elder nga magpanakayon sing madasig sa mga katubigan samtang ang mga pumuluyo sa pihak kag pihak sang suba nagakadula sa pagkawala’y pagtuo.
4 Apang, gintugotan ko ini agud nga magpamatuod kamo; tan-awa, madamo sang mga peligro sa mga katubigan kag ilabi na pagkatapos sini;
5 Kay ako, nga Ginuo, nagmando sa akon kaakig sing madamo nga kahalitan sa mga katubigan; huo, kag ilabi na sa sining mga katubigan.
6 Apang, ang tanan nga unod yara sa akon kamot, kag sia nga tampad sa tunga ninyo indi mapatay paagi sa mga katubigan.
7 Karon, kinahanglanon nga ang akon mga alagad nga sanday Sidney Gilbert kag William W. Phelps magdali-dali sa pagsugod sang ila buluhaton kag misyon.
8 Apang, indi ko pagtugotan nga magbulagay kamo tubtob nga napinahan kamo sa tanan ninyo nga sala agud nga mag-isa kamo, agud nga indi kamo madula upod sa kalainan;
9 Apang karon, sa pagkamatuod ginasiling ko, pagbuot ko nga magbulagay kamo. Gani, paupda ang akon mga alagad nga sanday Sidney Gilbert kag William W. Phelps sa ila grupo sa pagbiyahe sang una, kag palakta na sila sing dali-dali agud nga matuman nila ang ila misyon, kag paagi sa pagtuo magmadinalag-on sila;
10 Kag kon tampad sila pagaamligan sila, kag ako, nga Ginuo, makaupod nila.
11 Kag padal-a ang nabilin nga mga elder sang kinahanglanon nga mga biste.
12 Padal-a ang akon alagad nga si Sidney Gilbert sang indi kinahanglanon sing iban nga elder suno sa inyo pagsugtanay.
13 Kag karon, tan-awa, para sa inyo kaayohan ginahatag ko sa inyo ang kasugoan parte sining mga butang; kag ako, nga Ginuo, makighambal sa inyo pareho sang mga tawo sa dumaan nga panahon.
14 Tan-awa, ako, nga Ginuo, nagpakamaayo sang mga katubigan sang ginsuguran; apang sa ulihing mga adlaw paagi sa baba sang akon alagad nga si Juan, ginsumpa ko ang mga katubigan.
15 Gani, maabot ang mga adlaw nga wala sang unod nga mangin luwas sa mga katubigan.
16 Kag igasiling sa palaabuton nga mga adlaw nga wala sing makasaka sa duta sang Sion sa mga katubigan luwas sa iya nga matarong sa tagipusuon.
17 Kag bisan pa ako, nga Ginuo, nagsumpa sang duta sa ginsuguran, apang sa ulihing mga adlaw ginpakamaayo ko ini sa iya sini husto nga tion para gamiton sang akon mga santos agud nga maambit nila ang kabuganaan sini.
18 Kag karon ginahatagan ko kamo sing isa ka kasugoan nga kon ano ang ginahambal ko sa isa ginahambal ko sa tanan nga paandaman ninyo ang inyo mga kauturan sa simbahan parte sining mga katubigan nga indi sila mag-agi diri pakadto sa Sion, agud nga indi mapaslawan ang ila pagtuo kag indi sila masiod;
19 Ako, nga Ginuo, nagmando kag ang manuglaglag nagasakay sa ibabaw sang mga katubigan, kag wala ko ginabawi ang mando.
20 Ako, nga Ginuo, naakig sa inyo kahapon apang subong wala na ang akon kaakig.
21 Karon, parte sa ila nga akon ginsambit, palakta na sila sing dali-dali—sa liwat ginasiling ko sa inyo, palakta na sila sing dali-dali.
22 Kag sa malip-ot nga tion, indi importante sa akon kon magbiyahe man sila sa tubig ukon sa duta, basta matuman nila ang ila misyon; ipahimo ini pareho sa ginpahibalo sa ila suno sa ila pagbinag-binag pagkatapos sini.
23 Kag karon, parte sa akon mga alagad nga sanday Sidney Rigdon, Joseph Smith Jr., kag Oliver Cowdery, indi sila pagtugoti nga magpanakayon liwat sa mga katubigan luwas sa kanal samtang nagabiyahe pakadto sa ila mga puluy-an; ukon sa iban nga pulong, indi sila pagtugoti nga magpanakayon sa mga katubigan luwas sa kanal.
24 Tan-awa, ako, nga Ginuo, naghatag sang alagyan para sa pagbiyahe sang akon mga santos; kag tan-awa, ini ang alagyan—nga pagkatapos nga makahalin sila sa kanal magapanglakaton sila sa duta bangod ginsugo sila nga magpanglakaton kag magkadto sa duta sang Sion;
25 Kag himuon nila ang pareho sa mga anak sang Israel nga nagapatindog sang ila mga tolda sa dalanon.
26 Kag tan-awa, ining kasugoan ihatag ninyo sa tanan ninyo nga kauturan.
27 Apang, kon kay sin-o ginahatag ang gahum sa pagsugo sang mga katubigan, ginahatag man sa iya sang Espiritu nga makahibalo sang tanan niya nga pamaagi;
28 Gani, pahimoa sia suno sa ginasugo sang Espiritu sang buhi nga Dios sa iya, kon sa duta man ukon sa mga katubigan, amo man nga nagapabilin sa akon ang gahum sa paghimo pagkatapos sini.
29 Kag ginhatag sa inyo ang alagyan para sa pagpanglakaton sang mga santos, ukon ang alagyan sang mga santos nga kabahin sang guban sang Ginuo.
30 Kag sa liwat, sa pagkamatuod ginasiling ko sa inyo, indi dapat pagbuksan sang akon mga alagad nga sanday Sidney Rigdon, Joseph Smith Jr., kag Oliver Cowdery ang ila mga baba sa mga kongregasyon sang mga malain tubtob nga mag-abot sila sa Cincinnati;
31 Kag sa sina nga lugar ibayaw nila ang ila mga tingug sa Dios batok sinang katawhan, huo, sa iya nga ang kaakig nagadabadaba batok sa ila kalainan, isa ka katawhan nga halos luto na sa kalaglagan.
32 Kag halin didto palakta sila sa mga kongregasyon sang ila mga kauturan sa simbahan; kay bisan pa subong ang ila mga pagpangabudlay mas labing kinahanglanon sa tunga nila sangsa mga kongregasyon sang mga malain.
33 Kag karon, parte sa nabilin nga mga elder, palakta sila kag ipapahayag sa ila ang pulong sa tunga sang mga kongregasyon sang mga malain suno sa pagpahayag sini;
34 Kag kon himuon nila ini pagakakasan nila sang dugo sang katawhan ang ila mga biste, kag mangin wala’y mantsa sila sa akon atubang.
35 Kag palakta sila sing ulupod ukon tagduha-duha suno sa nagakaigo para sa ila, basta indi pagpabulaga ang akon mga alagad nga sanday Reynolds Cahoon kag Samuel H. Smith, nga akon nahamut-an, tubtob nga makabalik sila sa ila mga puluy-an, kag para ini sa maalam nga katuyoan sa akon.
36 Kag karon, sa pagkamatuod ginasiling ko sa inyo, kag kon ano ang ginahambal ko sa isa ginahambal ko sa tanan, magkalipay kamo, magagmay nga kabataan; kay yara ako sa tunga ninyo, kag wala ko kamo ginpabay-an;
37 Kag bangod nagpaubos kamo sang inyo mga kaugalingon sa akon atubang, inyo ang mga bugay sang ginharian.
38 Wagkosi ang inyo mga balikawang kag mangin mabinantayon kag mangin but-anan nga nagapaabot sang pagkari sang Anak sang Tawo kay magakari sia sa oras nga wala ninyo paghunahunaa.
39 Magpangamuyo pirme agud nga indi kamo magsulod sa tentasyon, agud nga malampuwasan ninyo ang adlaw sang iya pagkari, sa kabuhi man ukon sa kamatayon. Kag gani amo sini. Amen.