Seksyon 70
Rebelasyon nga ginhatag paagi kay Joseph Smith nga Propeta sa Hiram, Ohio sang ika-12 sang Nobyembre 1831. Nagasiling sa kasaysayan sang Propeta nga apat ka espesyal nga mga komperensya ang ginhiwat humalin sa ika-1 tubtob sa ika-12 sang Nobyembre. Sa katapusan sining mga pagtipon, gintalupangod ang dako nga importansya sang mga rebelasyon nga sa ulihi igabantala bilang ang Book of Commandments (Libro sang mga Kasugoan) kag dayon ang Doktrina kag mga Kasugtanan. Ginpahayag ining rebelasyon pagkatapos nga nagboto ang mga nagtambong sa komperensya nga ang mga rebelasyon “nagabili sa Simbahan sang katumbas sang mga manggad sang bilog nga Kalibutan.” Nagatumod ang kasaysayan ni Joseph Smith sa mga rebelasyon bilang “pundasyon sang Simbahan sa sining ulihing mga adlaw, kag kaayohan sa kalibutan nga nagapakita nga ang mga yabi sang mga misteryo sang ginharian sang aton Manluluwas sa liwat gintugyan sa tawo.”
1–5, Ang mga tulugyanan ginpili nga magabantala sang mga rebelasyon; 6–13, Inang mga nagapangabudlay sa mga butang nga espirituhanon nagakaangay sang sohol; 14–18, Ang mga Santos dapat nga mangin patas sa mga butang nga dutan-on.
1 Tan-awa kag dungga ninyo, O mga pumuluyo sang Sion, kag tanan kamo nga katawhan sang akon simbahan nga yara sa malayo, kag pamatii ang pulong sang Ginuo nga ginahatag ko sa akon alagad nga si Joseph Smith Jr., kag amo man sa akon alagad nga si Martin Harris, kag amo man sa akon alagad nga si Oliver Cowdery, kag amo man sa akon alagad nga si John Whitmer, kag amo man sa akon alagad nga si Sidney Rigdon, kag amo man sa akon alagad nga si William W. Phelps bilang kasugoan sa ila.
2 Kay ginahatagan ko sila sang kasugoan; karon, dungga kag pamatii kay ini ang siling sang Ginuo sa ila—
3 Ako, nga Ginuo, nagpili sa ila, kag nag-ordin sa ila nga mangin mga tulugyanan sang mga rebelasyon kag mga kasugoan nga ginhatag ko sa ila, kag igahatag ko sa ila pagkatapos sini;
4 Kag ang pagsaysay sang pagtuman nila sining pagkatulugyanan pagapangayuon ko sa ila sa adlaw sang paghukom.
5 Gani, ginhatag ko sa ila, kag amo ini ang ila buluhaton sa simbahan sang Dios, ang magdumala sang mga ini kag sing bisan ano nga mga butang parte sini, huo, kag sang mga benepisyo sini.
6 Gani, isa ka kasugoan ang ginahatag ko sa ila nga indi nila ipahibalo ining mga butang sa simbahan ukon sa kalibutan;
7 Apang, kon nagabaton sila sing sobra sa kinahanglanon para sa ila mga panginahanglan kag ila mga kulang, ipahatag ini sa akon balay-talagoan;
8 Kag ipakonsagrar ang mga benepisyo sa mga pumuluyo sang Sion, kag sa ila mga henerasyon kon mangin mga manunubli sila suno sa mga layi sang ginharian.
9 Tan-awa, ini ang ginapangayo sang Ginuo sa tagsa ka tawo sa pagtuman sang iya pagkatulugyanan bisan pa pareho nga ako, nga Ginuo, ang naghatag ukon magahatag sa bisan sin-o nga tawo pagkatapos sini.
10 Kag tan-awa, wala sang makalikaw sa sining layi nga miyembro sang simbahan sang buhi nga Dios;
11 Huo, indi ang obispo, ukon ang representante nga nagadumala sang balay-talagoan sang Ginuo, ukon sia nga ginpili nga tulugyanan sing mga butang nga dutan-on.
12 Sia nga ginpili sa pagdumala sing mga butang nga espirituhanon, ang amo man nagakaangay sang sohol, pareho man sinang ginpili nga tulugyanan nga magdumala sing mga butang nga dutan-on;
13 Huo, mas bugana pa gid gani nga ang amo nga kabuganaan mangin pila ka pilo sa ila paagi sa mga pagpahayag sang Espiritu.
14 Apang, mangin patas kamo sa inyo mga butang nga dutan-on, kag indi ini paghimoa nga nagaduhaduha, indi gani pagapunggan ang kabuganaan sang mga pagpahayag sang Espiritu.
15 Karon, ining kasugoan ginahatag ko sa akon mga alagad para sa ila kaayohan samtang buhi sila, para ipakita ang akon mga pagpakamaayo sa ila mga ulo, kag para padyaan ang ila katutum kag para sa ila seguridad;
16 Para sa pagkaon kag para sa panapton; para sa panublion; para sa mga balay kag para sa mga duta sa ano man nga mga sirkumstansya nga ako, nga Ginuo, magapahamtang sa ila, kag kon sa diin nga ako, nga Ginuo, magapadala sa ila.
17 Kay nangin tampad sila sa madamo nga butang, kag naghimo sing maayo kon wala sila nakasala.
18 Tan-awa, ako, nga Ginuo, maluluy-on kag magapakamaayo sa ila, kag magasulod sila sa kalipay sining mga butang. Kag gani amo sini. Amen.