Seksyon 32
Rebelasyon nga ginhatag paagi kay Joseph Smith nga Propeta kanday Parley P. Pratt kag Ziba Peterson sa Manchester, New York, sang pagsugod sang Oktubre 1830. Dako nga pag-ulikid kag mga handum sa pagdala sang ebanghelyo ang nabatyagan sang mga elder parte sa mga Lamanhon, nga ang mga bugay nga gintagna sa ila natun-an sang Simbahan sa Libro ni Mormon. Bangod sini, nag-ampo sila sa Ginuo nga ipahibalo ang Iya pagbuot parte sa kon ang mga elder ipadala sa sina nga tion sa mga tribo sang Indiyan sa Weste. Nagsunod ining rebelasyon.
1–3, Sanday Parley P. Pratt kag Ziba Peterson gintawag sa pagwali sa mga Lamanhon kag sa pag-upod kanday Oliver Cowdery kag Peter Whitmer Jr.; 4–5, Dapat magpangamuyo sila para sa paghangop sang balaan nga mga kasulatan.
1 Kag karon parte sa akon alagad nga si Parley P. Pratt, tan-awa, ginasiling ko sa iya nga sa amo man nga nagakabuhi ako pagbuot ko nga ipahayag niya ang akon ebanghelyo kag magtuon sa akon, kag mangin malulo kag mapainubuson sa tagipusuon.
2 Kag ginhatag ko sa iya nga maglakat sia upod sa akon mga alagad nga sanday Oliver Cowdery kag Peter Whitmer Jr. sa kamingawan pakadto sa mga Lamanhon.
3 Kag si Ziba Peterson dapat mag-upod man sa ila; kag ako mismo magaupod sa ila kag mangin yara sa tunga nila; kag ako ang ila mananabang sa Amay, kag wala sing bisan ano nga makadaug batok sa ila.
4 Kag talupangdan nila inang nasulat, kag indi magpakunokuno sing iban pa nga rebelasyon; kag magpangamuyo sila pirme agud nga ipahayag ko ini sa ila paghangop.
5 Kag magpamati sila sa sining mga pulong kag indi pagpasapayan, kag pagapakamaayohon ko sila. Amen.