1 Magpamati, O kamo nga kalangitan kag dungga, O duta, kag magkalipay kamo nga mga pumuluyo sini kay Dios ang Ginuo kag luwas sa iya wala na sang Manluluwas.

2 Dako ang iya kaalam, dalayawon ang iya mga pamaagi, kag ang tanan niya nga hinimoan wala sing may makahibalo.

3 Wala nagakapaslaw ang iya mga katuyoan kag wala sing bisan sin-o nga makapugong sang iya kamot.

4 Halin sa wala’y katapusan tubtob sa wala’y katapusan amo man sia sa gihapon, kag magapadayon ang iya mga tuig.

5 Kay ini ang siling sang Ginuo—ako, nga Ginuo, maluluy-on kag maayo sa sinang nagatahod sa akon, kag nalipay nga pasidunggan inang mga nagaalagad sa akon sa pagkamatarong kag sa kamatuoran tubtob sa katapusan.

6 Dako ang mangin ila padya kag wala’y katapusan ang mangin ila himaya.

7 Kag sa ila ipahayag ko ang tanan nga misteryo, huo, tanan nga natago nga mga misteryo sang akon ginharian halin sang dumaan nga panahon, kag tubtob sa magaabot nga mga panahon, ipahibalo ko sa ila ang maayo nga tinutuyo sang akon pagbuot parte sa tanan nga butang nga parte sa akon ginharian.

8 Huo, bisan ang mga katilingalahan sang wala’y katapusan mahibaloan nila, kag ang magaabot nga mga butang ipakita ko sa ila, bisan ang mga butang sing madamo nga henerasyon.

9 Kag magasangkad ang ila kaalam, kag magalab-ot ang ila paghangop tubtob sa langit; kag madula ang kaalam sang mga maalam sa atubang nila, kag mangin wala’y pulos ang paghangop sang mga mahinalungon.

10 Kay paagi sa akon Espiritu hatagan ko sila sang kasanag, kag paagi sa akon gahum ipahibalo ko sa ila ang mga sekreto sang akon pagbuot—huo, bisan pa inang mga butang nga wala pa nakita sang mata, ukon nabatian sang dulunggan, ukon nakasulod sa tagipusuon sang tawo.

11 Kami, sanday Joseph Smith Jr. kag Sidney Rigdon samtang yara sa Espiritu sa ika-disesais nga adlaw sang Pebrero sa tuig sang aton Ginuo mil otso sientos treinta’y dos—

12 Paagi sa gahum sang Espiritu nabuksan ang amon mga mata kag napasanagan ang amon mga paghangop agud makita namon kag mahangpan ang mga butang sang Dios—

13 Bisan inang mga butang nga humalin pa sa ginsuguran antes ginhimo ang kalibutan nga gin-ordin sang Amay paagi sa iya Bugtong nga Anak nga yara sa sabak sang Amay bisan pa humalin sa ginsuguran;

14 Nga kami nagapamatuod; kag ang amon ginapamatud-an amo ang kabug-osan sang ebanghelyo ni Jesucristo nga Anak nga nakita namon kag nasugilanon namon sa isa ka langitnon nga panan-awon.

15 Kay samtang ginahimo namon ang buluhaton sang paglubad nga ginhatag sang Ginuo sa amon, nakalab-ot kami sa ika-beynte-nuebe nga bersikulo sang ika-lima nga kapitulo sang libro ni Juan nga ginpahayag sa amon bilang ang masunod—

16 Nga nagahambal parte sa pagkabanhaw sang mga minatay, parte sinang magapamati sa tingug sang Anak sang Tawo:

17 Kag magabangon sa pagkabanhaw sang mga matarong sila nga naghimo sang maayo; kag sa pagkabanhaw sang mga di-matarong sila nga naghimo sang malain.

18 Karon natingala kami kay ginpahayag ini sa amon sang Espiritu.

19 Kag samtang nagabinag-binag kami sa sining mga butang, gintandog sang Ginuo ang mga mata sang amon mga paghangop kag nabuksan ang mga ini, kag nagsilak sa palibot ang himaya sang Ginuo.

20 Kag nakita namon ang himaya sang Anak sa tuo nayon nga kamot sang Amay, kag nakabaton sang iya kabug-osan;

21 Kag nakita ang balaan nga mga anghel, kag sila nga ginpakabalaan sa atubang sang iya trono nga nagasimba sa Dios kag sa Kordero, nga nagasimba sa iya tubtob sa wala’y katapusan.

22 Kag karon, pagkatapos sing madamo nga testimonya nga ginhatag parte sa iya, ini ang testimonya nga pinakaulihi sa tanan nga ginahatag namon parte sa iya: Nga buhi sia!

23 Kay nakita namon sia sa tuo nayon nga kamot sang Dios; kag nabatian namon ang tingug nga nagapamatuod nga sia ang Bugtong nga Anak sang Amay—

24 Nga sa iya, kag paagi sa iya, kag halin sa iya, ginatuga kag gintuga ang mga kalibutan, kag ang mga pumuluyo sini ginbun-ag nga mga anak nga lalaki kag babayi sang Dios.

25 Kag nakita man namon ini, kag nagapamatuod kami nga isa ka anghel sang Dios nga may awtoridad sa atubang sang Dios, nga nagrebelde batok sa Bugtong nga Anak nga hinigugma sang Amay kag sia nga yara sa sabak sang Amay, ang gintabug halin sa presensya sang Dios kag sang Anak,

26 Kag gintawag nga Kalaglagan kay naghibi ang kalangitan sa iya—sia si Lucifer, anak sang kaagahon.

27 Kag nakita namon, kag yari karon, nalaglag sia! nalaglag bisan anak sang kaagahon!

28 Kag samtang yara pa kami sa Espiritu, ginsugo kami sang Ginuo nga isulat namon ang panan-awon; kay nakita namon si Satanas, ang dumaan nga man-og, bisan ang yawa nga nagrebelde batok sa Dios, kag nagtinguha nga agawon ang ginharian sang amon Dios kag sang iya nga Cristo—

29 Gani, gingiyera niya ang mga santos sang Dios, kag ginpalibutan sila.

30 Kag nakita namon ang isa ka panan-awon sang mga pag-antos sinang iya gingiyera kag gindaug kay ini ang siling sang tingug sang Ginuo nga nag-abot sa amon:

31 Ini ang siling sang Ginuo parte sa tanan sinang nakahibalo sang akon gahum, kag ginhimo nga kabahin sini, kag ginpabay-an ang ila mga kaugalingon nga daugon paagi sa gahum sang yawa, kag ipanghiwala ang kamatuoran kag kontrahon ang akon gahum—

32 Sila ang mga anak sang kalaglagan nga akon ginatumod sa pagsiling nga mas maayo pa para sa ila nga wala na sila ginbun-ag pa;

33 Kay mga suludlan sila sang kaakig nga ginhukman nga mag-antos sang kaakig sang Dios upod ang yawa kag ang iya mga anghel sa wala’y katapusan;

34 Nga akon ginatumod sa pagsiling nga wala sila sang kapatawaran sa sining kalibutan ukon sa kalibutan nga magaabot—

35 Kay ginpanghiwala nila ang Balaan nga Espiritu pagkatapos nga mabaton ini, kag ginpanghiwala ang Bugtong nga Anak sang Amay, nga ila ginlansang sa ila kaugalingon kag ginbutang sa hayag nga kahuy-anan.

36 Sila ining igadap-ong sa linaw nga kalayo kag asupre upod ang yawa kag iya mga anghel—

37 Kag sa ila lamang may gahum ang ika-duha nga kamatayon;

38 Huo, sa pagkamatuod, sila lang ang indi matubos sa natalana nga tion sang Ginuo pagkatapos sang mga pag-antos sang iya kaakig.

39 Kay magabangon ang tanan nga iban pa sa pagkabanhaw sang mga minatay paagi sa kadalag-an kag himaya sang Kordero nga ginpatay, nga yara sa sabak sang Amay antes pa ginhimo ang mga kalibutan;

40 Kag ini ang ebanghelyo, ang maayong balita nga ang tingug nga halin sa kalangitan nagsaksi sa amon—

41 Nga nagkadto sia sa kalibutan, si Jesucristo, agud ilansang para sa kalibutan, kag agud pas-anon ang mga sala sang kalibutan, kag agud pakabalaanon ang kalibutan, kag agud tinloan ini halin sa tanan nga indi matarong;

42 Nga paagi sa iya ang tanan maluwas, sila nga ginbutang sang Amay sa iya gahum kag iya nga gintuga;

43 Nga nagahimaya sang Amay, kag ginaluwas ang tanan nga gintuga sang iya mga kamot luwas sinang mga anak sang kalaglagan nga nagpanghiwala sang Anak pagkatapos nga ginpakita sia sang Amay.

44 Gani, ginaluwas niya ang tanan luwas sa ila—igadap-ong sila sa wala’y katubtuban nga silot, nga amo ang nagapadayon nga silot, nga amo ang wala’y katapusan nga silot agud maghari upod sa yawa kag iya mga anghel sa wala’y katapusan kon sa diin ang ila ulod indi mapatay, kag ang kalayo indi mapalong nga amo ang ila pag-antos—

45 Kag ang katapusan sini ukon ang lugar sini ukon ang ila pag-antos, wala sang tawo nga nakahibalo;

46 Wala man ini ginpahayag, ukon ginapahayag, ukon igapahayag sa tawo luwas sa ila nga magabaton sini;

47 Apang ako, nga Ginuo, nagpakita sini sa madamo paagi sa panan-awon apang ginlipdan ini liwat sa gilayon;

48 Gani, ang katapusan, ang kalaparon, ang kataason, ang kadalumon, kag ang kalisud sini indi nila matungkad ukon sing bisan sin-o man luwas sinang gintandaan sa sining pagkondenar.

49 Kag nabatian namon ang tingug nga nagasiling: Isulat ang panan-awon, kay yari karon, ini ang katapusan sang panan-awon sang mga pag-antos sang mga indi diosnon.

50 Kag sa liwat nagapamatuod kami—kay nakita namon kag nabatian, kag ini ang testimonya sang ebanghelyo ni Cristo parte sa ila nga magabangon sa pagkabanhaw sang mga matarong—

51 Sila inang nagbaton sang testimonya parte kay Jesus, kag nagpati sa iya ngalan kag nabunyagan suno sa paagi sang iya pagkalubong nga ginlubong sa tubig sa iya ngalan, kag ini suno sa kasugoan nga ginhatag niya—

52 Agud nga paagi sa pagtuman sang mga kasugoan mahimo sila mahugasan kag matinloan halin sa tanan nila nga sala, kag makabaton sang Balaan nga Espiritu paagi sa pagtakdong sang mga kamot niya nga gin-ordinan kag ginselyo para sa sining gahum;

53 Kag sia nga madinalag-on sa pagtuo, kag ginselyo paagi sa Balaan nga Espiritu sang promisa nga ginabubo sang Amay sa tanan sinang mga matarong kag matuod.

54 Sila inang simbahan sang Panganay.

55 Sila inang kon kay sin-o mga kamot ginhatag sang Amay ang tanan nga butang—

56 Sila inang mga pari kag mga hari nga nakabaton sang iya kabug-osan, kag iya himaya;

57 Kag mga pari sang Labing Mataas, suno sa paagi ni Melquisedec, nga suno sa paagi ni Enoc, nga suno sa paagi sang Bugtong nga Anak.

58 Gani, suno sa nasulat, mga dios sila, bisan ang mga anak sang Dios—

59 Gani, ila ang tanan nga butang, sa kabuhi man ukon kamatayon, ukon mga butang subong, ukon mga butang sa palaabuton, ila ang tanan kag sila iya ni Cristo, kag si Cristo iya sang Dios.

60 Kag magmadinalag-on sila sa tanan nga butang.

61 Karon, wala sing bisan sin-o nga maghimaya sa tawo kundi pahimayaon sia sa Dios nga magatasak sang tanan nga kaaway sa idalom sang iya mga tiil.

62 Magapuyo ang mga ini sa presensya sang Dios kag sang iya Cristo tubtob sa wala’y katapusan.

63 Sila ining pagadal-on upod niya kon magkari sia sa mga panganod sang langit agud maghari sa duta sa iya katawhan.

64 Sila ining may mangin bahin sa una nga pagkabanhaw.

65 Sila ining magabangon sa pagkabanhaw sang mga matarong.

66 Sila ining nagkadto sa Bukid sang Sion, kag sa siyudad sang buhi nga Dios, ang langitnon nga lugar, ang pinakabalaan sa tanan.

67 Sila ining nagbuylog sa di-maisip nga guban sang mga anghel, sa pangkabilogan nga pagtipon kag simbahan ni Enoc, kag sang Panganay.

68 Sila ining mga ngalan nasulat sa langit kon sa diin ang Dios kag si Cristo ang hukom sang tanan.

69 Sila ining matarong nga mga tawo nga naperpekto paagi kay Jesus nga manugpatunga sang bag-o nga kasugtanan, nga nagtuman sining lubos nga pagbayad-sala paagi sa pagpaagay sang iya kaugalingon nga dugo.

70 Sila ining ang mga lawas selestiyal, nga ang himaya pareho sang adlaw, bisan ang himaya sang Dios, ang pinakamataas sa tanan, nga ang himaya nalaragway sa balaan nga mga kasulatan nga pareho sa adlaw sa kalangitan.

71 Kag sa liwat, nakita namon ang terestriyal nga kalibutan, kag tan-awa kag yari karon, sila ining nalakip sa terestriyal nga ang himaya lain sa sinang iya sang simbahan sang Panganay nga nakabaton sang kabug-osan sang Amay, pareho nga ang bulan lain sa adlaw sa kalangitan.

72 Tan-awa, sila ining napatay nga wala sang layi;

73 Kag sila man ining mga espiritu sang mga tawo nga nabilanggo, nga ginbisitahan sang Anak, kag ginwali ang ebanghelyo sa ila agud mahukman sila suno sa mga tawo sa unod;

74 Nga wala nagbaton sang testimonya parte kay Jesus sa unod apang sang ulihi ginbaton ini.

75 Sila ining dungganon nga mga tawo sa duta nga nabulag sang pagpatalang sang mga tawo.

76 Sila ining nagbaton sang iya himaya apang indi sang iya kabug-osan.

77 Sila ining nagbaton sang presensya sang Anak apang indi sang kabug-osan sang Amay.

78 Gani, sila mga lawas nga terestriyal, kag indi mga lawas nga selestiyal, kag lain sa himaya pareho nga ang bulan lain sa adlaw.

79 Sila ining indi maisog sa testimonya parte kay Jesus; gani, wala nila maangkon ang korona sang ginharian sang aton Dios.

80 Kag karon ini ang katapusan sang panan-awon nga nakita namon sa terestriyal, nga ginsugo sa amon sang Ginuo nga isulat samtang yara pa kami sa Espiritu.

81 Kag sa liwat, nakita namon ang himaya sang telestiyal nga mas manubo nga himaya, bisan pa pareho sa himaya sang mga bituon nga lain sa himaya sang bulan sa kalangitan.

82 Sila ining wala nagbaton sang ebanghelyo ni Cristo ukon sang testimonya parte kay Jesus.

83 Sila ining wala nagpanghiwala sang Balaan nga Espiritu.

84 Sila ining igadap-ong sa impiyerno.

85 Sila ining indi matubos halin sa yawa tubtob sa katapusan nga pagkabanhaw, tubtob nga matapos na sang Ginuo, bisan pa ni Cristo nga Kordero ang iya buluhaton.

86 Sila ining wala nakabaton sang iya kabug-osan sa wala’y katapusan nga kalibutan kundi nakabaton sang Balaan nga Espiritu paagi sa pag-alagad sang terestriyal;

87 Kag ang terestriyal paagi sa pag-alagad sang selestiyal.

88 Kag mabaton man ini sang telestiyal halin sa pag-alagad sang mga anghel nga ginpili nga mag-alagad para sa ila, ukon ginpili nga mangin mga manug-alagad nga espiritu para sa ila; kay mangin mga manunubli sila sang kaluwasan.

89 Kag gani nakita namon sa langitnon nga panan-awon ang himaya sang telestiyal nga labaw sa tanan nga paghangop;

90 Kag wala sing bisan sin-o ang makahangop sini luwas sa iya kon kay sin-o ini ginpahayag sang Dios.

91 Kag gani nakita namon ang himaya sang terestriyal nga labaw sa tanan nga butang sa himaya sang telestiyal, bisan sa himaya, kag sa gahum, kag sa kusog, kag sa nasakpan.

92 Kag gani nakita namon ang himaya sang selestiyal nga labaw sa tanan nga butang—kon sa diin ang Dios, bisan ang Amay, nagahari sa iya trono tubtob sa wala’y katapusan;

93 Sa atubang sang iya trono ang tanan nagaduko sa mapainubuson nga pagtahod, kag nagahatag sa iya sang himaya tubtob sa wala’y katapusan.

94 Sila nga nagapuyo sa iya presensya amo ang simbahan sang Panganay; kag makita nila kag mahibaloan ang tanan nga butang kay nakabaton sila sang iya kabug-osan kag sang iya grasya;

95 Kag ginhimo niya sila nga palarehas sa gahum, kag sa kusog, kag sa ginsakpan.

96 Kag lain ang himaya sang selestiyal pareho nga lain ang himaya sang adlaw.

97 Kag lain ang himaya sang terestriyal pareho nga lain ang himaya sang bulan.

98 Kag lain ang himaya sang telestiyal pareho nga lain ang himaya sang mga bituon; kay pareho nga ang isa ka bituon lain sa isa naman ka bituon sa himaya, sa amo man may kinalain ang isa sa isa naman sa himaya sa telestiyal nga kalibutan;

99 Kay sila ining nagasiling nga sumulunod sila ni Pablo, kag ni Apolos, kag ni Cefas.

100 Sila ining nagasiling nga ang pila sa ila sa isa kag ang pila sa isa naman—ang pila kay Cristo kag ang pila kay Juan, kag ang pila kay Moises, kag ang pila kay Elias, kag ang pila kay Esaias, kag ang pila kay Isaias, kag ang pila kay Enoc;

101 Apang wala ginbaton ang ebanghelyo ukon ang testimonya parte kay Jesus, ukon ang mga propeta, ukon ang wala’y katubtuban nga kasugtanan.

102 Kag katapusan sa tanan, sila tanan ining indi pagtiponon upod sang mga santos nga sabniton sing paibabaw sa simbahan sang Panganay, kag batonon sa panganod.

103 Sila ining mga butigon, kag mga manughiwit, kag mga nagapanginbabayi, kag mga makihilawason, kag kon sin-o man ang nagahigugma kag nagahimo sang butig.

104 Sila ining magaantos sang kaakig sang Dios sa duta.

105 Sila ining magaantos sang silot sang wala’y katapusan nga kalayo.

106 Sila ining igadap-ong sa impiyerno kag magaantos sang kaakig sang Dios nga Makagagahum tubtob sa kabug-osan sang mga panahon kon tasakon ni Cristo ang tanan nga kaaway sa idalom sang iya mga tiil, kag malubos na ang iya buluhaton;

107 Kon matugyan na niya ang ginharian, kag mapakita ini sa Amay nga wala’y mantsa nga nagasiling: Nagmadinalag-on ako kag gintasak nga isahanon ang pulugaan sang ubas, bisan ang pulugaan sang ubas sang kapintas sang kaakig sang Dios nga Makagagahum.

108 Dayon pagakoronahan sia sang korona sang iya himaya agud magpungko sa trono sang iya gahum agud maghari tubtob sa wala’y katapusan.

109 Apang tan-awa, kag yari karon, nakita namon ang himaya kag ang mga pumuluyo sang telestiyal nga kalibutan nga indi sila maisip pareho sang mga bituon sa kalangitan ukon pareho sang balas sa baybayon;

110 Kag nabatian ang tingug sang Ginuo nga nagasiling: Magaluhod ini tanan, kag ang tagsa ka dila magadayaw sa iya nga nagapungko sa trono tubtob sa wala’y katapusan;

111 Kay pagahukman sila suno sa ila mga binuhatan, kag ang tagsa ka tawo magabaton suno sa iya kaugalingon nga mga binuhatan, sang iya kaugalingon nga ginsakpan, sa ginhanda nga mga mansyon;

112 Kag mangin mga alagad sila sang Labing Mataas; apang kon sa diin ang Dios kag si Cristo nagapuyo indi sila makakadto sa mga kalibutan nga wala’y katapusan.

113 Ini ang katapusan sang panan-awon nga nakita namon nga ginsugo kami nga isulat samtang yara pa kami sa Espiritu.

114 Apang dako kag dalayawon ang mga buluhaton sang Ginuo, kag ang mga misteryo sang iya ginharian nga ginpakita niya sa amon nga nagalabaw sa tanan nga paghangop sa himaya, kag sa kusog, kag sa ginsakpan;

115 Nga ginsugo niya kami nga indi namon dapat isulat samtang yara pa kami sa Espiritu, kag wala ginatugot nga ihambal sang tawo;

116 Wala man ang tawo sang ikasarang nga ipahibalo ang mga ini kay ang mga ini makita lamang kag mahangpan paagi sa gahum sang Balaan nga Espiritu nga ginahatag sang Dios sa sinang nagahigugma sa iya, kag nagatinlo sang ila mga kaugalingon sa atubang niya;

117 Kon kay sin-o ginahatag niya ining kinamatarong nga makakita kag makahibalo para sa ila kaugalingon;

118 Agud nga paagi sa gahum kag pagpahayag sang Espiritu samtang yara sa unod, mahimo nila mabatas ang iya presensya sa kalibutan sang himaya.

119 Kag sa Dios kag sa Kordero ang himaya, kag pasidungog, kag pagkaginuo tubtob sa wala’y katapusan. Amen.