1 Sa pagkamatuod, ini ang siling sang Ginuo sa inyo nga nagtipon sang inyo mga kaugalingon agud batonon ang iya pagbuot parte sa inyo:

2 Tan-awa, makapalipay ini sa inyo Ginuo, kag nagakalipay ang mga anghel sa inyo; ang inyo mga halad nga mga pangamuyo nakalab-ot sa mga dulunggan sang Ginuo sang Kasoldadohan, kag nasulat sa libro sang mga ngalan sang ginpakabalaan, bisan pa sila sang selestiyal nga kalibutan.

3 Karon, ginapadala ko subong sa inyo ang isa pa ka Manugpasulhay, sa pagkamatuod sa inyo mga abyan ko agud magpabilin ini sa inyo mga tagipusuon nga amo ang Balaan nga Espiritu sang promisa; nga ining isa pa ka Manugpasulhay amo man ang akon ginpromisa sa akon mga disipulo suno sa nasulat sa testimonya ni Juan.

4 Ining Manugpasulhay ang promisa nga ginahatag ko sa inyo sang kabuhi nga wala’y katapusan, bisan pa ang himaya sang selestiyal nga ginharian;

5 Nga ang amo nga himaya iya sang simbahan sang Panganay, bisan pa sang Dios, ang pinakabalaan sa tanan paagi kay Jesucristo nga iya Anak—

6 Sia nga nagsaka sa kahitaasan, nagpanaog man sa idalom sang tanan nga butang bangod nahangpan niya ang tanan nga butang agud sia mangin sa tanan kag paagi sa tanan nga butang, ang kasanag sang kamatuoran;

7 Nga ang amo nga kamatuoran nagasilak. Ini ang kasanag ni Cristo. Pareho nga yara sia sa adlaw, kag ang kasanag sang adlaw, kag ang gahum nga sa sina nga paagi gintuga ini.

8 Pareho nga yara sia sa bulan, kag ang kasanag sang bulan, kag ang gahum nga sa sina nga paagi gintuga ini;

9 Pareho man nga yara sia sa kasanag sang mga bituon, kag ang gahum nga sa sina nga paagi gintuga ang mga ini;

10 Kag sang duta man, kag ang gahum sini, sa pagkamatuod ang duta nga inyo ginatindogan.

11 Kag ang kasanag nga nagasilak, nga nagahatag sa inyo sang kasanag paagi sa iya nga nagapasanag sa inyo mga mata, nga amo man ang kasanag nga nagadugang sang inyo paghangop;

12 Nga ang amo nga kasanag nagabanaag halin sa presensya sang Dios agud pun-on ang kasangkaron sang kahawaan—

13 Ang kasanag nga yara sa tanan nga butang, nga nagahatag kabuhi sa tanan nga butang, nga amo ang layi kon sa diin ang tanan nga butang ginadumalahan, nga amo ang gahum sang Dios nga nagapungko sa iya trono, nga yara sa dughan sang wala’y katapusan, nga yara sa tunga sang tanan nga butang.

14 Karon, sa pagkamatuod ginasiling ko sa inyo nga paagi sa pagtubos nga ginhimo para sa inyo napahanabo ang pagkabanhaw sang mga minatay.

15 Kag ang espiritu kag ang lawas amo ang kalag sang tawo.

16 Kag ang pagkabanhaw sang mga minatay amo ang pagtubos sang kalag.

17 Kag ang pagtubos sang kalag paagi sa iya nga nagahatag kabuhi sa tanan nga butang, nga sa iya dughan ginamando nga ang mga imol kag ang mga malulo sang kalibutan magapanubli sini.

18 Gani, kinhanglanon nga tinloan ini halin sa tanan nga kalainan agud ihanda ini para sa selestiyal nga himaya;

19 Kay pagkatapos nga matuman ang katuyoan sang pagtuga sini, pagakoronahan ini sang himaya, sa pagkamatuod sa presensya sang Dios nga Amay;

20 Agud inang nabanhaw nga mga lawas nga yara sa selestiyal nga ginharian magaangkon sini tubtob sa wala’y katapusan; kay sa sining katuyoan ginhimo kag gintuga ini, kag sa sining katuyoan ginpakabalaan sila.

21 Kag sila nga wala natinloan paagi sa layi nga akon ginhatag sa inyo nga layi ni Cristo, kinahanglan magpanubli sang lain nga ginharian nga iya sinang terestriyal nga ginharian ukon sinang telestiyal nga ginharian.

22 Kay sia nga indi makatuman sang layi sang selestiyal nga ginharian indi makabatas sang selestiyal nga himaya.

23 Kag sia nga indi makatuman sang layi sang terestriyal nga ginharian indi makabatas sang terestriyal nga himaya.

24 Kag sia nga indi makatuman sang layi sang telestiyal nga ginharian indi makabatas sang telestiyal nga himaya; gani, indi sia nagakabagay para sa isa ka ginharian sang himaya. Gani, kinahanglan sia magbatas sing isa ka ginharian nga indi ginharian sang himaya.

25 Kag sa liwat, sa pagkamatuod ginasiling ko sa inyo, ang duta nagatuman sang layi sang selestiyal nga ginharian kay ginatuman sini ang katuyoan sang pagtuga sa iya, kag wala ginalapas ang layi—

26 Gani, pakabalaanon ini; huo, bisan pa nga mapatay ini, hatagan ini liwat sang kabuhi, kag magabatas sang gahum nga amo ang nagahatag kabuhi diri, kag ang mga matarong magapanubli sini.

27 Kay bisan pa mapatay sila, mabanhaw man sila liwat, bilang espirituhanon nga lawas.

28 Sila nga may selestiyal nga espiritu magabaton sang ila mismo nga lawas nga isa ka pisikal nga lawas; bisan pa nga kamo magabaton sang inyo mga lawas, kag ang inyo himaya mangin inang himaya nga paagi sini ang inyo mga lawas ginahatagan sang kabuhi.

29 Kamo nga ginahatagan kabuhi sang bahin sang selestiyal nga himaya makabaton dayon sang amo man nga himaya, kag sa pagkamatuod sang kabug-osan sini.

30 Kag sila nga ginahatagan kabuhi sang bahin sang terestriyal nga himaya makabaton dayon sang amo man nga himaya, kag sa pagkamatuod sang kabug-osan sini.

31 Kag amo man sila nga ginahatagan kabuhi sang bahin sang telestiyal nga himaya makabaton dayon sang amo man nga himaya, kag sa pagkamatuod sang kabug-osan sini.

32 Kag sila nga mabilin hatagan man sang kabuhi; apang, magabalik sila liwat sa ila kaugalingon nga lugar agud magpangalipay sa sinang handa lang nila nga batonon bangod indi sila handa sa pagpangalipay sa sinang mahimo nila tani mabaton.

33 Kay ano ang kaayohan sini sa tawo kon ang isa ka regalo ginhatag sa iya, kag wala niya ginabaton ang regalo? Tan-awa, wala sia nagapangalipay sa sinang ginhatag sa iya, ni nagakalipay sa iya nga taghatag sang regalo.

34 Kag sa liwat, sa pagkamatuod ginasiling ko sa inyo nga inang ginadumalahan sang layi ginaamligan man sang layi kag ginaperpekto kag ginapakabalaan sang amo man.

35 Inang nagalapas sang layi, kag wala nagatuman sang layi kundi nagatinguha nga mangin layi sa iya sini kaugalingon, kag nagapili nga magpabilin sa kasal-anan, kag lubos nga nagapabilin sa kasal-anan, indi matinloan sang layi, ni sang kaluoy, hustisya, ukon paghukom. Gani, kinahanglan sila magpabilin nga mahigko sa gihapon.

36 Ang tanan nga ginharian ginhatagan sang layi;

37 Kag madamo sang mga ginharian; kay wala sang lugar nga wala sang ginharian; kag wala sang ginharian nga wala sang lugar, halangdon man ukon kubos nga ginharian.

38 Kag ang tagsa ka ginharian ginhatagan sang layi; kag sa tagsa ka layi may mga limitasyon man kag mga kondisyon.

39 Ang tanan nga tawo nga wala nagatuman sinang mga kondisyon wala napakamatarong.

40 Kay ang ihibalo nagapanguyaput sa ihibalo; ang kaalam nagabaton sang kaalam; ang kamatuoran nagahakos sa kamatuoran; ang pagkamatarong nagahigugma sa pagkamatarong; ang kasanag nagapanguyaput sa kasanag; ang kaluoy may kaawa sa kaluoy kag ginaangkon ang tanan nga iya; ang hustisya nagapadayon sa iya banas kag ginaangkon ang tanan nga iya; ang paghukom nagahalin sa iya nga nagapungko sa trono kag nagadumala kag nagahimo sang tanan nga butang.

41 Nakahibalo sia sang tanan nga butang, kag ang tanan nga butang yara sa atubang niya, kag ang tanan nga butang yara sa palibot niya; kag yara sia sa ibabaw sang tanan nga butang, kag sa tanan nga butang, kag paagi sa tanan nga butang, kag yara sa palibot sang tanan nga butang; kag ang tanan nga butang paagi sa iya, kag halin sa iya, bisan pa ang Dios, tubtob sa wala’y katapusan.

42 Kag sa liwat, sa pagkamatuod ginasiling ko sa inyo, naghatag sia sang layi sa tanan nga butang sa diin ang mga ini nagahulag sa ila mga tinion kag ila mga panahon;

43 Kag ang ila mga banas indi magliwat, bisan pa ang mga banas sang langit kag sang duta nga nagalakip sang duta kag sang tanan nga planeta.

44 Kag nagahatag sila sang kasanag sa tagsa-tagsa sa ila mga tinion kag ila mga panahon, sa ila mga minuto, sa ila mga oras, sa ila mga adlaw, sa ila mga semana, sa ila mga bulan, sa ila mga tuig—ini tanan isa ka tuig sa Dios apang indi sa tawo.

45 Ang duta nagatiyog sa iya mga pakpak, kag ang adlaw nagahatag sang iya kasanag sa kaadlawon, kag ang bulan nagahatag sang iya kasanag sa kagab-ihon, kag ang mga bituon nagahatag man sang ila kasanag samtang nagatiyog sila sa ila mga pakpak sa ila himaya sa tunga sang gahum sang Dios.

46 Sa ano ko ipaanggid ining mga ginharian agud makahangop kamo?

47 Tan-awa, ini tanan mga ginharian, kag ang bisan sin-o nga tawo nga nakakita sing bisan isa ukon sing pinakakubos sini sa ila nakakita sa Dios nga nagahulag sa iya pagkahari kag gahum.

48 Ginasiling ko sa inyo, nakita niya sia; apang, sia nga nagkari sa iya kaugalingon nga katawhan wala ginbaton.

49 Ang kasanag nagasilak sa kadulom, kag ang kadulom indi makahangop sini; apang, magaabot ang adlaw nga mahangpan ninyo sa pagkamatuod ang Dios nga ginabuhi kamo sa iya kag paagi sa iya.

50 Dayon mahibaloan ninyo nga nakita ninyo ako, nga buhi ako, kag ako ang matuod nga kasanag nga yara sa inyo, kag kamo yara sa akon; indi gani indi kamo mag-uswag.

51 Tan-awa, ipaanggid ko ining mga ginharian sa isa ka tawo nga may uma, kag ginpadala niya ang iya mga alagad sa uma agud magbungkal sang duta.

52 Kag nagsiling sia sa pinakauna: Maglakat ka kag magpangabudlay sa uma, kag sa nahauna nga oras makadto ako sa imo, kag makita mo ang kalipay sa akon nawong.

53 Kag nagsiling sia sa ika-duha: Maglakat ka man sa uma, kag sa ika-duha nga oras mabisita ako sa imo nga may kalipay sa akon nawong.

54 Kag amo man sa ika-tatlo nga nagasiling: Mabisita ako sa imo;

55 Kag sa ika-apat, kag dalayon tubtob sa ika-dose.

56 Kag ang amo sang uma nagkadto sa pinakauna sa nahauna nga oras, kag nagtinir sa iya sa sinang bilog nga oras, kag ginpalipay sia sang kasanag sang nawong sang iya amo.

57 Kag dayon nagbiya sia sa pinakauna agud bisitahan man niya ang ika-duha, kag ang ika-tatlo, kag ang ika-apat, kag dalayon tubtob sa ika-dose.

58 Kag gani nabaton nila tanan ang kasanag sang nawong sang ila amo, ang tagsa ka tawo sa iya oras, kag sa iya tion, kag sa iya panahon—

59 Sumugod sa pinakauna, kag dalayon tubtob sa pinakaulihi, kag halin sa pinakaulihi tubtob sa pinakauna, kag halin sa pinakauna tubtob sa pinakaulihi;

60 Ang tagsa ka tawo sa iya kaugalingon nga pagpasunod tubtob matapos ang iya oras, sa pagkamatuod suno sa ginsugo sang iya amo sa iya agud ang iya amo mahimaya sa iya, kag sia sa iya amo, agud sila tanan mahimaya.

61 Karon, sa sining paanggid nakon ipaanggid ining tanan nga ginharian, kag ang mga pumuluyo sini—ang tagsa ka ginharian sa iya sini oras, kag sa iya sini tion, kag sa iya sini panahon, sa pagkamatuod suno sa mando nga ginhimo sang Dios.

62 Kag sa liwat, sa pagkamatuod ginasiling ko sa inyo, mga abyan ko, ginabilin ko ining mga pahayag sa inyo agud binag-binagon sa inyo mga tagipusuon upod sining kasugoan nga ginahatag ko sa inyo nga magtawag kamo sa akon samtang malapit ako—

63 Magpalapit sa akon kag magapalapit ako sa inyo; pangitaa ako sing matutum kag makita ninyo ako; magpangayo kag magabaton kamo; magpanuktok kag pagabuksan ini sa inyo.

64 Kon ano man ang inyo pangayuon sa Amay sa akon ngalan nga maayo para sa inyo, igahatag ini sa inyo;

65 Kag kon magpangayo kamo sing bisan ano man nga butang nga indi maayo para sa inyo, magaresulta ini sa pagkondenar sa inyo.

66 Tan-awa, inang inyo nabatian pareho sa tingug sing isa nga nagasinggit sang mensahe sa kamingawan—sa kamingawan bangod indi ninyo sia makita—ang akon tingug bangod ang akon tingug amo ang Espiritu; ang akon Espiritu amo ang kamatuoran; ang kamatuoran nagapadayon kag wala’y katapusan; kag kon ini yara sa inyo magauswag ini.

67 Kag kon ang inyo mata tampad sa akon himaya, ang inyo bilog nga lawas pagapun-an sang kasanag, kag wala sang mangin kadulom sa inyo; kag inang lawas nga puno sang kasanag nakahangop sang tanan nga butang.

68 Gani, pakabalaana ang inyo mga kaugalingon sa bagay nga ang inyo mga hunahuna mangin tampad sa Dios, kag magaabot ang mga adlaw nga makita ninyo sia; kay pagakakason niya ang belo sa iya nawong sa inyo, kag ini sa iya kaugalingon nga panahon, kag sa iya kaugalingon nga pamaagi, kag suno sa iya kaugalingon nga pagbuot.

69 Dumduma ang dako kag ulihi nga promisa nga ginhimo ko sa inyo; ihaboy ang inyo wala’y pulos nga mga pamensaron kag ang inyo tuman nga pagkinadlaw halin sa inyo.

70 Magpabilin kamo, magpabilin kamo sa sining lugar, kag magtawag sing isa ka sagrado nga pagtipon sinang una nga mga nagapangabudlay sa sining ulihi nga ginharian.

71 Kag patawga sa Ginuo inang ila ginpaandaman sa ila pagpanglakaton, kag ipabinag-binag ang paandam sa ila mga tagipusuon nga ila nabaton sa malip-ot lamang nga tion.

72 Tan-awa, kag yari karon, tatapon ko ang inyo mga panong, kag magabangon ako sang mga elder kag ipadala sa ila.

73 Tan-awa, padalion ko ang akon buluhaton sa iya sini panahon.

74 Kag ginahatag ko sa inyo nga una nga mga nagapangabudlay sa sining ulihi nga ginharian, ang kasugoan nga tiponon ninyo ang inyo mga kaugalingon, kag i-organisar ang inyo mga kaugalingon, kag ihanda ang inyo mga kaugalingon, kag pakabalaanon ang inyo mga kaugalingon; huo, tinloi ang inyo mga tagipusuon, kag hugasi ang inyo mga kamot kag inyo mga tiil sa akon atubang agud mahimo ko kamo nga matinlo;

75 Agud makapamatuod ako sa inyo Amay, kag inyo Dios, kag akon Dios, nga matinlo kamo halin sa dugo sining malain nga henerasyon; agud matuman ko ining promisa, ining dako kag ulihi nga promisa nga ginhimo ko sa inyo kon akon pagbuot.

76 Amo man, ginahatagan ko kamo sing isa ka kasugoan nga magpadayon kamo sa pagpangamuyo kag pagpuasa sugod subong.

77 Kag ginahatagan ko kamo sing isa ka kasugoan nga tudloan ninyo ang isa kag isa sang doktrina sang ginharian.

78 Magtudlo kamo sing matutum kag ang akon grasya mangin yara sa inyo, agud matudloan kamo sing mas lubos sa teoriya, sa prinsipyo, sa doktrina, sa layi sang ebanghelyo, sa tanan nga butang parte sa ginharian sang Dios nga kinahanglanon ninyo mahangpan;

79 Parte sa mga butang sa langit pati sa duta, kag sa idalom sang duta; mga butang nga natabo na, mga butang nga nagakatabo subong, mga butang nga malapit na matabo; mga butang nga yara sa puluy-an, mga butang nga yara sa iban nga pungsod; ang mga giyera kag ang mga palaligban sang mga nasyon, kag ang mga paghukom nga yara sa duta; kag ihibalo man parte sa mga pungsod kag parte sa mga ginharian—

80 Agud mangin handa kamo sa tanan nga butang kon ipadala ko kamo liwat agud tumanon sing maayo ang inyo tawag sa pag-alagad nga sa diin gintawag ko kamo, kag ang misyon nga ginpahimo ko sa inyo.

81 Tan-awa, ginpadala ko kamo agud magpamatuod kag magpaandam sa mga tawo, kag kinahanglanon sa tagsa ka tawo nga napaandaman nga magpaandam man sa iya isigkatawo.

82 Gani, wala sila sang balibad, kag ang ila mga sala yara sa ila kaugalingon nga mga ulo.

83 Sia nga una nga nagapangita sa akon makakita sa akon, kag indi pagpabay-an.

84 Karon, magpabilin kamo, kag magpangabudlay sing matutum agud nga mangin perpekto kamo sa inyo pag-alagad nga magkadto sa mga Gentil sa katapusan nga tion, kamo tanan nga hingalanan sang baba sang Ginuo, agud bugkoson ang layi kag selyohan ang testimonya, kag agud ihanda ang mga santos para sa oras sang paghukom nga magaabot;

85 Agud nga ang ila mga kalag makalikaw sa kaakig sang Dios, inang makangilil-ad nga butang nga ginabangdan sang kalaglagan nga nagahulat sa mga malain, sa sining kalibutan kag sa kalibutan nga magaabot. Sa pagkamatuod, ginasiling ko sa inyo, papadayona inang indi nauna nga mga elder sa ulubasan tubtob nga pagatawgon sila sang baba sang Ginuo kay ang ila panahon wala pa nag-abot; ang ila mga biste indi matinlo halin sa dugo sang sining henerasyon.

86 Magpabilin kamo sa kahilwayan sa diin ginhilway kamo; indi paggomona ang inyo mga kaugalingon sa sala kundi himoa nga matinlo ang inyo mga kamot tubtob nga magkari ang Ginuo.

87 Kay indi na madamo nga mga adlaw sugod subong kag ang duta magakurog kag magahabyog pareho sang hubog nga tawo; kag ang adlaw magatago sang iya sini nawong, kag magadumili sa paghatag sang kasanag; kag ang bulan magapaligo sa dugo; kag ang mga bituon maakig sing tuman, kag magataktak ang ila sini kaugalingon pareho sing isa ka higuera nga nagakataktak halin sa kahoy nga higuera.

88 Kag pagkatapos sang inyo testimonya matabo ang kaakig kag kaugot sa mga tawo.

89 Kay pagkatapos sang inyo testimonya matabo ang testimonya sang mga linog nga magatuga sang mga pag-ugayong sa tunga niya, kag ang mga tawo matumba sa duta kag indi makatindog.

90 Kag matabo man ang testimonya sang tingug sang mga daguob, kag sang tingug sang mga kilat, kag sang tingug sang mga unos, kag sang tingug sang mga balod sang dagat nga mabaskog nga magahampak lapaw sa mga dulonan sini.

91 Kag ang tanan nga butang magginamo; kag pat-od nga ang mga tagipusuon sang mga tawo magapaslaw sa ila; kay ang kahadlok magapangibabaw sa tanan nga tawo.

92 Kag ang mga anghel magalupad sa tunga sang langit nga nagasinggit sa mabaskog nga tingug, nga nagapatunog sang trumpeta sang Dios nga nagasiling: Maghanda kamo, maghanda kamo, O mga pumuluyo sang duta; kay ang paghukom sang aton Dios nag-abot na. Tan-awa, kag yari karon, ang Nobyo magaabot; gwa kamo agud sugataon sia.

93 Kag gilayon may magapakita nga dako nga tanda sa langit, kag ang tanan nga tawo makakita sini.

94 Kag isa pa ka anghel ang magapatunog sang iya trumpeta nga nagasiling: Inang gamhanan nga simbahan, ang iloy sang mga malain nga nagpainom sa tanan nga nasyon sang alak sang kaakig sang iya pagpakighilawas, nga nagahingabot sang mga santos sang Dios, nga nagpaagay sang ila dugo—sia nga nagapungko sa madamo nga tubig, kag sa mga isla sang dagat—tan-awa, sia ang hilamon sang duta; nabugkos na sia; ang iya mga higot ginhimo nga mabakod, wala sing bisan sin-o nga tawo ang makahukas sini; gani, handa na sia para sunogon. Kag patunogon niya ang iya trumpeta sing malawig kag mabaskog, kag mabatian ini sang tanan nga nasyon.

95 Kag may yara sang kalinong sa langit sa kalawigon sang tunga sa oras; kag gilayon pagkatapos sini ang kurtina sang langit pagabukaron pareho sing isa ka linokot nga papel nga ginbukad pagkatapos nga ini ginlukot, kag ang nawong sang Ginuo pagakakasan sang belo;

96 Kag ang mga santos nga yara sa duta nga buhi pagapabaskogon kag sabniton paibabaw sa mga panganod agud sugataon sia.

97 Kag sila nga nagtulog sa ila mga lulubngan mabanhaw kay ang ila mga lulubngan pagabuksan; kag pagasabniton man sila paibabaw sa mga panganod agud sugataon sia sa tunga sang haligi sang langit—

98 Sila iya ni Cristo, ang una nga mga bunga, sila ang magapanaog una kaupod niya, kag sila ang yara sa duta kag sa ila mga lulubngan nga una nga sabniton paibabaw sa mga panganod agud sugataon sia; kag ini tanan paagi sa tingug sang pagtunog sang trumpeta sang anghel sang Dios.

99 Kag pagkatapos sini isa pa ka anghel ang magapatunog nga amo ang ika-duha nga trumpeta; kag dayon masunod ang pagtubos sinang iya ni Cristo sa iya pagkari; nga nagbaton sang ila bahin sa sinang bilanggoan nga ginhanda para sa ila agud mabaton nila ang ebanghelyo, kag mahukman suno sa mga tawo sa unod.

100 Kag sa liwat, isa pa ka trumpeta ang magatunog nga amo ang ika-tatlo nga trumpeta; kag dayon masunod ang mga espiritu sang mga tawo nga pagahukman, kag ginakabig nga yara sa idalom sang pagkondenar;

101 Kag ini ang mga nabilin sang mga patay; kag indi sila mabuhi liwat tubtob nga matapos ang isa ka libo ka tuig, kag indi na liwat tubtob sa katapusan sang duta.

102 Kag isa pa ka trumpeta ang magatunog nga amo ang ika-apat nga trumpeta nga nagasiling: May yara sang magapabilin tubtob sa sinang dako kag ulihi nga adlaw, bisan pa sa katapusan, nga mangin mahigko pa sa gihapon.

103 Kag isa pa ka trumpeta ang magatunog nga amo ang ika-lima nga trumpeta, nga amo ang ika-lima nga anghel nga nagadala sang wala’y katubtuban nga ebanghelyo—nga nagalupad sa tunga sang langit sa tanan nga nasyon, kaliwat, lengguahe kag katawhan;

104 Kag ini ang mangin tunog sang iya trumpeta nga nagasiling sa tanan nga tawo sa langit pati sa duta, kag sa idalom sang duta—kay ang tagsa ka dulunggan makabati sini, kag ang tagsa ka tuhod magaluhod, kag ang tagsa ka dila magadayaw samtang mabatian nila ang tunog sang trumpeta nga nagasiling: Mahadlok sa Dios, kag maghatag sang himaya sa iya nga nagapungko sa trono tubtob sa wala’y katapusan; kay ang oras sang iya paghukom nag-abot na.

105 Kag sa liwat, isa pa ka anghel ang magapatunog sang iya trumpeta nga amo ang ika-anum nga anghel nga nagasiling: Nalaglag sia nga nagpainom sa tanan nga nasyon sang alak sang kaakig sang iya pagpakighilawas; nalaglag sia, nalaglag!

106 Kag sa liwat, isa pa ka anghel ang magapatunog sang iya trumpeta nga amo ang ika-pito nga anghel nga nagasiling: Tapos na; tapos na! Ang Kordero sang Dios nagdaug kag gintasak nga isahanon ang pulugaan sang ubas, bisan pa ang pulugaan sang ubas sang kapintas sang kaakig sang Dios nga Makagagahum.

107 Kag dayon pagakoronahan ang mga anghel sang himaya sang iya gahum, kag pagapun-on ang mga santos sang iya himaya, kag magabaton sang ila panublion kag pagahimuon nga pareho sa iya.

108 Kag dayon ang una nga anghel sa liwat magapatunog sang iya trumpeta sa mga dulunggan sang tanan nga buhi, kag magapahayag sang sekreto nga mga buhat sang mga tawo, kag sang gamhanan nga mga buluhaton sang Dios sa una nga isa ka libo ka tuig.

109 Kag dayon ang ika-duha nga anghel magapatunog sang iya trumpeta, kag magapahayag sang mga sekreto nga mga buhat sang mga tawo, kag sang mga hunahuna kag mga tinutuyo sang ila mga tagipusuon, kag sang gamhanan nga mga buluhaton sang Dios sa ika-duha nga isa ka libo ka tuig—

110 Kag dalayon tubtob sa ika-pito nga anghel ang magapatunog sang iya trumpeta; kag magatindog siya sa ibabaw sang duta kag sa ibabaw sang dagat, kag magasumpa sa ngalan niya nga nagapungko sa trono, nga matapos na ang panahon; kag gaposon si Satanas, inang dumaan nga man-og nga ginatawag nga yawa, kag indi pagabuy-an sa kalawigon sing isa ka libo ka tuig.

111 Kag dayon pagabuy-an sia sa malip-ot lamang nga tion agud matipon niya ang iya mga kasoldadohan.

112 Kag si Miguel, ang ika-pito nga anghel nga amo ang arkanghel, magatipon sang iya mga kasoldadohan nga mga kasoldadohan sang langit.

113 Kag ang yawa magatipon sang iya mga kasoldadohan; nga mga kasoldadohan sang impiyerno, kag magasulong agud magpakig-away batok kay Miguel kag sa iya mga kasoldadohan.

114 Kag dayon matabo ang giyera sang dakong Dios; kag igahaboy ang yawa kag ang iya mga kasoldadohan sa ila kaugalingon nga lugar sa bagay nga wala na gid sila sang mangin gahum sa mga santos.

115 Kay ipakig-away ni Miguel ang ila mga away, kag daugon sia nga nagatinguha nga kuhaon ang trono niya nga nagapungko sa trono nga amo ang Kordero.

116 Ini ang himaya sang Dios, kag sang ginpakabalaan; kag indi na nila makita pa ang kamatayon.

117 Karon, sa pagkamatuod ginasiling ko sa inyo, mga abyan ko, magtawag sang inyo sagrado nga pagtipon suno sa akon ginsugo sa inyo.

118 Kag bangod indi ang tanan may pagtuo, magtinguha sing matutum kag tudloi ang isa kag isa sang mga pulong sang kaalam; huo, magpangita kamo halin sa pinakamaayo nga mga libro sang mga pulong sang kaalam; magtinguha sa pag-angkon sang ihibalo, bisan pa paagi sa pagtuon kag paagi man sa pagtuo.

119 I-organisar ang inyo mga kaugalingon; ihanda ang tagsa ka kinahanglanon nga butang; kag ipahamtang ang isa ka balay nga balay sang pagpangamuyo, balay sang pagpuasa, balay sang pagtuo, balay sang pagtuon, balay sang himaya, balay sang kahusay, balay sang Dios;

120 Agud nga ang inyo mga pagsulod mangin sa ngalan sang Ginuo; agud nga ang inyo mga paggwa mangin sa ngalan sang Ginuo; agud nga ang tanan ninyo nga panamyaw mangin sa ngalan sang Ginuo nga nakabayaw ang mga kamot sa Labing Mataas.

121 Karon, untata ang tanan ninyo nga wala pulos nga halambalanon, ang tanan nga pagkinadlaw, ang tanan ninyo nga lawasnon nga mga handum, ang inyo pagkabugalon kag pagkahapaw, kag ang tanan ninyo nga malain nga mga buhat.

122 Magpili sa inyo mga kaugalingon sing isa ka manunudlo, kag indi ang tanan pagpahambala sing dulungan; kundi pahambala nga tinag-isaisa kag papamatia ang tanan sa iya mga ginahambal agud nga kon ang tanan nakahambal na, ang tanan mapasanagan sang tanan, kag ang tagsa ka tawo makaangkon sing palarehas nga pribilihiyo.

123 Siguroha nga nagahigugmaanay kamo; untata ang kahisa; tun-i nga magpaambit sa isa kag isa sang kon ano nga may ara kamo pareho sang ginamando sang ebanghelyo.

124 Untata ang katamad; untata ang kahigko; untata ang pagpangita sang sala sa isa kag isa; untata ang pagtulog sing mas malawig sangsa kinahanglanon; magpahuway sa inyo hiligdaan sing temprano agud indi kamo pagkapoyon; magbangon sing temprano agud magpagsik ang inyo mga lawas kag inyo mga hunahuna.

125 Kag labi sa tanan, sul-obi ang inyo mga kaugalingon sang higot sang paghigugma sa isigkatawo pareho sang kunop nga amo ang higot sang pagkaperpekto kag paghidaet.

126 Magpangamuyo pirme agud indi kamo magluya tubtob nga magkari ako. Tan-awa, kag yari karon, magakari ako sing madasig, kag pagabatonon ko kamo kaupod nakon. Amen.

127 Kag sa liwat, ang pagpalakat sang balay nga ginhanda para sa pangulohan sang eskwelahan sang mga propeta nga ginpahamtang para sa pagtudlo sa ila sa tanan nga butang nga nagakaigo para sa ila, bisan pa para sa tanan nga opisyales sang simbahan, ukon sa iban nga pulong, inang mga gintawag sa pag-alagad sa simbahan halin sa mga mataas nga pari pakadto sa mga deacono—

128 Kag ini ang mangin pagpalakat sang balay para sa pangulohan sang eskwelahan: Sia nga ginpili nga mangin pangulo ukon manunudlo dapat nagatindog sa iya lugar, sa balay nga ihanda para sa iya.

129 Gani, dapat sia gid ang una nga mag-abot sa balay sang Dios, sa lugar nga sa diin mabatian sing maayo kag sing maathag sang kongregasyon nga yara sa balay ang iya mga pulong, indi sa mabaskog nga paghambal.

130 Kag kon magsulod sia sa balay sang Dios, kay dapat una gid sia nga mag-abot sa balay sang Dios—tan-awa, matahum ini agud mangin isa sia ka ehemplo—

131 Papangamuyoa sia nga nagaluhod sa atubang sang Dios nga ginahalad and iya kaugalingon, bilang tanda ukon pagdumdum sang wala’y katubtuban nga kasugtanan.

132 Kag kon may mga magsulod pagkatapos niya, patindoga ang manunudlo kag, nga nakabayaw ang mga kamot sa langit, huo, sa pagkamatuod sing tadlong, patamyawa sa iya utod ukon mga kauturan (sa simbahan) sa sining mga pulong:

133 Ikaw bala utod ukon mga kauturan (sa simbahan)? Ginatamyaw ko ikaw sa ngalan sang Ginuong Jesucristo bilang tanda ukon pagdumdum sang wala’y katubtuban nga kasugtanan, nga sa amo nga kasugtanan ginabaton ko ikaw bilang miyembro sa tuyo nga mapag-on, mabakod kag dalayon, nga mangin imo abyan kag utod paagi sa grasya sang Dios sa mga higot sang paghigugma, nga maglakat sa tanan nga kasugoan sang Dios nga wala’y kabasulanan, nga may kapasalamatan tubtob sa wala’y katapusan. Amen.

134 Kag sia nga masalapoan nga di-nagakaangay sining pagtamyaw wala sang lugar sa inyo; kay indi ninyo pagtugotan nga ang akon balay mahigkoan niya.

135 Kag sia nga nagasulod sa templo kag tampad sa akon atubang, kag isa ka utod ukon kon mga kauturan sila (sa simbahan), pagatamyawon nila ang pangulo ukon manunudlo nga nakabayaw ang mga kamot sa langit paagi sa amo man sini nga pangamuyo kag kasugtanan ukon paagi sa paghambal sang Amen bilang tanda sang amo man.

136 Tan-awa, sa pagkamatuod, ginasiling ko sa inyo, isa ini ka sulundan sa inyo bilang pagtamyaw sa isa kag isa sa balay sang Dios, sa eskwelahan sang mga propeta.

137 Kag gintawag kamo nga himuon ini paagi sa pangamuyo kag pagpasalamat samtang ang Espiritu nagahambal parte sa tanan ninyo nga himuon sa balay sang Ginuo, sa eskwelahan sang mga propeta agud mangin isa ini ka santuaryo, isa ka tabernakulo sang Balaan nga Espiritu sa pagpalig-on sa inyo.

138 Kag indi kamo magbaton sing bisan sin-o man sa inyo sa sining eskwelahan luwas kon matinlo sia halin sa dugo sining henerasyon;

139 Kag dapat batonon sia paagi sa ordinansa sang paghugas sang mga tiil kay sa sini nga katuyoan ang ordinansa sang paghugas sang mga tiil ginpahamtang.

140 Kag sa liwat, ang ordinansa sang paghugas sang mga tiil dapat patigayonon sang pangulo ukon nagapangulo nga elder sang simbahan.

141 Dapat sugdan ini sang pangamuyo; kag pagkatapos nga mag-ambit sang tinapay kag alak, dapat wagkosan niya ang iya kaugalingon suno sa sulundan nga ginhatag sa ika-trese nga kapitulo sang testimonya ni Juan parte sa akon. Amen.