Nokwar a ho Tsew, Nkyerɛkyerɛ a ho Tsew, na Nyikyerɛ a ho Tsew
Meserɛ ma ehyiadzi yi nyɛ mber a ibɛmee wɔ Ewuradze ne nsɛm a ɔdze bodua N’asomfo do no.
Mo nuanom na me nkyerɛbaa adɔfo, mema hom akwaaba dze ba wiadze mfɛndzanan ehyiadzi yi ase! Mbrɛ osi yɛ enyigye dɛ menye hom wɔ ha! Hom ada m’adwen do abosoom esia a abɛsen yinom mu no mber pii mu. Mabɔ mpaa afa homho na ama hom. Ndaansa adapɛn yi mabɔ mpaa dzendzenndzen dɛ ehyiadzi yi bɛyɛ nyikyerɛ na ndwendwenho mber ama obiara a ɔrohwehwɛ dɛm nhyira nyina no.
Ɔyɛ hɛn ahomka dɛ yɛrekasa kyerɛ hom fi Ehyiadzi Asõe ha bio. Ngua dodowara da hɔ pan, mbom Tabernacle Adwontokuw mu mba binom a wɔwɔ ha no yɛ anamɔntu nwanwa dze kɔ kan. Yɛma obiara akwaaba beebiara ewɔ no, dze ba internet do ehyiadzi yi ma dodowara no.
Yɛda ho nye COVID-19 ɔsɛɛ dzendzen no na no su ahorow nsunsuando no ridzi esi. Yɛda hom ase dɛ wodzi hɛn afotu do na hɔn a wɔawea nduryɛ na aban edwumayɛfo a wɔwɔ hom sɔn horow no hɔn afotu so do.
Yehyia wɔ wiadze mfɛndzanan ehyiadzi biara mu dɛ mbrɛ Ewuradze akyerɛ no. 1 Mber rokɔ no nhyehyɛɛ no asesã pii. Mber a nna mosuar koraa no, nna ehyiadzi dzi nda ebiasa anaa anan. Ekyir no, wɔtseew ehyiadzi nda no do baa nda ebien. Asɛm biara—dɛm mber no na sesei—no yɛ mpaabɔ dzendzen na sunsum mu ahosiesie dodow no nsunsuando.
Wiadze Mfɛndzanan Etumdzifo na Asɔr ne Wiadze Mfɛndzanan Edzibewdzifo a wɔbɛkasa no begyina hɔn nsɛm wɔ hɛn Agyenkwa, Jesus Christ, N’ehumbɔbɔr, na No ɔpon a ɔmmbɔadze da tum no do. Mber biara mmbae wɔ wiadze n’abakɔsɛm mu a hɛn Agyenkwa no ho nyimdzee ayɛ ankorankor ehiadze na ehiasɛm mbordo ma ɔdasanyi biara ne kra nnkyɛn ber yi. Susu mbrɛ akõdzi a ɔresɛɛe wiadze nyina ntsɛntsɛm—na dza ɔwɔ hɛn ankorankor abrabɔ mu no—wobesiesie sɛ hɛn nyina san mu yi dɛ yɛbɛka Jesus Christ do na yɛayɛ setsie ama Ne nkyerɛkyerɛ a.
Dɛm sunsum mu no, moto nsa frɛ hom dɛ hom ntsie ndzɛmba ebiasa wɔ ehyiadzi ber yi mu: nokwar a ho tsew, Christ ne nkyerɛkyerɛ a ho tsew, na nyikyerɛ a ho tsew. Binom hɔn ekyingye ebirabɔ no, ampaara ara adze bi wɔ hɔ a ɔyɛ papa na bɔn. Nokwar tɔɔtsen—onnyiewiei nokwar wɔ hɔ ampaara. Hɛn nda mu yardɔm mu kor nye dɛ nkorɔfo kakrabaa na wonyim bea a wobohu nokwar no. 2 Mutum ma hom awerɛhyɛmu dɛ ndɛ na ɔkyena hom bɛtse dza ɔyɛ nokwar a ho tsew.
Tum wɔ Christ ne nkyerɛkyerɛ a ho tsew no mu. Ɔsesã abrabɔ no ma obiara a ɔtse ase na ɔhwehwɛ dze dzi dwuma wɔ n’abrabɔ mu. Christ ne nkyerɛkyerɛ no boa hɛn ma yehu ahyɛmu anamɔn kwan no na yɛnantsew do. Yɛrenantsew dɛm anamɔn kwan heaheaba a wɔada no edzi pɛpɛɛpɛ no do no, ewiei no bɛma yɛafata dɛ yɛgye dza Nyankopɔn wɔ no nyina. 3 Biribiara nnkotum asom bo asen dza hɛn Egya wɔ nyina!
Ewiei no, nyikyerɛ a ho tsew ma hom akoma mu nsɛmbisa no bɛma ehyiadzi yi ayɛ mfaso na nkaadze. Sɛ nnyae nnhwehwɛɛ Sunsum Krɔnkrɔn no som no ma ɔaboa wo ma atse dza Ewuradze rohwehwɛ ma aatse no nda ebien yinom mu a, moto nsa frɛ wo dɛ yɛ no seseiara. Meserɛ dɛ ma ehyiadzi yi nyɛ mber a ibɛmee wɔ Ewuradze ne nsɛm a ɔdze bodua N’asomfo do no. Sũa mbrɛ ibesi dze bedzi dwuma wɔ w’abrabɔ mu.
Iyi nye Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo. Yɛyɛ N’ahyɛmu nkorɔfo. Ewuradze paa mu kãa dɛ Ɔbɛyɛ N’edwuma ntsɛntsɛm wɔ ne mber mu, 4 na Ɔreyɛ no hahaahar so. Wɔayɛ hɛn adom dɛ yɛdze hɛnho hyɛ N’edwuma krɔnkrɔn no mu.
Mihyira obiara a ɔrohwehwɛ kan, nyimdzee, na nokwar kɛsenara. Mekyerɛ modɔ ma hom mu kor biara, wɔ Jesus Christ ne dzin mu, amen.