Yɛbɛyɛ Christ Akãdofo

Mankasa me kyerɛwsɛm nsũae mu no, Saul a ofi Tarsus, a ekyir no wɔbɛfrɛɛ no Paul, dɛ mbrɛ ɔaka ho asɛm wɔ Bible mu no ne nsakyeree no ekenyan me.

Nna Paul yɛ ɔbarimba a odzi akotsen wɔ Asɔr na Christianfo hɔn atseetsee mu. Na osian ɔsor tum na Jesus Christ No Werdambɔ no ntsi, ɔsesãa koraa, na ɔbɛyɛɛ Nyankopɔn no nkowaa akɛsefo no mu kor. Agyenkwa Jesus Christ yɛɛ n’abrabɔ mu Ɔhwɛdofo.

Paul ne nkyerɛkyerɛ no mu kor a ɔdze kɛmaa Corinthfo no, ɔtoo nsa frɛ hɔn dɛ wɔmbɛyɛ n’esuasuafo dɛ mbrɛ ɔnoara yɛ Christ suasuafo no.(hwɛ 1 Corinthians 11:1 Iyi yɛ ɔfrɛ a ɔyɛ nokwar na odzi mu fi Paul n’aber do kɛpem ndɛ: dɛ ebɛyɛ Christ suasuafo.

Mehyɛɛ ase dwendween dza ebɛyɛ Christ suasuafo n’asekyerɛ ho. Na ohia dodow no, mehyɛɛ ase bisaa dɛ, “ebɛn kwan mu na ɔwɔ dɛ musuasua No?’’

Ebɛyɛ Christ suasuafo nye dɛ yɛbɛper ma hɛn ndzeyɛɛ, suban, na hɛn abrabɔ nye Agyenkwa ne dze asɛ. Ɔno nye dɛ yebenya abrabɔ pa. Ɔno nye dɛ yɛbɛyɛ Jesus Christ n’osuanyi nokwafo.

Meesũa Agyenkwa n’abrabɔ n’afã bi, No suban anan a mobɔ mbɔdzen suasua na medze aka ndɛ m’asɛm no ho, na menye hom kyɛ.

Agyenkwa no no su a odzi kan nye ahobrɛadze. Fi wiadze ansaana yɛreba asaase abrabɔ mu no nna Jesus Christ yɛ ahobrɛadzenyi mapã. Ɔsor Bagua mu no, Ohunii na Ɔmaa Nyankopɔn ne pɛ dzi nyim wɔ nkwagye ho nhyehyɛɛ ma adasamba mu. Ɔkãa dɛ, “Egya, wo pɛ nyɛ hɔ, na enyimnyam no nyɛ wodze afebɔɔ’’ (Moses 4:2).

Yenyim dɛ Jesus Christ kyerɛkyerɛɛ ahobrɛadze na ɔbrɛɛ Noho adze dze hyɛɛ N’Egya enyimnyam.

Hom mma yɛntsena ahobrɛadze mu osiandɛ ɔdze asomdwee ba (hwɛ Nkyerɛkyerɛ na Ahyɛmudzi 19:23). Ahobrɛadze dzi enyimnyam kan, na ɔdze Nyankopɔn n’enyimpa brɛ hɛn: “Nyew, hom nyina mbrɛ homho adze nhyehyɛ homho ase, na hom mfura ahobrɛadze: osiandɛ Nyankopɔn siw ahopɔwfo kwan, na ɔdom ahobrɛadzefo’’ (1 Peter 5:5). Ahobrɛadze dze nyiano bɔkɔɔ ba. Ɔno nye tsenenee suban ne fibea.

Elder Dale G. Renlund kyerɛkyerɛe:

“Ankorankor a wɔnye Nyame nantsew ahobrɛadze mu no kaa dza Ɔsor Egya na Jesus Christ ayɛ ama hɔn.’’

Hɛn ndzeyɛɛ yɛ enyidzi wɔ Nyame enyim ber a yɛnye No nantsew ahobrɛadze mu’’ (“Yɛ Tsenenee, Dɔ Ehumbɔbɔr, na Enye Nyankopɔn Nnantsew Ahobrɛadze mu,” Liahona, Ɔberɛfɛw 2020, 111, 109).

Agyenkwa no no su a otsĩa ebien nye akokodur. Sɛ modwen Jesus Christ a oedzi mfe 12 ho, a ɔtsena Nyankopɔn ne temple mu hyɛ mbra mu abemfo mu na ɔrekyerɛkyerɛ hɔn ndzɛmba krɔnkrɔn a, muhu dɛ nna Ɔnoara wɔ N’abrabɔ ahyɛse koraa mu no, nna ɔwɔ akokodur, akokodur soronko. Ber a nna dodowara enyi da kwan dɛ wobohu dɛ mbra mu abemfo na wɔrekyerɛkyerɛ banyimba adze no, nna Ɔno na ɔrekyerɛkyerɛ hɔn adze ber a “nna woritsie no, na woribisabisa no nsɛm’’ (Joseph Smith Nkyerɛase, Luke 2:46 [wɔ Luke 2:46, ase asɛnsin c]).

Yɛsoom etuhoakyɛ asɛmpakã mu wɔ Democratic Republic a ɔwɔ Congo Mbuji-Mayi Asɛmpakã Dwuma fi 2016 kesi 2019. Kwan kor a ibotu kwan wɔ asɛmpakã dwuma no mu fi zone bea kor dze kɔ kor so hɔ no, nna ebɛfa kwan do. Nna ahobowsɛm bi esi wɔ apaamu hɔ, a edwotwafo dze asekan na akõdze bi so esiw kwan no na worisiw akwantufo hɔn akɔnaba kwan.

Asɛmpakafo beenum a nna worutu kwan fi zone bea kor dze rokɔ kor so do dɛ ɔkã dwuma bea nsesae ho no kehyiaa edwotwafo no. Hɛnara yɛayɛ ahobowsɛm yi akwanhyiafo ankasa pɛn no, yɛhyɛɛ ase nyaa suro maa hɔn nkwa na hɛn nyina hɛn ahotɔ, mpo yɛtweɔntweɔn dɛ yebotu kwan wɔ akwan yinom do akɛserɛ asɛmpasomafo na yɛayɛ zone ehyiadzi horow. Nna yennyim mber tsentsen a obedzi. Mekyerɛɛw ho amandzɛɛ, a mosomae ma wɔdze kɛmaa Apaamu Presidency no, na mekyerɛɛ mo suro dɛ yɛbɔ kɔ do etu kwan ber a nna kwan no nko nye dza yɛfa do a yebodur hɛn asɛmpasomafo no hɔ.

No mbuae mu no, Elder Kevin Hamilton, a nna ɔyɛ hɛn President ma Africa Anaafo Boka Apaamu no, kyerɛɛw me dɛ: “M’afotu nye dɛ yɛ dza ɔyɛ papa ara yie a ibotum ayɛ. Yɛ nyansadze na bɔ mpaa. Mma nngye enyim mmfa woho anaa w’asɛmpasomafo no nkɛhyɛ mbusu mu, mbom ber kor noara fa gyedzi kɔ kan. ‘Na Nyankopɔn amma hɛn suro sunsum, na mbom ahoɔdzen, nye dɔ na adwenmutsew’ (2 Timothy 1:7).’’

Afotu yi hyɛɛ hɛn dzen kɛsenara na ɔmaa hɛn kwan ma yɛkɔr do tuu kwan na yɛdze akokodur somii kesii hɛn asɛmpakã n’ewiei, osiandɛ yɛnam dɛm kyerɛwsɛm no do tsee hɛn Egya a ɔwɔ Sor n’akwankyerɛ.

Ndɛ kyerɛwsɛm mu no, yɛkenkan Nkɔnhyɛnyi Joseph Smith ne nkenyan nsɛm a ɔkyerɛ Ewuradze ne nkuranhyɛsɛm ma hɛn: “Enuanom, ana ɔnnsɛ dɛ yɛkɔ do boa wɔ dɛm dwumadzi kɛse yi mu? Hom nkõ nkɔ hom enyim na mma hom nnsan hom ekyir. Hom, nnya akokodur, enuanom; na wɔnkɔ do, nkedzi konyim!’’ (Nkyerɛkyerɛ na Ahyɛmudzi 128:22).

Hom mma yenya akokodur nyɛ dza ɔtsen, mpo sɛ ɔnnyɛ atsenkã a—akokodur dɛ yɛdze bɔbɔ hɛn gyedzi ho ban na yɛdze gyedzi ayɛ adze. Hom mma yenya akokodur mmfa nnu hɛnho daa daa, akokodur dɛ yɛdze bɛgye Nyankopɔn ne pɛ na yɛayɛ setsie ama Ne mbrasɛm. Hom mma yenya akokodur dɛ yɛbɔbɔ bra tsenenee na yɛayɛ dza enyi da kwan dɛ yɛbɛyɛ wɔ hɛn asodzii na gyinabew ahorow mu.

Agyenkwa no no su a otsĩa ebiasa nye bɔnfakyɛ. No Ɔnnkyebo somdwuma mu no, Agyenkwa no amma kwan ma oensiw ɔbaa bi a ɔbɔɔ edwaman abo. Ɔsee no dɛ “kɔ na mma nnkɛyɛ bɔn bio” (John 8:11). Iyi kenyaan no ma onuu noho na no korakora no, bɔnfakyɛ, osiandɛ kyerɛsɛm no kyerɛɛw dɛ, “fi dɛm dɔnhwer no ɔbaa no yii Nyankopɔn ayɛw na ɔgyee ne dzin dzii’’ (Joseph Smith Nkyerɛase, John 8:11 [wɔ John 8:11, ase asɛnsin c]).

Borɔnya Mpaabɔsom bi mu wɔ Mumu 2018 no, hɛn dɔfo President Russell M. Nelson kasaa ndzɛmba anan a yeenya dɛ akyɛdze fi Agyenkwa hɔ noho asɛm Ɔkãa dɛ akyɛdze kor a Agyenkwa no dze ma nye ahom dɛ edze bɔn bɛkyɛ:

Ɔnam No Werdam a ɔmmbɔadze da do no, ibotum dze bɔn akyɛ hɔn a wɔafom wo na wɔnnkɛgye hɔn tsirmɔdzen a wɔdze yɛe no ato mu da.

“Ɔtaa yɛ mberɛw dɛ edze bɔn bɛkyɛ obi a nokwar mu ara ɔhwehwɛ wo bɔn fakyɛ. Na Agyenkwa no bɛma wo ahom ma edze bɔn akyɛ obiara a ɔayɛ wo ayaayaadze wɔ kwan biara mu no’’ (“ Four Gifts That Jesus Christ Offers to You ” [President a Odzi Kan na n’Apamfo Borɔnya mpaabɔsom, Mumu 2, 2018], broadcasts.ChurchofJesusChrist.org).

Hom mma nokwar mu ara yɛmfa bɔn nkyɛ hɛnho nkorkor ama yeenya Egya hɔ bɔnfakyɛ. Bɔnfakyɛ ma yɛyɛ adehye na ɔma yɛfata dɛ yebedzi sacrament no Kwesida biara. Bɔnfakyɛ ma hɛn ma yɛayɛ Jesus Christ n’esuafo nokwafo.

Agyenkwa no no su a otsĩa anan nye afɔrbɔ. Ɔkã Jesus Christ asɛmpa no ho. Agyenkwa no dze No nkwa ankasa bɔɔ afɔr maa hɛn ama ɔapon hɛn. Ɔtsee afɔrbɔ ne yaw no, Ɔserɛɛ N’Egya dɛ onnyi kuraba no mmfi hɔ, naaso Otsimii dze wiei afɔrbɔ no. Iyi nye Jesus Christ no Werdambɔ no.

President M. Russell Ballard kyerɛkyerɛɛ dɛ: “Afɔrbɔ nye ɔdɔ mapã ne ɔyɛkyerɛ [no]. Hɛn dɔ ne pɛnpɛndo ma Ewuradze, ma asɛmpa no, na ma hɛn mfɛfo botum ayɛ esusudze ama dza yɛpɛ dɛ yɛdze bɔ afɔr ma hɔn’’ (“ The Blessings of Sacrifice ,” Ensign, Esusow Aketseaba 1992).

Yebotum dze hɛn mber abɔ afɔr dze ayɛ ɔsom, dze asom binom, dze ayɛ papa, dze ayɛ ebusua abakɔsɛm, na yɛdze akrɔn hɛn Asɔr ɔfrɛ.

Yebotum dze hɛn sika a yɛwɔ no ama ber a yetua ebupɛn du, akɔnkye afɔrbɔdze, na ntoboa bi so ma wɔdze akyekyer Nyankopɔn n’ahenman wɔ asaase do. Yehia afɔrbɔ dze esie hɛn ahyɛmudzi horow a yɛnye Agyenkwa ayɛ no.

Me mpaabɔ nye dɛ yɛka Jesus Christ do na yegyina No Werdambɔ nhyira horow no do a, yɛbɛyɛ ahobrɛadze mbordo mbordo, yɛyɛ akokodurfo mbordo, yɛdze bɔn kyɛ mbordo, mbordo, na yɛbɔ afɔr mbordo ma N’ahenman.

Megye dase dɛ hɛn Ɔsor Egya tse ase na Onyim hɛn mu kor biara dɛ ankorankor, na Jesus nye Christ no, na President Russell M. Nelson nye Nyankopɔn no nkɔnhyɛnyi ndɛ. Megye dase dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no nye Nyankopɔn n’ahenman wɔ asaase do na Mormon Nwoma no yɛ nokwar. Jesus Christ, hɛn Pomfo ne dzin mu, amen.