Asɔr no ne Dzin no Wɔnnsesã no.
Sɛ ɔpɛ mu ara yedzi Ewuradze n’afotu a Ɔdze edua No nkɔnhyɛnyi tseasefo do a, nkankara ber a otsia hɛn adwen a yedzii kan nyae wɔ ho a, ohia ahobrɛadze na afɔrbɔ a, Ewuradze dze sunsum mu tum kã ho nhyira hɛn.
Dzifuu 16, 2018 wɔ nsɛnkyerɛwfo nhyiamu ase no, President Russell M. Nelson kãa dɛ: “Ewuradze dze ahyɛ m’adwen mu hia a N’Asɔr ne dzin a Oyii kyerɛɛ no hia, Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no mpo no. 1 Yɛwɔ edwuma da hɛn enyim dɛ yɛnye Ne pɛ bɛsaa.” 2
Nda ebien ekyir no, wɔ Dzifuu 18 no, nna menye President Nelson wɔ Montreal, Canada. Yɛnye hɛn asɔrmba yɛɛ nhyiamu wɔ Palais de Congrés fɛɛfɛw no ekyir no, President Nelson yiyii akɛtseabɛkãfo hɔn nsɛmbisa ano. Ɔgyee pen dɛ ɔbɛyɛ “tafɛrbanyinmbɔmu dɛ [wɔbɛsan ama Asɔr ne dzin atahye na] wɔasesã mfe ɔha mboree amambra.” Mbom ɔdze sɔɔw do dɛ, “Asɔr no ne dzin no wɔnnsesã no.” 3
Adapɛn esuon ekyir no, President Nelson kasaa wɔ wiadze mfɛndzanan ehyiadzi ase: “Ewuradze dze hyɛɛ m’adwen mu hia a N’Asɔr ne dzin a Ɔhyɛɛ ho ɔmom no hia, Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no mpo no. … Agyenkwa Ɔnoara na Ɔsee dɛ: “Na dɛm na wɔbɛfrɛ m’asɔr.’” Nkyii President Nelson sii do dɛ, “Asɔr no ne dzin no wɔnnsesã no.” 4
Asɛmbisa Dɛw
Asɛmbisa dɛw bi puei: “Dɛn ntsi na sesei ber a mfe du mfe du pii yɛagye afɛdzin “Mormon”? “Mormon Tabernacle Adwontokuw,” video ɔyɛkyerɛ tsiabaa yinom “Meyɛ Mormonyi,” na Primary ndwom “Meyɛ Mormon Banyimba”?
Christ ne nkyerɛkyerɛ no nnsesã na ɔyɛ daapem. Naaso Agyenkwa n’edwuma ho anamɔntu pɔkyee a ho hia tsitsir no wɔda no edzi hɔn mber pa mu. Anapa yi President Nelson kãa dɛ, “Nsanananmu no yɛ dwumadzi kwan, nnyɛ dza osi pɛn bi.” 5 Na Ewuradze akã dɛ, “Ɔsɛ dɛ ndzɛmba nyinara ba mu wɔ hɔn aber do.” 6 Sesei nye hɛn mber, na yɛretahye Asɔr no ne dzin a woeyi akyerɛ no.
Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo ne dzin na ne daakyɛ no hia dɛ wɔdze Ne dzin frɛ hɛn. Ndaansa yi nna mowɔ Kirtland, Ohio, bea a Nkɔnhyɛnyi Joseph Smith, nye asɔrmba kumabaa ara no, ɔhyɛɛ nkɔm, “Asɔr yi bɛhyɛ America Etsifi na Anaafo mã—ɔbɛhyɛ wiadze no mã.” 7 Ewuradze kyerɛɛ dɛ mberano dwuma no bɛyɛ “ dwuma a ɔyɛ nwanwa na ahobow” 8 Na Ɔkasaa faa “ahyɛmu no ne mãhyɛ [a ɔbɛba mu] wɔ nda a odzi ekyir no mu;” a ɔbɛma “wobehyira asaase … nyinara.” 9
Ehyiadzi yi mu nsɛm no wɔrekyerɛ ase mber yi ara mu robɔ no dawur kɔ kasa 55 mu. Ekyir no, wɔbɛtse nsɛm na wɔakenkan no wɔ kasa 98 wɔ aman bɔbor 220 mu.
Sɛ Ewuradze san ba wɔ ahendzi na enyimnyam mu a, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu asɔrmba anokwafo bɛkã aman, nyimpa dɔm, ebusuakuw, na kusum amandze horow nyina a wɔwɔ wiadze mu no.
Asɔr no N’atsenkãyɛ a Ɔretahye
Jesus Christ N’Asɔr a wɔdze asan anamu aba no ne nhyɛdo ronnwɔ Asɔrmba no nko do. Osian ɔsor nyikyerɛ wɔ hɛn nda yi mu no, osian kyerɛwsɛm krɔnkrɔn a wɔdze asan aba asaase na Sunsum Krɔnkrɔn tum akyɛdze no, yɛbɛyɛ kandzea a ɔrehyerɛn wɔ koko no do ber a Jesus Christ ho ekyingye rehyɛ sum wɔ wiadze no. Dodowara bɛma kwan ma wiadze dze mununkum akata hɔn gyedzi wɔ Agyenkwa no do, naaso [wo]runntutu [hɛn] mmfi [hɛn] ananmu.” 10 Christianfo a wɔnnkã hɛn asɔrmba ho no bofua hɛn asodzi na hɛn Christ ho dasegye a otsim. Christianfo binom mpo a wɔahwɛ hɛn enyikankye no, dakor wɔbɛyɛ hɛn etuu dɛ anyɛnkofo. Nda yinom a ɔreba no mu no, wɔdze Jesus Christ ne dzin bɛfrɛ hɛn.
Meda hom ase wɔ hom mbɔdzembɔ ara yie dɛ wɔbɛma Asɔr no nokwar dzin no akɔ kan. Mfe ebiasa a abasen kɔ ehyiadzi mu no, President Nelson bɔɔ hɛn anohoba dɛ “ahwɛyie ara yie a yɛbɛyɛ dze Agyenkwa N’Asɔr ne dzin a ɔtsen no afrɛ no … ɔdze gyedzi ntomu na sunsum mu tum kɛse ho kwan” [babrɛ hɛn]. 11
Esuafo nokwafo a wɔwɔ wiadze nyina no enya anohoba yi mu enyadze. 12
Onuabanyin Lauri Ahola a ofi United States boka afamu kãa dɛ ɔtɔfabi a ɔkyer do dɛ ɔbɛkyɛ Asɔr ne dzin mu nyina. Naaso osian nkɔnhyɛnyi n’afotu ntsi, ɔwɔw do. Ber bi nna ɔakɛsera ne nyɛnko bi wɔ asɔr a ɔwɔ gyedzi bi mu. Ne nsɛm nye yi:
Nyɛnko no bisaa dɛ, “Iyɛ Mormonyi a?”
Mesee dɛ, “‘Meyɛ Jesus Christ N’Asɔr a ɔwɔ hɔ ma Nda a odzi asɔrba, nyew. Ɔhyɛɛ ase bisaa me nsɛmbisa pii, a kor biara ɔhyɛɛ ase dɛ: ‘Ana Mormon Asɔr no gyedzi dɛ … ?’ Na ber biara, medzi nsɛnsin yi hyɛ me nyiano ase: ‘[Jesus] Christ Asɔr a wɔdze asan ananmu aba mu no, yɛgye dzi dɛ …’
“… Ber a ɔhyɛɛ no nsew dɛ merenngye dzin ‘Mormon’ no nnto mu no, obisaa me enyim na enyim dɛ, ‘Anna nnyɛ Mormonyi?’
“Ntsi mibisaa no sɛ onyim Mormon ne nyimpa ban—nna onnyim. Mekãa kyerɛɛ no dɛ nna Mormon yɛ nkɔnhyɛnyi … [na] ɔyɛ adom dɛ menye [no] wɔ bi yɛ.
‘“Mbom, mosɔɔw do dɛ, ‘Mormon ennwu amma mo bɔn. Mormon ennhu … amandze wɔ Gethsemane anaa oennwu wɔ mbeamudua no do [ama me]. … Jesus Christ nye me Nyame na m’Agyenkwa. … Na Ne dzin na mepɛ dɛ wɔdze frɛ me. …’
“… Kommyɛ sima kakra ekyir no, nyɛnko no see dɛ, ‘Ntsi, eyɛ Christianyi!’” 13
Hom kaa President Nelson ne nsɛm? Mobɔ hom anohoba dɛ sɛ yɛbɔ hɛn mbɔdzen ara yie dze Ewuradze N’Asɔr ne dzin a ɔtsen no san ba a, Ɔno a Asɔr yi yɛ Ne dze no bohue No tum na nhyira egu Latter-day Saintfo hɔn etsir do a ne nsaso wonnhun bi pɛn.” 14
Ewuradze Bue Kwan no Aber Biara.
Ewuradze sie N’anohoba aber biara. Ewuradze bue kwan ma hɛn ber a yɛyɛ N’edwuma.
Mfe pii mu no nna yɛwɔ enyidado dɛ yɛbɔtɔ internet domain mbea a ɔyɛ ChurchofJesusChrist.org na ChurchofJesusChrist.com. Nna wɔnntɔn no mu biara. Mber noara mu a President Nelson maa nkaabɔ ho dawur no, kwan bɛdaa hɔ ma ebien no nyina awerɛfir mu ara. Nna ɔyɛ anwanwadze. 15
Ewuradze akrɔn hɛn mbɔdzembɔ dɛ yɛbɛsesã edzin a wɔdze afam Asɔr no ho akyɛr no.
Yɛdze gyedzi rokɔ kan no, Mormon Tabernacle Adwontokuw ne dzin wɔsesãa no baa Tabernacle Adwontokuw no a wɔwɔ Temple Square. LDS.org website a onya nsera bɔbor ɔpepe 21 bosoom no, wɔasesã no kɔ ChurchofJesusChrist.org. 16 Dzin LDS Business College no wɔasesã no kɔ Ensign College. Mormon.org, website wɔadan no kɔ ChurchofJesusChrist.org. Ndzɛmba bɔbor apem a wɔwɔ “Mormon” anaa “LDS” wɔ hɔn dzin mu no wɔama hɔn dzin fofor. Latter-day Saintfo anokwafo ayɛ nsesã wɔ hɔn website, podcast nye Twitter account horow mu.
Yɛafa sɛnkyerɛdze fofor a otsim Jesus Christ do.
“Sɛnkyerɛdze no ne finimfin no yɛ Thorvaldsen ne marble ɔbo Christus no honyi ne ngyinahɔmadze. Ɔkyerɛ Ewuradze a ɔasoɛr, tseasefo no retsen ne nsamu dze efua obiara a ɔbɛba No hɔ no.
Jesus Christ a Ogyina arch ase no yɛ ngyinahɔmadze a [ɔrekaa] hɛn Agyenkwa no a Ɔasoɛr rifi ɔbo tu no mu rupue no.” 17
Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no dze ne sɛnkyerɛdze no akɔ kasa 50 na no mboree mu. Yɛagye internet domain edzin afofor wɔ wiadze nyina mu.
Enyisɔ ma Binom hɔn Mboa
Hɛn enyi sɔ nkorɔfo papa dodow a, adom mu ara wɔdze enyidzi ama hɛn pɛ dɛ wɔdze hɛn dzin a ɔtsen no bɛfrɛ hɛn. Ndaansa yi mekenkan dawurbɔ krataa mu nsɛm a ɔserɛɛ kãa Catholic cardinal bi a ɔrekã “Latter-day Saintfo” ho asɛm. 18 Ber a mekɛseraa Asɔr bi ne baanodzinyi bosoom kor a abɛsen no wɔ America boka afamu no, ɔdze hɛn dzin no nyina frɛɛ Asɔr no mpɛn a odzi kan no, na ɔtoaa do dze, Jesus Christ N’Asɔr” frɛɛ Asɔr boor mpɛn kor.”
Yehu no dɛ yɛdze nsɛmfua esia rekã hɛn dzin ho no rennyɛ nsɛnkyerɛwfo dɛw, naaso dɛ mbrɛ President Nelson akã no, “nsɛnkyerɛwfo a wonyim hɔn asodzi no bɛkyɛn aso ama hɛn ebisadze.” 19 Yɛda hom ase dɛ hom akyerɛ hɛn obu kor noara a hom dze ma kusum amambra, akansi, amambu nsɛm, anaa sɔn mu ekuwekuw ber hom dze hɛn dzin a yɛpɛ no frɛ hɛn.
Kumaabi, na osian dɛ wɔpɛ dɛ wosianka anaa wohuan hɛn somdwuma ne kɛseyɛ do no, wɔbɔkɔ do afrɛ hɛn “Mormonfo” anaa “Mormon n’Asɔr.” Enyidzi mu ara, yebisa nsɛnkyerɛwfo a wɔnnyɛ nyiyimu dɛ wɔmfa bu mma hɛn pɛ dɛ wɔdze hɛn bɛyɛ mfe 200 dzin no bɛfrɛ hɛn.
Latter-day Saintfo hɔn Akokodur
Latter-day Saintfo mpempem na akokodur mu ara wɔapaa mu akã Asɔr ne dzin. Ber a yɛyɛ hɛn afãmudze no, nkaafo no bɔtoa do. Mepɛ asɛm yi a ofi Tahiti no.
Mfe-du Iriura Jean sii nkitse dɛ obedzi President Nelson n’afotu no do.
“No skuul adzesũafo kasaa faa hɔn dapɛn ewiei mu nsɛm ho … na Iriura kasaa faa … asɔr ho.
“Ne kyerɛkyerɛnyi, Vaite Pifao, see dɛ, ‘Ao, ntsi eyɛ Mormonyi?”
“Iriura kãa no akokodur mu ara dɛ, ‘Oho, … meyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrba!’
“Ne kyerɛkyerɛnyi no buaa dɛ, ‘Nyew, … eyɛ Mormonyi.’
“Iriura gyinaa pintsii dɛ, ‘Oho kyerɛkyerɛnyi, meyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrba!’
“Ewuraba Pifao no ho boow no wɔ Iriura ne pisi ho na ɔyɛɛ no nwanwa siantsir a orisi do ara dze n’asɔr [ne] dzin tsentsen no afrɛ no. [Ɔyɛɛ n’adwen dɛ obosũa Asɔr no ho nsɛm bi akã ho.]
“[Ekyir no, ber a Akyerɛbaa] Vaite Pifao wonumaa no no [ɔkyerɛɛ n’enyisɔ] dɛ Iriura tsie President Nelson afotu no.” 20
“Asɔr no ne dzin no wɔnnsesã no.” Yɛmfa gyedzi nkɔ kan. Sɛ ɔpɛ mu ara yedzi Ewuradze n’afotu a Ɔdze edua No nkɔnhyɛnyi tseasefo do a, nkankara ber a otsia hɛn adwen a yedzii kan nyae wɔ ho a, ohia ahobrɛadze na afɔrbɔ a, Ewuradze dze sunsum mu tum kã ho nhyira hɛn na Ɔsoma N’abɔfoe ma wɔbɔ hɛn abamba na wogyina hɛn nkyɛn. 21 Yenya Ewuradze Ne taduasi na Ne nkamfo.
Meyɛ dasefo wɔ nyikyerɛ tum a ofi sor a ɔda hɛn Nkɔnhyɛnyi dɔfo, President Russell M. Nelson no do. Ɔyɛ ne pɛ ankasa dɛ ɔbɔsɔ Ewuradze enyi na oehyira Ɔsor Egya ne mba. Fi mankasa mo sũahu krɔnkrɔn mu, megye dase wɔ Ewuradze no dɔ a Ɔwɔ ma no ho. Ɔyɛ Nyankopɔn no nkɔnhyɛnyi.
Megye dase dɛ Jesus nye Christ no, Nyame ne Ba no. Jesus Christ ne dzin mu, amen.