Agyenkwa No n’Ayamuhyehye A Otsim

Agyenkwa ne fapem horow a odzi akõtsen dodow mu kor a ɔkyerɛkyerɛe wɔ Ne asaase do somdwuma mu nye edze ayamuhyehye rohwɛ binom. Hom mma yɛndwendwen fapem yi ho na mbrɛ yebesi dze bedzi dwuma wɔ hɛn abrabɔ mu ber a yɛrohwɛ Jesus a ɔkɔr Simon, Phariseenyi no ne fie ho asɛm.

Luke n’Asɛmpa no kyerɛ dɛ ɔbaa bi a, nna wohun dɛ ɔdzebɔnyɛnyi, kɛhɛɛn Simon ne fie ber a nna Jesus wɔ hɔ. Nnuhu ahobrɛadze mu no, ɔbaa no kɔɔr Jesus hɔ, dze ne nyinsuwa fɔɔw N’anan ho, na ɔdze ne tsinhwi pepae, na ofeew n’anan ho, na ɔdze ngohuam seraa ho. ¹ Fiewura ahantanyi a, nna obu noho dɛ no ho tsew koraa kyɛn ɔbaa no, dze nkaenyim na ahomemado kãe wɔ no mu dɛ, “Oyi, sɛ ɔyɛ nkɔnhyɛnyi a, nkyɛ obohu onyi kor a, anaa ɔbaa kor a ɔdze ne nsa kã no yi: dɛ ɔyɛ dzebɔnyɛnyi.’’ ²

Phariseenyi no ne meye-sen-obi su no maa obuu Jesus na ɔbaa no atsɛn kyew. Na Ɔno a onyim biribiara no, nna Agyenkwa no nyim Simon n’adwen na wɔ nyansa kɛse mu no, kãa Simon ne enyimtsĩabu ho asɛm, dɛmara dɛ otuu no fo wɔ ne enyiannsɔ a ɔkyerɛe ber a onyaa hɔho tsitsir tse dɛ Agyenkwa no wɔ ne fie. Nokwar, Jesus n’enyimka a ɔtsen ma Phariseenyi no yɛɛ dasegye dɛ ampa Jesus kitsa nkɔnhyɛ akyɛdze na dɛm ɔbaa yi, dze ahobrɛadze na akoma a abotow, no nuu noho na onyaa no bɔnfakyɛ. ³

Dɛ mbrɛ osisii pii wɔ Jesus ne asaase somdwuma ber mu no, asɛm yi kyerɛ hɛn bio dɛ Agyenkwa no kyerɛɛ ayamuhyehye maa obiara a ɔbaa No hɔ—wɔannyɛ nyiyimu—na ne tsitsir ara maa hɔn a nna wohia No mboa kɛse no. Nnuhu na enyidzi ɔdɔ a ɔbaa no kyerɛe maa Jesus no daa no nokwar nnuhu na ɔpɛ dɛ obenya no bɔn ho bɔnfakyɛ no edzi. Mbom, Simon ne meye-sen-obi, a n’akoma dzen kã ho no, ⁴ siiw no kwan dɛ obenya tsema ama ɔkra a oenya nnuhu no, na mpo ɔdze ahopɔw na enyimtsiabu kyerɛkyerɛɛ wiadze Agyenkwa no adze. No suban daa edzi dɛ n’abrabɔ yɛ mbra ndzido katsee a botae nnyi mu na n’apɛbiakyerɛ pisi a ɔnam no ntuwoho na ɔtor krɔnkrɔnyɛ do. ⁵

Jesus n’ayamuhyehye na nankasa no som wɔ asɛm yi mu no, kyerɛ nhwɛdo a odzi mu a, ɔwɔ mbrɛ yesi nye hɛn fipamfo nya nkitahodzi ho. Mfatoho pii wɔ kyerɛwsɛm mu wɔ mbrɛ Agyenkwa, N’ayamuhyehye a otsim na no mu dɔ sii kenyaan no ma Ɔnye N’aberdo nkorɔfo nyaa nkitahodzi na Ɔboaa hɔn a nna woruhu amandze na “wɔahaw, na wɔapetse dɛ nguan a wonnyi guanhwɛfo.’’ ⁶ Ɔtserɛɛw N’ehumbɔbɔr nsa maa hɔn a nna wohia ahomgye fi hɔn adzesoa mu, honandua mu na sunsum mu nyina. ⁷

Jesus n’ayamuhyehye suban no gyina ɔdɔ do, ⁸ ɔkyerɛ, wɔ No dɔ mapã na odzi mu, a ɔno nye No werdam afɔrbɔ adze tsitsir. Ayamuhyehye yɛ hɔn a wɔper hwehwɛ ahotsew hɔn sɛnkyerɛdze na ɔnye Christiansu bi bɔmu, tse dɛ wɔnye hɔn a hɔn werɛ ahow dzi hɔn yaw, na wonya tsema, ehumbɔbɔr, na ayamuyie. ⁹ Nokwar, yɛrekyerɛ ayamuhyehye ama binom, no nye Jesus Christ n’asɛmpa n’adze tsitsir na hɛn sunsum mu na nkãtse sɛnkyerɛdze a ɔda edzi dɛ yɛbɛn Agyenkwa no. Bio, ɔkyerɛ Ne nhyɛdo mpɛnpɛndo a ɔwɔ wɔ mbrɛ yesi bɔ hɛn bra na ɔkyerɛ hɛn sunsum ne ndaamba

Ɔyɛ mfaso dɛ yebohu dɛ nna Jesus n’ayamuhyehye nyɛe horow no nnyɛ dza wɔse no dɛ Ɔnyɛ ana Ɔayɛ, anaa nna ogyina edwuma a ɔakyerɛw no nkorkor do a ɔwɔ dɛ Owie yɛ, mbom dabiara No nokwar dɔ mapã ma Nyankopɔn na Ne mba na Ne pɛ a otsim dɛ Ɔboa hɔn nyɛe a.

Jesus tumii hun nkorɔfo hɔn ehiadze mpo wɔ ekyirkyir. Dɛm ntsi ɔnnyɛ ahobow, mfatoho, dɛ ntsɛmara a ɔsaa ɔhamupanyin bi n’akowaa yarba no, ¹⁰ Jesus tuu kwan fii Capernaum kɔr kurow bi a wɔfrɛ no Nain mu. Hɔ no na Jesus yɛɛ Ne asaase ɔsom ayamuhyehye anwanwadze no mu kor ber a Ɔhyɛɛ aberantsɛ bi a nna oewu, enã okunafo bi ne babanyin kortoo, dɛ ɔnsoɛr na ɔntsena ase. Jesus ennhu enã bɔbɔfo n’amandzehu dzendzendzenn no nko mbom n’abrabɔ mu gyinabew dzendzen no so, na Okenyaan no ma onyaa nokwar ayamuhyehye maa no. ¹¹

Dɛmara tse dɛ ɔbaa dzebɔnyɛnyi na Nain okunafo no, nkorɔfo pii wɔ hɛn nhyɛdo ase mu a wɔrohwehwɛ awerɛkyekyer, asõkyɛn, na wɔbɛka ho, na mboa biara a yebotum dze ama hɔn. Hɛn nyinara botum ayɛ edwindadze wɔ Ewuradze ne nsa mu na yɛdze ayamuhyehye edzi dwuma ama hɔn a wohia, dɛmara dɛ mbrɛ Jesus yɛe.

Minyim basiaba kakraba bi a wɔwoo no a nna n’ano sor na ase no ɔakyekyɛmu ebien a nna ɔyɛ dzen. Wɔwoo no ne nda ebien ekyir ara nna ɔwɔ dɛ wɔyɛ no ɔperehyɛn horow mu dza odzi kan. Nokwar ayamuhyehye kenyaan no ma hɔn a wonya nsɔhwɛ yi ara bi no, basiaba yi na n’awofo hwehwɛ dze mboa, ntseasee, na nkãtse mboa ma hɔn a wohyia nkõdzen dzendzen yi. Wɔkyerɛɛw me nnkyɛree na wɔkãa dɛ: “Ɔnam hɛn babaa no nsɔhwɛ mu no, yeenya kwan dze ehyia nkorɔfo anwanwafo a wohia awerɛkyekyer, mboa, na nkuranhyɛ. Mber bi a abasen kɔ no, hɛn babaa, a sesei oedzi mfe 11, nye n’awofo dzii abɔdomaba bi a ɔwɔ ɔhaw yi ara bi ho nkɔmbɔ. Nkɔmbɔdzi yi mu no, hɛn babaa no yii akata-anodze a osian nsan yarba nna ɔhyɛ no mber tsĩabaa ama awofo no eehu dɛ enyidado wɔ hɔ, kaansa mpo sɛ abɔdomaba no wɔ mbertsentsen da n’enyim a wɔdze besiesie asɛnhia no a. Hɛn enyisɔ papaapa wɔ kwan a yenyae dze tserɛw hɛn tsema mu ma hɔn a wohu amandze, dɛmara dɛ mbrɛ Agyenkwa no yɛ ma hɛn. Yɛtse nkã dɛ hɛn yaw no do huan mber biara a yɛboa ma obi so ne yaw no do huan.

M’anyɛnkofo adɔfo, ber a yɛgye enyim ara per dze ayamuhyehye su kã hɛn abrabɔ ho, dɛ mbrɛ Agyenkwa no yɛɛ ne fasusu no, hɛn nkãtse bɛyɛ har mbordo ama nkorɔfo hɔn ehiadze. Yɛdze dɛm nkã-tse a orinyin no, nokwar enyikadze nkã na ɔdɔ benya nhyɛdo wɔ adze biara a yɛbɛyɛ do. Ewuradze bohu hɛn mbɔdzembɔ, na nokwar ara wɔdze akwan horow behyira hɛn ma yɛayɛ edwindadze wɔ Ne nsamu dɛ yɛrogow akoma na yɛdze ahomgye ama hɔn a hɔn “nsa … sensan famu.’’ ¹²

Jesus n’afotu dze ma Simon Phariseenyi no san so yɛ no pefee dɛ onnyi dɛ yebu atsɛn katsee na tsirmɔdzen mu wɔ hɛn fipamfo ho osiandɛ hɛn nyinara yehia ntseasee na ehumbɔbɔr wɔ hɛn esintɔ ho fi hɛn Ɔsor Egya dɔfo hɔ. Ana ɔnnyɛ dza Agyenkwa no kyerɛkyerɛe pɛpɛɛpɛ no mber bi so ber a Ɔkãa dɛ, “Na ɔyɛ dɛn na ehwɛ duaba a ɔwɔ wo nua enyiwa mu, na enndwen mpuna a ɔwɔ w’ankasa w’enyiwa mu ho?’’ ¹³

Yehia dɛ yehu dɛ ɔnnyɛ mberɛw dɛ yɛbɛtse gyinabew nyina ase wɔ dza okenyan obi no su anaa ne ndzeyɛe. Dza opue enyiwa do no botum ayɛ ndaadaa na mber pii so ɔnnda obi no nokwar suban ankasa edzi nnkyerɛ. Ɔnntse dɛ emi na ɔwo no, wɔ gyinabew biara mu no, Christ tum hu n’afã biara pefee. ¹⁴ Mpo onyim hɛn mbrɛwyɛ horow nyina no dɛ mbrɛ Onyim no, Agyenkwa no mmbu hɛn fɔ yerɛwyerɛw mbom ɔkɔ do nye hɛn yɛ edwuma ayamuhyehye mu ara mber tsentsen, a ɔroboa hɛn ma yeeyi mpuna no efi hɛn enyiwa mu. Aber nyina Jesus hwɛ akoma no mu, na nnyɛ dza opue enyiwa do. ¹⁵ Ɔnoara ankasa paa mu kãa dɛ, “Mma hom mmbu atsɛn dɛ mbrɛ enyiwa do tse.’’ ¹⁶

Afei, hwɛ Agyenkwa no ne nyansaa afotu ma Nephi esuafo duebien no a ɔfa asɛmbisa yi ho no:

“Na hom nhu dɛ hom bɛyɛ dɛm nkorɔfo yi hɔn atsɛmbuafo, dɛ mbrɛ atsɛmbu a medze bɛma hom no tse, dza ɔyɛ pɛrpɛr no. Dɛm ntsi, ebɛn nyimpa ne saso na ɔsɛ dɛ hom yɛ? Nokwar mese hom dɛ, dɛ ma metse mpo.” ¹⁷

“Dɛm ntsi mɛpɛ dɛ hom ndzi mu, dɛ mbrɛ Emi, anaa hom sor Egya no dzi mu no.’’ ¹⁸

Nyiano yi mu no, Ewuradze dze atsɛmbu ato hɔn a wɔgye to hɔnankasa hɔnho do dɛ wobobu binom annyɛ a hɔn esintɔ atsɛn kyew no. Ama hɛnankasa yɛafata dɛ yebobu atsɛn tsenenee no, otwar dɛ yɛper yɛbɛyɛ tse dɛ Agyenkwa no na yɛhwɛ ankorankor hɔn esintɔ ayamuhyehye mu ara, mpo dɛmara dɛ mbrɛ Ɔno hwɛ no. Yɛrohwɛ no dɛ yɛdaho wɔ kwan tsentsen twa ana yeenya emudziyɛ no, ebia obeye koraa dɛ yɛbɛtsena Jesus n’ananadze na yɛatotɔ aserɛ ehumbɔbɔr ama hɛnara hɛn esintɔ, dɛmara dɛ ɔbaa no a onyaa nnuhu wɔ Phariseenyi ne fie no, na yɛnnsɛe mber na ahom dodow mmfa nntsim binom hɔn esintɔ a ɔyɛ dɛ yehu no do.

M’anyɛnkofo adɔfo, megye dase dɛ ber a yɛper dɛ yɛdze Agyenkwa n’ayamuhyehye fasusu bɛka hɛn abrabɔ mu no, hɛn ahom dɛ yɛbɛkamfo hɛn fipamfo hɔn ndzepa no benyin na hɛn awosu nkãtse dɛ yebobua hɔn esintɔ atsɛn no do bohuan. Yɛnye Nyankopɔn nkitahodzi no botu mpon, na nokwar mu ara hɛn abrabɔ bɛyɛ dɛɛdɛɛdɛw, hɛn nkã-tse ayɛ mberɛw mbordo, na yebenya enyigye a ɔmmbɔadze da ne fibea. Wobohu hɛn dɛ esiesiefo, ¹⁹ a hɔn nsɛm dwe dɛmara dɛ fefɛw anapa no bosu.

Mowɔ enyidado dɛ yebenya binom hɔn ho penkyɛr na ntseasee mbordo na dɛ Ewuradze n’ehumbɔbɔr no, wɔ emudzi botooyɛ mu no, dze hɔn esintɔ bɔdwedwe hɛn akoma soɛr. Iyi nye Agyenkwa no ne frɛ ma hɛn. Megye dase dɛ Ɔtse ase. Ɔno nye abotar na mbɔbɔrhufo osuanyiyɛ fasusu nhwɛdo a odzi mu. Megye dase wɔ nokwar yinom ho wɔ Agyenkwa Jesus Christ ne dzin krɔnkrɔn mu, amen.