Christ N’Asomdwee Gura Enyitan Gu

Mo nuanom na nkyerɛbaa adɔfo, apɔwmutsentsen atseetsee nsɔhwɛ ber mu no, akoma n’edwuma a ɔyɛ no kɔ sor. Akoma a obotum asɔw nantsew no bedzi aper dɛ ɔbɛgye mbirikatu ahom dze fow bepɔw. Kwan yi mu no, atseetsee nsɔhwɛ no botum akyerɛ dɛ yarba bi hyɛ ase a ɔnnda edzi. Afei wobotum esiesie adze biara a wobohu no ansaana ɔdze nsɛnhia dzendzen bi aba daa daa abrabɔ mu.

Nokwar mu ara COVID-19 wiadze mu nsan yarba no ayɛ wiadze nyina mu atseetsee nsɔhwɛ! Nsɔhwɛ no dze nsunsuando horow aba. Wɔayɛ ndur apapa a wɔdze bota a oye. ¹ Hɔn a wɔawea eduryɛ ho, akyerɛkyerɛfo, ahwɛfo, na binom so abɔ afɔr ekunyin mu ara—na wɔkɔ do so yɛ dɛmara. Nkorɔfo beberee akyerɛ papayɛ na ayamuyie—na wɔkɔ do so yɛ dɛmara. Naaso, akwansidze horow bi a wɔhyehyɛ ase ada edzi. Ankorankor a hɔn apɔwmudzen yɛ mberɛw no ehu amandze—na wɔkɔ do so hu dɛmara. Hɔn a wɔyɛ edwuma dze siesie nsisi yinom a ɔhyehyɛ ase no, ɔsɛ dɛ wɔhyɛ hɔn nkuran na wɔda hɔn ase.

Wiadze nsan yarba yi san so yɛ sunsum mu atseetsee nsɔhwɛ ma Agyenkwa no N’Asɔr na asɔrmba no. No nsunsuando no yɛ ahorow dɛmara. Yɛrosom wɔ “kwan a ɔkrɔn na krɔnkrɔn mu,’’ ² Bra, Bɛka Mo Do adzesũa nhyehyɛɛ, na fie adzesũa a ɔgye Asɔr mboa no ehyira hɛn abrabɔ. Beberee ama ayamuhyehye mboa na awerɛkyekyer wɔ nkõdzen mber yinom mu na wɔkɔ do so yɛ. ³

Naaso, akwanhorow binom mu no, sunsum mu atseetsee nsɔhwɛ no ada akwan horow a wentwiwentwi na nkyekyɛmu ba no edzi. Iyi kyerɛ dɛ yɛwɔ edwuma yɛ dze sesã hɛn akoma na yɛbɛyɛ kor dɛ Agyenkwa no nokwar esuafo. Iyi nnyɛ ɔhaw fofor, mbom ɔyɛ dza ohia papaapa. ⁴

Ber a Agyenkwa no kɛseraa Nephifo no, Ɔkyerɛkyerɛɛ dɛ; “Na mma hom mma ekyingye biara mmba hom mu. … Obiara a wentwiwentwi sunsum wɔ no mu no nnyɛ medze, mbom ɔyɛ abɔnsam dze, ɔno nye wentwiwentwi n’egya, na onunu nyimpa hɔn akoma ma wɔdze ebufuw dzi aper.’’ ⁵ Sɛ yɛdze ebufuw nye hɛn ho dzi aper a, Satan serew na ɔsor Nyankopɔn no sũ. ⁶

Satan serew na Nyankopɔn sũ annyɛ koraa wɔ siantsir ebien ho ntsi. Odzi Kan, wentwiwentwi ma hɛn nkabɔmu dasegye ma Jesus Christ ne wiadze na ɔpon a ɔnam No “ndwuma pa, … n’ehumbɔbɔr, na n’adom,’’ ⁷ do ba no yɛ mberɛw. Agyenkwa no kãa dɛ, “Mbrasɛm fofor na medze mema hom, Dɛ hom ndodɔ homho nkorkor. … Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.” ⁸ Ne ndanho san so yɛ nokwar—obiara nyim dɛ sɛ yɛannkyerɛ ɔdɔ amma hɛnho nkorkor a nna yɛnnnyɛ N’esuafo. Sɛ wentwiwentwi anaa ɔtan wɔ N’esuafo ntamu a ⁹ Ne nda a odzi ekyir edwuma no nntum nnkɔ kan. ¹⁰ Otsĩa Ebien, wentwiwentwi nnyɛ sunsum mu adze papa mma hɛn dɛ yɛyɛ ankorankor. Ɔgye hɛn asomdwee, dɛwdzi, na ahomgye fi hɛn nsamu, na hɛn tum dɛ yɛbɛtse Sunsum no ne nkã no nntum nnkɔ kan.

Jesus Christ kyerɛkyerɛɛ mu dɛ nnyɛ Ne nkyerɛkyerɛ nye dɛ “[Ɔ]dze ebufuw bonunu adasa hɔn akoma ma woetsia hɔnho; mbom [dɛ Ne] nkyerɛkyerɛ, [nye] dɛ hom nnyi dɛm ndzɛmba yi akwa.’’ ¹¹ Sɛ minya ayawdzi ntsɛm anaa medze ebufuw anaa atsɛnbu yiyi adwenkyerɛ nsonsonee ano a, “menndzi’’ sunsum mu atseetsee nsɔhwɛ no do konyim. Nsɔhwɛ yi a menndzi ho konyim no nnkyerɛ dɛ minnyi enyidado. Mbom ɔda edzi dɛ mihia dɛ me sesã. Na dɛm no ye dɛ yebohu.

Agyenkwa no kɛseraa Amerikafo ekyir no, nkorɔfo no yɛɛ kor a; “nna wentwiwentwi biara nnyi asaase no do.’’ ¹² Ana edwen dɛ nkorɔfo no yɛɛ kor osiandɛ nna hɔn nyina yɛ pɛr, anaa osiandɛ nna wonnyi adwenkyerɛ nsonsonee? Minngye nndzi. Mbom, wentwiwentwi na ɔtan fii hɔ osiandɛ Agyenkwa no osuanyiyɛ no hia hɔn kyɛn adzebiara. Nna adze biara nnyi hɔ a sɛ wɔdze toto hɔn dɔ ma Agyenkwa no ho a ɔnye no sɛ, na nna wɔayɛ kor dɛ “Nyankopɔn n’ahenman mu adzedzifo.’’ ¹³ Nna no nsunsuando nye dɛ “nyimpa biara nnyi hɔ a Nyankopɔn dze ne nsa abɔ hɔn a … wonyaa ahomka tse dɛ dɛm nyimpa yi.’’ ¹⁴

Koryɛ hia mbɔdzenbɔ. ¹⁵ Sɛ yenya Nyame no dɔ wɔ hɛn akoma mu ¹⁶ na yetsim wɔ hɛn onnyiewiei hyɛbea do a, onyin. ¹⁷ Dɛ yɛyɛ Nyankopɔn ne mba ¹⁸ hɛn pisi wɔ asɛmpa nsanananmu no nokwaryɛ ho nye adze tsitsir kor a ɔka hɛn bɔ mu. Odzi do no, hɛn dɔ ma Nyankopɔn na hɛn osũanyiyɛ wɔ Jesus Christ ho no ma yɛhwɛ binom hɔn ehiadze nokwar mu. Binom hɔn suban, nhumu, na talent asorɔtow no som hɛn bo. ¹⁹ Sɛ yɛamma hɛn osuanyiyɛ ma Jesus Christ ennhia hɛn annkyɛn hɛnankasa hɛn enyikadze na mbrɛ yesi hwɛ adze a, ɔwɔ dɛ yɛsan hwehwɛ dza ohia hɛn ankasa mu yie na yɛsesã.

Yebotum asa mu akã dɛ, “Nokwar sɛ enye me bɛyɛ adwen dza—yebotum ayɛ kor!’’ Kwan papa nye ibisa dɛ, “Ebɛnadze na mubotum ayɛ ma koryɛ aba? Mibesi dɛn botum bɛyɛ bɔboa nyimpa yi ma ɔatwe abɛn Christ yie? Ebɛnadze na mubotum ayɛ dze ehuan wentwiwentwi do na maakyekyer ayamuhyehye na Asɔr kuw a ɔwɔ tsema?’’

Sɛ Christ no dɔ hyɛ hɛn do a, ²⁰ yɛdze botooyɛ, abotar, na ayamuyie hyia menntse moho ase. ²¹ Yɛnndwendwen hɛnara hɛn nkã-tse ho pii na yɛdwendwen hɛn fipamfo dze ho yie. “Yɛhwehwɛ dze ɔdwe ba na yɛka bɔ mu.’’ ²² Yɛmmfa hɛnho nnhyɛ “ekyingye aperperdzi mu,’’ yemmbua hɔn a yɛnye hɔn nnyɛ adwen no atsɛn, anaa yɛmmbɔ mbɔdzen nnyɛ ma wommfintsiw. ²³ Mbom, yɛfa no dɛ hɔn a yɛnye hɛn nnyɛ adwen no dze abrabɔ mu sũahu horow a wɔwɔ no reyɛ dza oye biara a wobotum ayɛ.

Me yer ayɛ edwuma dɛ mbranyimnyi bɔbor mfe 20. Dɛ mbranyimnyi no, nna ɔtɔ dɛ ɔnye hɔn a wɔda edzi pefee dɛ wɔtaa wɔ adwenkyerɛ a ɔbɔ ebira no yɛ edwuma. Naaso osũae dɛ ɔnye hɔn nnkɛyɛ adwen a ɔannyɛ ntsɛn anaa no bo mmfuw. Nna otum kã kyerɛ mbranyimnyi no a oridzi etsia no dɛ, “Mutum hu dɛ hɛn adwen nnkɛyɛ kor wɔ asɛm yi ho. Mepɛ w’asɛm. Midzi w’adwenkyerɛ no nyi. Mowɔ enyidado dɛ ibotum dze enyidzi kor noara ama me.’’ Ɔtɔ dɛ, wonya enyidzi ma hɔn ho na anyɛnkoyɛ wɔ nsonsonee mpo mu.

Nkaano atamfo mpo botum ayɛ kor wɔ hɔn Agyenkwa no osuanyiyɛ ho. ²⁴ Afe 2006 mu no, mokɔr Helsinki Finland Temple tu hyɛ Nyame nsa dwumadzi ase dze hyɛɛ m’egya na nananom a nna wɔyɛ abɔase nsakyereefo ma Asɔr no wɔ Finland enyimnyam. Nna Finlandfo a m’egya kã ho no asõ temple wɔ Finland ho daa mfe du mfe du. Mber no, nna temple mansin no bɛfa Finland, Estonia, Latvia, Lithuania, Belarus, na Russia akã ho.

Tu hyɛ Nyame nsa dwumadzi ase no, musũaa adze soronko bi. Nna da a odzi kan no mu dwumadzi nyina no wɔdze esi hɔ ama Russiafo asɔrmba dɛ wɔnyɛ temple ayɛdze horow. Ɔyɛ dzen dɛ mubotum akyerɛkyerɛ mbrɛ iyi sii yɛe ahobow mu. Nna Russia na Finland nye hɔnho edzi akõkõekõ mfe ɔha mfe ɔha. M’egya anngye Russia enndzi na oennkyir no nko mbom Russiafo nyina so. Nna ɔada nkã-tse dzendzen a ɔtse dɛm edzi, na nna ne nkã-tse kyerɛ Finlandfo hɔn ɔtan ma Russia. Nna oesũa awensɛm pii a ɔwowar yie a ɔkyerɛɛ mfe aha a otsĩa 19 Finlanfo na Russiafo ntamu akõdzi ho mbermunsɛm no egu ne tsir mu. No sũahu horow wɔ Wiadze Ɔsatu II ber no, ber a nna Finland na Russia yɛɛ atamfo bio no, annyɛ hwee annsesã n’adwen.

Afe kor ansaana Helsinki Finland Temple tu hyɛ Nyame nsa dwumadzi no, temple abaguafo, a nna wɔyɛ Finland asɔrmba nkotsee no, hyiae dɛ wɔbɛpɛnsapɛnsa tu hyɛ Nyame nsa nhyehyɛɛ no mu. Nhyiamu ber no, obi hun dɛ Russiafo Ahotseweefo no botu kwan nda pii dze aba tu hyɛ Nyame nsa dwumadzi no ase na wɔwɔ enyidado dɛ wɔbɛgye hɔn temple nhyira horow ansaana wɔasan akɔ fie. Abaguafo guamutsenanyi, Onuabanyin Sven Eklund, susuii dɛ Finlandfo no botum atweɔn kakra, a Russiafo no botum edzi kan ayɛ asɔrmba a wɔbɛyɛ temple ayɛdze horow no wɔ Helsinki Finland Temple mu. Abaguafo nyina peen do. Nda a odzi Ekyir Ahotseweefo Finlandfo anokwafo tweɔɔn hɔn temple nhyira no ekyir dze maa Russian Ahotseweefo no kwan.

Apaamu President a nna ɔwɔ temple abaguafo nhyiamu mu bi no, Elder Dennis B. Neuenschwander, kyerɛɛw no ekyir dɛ: “M’enyi nnsɔɔ Finlandfo no nnkyɛn dɛ dɛm mber yi da. Wɔdze Finland n’abakɔsɛm dzendzen wɔ Russia ho … na hɔn enyigye koraa dɛ woesi [temple no bi] wɔ hɔnara hɔn asaase do no too nkyɛn. Wɔrema Russiafo no kwan ma woedzi kan ahɛn temple no nna [ɔyɛ] ɔdɔ na afɔrbɔ asɛm.’’ ²⁵

Mber a mobɔɔ ayamuyie yi ho amandzeɛ kyerɛɛ m’egya no, ne atsenkã sesãe na osũi, adze a ɔnntaa nnsi ma dɛm Finlandnyi a ɔmma biribi nnhaw no no. Ofi dɛm mber no dze kɔ kɛpem mfe ebiasa ekyir ana oruwu no, ɔannkyerɛ adwen bɔn biara ammfa Russia ho bio dabiarada. Ne mfɛfo Finlandfo hɔn fasusu kenyaan no no, m’egya sanmu yii dɛ ɔbɛma Jesus Christ ho osuanyiyɛ ehia no akyɛn adzebiara. Finlandfo no enngyaa Finlandfo yɛ, Russiafo enngyaa Russiafo yɛ; anaa kuw ebien no enngyae hɔn kusum, abakɔsɛm, anaa suahu horow mu dze ammpam ɔtan. Nna onnhia dɛ wɔbɛyɛ. Mbom, wɔsaanmu yii dɛ wɔbɛma Jesus Christ osuanyiyɛ abɛyɛ hɔn adze hia tsitsir. ²⁶

Sɛ woetum ayɛ a, hɛn so yebotum. Yebotum dze hɛn egyapadze, kusum, na sũahu horow aba Jesus Christ N’Asɔr. Samuel ammfɛr n’egyapadze ho dɛ ɔyɛ Lamannyi, ²⁷ nna Mormon so ammfɛr ne dze ho dɛ ɔyɛ Nephinyi. ²⁸ Naaso kor biara dze n’Agyenkwa no ho osuanyiyɛ dzii kan.

Sɛ yɛannyɛ kor a, nna yɛnnyɛ Ne dze. ²⁹ Mefrɛ nye yebesi enyimpi dze bɛma hɛn Nyankopɔn ho dɔ na Agyenkwa no ho osuanyiyɛ behia akyɛn adze nyinara. ³⁰ Hom mma yensuo ahyɛmudzi a ɔhyɛ osuanyiyɛ no mu—ahyɛmudzi dɛ yɛbɛyɛ kor.

Hom mma yendzi Ahotseweefo a wɔwɔ wiadze nyina mu a konyimdzi mu ara wɔrebɛyɛ Jesus Christ n’esuafo no hɔn fasusu do. Yebotum adan Jesus Christ, ɔno a ɔyɛ “hɛn asomdwee, a … oedwuruw fasu a otwa ntamu no egu famu; na oegura nyitan wɔ no [werdam afɔrbɔ] mu no egu.’’ ³¹ Hɛn dasee wɔ Jesus Christ ho dze ma wiadze no bɛhyɛ dzen, na yɛbɔkɔ do enya sunsum mu apɔwmudzen. ³² Megye dase dɛ ber a “yɛpow wentwiwentwi’’ na “yɛnye Ewuradze adwen bɛyɛ kor wɔ ɔdɔ mu na yɛnye no ayɛ kor wɔ gyedzi mu no,’’ N’asomdwee bɛyɛ hɛn dze. ³³ Jesus Christ ne dzin mu, amen.