Jesus Christ N’Asɛmpa no n’Anwanwadze horow

Mabuhay! Medze ɔdɔ na nyerɛw ano ahomka mu ara fi Philippines Ahotseweefo anwanwafo hɔ brɛ hom. Afe yi yɛ mfe 60 a asɛmpasomafo a wodzii kan no bodur Philippines nsupruw no do. Ndɛ yɛwɔ asɛmpakã dwuma mbea 23 na Asɔr mba bɔbor 800,000 wɔ 123 stake horow mu. Seseiara temple horow esuon na wodzi mu dwuma, worisi, anaa wɔabɔ ho dawur. Iyi yɛ anwanwadze ampa. Yeruhu nkɔnhyɛ ne mãhyɛ a ɔwɔ 2 Nephi 10:21 mu no: “Anohoba akɛse na Ewuradze abɔ ama hɔn a wɔwɔ po nsupruw do.”

Dɛm anwanwadze yi so yɛ nkɔnhyɛ ne mãhyɛ a Elder Gordon B. Hinckley maa wɔ ne mpaabɔ mu wɔ Manila wɔ 1961. Wɔ dɛm mpaabɔ no mu no, Elder Hinckley kãa dɛ: “Yɛserɛ Wo nhyira gu nkorɔfo a wɔwɔ asaase yi do, dɛ wɔbɛyɛ anyɛnkoyɛ na ahɔhogye na ayamuyie na adom ama obiara a ɔbɛba ha, na dɛ pii, nyew, Ewuradze, yɛbɔ mpaa dɛ [pii,] mpempem pii bɛgye nsɛm yi na woenya nhyira wɔ mu. Edze adwen a ɔgye na ntseasee akoma, na gyedzi a wɔdze gye nye akokodur a wɔdze dzi asɛmpa ne nkyerɛkyerɛ no do behyira hɔn” (tu hyɛ Ewuradze nsa mpaabɔ wɔ American War Memorial Cemetery, Philippines, Ebɔbira 28, 1961).

Latter-day Saintfo anokwafo mpempem pii ekyir no, asɛmpa no n’anwanwadze dze nsesã pa abrɛ ɔman no na no nkorɔfo. Meyɛ iyi ho dasefo ɔtseasefo. Nna meedzi mfe esia ber a m’awofo dɔɔm Asɔr no wɔ anaafo nsupruw Mindanao. Dɛm mber no nna asɛmpakã dwuma bea kortsee na ɔwɔ ɔman ne nyina mu na stake biara nnyi hɔ. M’enyi sɔ afebɔɔ ma m’awofo hɔn akokodur na pisi dɛ wobedzi Agyenkwa no n’ekyir. Midzi hɔn na Asɔr no n’abɔasefo a wɔwɔ Philippines nyina nyi. Wobuee kwan no too hɔ ama ebusuasantsen a wɔreba no enya nhyira.

Ɔhen Benjamin kãa no wɔ Mormon Nwoma no mu dɛ: “Na bio, mebɛpɛ dɛ hom dwendwen nhyira nye ahomka tsebew a hɔn a wodzi Nyankopɔn ne mbrasɛm do no wɔ mu. Na hwɛ, woehyira hɔn wɔ adze nyina mu, wɔ honam nye sunsum nyina mu” (Mosiah 2:41).

Ber a yɛyɛ setsie na yɛdze asɛmpa no ne fapem na ayɛdze horow bɔ bra no, yenya nhyira, yɛsesã, na yɛsakyer bɛyɛ dɛ Jesus Christ yie. Dɛm na asɛmpa no sii faa sesãa na ohyiraa Filipino Ahotsewfo no a, m’ebusua kã ho. Nokwar mu ara asɛmpa no gya hɛn kwan kɔ enyigye, abrabɔ prɔmprɔm mu.

Asɛmpa ne fapem a odzi kan nye gyedzi wɔ Ewuradze Jesus Christ mu. Filipinofo piinaara gye Nyankopɔn dzi. Ɔnnyɛ hɛn dzen dɛ yɛdze hɛn werɛ bɛhyɛ Jesus Christ mu na yenyim dɛ yebotum enya hɛn mpaabɔ ho nyiano.

Obedoza ebusua yɛ iyi ho fasusu mapã. Nna Onuabanyin Obedoza yɛ mo nkorbata president ber a nna meyɛ aberantsɛba no. Nna Onuabanyin na Onuabaa Obedoza hɔn pɛ kɛse papaapa nye dɛ wɔbɔsɔw hɔn ebusua ano wɔ Manila Temple mu. Nna wɔtse General Santos kuropɔn mu, akwansin 1,000 fi Manila. Ma ebusuafo akron no, nna worutu kwan akɔ temple no yɛ dɛ ɔnnkɛyɛ yie. Naaso tse dɛ batanyi no a ɔtɔɔn dza ɔwɔ nyina dze kɔtɔɔ ahondze kor a no bo sõ no (hwɛ Matthew 13:45–46), dɛm awarfo yi bɔɔ adwenpɔw dɛ wɔbɔtɔn hɔn dan dze etua akwantu no ho kaw. Ɔhaaw Akerɛbaa Obedoza osiandɛ sɛ wɔsan ba a wonnya fie a wɔbɛtsena mu. Naaso Onuabanyin Obedoza maa no awerɛhyɛmu dɛ Ewuradze bɛyɛ.

Wɔsɔɔw hɔn ano dɛ ebusua mber yi mu na mbersantsen nyina wɔ temple wɔ 1985 mu. Wɔ temple hɔ no wonyaa enyigye a onnyi esusudze—hɔn bota a ɔsom bo mapã. Na dɛ ma Onuabanyin Obedoza kãa noara, Ewuradze yɛɛ. Wofi Manila baa no, anyɛnkofo ayamuyiefo maa hɔn beebi beebi pii ma wɔtsenae, na ekyir no wonyaa hɔn ankansa hɔn fie. Ewuradze hwɛ hɔn a wɔkyerɛ hɔn gyedzi wɔ No mu.

Asɛmpa ne fapem a otsĩa ebien nye nnuhu. Nnuhu nye eredan efi bɔn ho na eredan akɔ Nyankopɔn hɔ akɛserɛ bɔnfakyɛ. Ɔyɛ adwen na akoma nsakyer. Dɛ ma President Nelson kyerɛkyerɛ no, ɔyɛ “ndzeyɛɛ na papayɛ nkakrankakra da kor biara” (“ We Can Do Better and Be Better ,” Liahona, Esusow Aketseaba 2019, 67).

Nnuhu tse dɛ semina ara. Mber a meyɛ aberantsɛba ndur mfirdwumanyi no, nna meyɛ edwuma wɔ semina dwumakuw bi mu wɔ Philippines. Musũaa mbrɛ wosi yɛ semina na kwan a ɔfa do si yɛ edwuma. Sɛ edze ngo fora alkali base na edze dza okum mboaba kã ho a, ɔma adze a n’ano yɛ dzen a obotum eyi mboabamboaba efi hɔ. Tse dɛ semina, nnuhu yɛ adze a wɔdze yi fĩ. Ɔma hɛn kwan ma yeyi hɛn fĩ na ndzɛmba mbubui adadaw tow gu ama yeedzi mu dɛ yɛnye Nyankopɔn bɛtsena, osiandɛ “adze fĩ biara runntum nntsena [Nyankopɔn] n’ahenman no mu” (Alma 11:37).

Ɔnam nnuhu do yebotum enya Jesus Christ n’ahotsew nye krɔnkrɔnyɛ tum no. Ɔyɛ ɔfã tsitsir wɔ nsakyeree kwan no do. Iyi nye dza osii Anti-Nephi-Lehifo do wɔ Mormon Nwoma no mu. Nna wɔyɛ Lamanfo a woeenya nsakyer a odzi mu ara ma “wɔannkɔ asehwe mu ara da” (hwɛ Alma 23:6–8). Wosiee hɔn akodze na wɔammfa no bio. Nkyɛ wobowuwu kyɛn dɛ wobobu ahyɛmu no do. Na wɔkyerɛɛ so. Yenyim dɛ hɔn afɔrbɔ dze anwanwadze baa; mpempem a wɔkõe tsia hɔn no tow hɔn akodze guguu daadze na wɔsakyeree. Mfe kakra ekyir no hɔn mba mbanyin a, yenyim hɔn dɛ mberantsɛ akofo akatakyi no, nyaa ahobambɔ wɔ ɔkõ a nkyɛ onnkedzi aboa hɔn koraa mu!

M’ebusua na Filipino Ahotseweefo pii faa nsakyeree kwan a ɔtse dɛm do. Ber a yɛgyee Jesus Christ n’asɛmpa no na yɛ dɔm Asɔr no, yɛsesãa hɛn akwan na hɛn amambra ma ɔnye asɛmpa no fae. Nna yɛwɔ amambra pii a ɔnnyɛ a yegyaa mu. Muhun iyi wɔ m’egya no mu ber a osũa asɛmpa no na onuu noho. Nna ɔnom sigyarɛtse ankasa naaso ɔtoow ne sigyarɛtse horow kyenee a oennsuo kor mu bio da. Ɔnam ne ngyina si dɛ ɔbɛsesã ntsi, ebusuasantsen anan a wofi no mu no enya nhyira.

Nnuhu gya hɛn ma yedua ayɛdze krɔnkrɔn do yɛ na yesie ahyɛmudzi horow. Ayɛdze a odzi kan wɔ nkwagye na ntowdo mu nye nsumuhyɛ enuma a ɔwɔ hɔ ma bɔnfakyɛ. Enuma ma hɛn kwan ma yɛgye Sunsum Krɔnkrɔn n’akyɛdze no na yɛnye Nyankopɔn dzi ahyɛmu. Yebotum ayɛ dɛm enuma ahyɛmu no fofor dapɛn biara ber a yɛfa sacrament no. Iyi so yɛ anwanwadze!

Enuanom na nkyerɛbaa, moto nsa frɛ hom dɛ hom mfa dɛm anwanwadze yi mbra hom abrabɔ mu. Bra Jesus Christ hɔ na san mu yi dɛ edze gyedzi bedzi dwuma wɔ No mu; nu woho na yɛ ahyɛmudzi horow a ɔwɔ nkwagye na ntowdo ayɛdze no mu na sie. Iyi bɔboa wo ma enye Christ atwe kɔndua kor na enya nyamesu mu tum na nhyira (hwɛ Nkyerɛkyerɛ na Ahyɛmudzi 84:20).

Megye dase fa Jesus Christ No nokwar ho dɛm dɛ Ɔtse ase na Ɔdɔ hɛn mu kor biara. Minyim dɛ N’asɛmpa no botum dze enyidado, asomdwee, na dɛw abrɛ hɛn, nnyɛ seisei nkõ, mbom obehyira mpempem binom so wɔ ndaamba ebusuasantsen mu. Iyi nye Filipino Ahotseweefo no hɔn ahomka anoyerɛw fɛɛfɛw no ne siantsir. Ɔyɛ Christ N’asɛmpa na nkyerɛkyerɛ no n’anwanwadze. Midzi iyi ho dase wɔ Jesus Christ ne dzin krɔnkrɔn mu, amen.