Ahosiesie ma Christ Ne Mbae a Otsĩa Ebien

Dɛ mbrɛ ɔakyerɛw no wɔ Mormon Nwoma no mu no, mfe esia ansaana wɔbɔwo Jesus Christ no, Samuel, Lamannyi a ɔtsen, hyɛɛ nkɔm kyerɛ Nephifo a nna dɛm mber no hɔn mu pii noara abɛyɛ etuatsewfo no, ¹ faa nsɛnkyerɛdze a obegya hɛn Agyenkwa no n’awoo kwan ho. Awerɛhow mu ara, Nephifo pii poow dɛm nsɛnkyerɛdze no osiandɛ “onnkehia dɛ nyimpa a ɔtse dɛ Christ bi bɛba.” ²

Awerɛhow mu ara, dɛ ma kyerɛwsɛm no kã no, Jewfo pii, dɛmara so, enntum anngye annto mu dɛ ɔbarimba bi a wɔfrɛ no Jesus a, ofi Galilee kurow a wommbu no bi no mu no, nye Messiah na wɔatweɔn no mber tsentsen no. ³ Jesus a, Ɔaba ampara rebɛhyɛ nkɔnhyɛ pii a Hebrew nkɔnhyɛfo ahyɛ no mã no, wɔpoow no na mpo wɔbɔɔ no mbeamudua mu osiandɛ, dɛ ma Mormon Nwoma nkɔnhyɛnyi Jacob kyerɛɛe no, Jewfo no “hwɛɛe traa do.” Dɛm ntsi, Jacob gyee dase dɛ “Nyankopɔn eyi dza ɔma ɔyɛ pefee no efi hɔn enyido, na ɔdze ndzɛmba pii a wonntum nntse ase ahyɛ hɔn ananmu, osiandɛ dɛm na wɔpɛ. Na osiandɛ wɔpɛ dɛm ntsi Nyankopɔn ayɛ no dɛm ama woeefintsiw.” ⁴

Ɔyɛ hu dɛ, nkyerɛkyerɛ biara nnyi hɔ, anwanwadze biara nnyi hɔ, na mpo sor ɔbɔfo no mpueii, tse dɛ ma Laman na Lemuel hunii no, biara nnyi hɔ a, ⁵ ɔyɛ dɛ otum nya nhyɛdo tum wɔ binom do a ogya hɔn ma wɔsesã hɔn kwan, nhwɛmu, anaa gyedzi dɛ biribi yɛ nokwar. Ɔtse dɛm nkanka ber a nkyerɛkyerɛ anaa anwanwadze nye onyia no ne pɛ, anaa n’adwenkyerɛ binom a ɔwɔ no dadaw no bɔ ebira.

Meserɛ dɛ hwɛ nsonsonee a ɔda kyerɛwsɛm ebien yi mu, dza odzi kan no fi Ɔsomafo Paul hɔ a ɔkasa fa nda a odzi ekyir ho, a ɔkyerɛ nyimpa n’akwan, na dza otsĩa ebien no fi Alma Nkɔnhyɛnyi no hɔ a ɔkyerɛ mbrɛ Nyankopɔn si dzi No dwuma wɔ adasa hɔn mu. Odzi kan fi Paul hɔ:

“Na hu iyi dɛ, nda a odzi ekyir no mu no awerɛhow ber bɛba.

“Na nyimpa bɛyɛ ahopɛfo, sikapɛfo, ahohyehyɛfo, ahoramfo, ndzebɔfo, awofo do asoɔdzenfo, bɔnyiayɛfo, hɔn a hɔn ho nntsew,

“Hɔn a wonnyi dɔ, asɛnkadofo, nsekubɔfo, hɔn a wonnyi ahohyɛdo, abɔyafo, hɔn a wɔmmpɛ papa,

“Yimafo, etsiɔdzenfo, enyimenamfo, hɔn a wɔdɔ enyigye sen Nyame; …

“Hɔn a akɔndɔ horow dze hɔn rokɔ a wosũa daa, naaso wonntum nndu nokwar nyimdzee ho da no.” ⁶

Afei dza ofi Alma hɔ, a ɔrekyerɛ Jesus Christ asɛmpa ne nkyerɛkyerɛ fapem bi: “Afei ebɔdwen dɛ dza merekã yi yɛ nkwaseasɛm; na mbom hwɛ mese wo dɛ, ɔnam akwan nketsenketse do nna ndzɛmba akɛse dua ba; na mpɛn pii na ndzɛmba a ɔtsetse dɛm hyɛ enyansafo fɛr.” ⁷

Yɛtse wiadze mu a nyimdzee kɛse na hɔn a wɔawea wɔ ndwuma ho ahyɛ mu mã. Naaso, mpɛn dodow ara iyinom tum bir fapem a ohihim a woesisi wɔ do no. Dɛm ntsi, wonngya nnkɔ nokwar ankasa ho na Nyame ho na tum a wɔdze nya nyikyerɛ, sunsum mu nyimdzee, na ɔma yenya gyedzi wɔ Jesus Christ mu a ɔdze kɔ nkwagye mu no ho. ⁸

Wɔakaa hɛn pefee wɔ hɛn Ewuradze Ne nsɛm a ɔdze maa Thomas na esũafo binom wɔ Ne werdam afɔrbɔ no n’anafua no: “Jesus see no dɛ, Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do.” ⁹

Hɔn a wɔwɔ enyiwa a wɔdze hwɛ, asowa a wɔdze tsee, nye akoma a wɔdze hu no, hia ndɛ kyɛn da biara, dɛ yɛgye to mu dɛ yɛrebɛn Jesus Christ Ne Mbae a Otsĩa Ebien no ho papaapa. Nokwar, haw kɛse wɔ hɔ ma hɔn a wɔbɔwɔ asaase do wɔ Ne mbae no, naaso wɔ iyi mu no, anokwafo nnhia dɛ wosuro.

Seisei mekenkan mber kakra bi fi Asɔr Asɛmpa Nsɛngyinado mu dza ne tsir yɛ “Jesus Christ Ne Mbae a Otsĩa Ebien”:

“Sɛ Agyenkwa no ba bio a, Ɔbɛba no tum nye enyimnyam mu abɛfa asaase no dɛ N’ahenman. Ne Mbae a Otsĩa Ebien no bɛyɛ Mfe Apem ber no n’ahyɛse.

“Mbae a Otsĩa Ebien no bɛyɛ suro, awerɛhow ber ama emumuyɛfo, naaso ɔbɛyɛ asomdwee da ama atseneneefo. Ewuradze apaamu akã dɛ:

“Na hɔn a wɔyɛ enyansafo na wɔgyee nokwar no, na wɔfaa Sunsum Krɔnkrɔn no dze yɛɛ hɔn kwankyerɛfo, na wɔamma wɔanndaadaa hɔn no—nokwar, mese hom dɛ worunntwa hɔn nnto famu na wɔnntow hɔn nnkyen ogya mu, mbom, wobotum egyina wɔ da no mu.

“Na wɔdze asaase no bɛma hɔn ma ɔaayɛ hɔn egyapadze; na wɔbɔdɔr na hɔn ho bɛyɛ dzen, na hɔn mba benyin na wɔrennyɛ bɔn dze akɔ nkwagye mu.

“Na Ewuradze bɛtsena hɔn finimfin, na n’enyimnyam bɛba hɔn do, na ɔbɛyɛ hɔn hen na hɔn mbrahyɛfo (Nkyerɛkyerɛ na Ahyɛmudzi 45:57–59).” ¹⁰

Wɔ hɛn ahosiesie ma Jesus Christ Ne Mbae a Otsĩa Ebien mu no, mema ehiasɛm a, ɔyɛ awerɛkyekyer ma anokwafo a mefa fi Ahyɛmu Dadaw Nkɔnhyɛnyi Amos hɔ: “Ewuradze Nyankopɔn rennyɛ biribi, gyedɛ oeyi n’esumasɛm akyerɛ no nkowaa nkɔnhyɛfo no ansaana.” ¹¹

Dɛm sunsum yi mu no, Ewuradze Ne nkɔnhyɛnyi ma wiadze ndɛ, President Russell M. Nelson, ama hɛn dɛm nkenyan afotu yi ndaansa yi: “Jesus Christ N’asɛmpa no yɛ nnuhu asɛmpa. Osian Agyenkwa No Werdambɔ no ntsi, N’asɛmpa no ma hɛn nsato dɛ yɛnkɔ do nsesã, nyin, na hɛnho ntsew yie. Ɔyɛ enyidado asɛmpa, ayarsã, na mpontu. Dɛm ntsi asɛmpa no yɛ enyigyesɛm! Hɛn esunsum dzi dɛw wɔ anamɔn kor biara a yetu kɔ kan.” ¹²

Megye dase a ekyingye biara nnyi ho wɔ nokwar no dɛ Nyame wɔ hɔ nna anwanwadze horow a ɔwɔ nyimpa pii hɔn daa daa abrabɔ mu ho, fi mbea nkuma na akɛse wɔ abrabɔ mu. Nokwar, sũahu krɔnkrɔn pii na wɔnntaa nnkã ho asɛm, ne fã bi ɔnam dɛ ofi sor na dɛ obotum esi dɛ binom a wonnyim papa besi ho atwetwe.

Dɛm ntsi, Mormon Nwoma no no nkɔnhyɛnyi a odzi ewiei, Moroni, kaakaa hɛn dɛ:

“Na afei mekasa kyerɛ hom a hom pow Nyankopɔn ne nyikyerɛ, na hom kã dɛ woetwa mu kɔ dada, na dɛ nyikyerɛ, anaa nkɔnhyɛ, anaa akyɛdze, anaa ayarsa, anaa kasa horow, nye kasa horow ne nkyerɛase nnyi hɔ;

“Hwɛ mese hom dɛ nyia ɔpow dɛm ndzɛmba yi no nnyim Christ n’asɛmpa no; nyew, ɔnnkenkaan kyerɛwsɛm no; sɛ ɔakenkan so a, nna ɔnntse ase.

“Ana yɛnnkenkaan dɛ mbrɛ Nyankopɔn tse dɛm ndeda, ndɛ na afebɔɔ, na nsakyer bi nnyi no mu anaadɛ biribi a ɔkyerɛ nsakyer nnyi no mu?” ¹³

Medze me nsɛm ba ewiei no mema hom Nkɔnhyɛnyi Joseph Smith ne nkenyan nkɔnhyɛ a, ɔdze mae ber a orubowie no somdwuma a n’enyi da Jesus Christ Ne Mbae a Otsĩa Ebien no kwan: “Ana ɔnnsɛ dɛ yɛkɔ do boa wɔ dɛm dwumadzi kɛse yi mu? Hom nkõ nkɔ hom enyim na mma hom nnsan hom ekyir. Hom nnya akokodur, enuanom [na nkyerɛbaa]; na wɔnkɔ do, wɔnkɔ do nkedzi konyim! Hom mma hom akoma ndzi dɛw, na hom enyi ngye kɛse.” ¹⁴ Megye iyi ho dase wɔ Jesus Christ ne dzin mu, amen.