Nsɛm a Ofi M’Akoma Mu

Mo nuambanyin na nkyerɛbaa, ber a mesan migyina hɛn Ehyiadzi Asoɛe a yɛpɛ no dodow no, mekaa Ɔsomafo Peter ne nsɛm a ɔkãe dɛ: “Ewuradze, oye ma hɛn dɛ yɛtsena ha.’’ ¹

M’adwendwen ndɛ no gyina nkɔnhyɛnyi Nephi, a Egya Lehi no wu ekyir no ɔkyerɛɛw no nkorɔfo hɔn abakɔsɛm siei, ne nsɛm do. Nephi kyerɛɛw dɛ, “Na, mprɛtse yinom do na mekyerɛw nsɛm a ofi m’akoma mu.’’ ²

Nna mekenkan nyiyimu yi a, modwen dɛ kasafua ndzɛmba no mmfata anaa sunsum nnyi mu, ɔnnyɛ nwanwa biara a ɔnye “me kra’’ bɛnantsew. Naaso m’esũa dɛ kasafua things no wɔ kyerɛwsɛm no mu mpɛn 2,354. ³ Mfatoho, Moses nwoma mu no: “Emi nye Ahyɛse na Ewiei no, Otumfo Nyankopɔn no; menam nyia mo Woo no Kortoo no do na mobɔɔ ndzɛmba yinom.’’ ⁴ Na Nephi ne nsɛm: “Hwɛ, me kra n’enyi gye Ewuradze ne ndzɛmba ho; na m’akoma kɔ do dwendwen ndzɛmba a mehu na matse ho daa nyina.’’ ⁵

Nephi ne nsɛm dze nsɛmbisa no ba dɛ “Ebɛn ndzɛmba na edwendwen ho?’’ “Ebɛn ndzɛmba na wohia ma wo ankasa?” Ebɛnadze nye nsɛm a ofi w’akoma mu?’’

Yɛdze nsɛmbisa taa nya nsɛm a ofi akoma mu nkyerɛkyerɛ mu na yenya ntowdo.

Wiadze nsan yarba ber mu no meedua dawurbɔ na social media do ehyia mbabun fi wiadze ne beebiara wɔ mpaabɔsom mu, ekuw akɛse na nkakraba, na yɛapɛnsapɛnsam hɔn nsɛmbisa mu.

Nna mfe duanan Joseph Smith wɔ asɛmbisa wɔ n’akoma bun mu, na ɔdze kɔr Ewuradze hɔ. President Russell M. Nelson etsĩ mu dɛ: “Fa wo nsɛmbisa kɔ Ewuradze nye nokwar fibea horow hɔ. Sũa adze a ewɔ pɛ dɛ ebɛgye edzi kyɛn dɛ edze enyidado bɔhwehwɛ sintɔ bi wɔ nkɔnhyɛnyi n’abrabɔ mu anaa kyerɛwsɛm mu mfomdo bi. Gyaa dɛ enye ekyingyefo binom so rekã w’ekyingyesɛm … dze atow w’ekyingye mu. Ma Ewuradze ndzi wo kan wɔ wo sunsum mu akwantu mu.’’ ⁶

Mbabun taa bisa me dza megye dzi na siantsir a megye dzi.

Mekaa dɛ meserɛɛ basiaba bi wɔ internet do wɔ ne fie. Mibisaa no sɛ dɛm da no nye dza odzi kan a Ɔsomafo aba ne fie. Ntsɛmara ɔyerɛɛw n’ano na obuaa dɛ, “Nyew.’’ Nna n’asɛmbisa ma me no ye: “Ebɛn ndzɛmba na ohia dodoodow a ɔwɔ dɛ muhu?’’

Medze nsɛm a ofi m’akoma mu yii no ano, nsɛm a osiesie me ma metse nkenyan, a ɔma mema m’adzehwɛ do tra wiadze akwan do, a ɔma m’edwuma wɔ asɛmpa no mu na mara m’abrabɔ ankasa ho botãe.

Menye hom nkyɛ nsɛm a ofi m’akoma mu no bi a? Nsɛm yinom kɔ ma hɔn a wɔhwehwɛ dɛ wɔbɛyɛ Jesus Christ no nokwar esuafo no nyina hɔ. Ɔbɛyɛ mberɛw dɛ hom bɛkaa no mu du. Ndɛ merema hom esuon a mowɔ enyidado dɛ hom dze homara hom sũahu ahorow bowie awɔtwe, akron, na du no.

Odzi Kan, dɔ Nyankopɔn Egya no na Jesus Christ, hɛn Agyenkwa.

Jesus hyɛɛ mbrasɛm kɛse a odzi kan no dɛ: “Dɔ Ewuradze wo Nyankopɔn wɔ w’akoma nyina mu, nye wo kra nyina mu, nye w’adwen nyina mu.” ⁷

President Nelson paa mu kãa no som ma Nyankopɔn, hɛn Onnyiewiei Egya, na Ne Ba, Jesus Christ, mber a wɔfrɛɛ no dɛ ondzi Ewuradze N’Asɔr baano, a ɔkãa dɛ, “Minyim Hɔn, modɔ Hɔn, na mobɔ anohoba dɛ medze mo nkwa nda a aka nyina bɔsom Hɔn—nye—hom.’’ ⁸

Ntsi odzi kan, dɔ Nyankopɔn na Jesus Christ.

Otsĩa ebien,“Dɔ wo nyɛnko.’’ ⁹

Dɛm no nnyɛ nsusui papa ara; ɔno nye mbrasɛm kɛse a otsĩa ebien no. Hom anyɛnkofo nye hom hokafo na ebusua, ward asɔrmba, edwumayɛfo, danmufo, hɔn a wɔnnye hɛn nnsom, hɔn a wohia mboa, na, pẽn pẽn no, obiara. “Dɔ wo nyɛnko’’ n’asɛntsitsir no wɔtow no wɔ asɔr ndwom “Love One Another.’’ ¹⁰

President Nelson bɔ hɛn nkaa dɛ, “Sɛ yɛdze hɛn akoma nyina dɔ Nyankopɔn a, Ɔdan hɛn akoma kɔ binom hɔn yieyɛ do.’’ ¹¹

Otsĩa ebiasa, dɔ wankasa wo ho.

Iyi nye bea a dodowara dze dzi aper. Ana ɔnnyɛ nwanwa dɛ ɔyɛ dɛ yɛrodɔ hɛnakasa hɛnho no nnyɛ mberɛw dɛ yɛbɔdɔ binom? Naaso Ewuradze akã dɛ, “Hom ndɔ hom nyɛnko dɛ homankasa homho.’’ ¹² Nyamesu a ɔhyɛ hɛn mu no som No bo, na otwar dɛ yɛyɛ dɛmara. Sɛ mfomdo, ayawdzi, esintɔ, abagura, ebufuw, anaa bɔn adzesoadze kɛse da hɛn do a, Agyenkwa No Werdambɔ no tum no, a Nyankopɔn hyehyɛɛ no, yɛ ndzɛmba no mu kor a opegya ɔkra no.

Otsĩa anan, sie mbrasɛm no.

Ewuradze akã no pefee dɛ: “Sɛ hom dɔ me a, hom ndzi me mbrasɛm do.’’ ¹³ Hom mper dabiara na hom nyɛ adze yie kakra na hom nkɔ kan wɔ tseneneeyɛ mu.

Otsĩa enum, aber nyina fata dɛ ebɔkɔ temple.

Mefrɛ no dɛ Ewuradze akamfo wo. Sɛ itum kɔ temple anaa nntum a, efata dɛ ikitsa temple recommend no ma etsim yie wɔ ndzɛmba a ohia no do, ahyɛmudzi anamɔn kwan no.

Otsĩa esia, dzi dɛw na ma w’enyi ngye.

Ewuradze akã dɛ, “Hom enyi ngye, na mma hom nsuro,’’ ¹⁴ Dɛn ntsi a? Osi dɛn yɛ, ber a nsɔhwɛ taataa hɛn? Osian anohoba no a Jesus Christ bɔe no ntsi: “Emi Ewuradze, menye hom wɔ hɔ, na mibegyina hom fã.’’ ¹⁵

President Nelson kã asɛmpa nsanananmu no ho asɛm dɛ “enyigye ho asɛm!’’ ¹⁶ Na ɔkyerɛkyerɛ mu dɛ, “Hɛn abrabɔ mu enyigye a yɛtse no mmfa gyinabew horow a yɛwɔ mu ho, mbom ɔfa adzebiara a hɛn abrabɔ tsim do ho.” ¹⁷

Otsĩa esuon, ka Nyankopɔn no nkɔnhyɛnyi tseasefo no do.

Ebia iyi bɛyɛ me ndzɛmba a m’akyerɛw nkorkor no dza otsĩa esuon, naaso ɔno nye dza odzi kan a ɔda m’adwen do wɔ noho hia a ohia ho ndɛ.

Yɛwɔ Nyankopɔn no nkɔnhyɛnyi wɔ asaase no do ndɛ! Mma nndwen dɛ noho nnhia mma wo. Kaa basiaba no a mekãa noho asɛm ahyɛse no. Nna ɔpɛ dɛ ohu ndzɛmba a noho hia dodoodow. Mekãa no wɔ hɔ na mitsĩ mu bio ndɛ, “Ereka nkɔnhyɛnyi tseasefo no do.’’

Yɛda nsew dɛ Asɔr a nkɔnhyɛfo, adzehufo, na nyikyerɛfo a Nyankopɔn afrɛ hɔn mber yi dzi hɛn kan. Mobɔ anohoba dɛ ber a itsie hɔn na idzi hɔn afotu do no, erennyew dabiarada. Dabiarada!

Yɛtse mber bi mu a wɔdze hɛn “dzi akɔnaaba,’’ ¹⁸ ber a sunsum mu asɛm, enyidzi, nokwardzi, na obu nnyɛ hwee. Ɔwɔ dɛ yɛyɛ nsanmuyi horow. Yɛwɔ Ewuradze ne ndze a odua No nkɔnhyɛnyi do ma ɔdwedwe hɛn suro na opegya hɛn enyi, osiandɛ sɛ President Nelson kasa a, ɔkasa ma Ewuradze.

Wɔdze kyerɛwsɛm na nkyerɛkyerɛ ehyira hɛn a wɔbɔ hɛn nkaa dɛ, “Na nnyɛ m’adwen nye hom adwen, eso nnyɛ hom akwan nye m’akwan, Ewuradze na ɔse.’’ ¹⁹

Dɛmara na Naaman yɛe, ɔsafohen kɛse wɔ Syria, na mbom ɔyɛ kwatanyi a, wɔkãa kyerɛɛ no dɛ nkɔnhyɛnyi Elisha botum asã no yar. Elisha somaa abɔfo ma wɔkɛsee Naaman dɛ onkoguar wɔ Esutsen Jordan mu mpɛn esuon na no honam befir. Naaman no bo fuwii. Nokwar ara nna esutsen kɛsenara wɔ hɔ kyɛn Jordan, na ɔyɛ dɛn na ɔsoma akowaa ber a nna n’enyi da kwan dɛ Elisha, nkɔnhyɛnyi no, ankasa bɛsã no yar? Naaman sii mu kɔree, mbom nkowaa no twee pinii bɛkasaa kyerɛɛ no dɛ: “Ana sɛ nkɔnhyɛnyi no kãa kyerɛɛ wo dɛ yɛ adze kɛse bi a, aso nnkyɛ annyɛ bi a?’’ ²⁰ Ewiei no Naaman dze noho kɔɔbɔɔ Jordan mu mpɛn esuon na onyaa ayarsa.

Naaman n’asɛm no bɔ hɛn nkaa wɔ esian a ɔwɔ ntase mu na nyiyimu wɔ nkɔnhyɛsɛm afotu mu bi a ɔnnye hɛn adwendwen, enyidoadze, na ndɛ ndzeyɛɛ nnsɛ ho. Hɛn nkɔnhyɛnyi kɔ do ara kyerɛ hɛn hɛnara hɛn Esutsen Jordan ahorow ma yeenya ayarsã.

Nsɛm a ohia dodoodow a yebotum atse, yɛadwendwen ho, na yeedzi ekyir nye dza wodua hɛn nkɔnhyɛnyi tseaseafo do woyi kyerɛ. Megye dase dɛ menye President Nelson afa apam apɛnsapɛnsa Asɔr no na wiadze nsɛm a ɔyɛ dur mu, na meehu nyikyerɛ a ɔpem dua no mu. Onyim Ewuradze, onyim N’akwan, na ɔpɛ dɛ Nyankopɔn ne mba nyinara betsie Ɔno, Jesus Christ

Mfe pii na yeetsie efi nkɔnhyɛnyi no hɔ mpɛn ebien wɔ afe mu wɔ wiadze mfɛndzanan ehyiadzi ase. Naaso hɛn nda mu nsɛmansɛm hwuenyann no, President Nelson rotoatoado kasa mpɛn pii wɔ bagua mu, ²¹ social media do, ²² mpaabɔsom mu, ²³ na nsɛnkyerɛwfo nsɛmbisa mpo mu. ²⁴ Meehu no a ɔreyɛ ahoboa na ɔdze nyikyerɛ nsɛm a no mu dɔ a woekenyan enyisɔ mbordo, woekenyan hɛn nuanom mbanyin na nkyerɛbaa nyinara a wɔwɔ asaase do hɔn pɛryɛ kɛsenara, ma asomdwee, enyidado, dɛwdzi, apɔwmudzen, na ayarsã wɔ hɛn ankorankor abrabɔ mu enyin ho rotõ gua.

President Nelson yɛ nkɔmbɔdzinyi mapã, mbom dza ohia dodow no, ɔyɛ Nyankopɔn no nkɔnhyɛnyi. Sɛ edwen ho a ɔyɛ ahobow, naaso ɔyɛ adzehia dɛ yebohu dɛ n’akwankyerɛ pefee no bɔbɔ hɛnho ban efi ndaadaa, enyitsewsɛm, na wiadze nyansa a nyamesom nnkã ho a wɔregye nsamu wɔ ndɛ wiadze mu no ho. ²⁵

Nkɔnhyɛsɛm tum ne nyina nye nyikyerɛ. “Jesus Christ N’Asɛmpa no ne Mãhyɛ ne Nsananan mu no: Mfe Ahaebien Afrenhyia Dawurbɔ ma Wiadze,” wɔdze maa wɔ Ebɔbira 2020, wiadze mfɛndzeanan ehyiadzi mu no, tsĩ mu dɛ Ewuradze rekyerɛ edwuma yi kwan. Dawurbɔ yi mu no, President a Odzi Kan na n’Apamfo na Asomafo Duebien no hɔn Quorum no kã dɛ: “Yɛbɔ no dawur enyigye mu dɛ Nsanananmu a wɔbɔɔ ho anohoba no, dua nyikyerɛ a ɔkɔ do no do, dze kɔ kan. Asaase yi rennda ho nnyɛ dɛmara bio, osiandɛ Nyame ‘bɛkã ndzɛmba nyina abɔ mu kor wɔ Christ mu’ (Ephesusfo 1:10).” ²⁶

“Adze nyina wɔ Christ mu’’ ²⁷ na “nsɛm a ofi m’akoma mu’’ ²⁸ nye dza ɔfa Asɔr yi, asɛmpa yi, na nkorɔfo yi nyina ho.

Medze nsato ma hom mu kor biara dɛ hom nhwɛ “nsɛm a ofi m’akoma mu’’ esuon no a menye hom akyɛ ndɛ no: dɔ Nyankopɔn Egya no na Jesus Christ, hɛn Agyenkwa; dɔ wo nyɛnko; dɔ wo ho; sie mbrasɛm no; aber nyina fata temple recommend; dzi dɛw na ma w’enyi ngye; na kã Nyankopɔn no nkɔnhyɛnyi tseasefo no do. Moto nsa frɛ hom dɛ hom nhwehwɛ homara hom awɔtwe, akron, na du no. Hom nhwehwɛ akwanhorow a hom nye binom botum bɛkyɛ hom nokwar “nsɛm’’ na [hom] [n]hyɛ hɔn nkuran dɛ wɔmbɔ mpaa, wɔndwendwen ho, na wɔnhwehwɛ Ewuradze n’akwankyerɛ.

Nsɛm a ofi m’akoma mu som mo bo dɛ mbrɛ wo so wo dze som wo bo no. Nsɛm yinom hyɛ hɛn som wɔ Asɔr na abrabɔ n’afã beebiara mu dzen. Wɔma yenya pisi wɔ Jesus Christ mu, wɔbɔ hɛn nkaa wɔ hɛn ahyɛmudzi horow ho, wɔboa hɛn ma yenya bambɔ ho atsenkã wɔ Ewuradze n’abasa mu. Megye dase dɛ hɛn akra dze “ɔkɔm na nsukɔm renndze no da, mbom ɔbɛmee’’ ²⁹ a ɔdze No dɔ ber a yɛhwehwɛ dɛ yɛbɛyɛ N’esuafo anokwafo, ma yɛnye No ayɛ kor dɛ mbrɛ Ɔnye Egya no yɛ kor. Jesus Christ ne dzin mu, amen.