Gyedzi a wɔdze Bisa na Nkyii Wɔdze Dzi Dwuma

Mo nuanom na nkyerɛbaa adɔfo, ɔyɛ me enyisɔ dɛ menya kwan menye hom rekasa wɔ Memenda ewimbir wiadze mfɛndzanan ehyiadzi nhyiamu yi ase. Ne nyienyim wɔ anapa yi ehyiadzi ase no, President Russell M. Nelson kãa dɛ “nyikyerɛ a ho tsew ma hom akoma mu nsɛmbisa no bɛma ehyiadzi yi ayɛ mfaso na nkaadze. Sɛ nnyae nnhwehwɛɛ Sunsum Krɔnkrɔn no som no ma ɔaboa wo ma atse dza Ewuradze rohwehwɛ ma aatse no nda ebien yinom mu a, moto nsa frɛ wo dɛ yɛ no seseiara.” ¹ Mahwehwɛ dɛm nhyira no ber a maayɛ ahoboa dɛ mebenya nyikyerɛ wɔ hom nsera yi ho. Me mpaabɔ enyiber do nye dɛ nkyɛ hom benya nyikyerɛ efi Nyame hɔ.

Kwan a wɔdze nya nyikyerɛ fi Nyame hɔ no nsesãa fi Adam na Eve hɔn nda mber mu. Wɔayɛ kor noara ama Ewuradze n’asomfo a wɔafrɛ hɔn fi ahyɛse no besi ndɛ da yi. Ɔtse dɛmara ma emi na ɔwo. Gyedzi a wɔdze ridzi dwuma na ber biara wɔdze nya. ²

Abasirba Joseph Smith nyaa gyedzi a ɔsõ yie a ɔdze bebisa Nyame asɛmbisa, a ɔgyee dzii dɛ Nyame bobua n’akoma mu ehiadze nkotoserɛ no. Nyiano no a ɔbae no sesãa wiadze. Nna ɔpɛ dɛ ohu asɔr no mu dza ɔnkɔdom ama wɔaatsew noho eefi no bɔn ho. Nyiano no a onyaa no hyɛɛ no nkuran dɛ ɔnkɔ do mbisa asɛmbisa ohia ara yie na ondzi nyikyerɛ a wɔahyɛ ase a, ɔrokɔ do pem no, no ho dwuma. ³

Bia wo sũahu botum ayɛ tse dɛm wɔ ehyiadzi yi mu. Iwɔ nsɛmbisa horow a erehwehwɛ ho mbuae. Iwɔ gyedzi ara a ɔbɔ sõ a ɔbɛma wo enyidado dɛ ibenya nyiano edua N’asomfo mu a ofi Ewuradze hɔ. ⁴ Irinnnya kwan ntsẽa mu mbisa nsɛmbisa no efi hɔn a wɔrekasa no hɔ, mbom ibotum ebisa w’Egya dɔfo no wɔ mpaabɔ mu.

Minyim fi sũahu mu dɛ nyiano no bɛba a ɔnye w’ehiadze na wo sunsum mu ahosiesie no asaa. Sɛ ihia nyiano a ohia tsitsir ma wo onnyiewiei yieyɛ anaa binom dze a, nyiano no bɛba ampara. Naaso dɛm mpo no, bia ibenya—tse dɛ ma Joseph Smith nyae—nyiano no bɛyɛ nya abotar. ⁵

Sɛ wo gyedzi a ɔwɔ Jesus Christ mu ɔama akoma abobɔ a ɔnam No Werdambɔ ho nsunsuando a, ibɛtse Sunsum no wɔsae nkã a ɔyɛ wo mpaabɔ ho mbuae. Mankasa mo sũahu nye dɛ ndze tseabaa, ketseketse no—a ɔyɛ nokwar no—yɛ pefee na mutum tse no wɔ m’adwen mu ber a mo mu ayɛ komm na megyaa moho ahyɛ Ewuradze ne pɛ nsa. Dɛm ahobrɛadze atsenkã no wobotum akyerɛ mu yie dɛ “Nnyɛ me pɛ a, na wodze na ɔnyɛ hɔ.” ⁶

Nyikyerɛ kwan yi nye siantsir a hom bɛtse dɛ hɔn a wɔbɛkasa wɔ ehyiadzi yi mu no bɛkyerɛkyerɛ dza wɔfrɛ no Christ ne nkyerɛkyerɛ no. ⁷ Yenya nyikyerɛ wɔ kwan dodow a yɛahwehwɛ dɛ yɛbɛfa Christ ne nkyerɛkyerɛ akɔ hɛn akoma mu na yɛdze abɔ bra ho.

Hom kaa fi Mormon Nwoma no mu dɛ Nephi kyerɛkyerɛɛ hɛn dɛ gyedzi wɔ Christ mu nye saafee a wɔdze nya nokwar ho nyikyerɛ na saafee a wɔdze benya awerɛhyɛmu dɛ yeridzi Agyenkwa no no kwankyerɛ do. Nephi kyerɛɛw nsɛmfua a odzi do yinom mfe ɔha ɔha pii ana wɔrowo Christ aba honandua mu:

“Abɔfo nam Sunsum Krɔnkrɔn no tum do kasa; dɛm ntsi, wɔkã Christ ne nsɛm. Dɛm ntsi, mekã kyerɛ hom dɛ, hom mmee wɔ Christ ne nsɛm mu, na hwɛ, Christ ne nsɛm no bɛkã ndzɛmba nyinara a ɔsɛ dɛ hom yɛ akyerɛ hom.

“Dɛm ntsi, aber a makã dɛm nsɛm yi akyerɛ hom ekyir no, sɛ hom enntum anntse ase a nna ɔbɛyɛ dɛ hom emmbisa, anaadɛ hom ammbɔ mu; dɛm ntsi, wɔammfa hom ammba kan no mu, ntsi otwar dɛ hom hera wɔ sum mu.

“Na hwɛ, mese hom bio dɛ sɛ hom rudua kwan no mu, na hom nsa rekã Sunsum Krɔnkrɔn no a, nkyɛ ɔbɛkyerɛ hom ndzɛmba nyinara a ɔsɛ dɛ hom yɛ.

“Hwɛ, iyi nye Christ ne nkyerɛkyerɛ; na nkyerɛkyerɛ biara nnyi hɔ bio a wɔdze bɛma ekesi dɛ ɔbɛda noho edzi akyerɛ hom ekyir yi wɔ honam mu. Na ber a ɔbɛda noho edzi akyerɛ hom wɔ honam mu no, dza ɔbɛse hom biara no, hom nhyɛ no nsew na hom nyɛ.” ⁸

Ewuradze bɛkã nsɛm edua N’asomfo mu akyerɛ hom na emi ndɛ na wɔ nda no a odzi do no mu. Ɔbɛkã dza ɔsɛ dɛ yɛyɛ akyerɛ hɛn. ⁹ Agyenkwa no renntsẽatsẽa mu nhyɛ emi na ɔwo. Tse dɛ mbrɛ Ɔkyerɛkyerɛɛ Elijah:

“Na ɔsee dɛ, Pue kɔ, na kegyina bepɔw no do wɔ Ewuradze enyim. Na, hwɛ, Ewuradze botwaa mu, na mframa kɛse dzendzen paapaa mbepɔw mu, na obobuu abotan mu esinesin dzii Ewuradze enyim; na Ewuradze nnyi mframa no mu: na mframa no ekyir asaase-wosow a; Ewuradze nnyi asaase-wosow mu:

“Na asaase-wosow no ekyir ogya a, na Ewuradze nnyi ogya no mu: na ogya no ekyir ndze bɔkɔɔ bi a.” ¹⁰

Yɛretse dɛm ndze no befi hɛn gyedzi a ɔwɔ No mu. Yɛdze gyedzi a ɔsõ no, yebebisa kwankyerɛ a yɛdze botae dɛ yɛbɛyɛ adzebiara Obisa hɛn no. ¹¹ Nna yeetu gyedzi no mpon dze ehu dɛ adzebiara a Obisa hɛn no bɔboa nkaafo na dɛ hɛnho botum atsew wɔ nyɛe kwan no do osian No dɔ ma hɛn no ntsi.

Ber a hɛn gyedzi wɔ Jesus Christ mu ebegya hɛn dɛ yembisa nyiano mfi Egya hɔ no, nna dɛm gyedzi no so nye hɛn aba Agyenkwa no ne nkenyan bɔkɔɔ ase a ɔbɔ sõ ama hɛn dɛ yebetsie No kwankyerɛ na yɛdze enyimpi na enyigye ayɛ aso. Nkyii yɛdze enyigye bɔtow asɔr ndwom no, ber mpo a edwuma no yɛ dzen no dɛ: “Dwuma dɛɛdɛw, me Nyame, me Hen.” ¹²

Mpɛn dodow a yɛwɔ Christ ne nkyerɛkyerɛ wɔ hɛn abrabɔ na hɛn akoma mu no, mber dodow a yenya ɔdɔ kɛse na ehumbɔbɔr atsenkã ma hɔn a wonnyaa gyedzi wɔ Jesus Christ mu ho nhyira anaa woridzi aper esie gyedzi no. Ɔyɛ dzen dɛ yebesie Ewuradze ne mbrasɛm a yennyi gyedzi na awerɛhyɛmu wɔ No mu. Ber a binom yew hɔn gyedzi wɔ Agyenkwa no mu no, bia wɔbɔkõ etsia N’afotu, wɔafrɛ papa bɔn na bɔn papa. ¹³ Ama yekwetsir mfom yaayaw yi, ohia tsitsir dɛ ankorankor nyikyerɛ biara a yebenya no nye Ewuradze na No nkɔnhyɛfo hɔn nkyerɛkyerɛ no saa.

Enuanom na nkyerɛbaa, ɔgye gyedzi dze esie Ewuradze ne mbrasɛm no. Ɔgye gyedzi wɔ Jesus Christ mu dze asom binom ama No. Ɔgye gyedzi dze efir edzi akɛkyerɛkyerɛ Ne nsɛmpa na edze ama nkorɔfo a bia wɔnntse Sunsum ne ndze anaa bia wɔbɔpow asɛm no no nokwar no mpo. Naaso ber a yɛdze gyedzi wɔ Christ mu dzi dwuma—na yɛka No nkɔnhyɛnyi tseasefo do no—gyedzi no mu bɔto wɔ wiadze nyina mu. Ɔnam abaefo mfir do, bia Nyankopɔn ne mba bɛtse na woehu Nyankopɔn n’asɛm dapɛn ewiei yi akyɛn nda ebien biara wɔ abakɔsɛm mu.

Asɔrmba hɔn gyedzi mu roto dɛ iyi nye Ewuradze N’Asɔr no, hɔn mu dodowara na wotua hɔn ebupɛn du na afɔrbɔ a wɔdze bɔboa hɔn a wɔwɔ hia mu, ber a dɛm asɔrmba noara rehyia hɔnankasa hɔn nsɔhwɛ. Wɔdze gyedzi dɛ Jesus Christ afrɛ hɔn no, asɛmpasomafo a wɔwɔ wiadze nyina ehu akwanhorow a wɔdze bedzi ɔhaw a wiadze nsan yarba dze baa no do konyim, wɔdze akokodur na enyimtsewee reyɛ dɛm. Na wɔabɔ mbɔdzen kakra aka ho no, hɔn gyedzi enyin ahyɛ dzen.

Dza otsia hɛn na nsɔhwɛ horow ayɛ bea frɔmfrɔm a gyedzi tum nyin. Ɔno ayɛ nokwar aber biara, nkanka fitsi Nsanananmu ahyɛse no na Ewuradze N’Asɔr ne nkyekyeree no. ¹⁴

Dza President George Q. Cannon kãa no mber pii a abɛsen no yɛ nokwar ndɛ na ɔbɛyɛ dɛm kɛpem Agyenkwa nankasa bɛba ebedzi N’Asɔr na No nkorɔfo ne kan: Setsie ma asɛmpa no dze [nkorɔfo] bɛn Ewuradze ara yie ma wɔnye No nya nkitahodzi mapã. Ɔkyekyer fɛkubɔ a ɔyɛ dzen wɔ adasa a wɔwɔ asaase do na hɛn Bɔadze Kokroko a Ɔwɔ ɔsorsor no hɛn ntamu Ɔdze awerɛhyɛmu a odzi mu wɔ Otumfo mu ba nyimpa n’adwen mu na Ne pɛ dɛ Otsie na Ɔma hɔn a wɔtwer No no hɔn ntotɔserɛ mpaabɔ ho nyiano. Nsɔhwɛ na nkõdzen ber mu no awerɛhyɛmu yi wonntwa ho bo. Ɔhaw botum aba ankorankor do anaa ɔman no do, ɔsɛɛ kɛse botum ehunahuna na adasa enyidado biara ayɛ dɛ ma woetutu egu mpo a, bea a nkorɔfo ama hɔnho kwan ma ndzinoa a asɛmpa ho setsie dze ba no, woenya ngyinae a otsim, hɔn anan sisi ɔbotan a wonnkotum eyi efi hɔ do.” ¹⁵

Ɔyɛ me dasegye dɛ dɛm ɔbotan no a yegyina do no yɛ hɛn dasegye dɛ Jesus nye Christ no; dɛ iyi nye N’Asɔr a, Nankasa dzi ne kan, na dɛ President Russell M. Nelson nye No nkɔnhyɛnyi tseasefo ndɛ.

President Nelson hwehwɛ kwankyerɛ fi Ewuradze hɔ na onya. Ɔyɛ fasusu ma me wɔ erohwehwɛ dɛm kwankyerɛ no a edze enyimpi si dɛ ibedzi do. Dɛm enyimpi si dɛ ibɛyɛ aso ama Ewuradze no kwankyerɛ no wɔ hɔn a wɔakasa anaa wɔbɛkasa, wɔabɔ mpaa, anaa wɔatow ndwom wɔ N’Asɔr ne wiadze mfɛndzanan ehyiadzi ase yi no hɔn akoma mu.

Mobɔ mpaa dɛ hɔn a wɔwɔ wiadze beebiara a wɔhwɛ anaa wotsie ehyiadzi yi benya Ewuradze no dɔ a Ɔwɔ ma hɔn ho atsenkã. Ɔsor Egya etsie me mpaabɔ dɛ nkyɛ maatse Agyenkwa no dɔ ma hom no mu ketseaba koraa na No dɔ ma No Sor Egya a, Ɔyɛ hɛn Ɔsor Egya.

Megye dase dɛ Jesus Christ tse ase. Ɔyɛ hɛn Agyenkwa, na hɛn Pomfo. Iyi nye N’Asɔr. Ɔno Ɔda ne tsir. Ɔno, nye No Sor Egya, Hɔnankasa wopuee Joseph Smith do wɔ ndua kwã mu wɔ New York. Jesus Christ asɛmpa na N’asɔfodzi no ɔsor abɔfo na wɔdze saan ananmu baa. ¹⁶ Ɔnam Sunsum Krɔnkrɔn no tum do, minyim dɛ ɔyɛ nokwar.

Mobɔ mpaa dɛ ibenya dɛm dasegye noara. Mobɔ mpaa dɛ ibebisa gyedzi wɔ Jesus Christ mu a ihia dze ayɛ ahyɛmu na edzi do efi Ɔsor Egya hɔ, a ɔbɛma kwan ma enya Sunsum Krɔnkrɔn n’anyɛnkoyɛ aber nyina . Megya hom modɔ nye me dasee a otsim wɔ Jesus Christ ne dzin krɔnkrɔn no mu, amen.