Nyaa Enyimnyam wɔ Ewuradze Enyim wɔ Me Nda Nyinara mu

Nsan yarba COVID-19 abɛyɛ ɔhaw na atseetsee pii a Nyame Ne mba ehyia no wɔ widaze n’abakɔsɛm nyina mu no no mu kor. Afe yi n’ahyɛse, emi na m’ebusua adɔfo faa sum mber bi mu. Nsan yarba na dza ɔkekãho dze owu na ɔyaw brɛɛ hɛn ebusua ber a adɔfo binom wuwui. Ndurgye nhwɛɛ, akɔnkye, na mpaabɔ nyina ekyir no, mo nuabanyin Charly, mo nuabasia Susy, na mo nuabasia no kun Jimmy dua mu kɔr ntwamutam no n’afã no ho wɔ adapɛn enum ntamu.

Ɔyɛ a modwendwen siantsir a Agyenkwa no sũi ber a ohun Mary n’awerɛhodzi wɔ no nua Lazarus no wu ho, mpo ber a Onyim dɛ Ɔwɔ tum dɛ Obenyan Lazarus na dɛ ɔnnkɛkyɛr Ɔdze dɛm tum yi abɛgye Ne nyɛnko efi owu mu. ¹ Agyenkwa no N’ayamuhyehye na tsema ma Mary no yɛ me ahobow; nna Ɔwɔ ntseasee wɔ ɔyaw dzendzen a Mary tsee wɔ no nua Lazarus, no wu no ho.

Yɛtse dɛm ɔyaw dzendzen noara bi sɛ yɛnye hɛn adɔfo ntamu paa mber kuma mu a. Agyenkwa no wɔ ayamuhyehye a odzi mu ma hɛn. Ɔnnkan no mfom nntsia hɛn dɛ yennhu nkɔ ekyir anaa dɛ yɛtɔ sin wɔ hɛn nhumu wɔ hɛn onnyiewiei akwantu mu. Mbom, Ɔwɔ ayamuhyehye ma hɛn awerɛhowdzi na amandzehu.

Egya a Ɔwɔ Sor na Ne ba, Jesus Christ, pɛ dɛ yedzi dɛw. ² President Russell M. Nelson akyerɛkyerɛ dɛ: “Hɛn abrabɔ mu enyigye a yɛtse no mmfa gyinabew a yɛwɔ mu ho, mbom ɔfa adze biara a hɛn abrabɔ tsim do ho. Sɛ yɛdze hɛn abrabɔ tsim Nyankopɔn no nkwagye ho nhyehyɛɛ do a, … yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho.” ³

Ber a nna meyɛ asɛmpasomafo aberantsɛ no, mekaa ber bi a asɛmpasomafo nwanwanyi bi a maabɛpɛ n’asɛm no nyaa abagura amandzɛɛbɔ bi. Nna ne maame na no nuabanyin kakraba efi mu wɔ akwanhyia yaayaw bi mu. Asɛmpasomafo panyin no maa elder yi kwan dɛ ɔnkɔ fie nkɛyɛ hɔn eyi. Naaso, ɔnye n’egya kasaa wɔ ahomatromfo do wiei no, dɛm asɛmpasomafo yi sii egyinae dɛ ɔbɛtsena na oewie n’asɛmpakã dwuma no.

Mber kumaa ekyir, ber a nna yɛrosom wɔ bea kor noara no, emi na m’adamfo nyaa mpofirmu ɔfrɛ bi; ewifo bi ewia dɛm asɛmpasomafo kor yi ara ne bicycle na wɔdze sekan epira no. Ɔno na n’adamfo nantsewee kɔr asoptisi a ɔbɛn hɔn, na emi na m’adamfo hyiaa hɔn wɔ hɔ. Kwan no do ɔdze kɔ asopitsi hɔ no, nna murusũ ma dɛm asɛmpasomafo yi. Mususuu dɛ no sunsum bɔwɔ famu, na dɛm atseetseesɛm a ɔafa mu ekyir yi dze ampaara, ɔbɛpɛ dɛ ɔbɔkɔ fie.

Mbom, yedur asopitsi hɔ no, muhun asɛmpasomafo yi dɛ ɔda ne mpa mu a, ɔrotweɔn dɛ wɔdze no bɔkɔ akɛyɛ no ɔprehyɛn—na nna ɔayerɛw n’ano. Modween dɛ, “Ɔbɛyɛ dɛn bɛyɛ na ɔayerɛw n’ano wɔ ber a ɔtse dɛm yi?” Ber a noho rotɔ no wɔ asopitsi hɔ no, ɔdze ahokekã kyɛɛ nkrataa na Mormon Nwoma no bi maa adatserfo, anɛɛsefo, na ayarfo binom. Nsɔhwɛ yinom mpo mu no, ɔammpɛ dɛ ɔbɔkɔ fie. Mbom, ɔdze gyedzi, ahom, ahoɔdzen, na ahokekã somee ara kesii ne da a odzi ewiei wɔ n’asɛmpakã edwuma no mu.

Mormon Nwoma n’ahyɛse no, Nephi kã dɛ, “Muhun amandze pii wɔ mo nkwa nda mu, naaso minyaa enyimnyam kɛse wɔ Ewuradze enyim wɔ me nda nyinara mu.” ⁴

Modwendwen nsɔhwɛ pii a Nephi fa mu ho, pii a wɔakyerɛw akã ne kyerɛwee ho. No nsɔhwɛ yi boa ma yɛtse ase dɛ hɛn nyina wɔ hɛn sum mber. Nsɔhwɛ yi mu kor sii ber a wɔhyɛɛ Nephi dɛ ɔnkɔ Jerusalem nkɛgye ayewa mprɛtse a ɔwɔ Laban hɔ no. Nna Nephi no nuanom yɛ mbanyin a hɔn gyedzi suar, na wɔdze abaa mpo hwee Nephi. Nephi nyaa nsɔhwɛ kor so ber a n’egyen mu bui na oennya edziban amma n’ebusua. Ekyir yi, ber wɔhyɛɛ Nephi dɛ ɔmpam hɛn no, no nuanom no sii no atwetwe na wɔammpɛ dɛ wɔboa no. Dɛm nsɔhwɛ yi na pii a ɔkekã ho wɔ ne bra mu nyina no, Nephi kaa Nyame N’ayamuyie daa daa.

N’ebusuafo rutwa po akɔ anohoba asaase do no, Nephi n’ebusuafo bi “hyɛɛ ase gyee hɔn enyi,” kasaa ahantan mu, na hɔn werɛ fir dɛ Ewuradze No tum na Ɔabɔ hɔn ho ban. Ber a Nephi kasaa tsiaa hɔn no, hɔn bo fuwii na wɔdze ntampehoma kyekyeer no ara ma nna onntum nnkeka noho. Mormon Nwoma no kã dɛ no nuanom no “yɛɛ no ayakayakadze kɛse”; nna ne nsakɔn na n’anan “ahohon dodow, na ne yaw dɔɔ sõ.” ⁵ Nephi dzii yaw osian no nuanom hɔn akomadzen ntsi na nna ɔyɛ a awerɛhow hyɛ no do. ⁶ “Iyi nyinara ekyir no”, ɔkãa dɛ, “memaa m’enyi do hwɛɛ me Nyankopɔn, na miyii no ayɛw mber nyina; na mennhwinhwin Ewuradze wɔ m’amandzehu no ntsi.” ⁷

Mo nuanom na nkyerɛbaa adɔfo, ebɛn su na yɛkyerɛ wɔ hɛn ahohiahia ber mu? Ana yehwinhwin wɔ Ewuradze enyim ɔnam amandzehu no ntsi? Anaa, tse dɛ Nephi na me nyɛnko asɛmpasomafo no, hɛn enyi sɔ wɔ kasa, adwendwen, na nyɛe mu osiandɛ hɛn enyi tsim hɛn nhyira do kyɛn hɛn haw?

Hɛn Agyenkwa, Jesus Christ, maa hɛn mfatoho wɔ N’asaase do somdwuma mu. Nsɔhwɛ a ɔyɛ dzen ber mu, ndzɛmba kakraabi wɔ hɔ a ɔbrɛ hɛn asomdwee kɛse na akomatomu kyɛn dɛ yɛrosom hɛn fɛfo nyimpa. Matthew Nwoma no kã dza osii ber a Agyenkwa no tsee dɛ No nua John Onumanyi no, Ɔhen Herod etwa ne tsir dze asɔ Herodias ne babaa n’enyi:

“Na n’esuafo no bae bɛfaa no fun no kesiei, na wɔkɔree kɛkãa kyerɛɛ Jesus.

“Na Jesus tsee no, ɔtwee noho fii hɔ nam hɛn mu kɔr sar do nkyɛn beebi: na nyimpadodow tsee no, wofii nkurow mu nam daadze tsiiw no.

“Na odwirii no, ohun nyimpadodow pii, na ne yamu hyehyee no maa hɔn, na ɔyɛɛ hɔn ayarfo edur.

“Na odur ewimbir no, n’esuafo baa ne nkyɛn bɛsee no dɛ, Ha yi sar do a, na ber enya abɛsen; gya nyimpadodow yi kwan, ma wɔnkɔ nkurobaase nkɔtɔ edziban mma hɔnho.

“Na Jesus see hɔn dɛ, Onnhia hɔn dɛ wɔkɔ; homara hom mma hɔn biribi ma wondzi.” ⁸

Jesus Christ kyerɛɛ hɛn dɛ wɔ nsɔhwɛ na amandzehu ber mu, yebotum ehu binom hɔn brɛ. Yɛdze ayamuhyehye no, yebotum atsen hɛn nsa na yɛamaa hɔn do. Na ber a yɛyɛ no dɛm no, hɛn Christ su som no maa hɛn so do. President Gordon B. Hinckley kãa dɛ: “Ɔhaw n’ano edur papapaa a minyim nye edwumayɛ. Edur papapaa a oye ma abagura nye ɔsom. Ɔbrɛ n’ano edur papapaa nye taferbanyinmbɔmu dɛ eroboa obi a ɔabrɛ mpo kyɛn ɔwo.” ⁹

Jesus Christ N’Asɔr yi mu no, meenya kwan pii dze aboa na medze asom me mfɛfo ɔdasanyi. Ɔyɛ dɛm mber no mu na metse dɛ Ɔsor Egya ama m’adzesoa mu ayɛ har. President Russell M. Nelson nye Nyame no nkɔnhyɛnyi a ɔwɔ asaase do; ɔyɛ fasusu kɛse ma hɛn wɔ kwan a ɔsɛ dɛ yɛfa do som binom wɔ nsɔhwɛ dzendzen mu. Medze me dasee kã Ahotseweefo pi hɔn dze ho dɛ Nyame yɛ hɛn Ɔsor Egya dɔfo. Maatse No onnyiewiei dɔ wɔ mo sum nda mu. Hɛn Agyenkwa, Jesus Christ, tse hɛn yaw na amandzehu ase. Ɔpɛ dɛ Ɔyɛ hɛn adzesoa har na Ɔkyekye hɛn werɛ. Ɔsɛ dɛ yesũa ne fasusu ber a yɛrosom na yɛroboa binom a hɔn adzesoa yɛ dur mpo kyɛn hɛn dze. Jesus Christ ne dzin mu, amen.