Yɛdze Gyedzi wɔ Christ mu Rehyia Hɛn Sunsum mu Ehum Dzendzen no

Mfe esia a woetwa mu yi, emi na mo dɔfo, Ann, yɛatsena Texas bea a ɔbɛn Gulf Coast, a ehum dzendzen akɛse binom ahwe United States a, woeegya ɔsɛɛ kɛse na mpo owu wɔ ekyir no. Ɔyɛ awerɛhow dɛ, ndaansa abosoom yi mu no, ɔsɛɛ a ɔtse dɛm bi esisi. Hɛn dɔ na mpaabɔ tsen kɔ ma hɔn a wɔakã hɔn wɔ kwan biara do. Afe 2017 mu, hɛnankasa yɛsɔɔw Ehum Dzendzen Harvey a, ɔmaa nsutɔree no nsusui kodu inkyis 60 a onnsii da.

Abɔdze ho mbra na odzi ehum dzendzen ne nyɛe do. Po ne hyew suar koraa no ɔwɔ dɛ odu 27 degrees C, a ɔkɔ anamɔn 165 wɔ po n’ase. Sɛ mframa bɔ hyia po mu nsu ɔayɛ hyew kakra a, ɔma nsu no dan ehubɔhubɔw na ɔfow kɔ sor, na hɔ no ɔadan nsu. Nkyii nna mununkum ahyehyɛ, na mframa etwa hankra su bi wɔ po no do.

Ehum dzendzen no sosõ, a otum tsen du ananmɔn 50,000 na no mboree wɔ wimu na ɔtra bɛyɛ akwansin 125 no. Enyigye mu ara, sɛ ehum dzendzen no dur asaase a, hɔn ano hyɛ ase brɛ adze osiandɛ wonnyi nsu a wɔayɛ hyew kakra a wohia ama hɔn ahoɔdzen no do bio. ¹

Bia nnkehyia honandua mu ɔsɛɛ ehum dzendzen da. Naaso, hɛn mu kor biara asɔw na ɔbɔsɔw sunsum mu ehum dzendzen a wɔsɛɛ hɛn asomdwee na wɔsɔ hɛn gyedzi hwɛ. Ndɛ wiadze yi mu no, ɔyɛ dɛ mpɛn a osisi na hɔn ano dzen no rokɔ sor. Ndaase mu ara, Ewuradze ama hɛn nokwar kwan a yɛbɛfa do edzi hɔn do konyim enyigye mu ara. Sɛ yedzi Jesus Christ asɛmpa no do a, yɛwɔ awerɛhyɛmu dɛ “ber a ɔhaw mununkum sensɛn hɛn do na ɔdze suro sɛɛ hɛn asomdwee, enyidado hyerɛn wɔ hɛn enyim.” ²

President Russell M. Nelson kyerɛkyerɛ mu dɛ:

“Ahotseweefo hɔn enyi botum agye wɔ gyinabew biara mu. Yebotum edzi dɛw mpo ber a da no ronnkɔ yie, dapɛn no ronnkɔ yie, anaa mpo afe no ronnkɔ yie!

“… Hɛn abrabɔ mu enyigye a yɛtse no mmfa gyinabew horow a yɛwɔ mu ho koraa, mbom ɔfa adze biara a hɛn abrabɔ tsim do ho.

“Sɛ yɛdze hɛn abrabɔ tsim … Jesus Christ na N’asɛmpa no do a, yebotum enya enyigye a, dza orisi—anaa dza orinnsi—wɔ hɛn abrabɔ mu no mmfa ho.” ³

Dɛ mbrɛ abɔdze mbra na ɔhwɛ honandua mu ehum do no, ɔsor mbra so hwɛ mbrɛ yebesi enya enyigye hɛn sunsum mu ehum ber mu no do. Enyigye anaa ɔhaw a yɛtse ber a yehyia ɔbra n’ehum no gyina mbra a Nyankopɔn ahyehyɛ no do. President Nelson akã dɛ: “Wɔfrɛ hɔn mbra, naaso wɔyɛ nokwar tse dɛ mma do ho mbra, tum a ɔtwe adze ba famu mbra, [na] mbra a odzi akoma no ntowee do.”

President Nelson toa do dɛ, “Ɔbɛyɛ nhyehyɛɛ a ɔda famu: Sɛ epɛ enyige a, dzi mbrasɛm no do.” ⁴

Ekyingye yɛ gyedzi na enyigye ho tamfo. Dɛ mbrɛ po nsu a ɔyɛ hyew kakra na ɔnyɛn ehum no, ekyingye so na ɔnyɛn sunsum mu ehum. Dɛ mbrɛ itum san mu yi gyedzi no, dɛm ara na ekyingye so tse. Sɛ yɛsan mu fa dɛ yɛbɛgye kyim a, nna yɛasan mu afa dɛ biribi nhyɛ hɛn do, yeegyaa tum mu ma ɔsɛɛfo no, na ɔma yɛyɛ mberɛw na ogya hɛn adagyaw. ⁵

Satan hwehwɛ dɛ obegya hɛn akɔ ekyingye nyɛnee bea. Ɔhwehwɛ dɛ obepirim hɛn akoma amma yɛanngye enndzi. ⁶ Ekyingye nyɛnee bea botum ayɛ dɛ ma ɔyɛ akɔndɔ osiandɛ ɔyɛ dɛ asomdwee, nsu a wɔadɔ kakra ara a onnhia hɛn dɛ yɛdze “asɛm biara a ofi Nyankopɔn n’anomu aba no” bɔ bra. ⁷ Esu a ɔtse dɛm mu no Satan gyegye hɛn dɛ yɛndwedwe hɛn ho wɔ hɛn sunsum mu ahwɛyie ho. Dɛm ahwɛyie a yɛnnyɛ no botum eyi sunsum mu pisi efi hɔ a, afei na “[yɛ]nnyɛ nwin na [yɛ]nnyɛ hyew.” ⁸ Sɛ yɛnntow hɛn sekyɛ wɔ Christ do a, ekyingye na ne ndaadaa no begya hɛn akɔ ɔmmfa moho tsebea mu a yennkenya anwanwadze, daapem enyigye, anaa “ahomgye ama [hɛn] akra.” ⁹

Dɛ mbrɛ ehum n’ano brɛ adze wɔ asaase do no, gyedzi bɛhyɛ ekyingye ananmu ber a yɛtow hɛn fapem wɔ Jesus Christ do. Nkyii yetum hu sunsum mu ehum no mbrɛ wɔtse, na hɛn tum dɛ yebedzi do no yɛ kɛse. Nkyii, “sɛ abɔnsam bɔ n’ehum dzendzen no a, nyew, n’egyenmenaba a ɔwɔ ekyinehyia ehum no mu no a, … orinnya tum … nntwe [hɛn] nnkɛhyɛ awerɛhow nye mbusu a onnyi ewiei no bun ase, osian ɔbotan a [yɛ]atow [hɛn] adan wɔ do ntsi, dza ɔyɛ fapem tsim.” ¹⁰

President Nelson akyerɛkyerɛ dɛ:

“Gyedzi wɔ Jesus Christ mu nye dza yɛgye dzi nyina ne fapem na kwan a wodua do nsa kã ɔsor tum. …

“Ewuradze ronnhwehwɛ gyedzi a odzi mu ana yeenya kwan nsa akã No tum a odzi mu no. Naaso Ɔse hɛn dɛ yɛngye ndzi.” ¹¹

Ofi Ebɔbira wiadze mfɛndzanan ehyiadzi no, emi na m’ebusuafo akɔ do ahwehwɛ dɛ yɛbɛhyɛ hɛn gyedzi dzen wɔ Jesus Christ na No Werdam Afɔrbɔ no mu na ɔaboa hɛn “adan hɛn haw akɔ nyinii a onnyi nsɛ mu na akwan pa.” ¹²

Hɛn nanabaa Ruby, wɔdze nhwɛdo ɔpɛ dzendzen ehyira no. Wɔwoo no no, nna ne men nntoa ne yafun do. Ɔyɛ abɔdomaba mpo no, na ɔdze n’awofo hɔn mboa no, Ruby dze enyimpi si soronko bi hyiaa dɛm nsɔhwɛ yi. Seseiara Ruby edzi mfe enum. Ɔwɔ mu dɛ ɔda ho ara suar dze, naaso ɔyɛ fasusu kɛse dɛ ɔmma ne tsebew nnkyerɛ n’enyigye. N’enyi gye daa.

Esusow Aketseaba a etwa mu yi, Ruby dze gyedzi hyiaa ehum dzendzen kor so bio wɔ n’abrabɔ mu. Wɔwoo no no nna ne nsa so nnyin yie ntsi nna obehia sekankã eduryɛ dze esiesie. Ansaana wɔrebɛyɛ dɛm ɔprehyɛn a ne yɛ yɛ dzen yi, yɛkɛseraa no maa no nsaano mfonyin bi a ɔkyerɛ abofra a ahomka mu ara oesuo Agyenkwa no ne nsamu. Yebisaa no dɛ sɛ noho mmbaa no a, oyii ano dɛ, “Oho, m’enyi agye!”

Nkyii yebisaa no dɛ, “Ruby, ɔyɛ dɛn yɛ?”

Ruby dze awerɛhyɛmu kãa dɛ, “Osiandɛ minyim dɛ Jesus bosuo me nsa mu.”

Ruby n’ahotɔ no ayɛ anwanwadze, na n’enyi kɔ do gye. Mbrɛ abofra ne gyedzi a no ho tsew si nye ekyingye a ɔnnsɛ a obotum ataa asɔ hɛn ahwɛ wɔ hɛn mpanyinyɛ ber mu no bɔ ebira a! ¹³ Mbom hɛn nyina botum abɛyɛ dɛ mbofra nkakraba na yɛasan mu eyi dɛ yɛdze hɛn ekyingye bɔto nkyɛn. Ɔyɛ nsanmuyi a ɔda famu.

Egya dɔfo bi totɔe serɛɛ Agyenkwa no enyiber do dɛ, “Sɛ ibotum biribi yɛ a, … boa hɛn.” ¹⁴

“Na Jesus see no dɛ:

“Sɛ ibotum a, Nyia ɔgye dzi no, ndzɛmba nyina botum ayɛ hɔ ama no.

“Na ntsɛmara … egya no kaa mu, dze sũ see dɛ, Ewuradze, Megye midzi; boa m’ekyingye.” ¹⁵

Nyansa mu ara, dɛm egya ahobrɛadze nyi yi san mu yii dɛ ɔdze no werɛ bɛhyɛ ne gyedzi wɔ Christ mu kyɛn n’ekyingye. President Nelson kyerɛɛ dɛ, “Gyedɛ w’ ekyingye nko na obesiw Nyame kwan efi Ɔdze anwanwadze ho nhyira a edze botutu mbepɔw a ɔwɔ w’ abrabɔ mu no ama wo.” ¹⁶

Mbrɛ hɛn Nyame n’ehumbɔbɔr tse, dɛ ɔdze esusudze no ato gyedzi ho na ɔnnda nyimdzee ho!

Alma kyerɛkyerɛ dɛ:

“Nhyira nye nyia ɔgye Nyankopɔn n’asɛm dzi.” ¹⁷

“[Na] Nyankopɔn hu hɔn a wɔgye ne dzin dzi nyina mbɔbɔr; dɛm ntsi ahyɛse no ara na ɔpɛɛ dɛ hom nya gyedzi.” ¹⁸

Nyew, ahyɛse no ara, Nyankopɔn pɛ dɛ yɛgye No dzi.

Yehyia hɛn sunsum mu ehum adzendzen ano yie ber a yɛgye Christ dzi na yedzi Ne mbrasɛm do. Hɛn gyedzi na setsie dze hɛn fam tum a ɔbor hɛn dze do ma yedzi “dza orisi—anaa orinnsi—wɔ hɛn abrabɔ mu” ¹⁹ do konyim. Nyew, Nyankopɔn “hyira [hɛn] ntsɛmara” dɛ yɛgye dzi na yɛyɛ setsie. ²⁰ Nokwar, mber gu mu a hɛn tsebea sesã bɛyɛ enyigye dze na “wɔayɛ hɛn atseasefo wɔ Christ mu” ber a yɛdze gyedzi wɔ No mu dzi dwuma na yedzi Ne mbrasɛm do. ²¹

Enuanom na nkyerɛbaa, hom mma yɛnsan mu nyi ndɛ dɛ “[yɛ]nngye kyim, mbom [yɛ]ngye ndzi.” ²² “Kwan pa no nye dɛ [yɛ]bɛgye Christ edzi.” ²³ “[Wo]ekrukye [hɛn] wɔ [Ne] nsayamu.” ²⁴ Ɔyɛ hɛn Agyenkwa na Ɔpomfo a ogyina hɛn abobow ano ara robɔ mu. ²⁵ Jesus Christ ne dzin mu, amen.