Gyedzi a wɔdze Dzi Dwuma dze Bɛyɛ Osũanyi Pa

Ɔkãa dɛ, “Bisa wo Sor Egya, wɔ Jesus Christ ne dzin mu, fa gye mboa.” ² Irudua mpaabɔ do ebisa no yɛ adze tsitsir kor a ɔma ihu mbrɛ ibesi abɛyɛ Jesus Christ no osũanyi papa.

Ɔdze ne nkyerɛkyerɛ wɔ Nephifo mu wɔ America no reba ewiei no, Jesus Christ fowee kɔr sor. Ekyir no, N’esũafo no boaa hɔn ano wɔ fakor, “na wɔbɔɔ mu faa akɔnkye na wɔbɔɔ mpaa enyiberdo. Na Jesus yii noho kyerɛɛ hɔn bio, osiandɛ nna wɔrobɔ mpaa ma Egya no wɔ ne dzin mu.” ³ Ebɛnadze ntsi na Jesus yii noho kyerɛɛ N’esũafo no bio? Osiandɛ nna wɔrobɔ mpaa; nna woribisa.

Na Ɔkãa dɛ:

“Na afei morokɔ Egya no nkyɛn. Na nokwar mese hom dɛ biribiara a hom bebisa Egya no wɔ me dzin mu no, wɔdze bɛma hom.

Dɛm ntsi, hom mbisa, na hom nsa bɛkã; hom mbɔ mu, na wobobue ama hom; na nyia obisa no, ne nsa kã; na nyia ɔbɔ mu no, wobue ma no.” ⁴

Ohia dɛ yebisa wɔ gyedzi mu dze hu Ewuradze ne pɛ na yɛgye to mu dɛ Ewuradze nyim dza oye ma hɛn.

Iridzi dwuma so yɛ adze tsitsir a ɔma ebɛyɛ Jesus Christ no osũanyi papa. Ber a yedzi dwuma no, Ɔbɔweɔn hɛn na Ɔama hɛn akwankyerɛ wɔ kwan no do. Megye dzi dɛ nna Nephi rohwehwɛ akwankyerɛ efi Ewuradze hɔ wɔ mbrɛ wobesi enya ayewa mprɛtse no efi Laban hɔ, eso ɔno na n’enuanom no bɔɔ mbɔdzen mpɛn ebien a hɔn nsa annkã. Naaso nna woridzi dwuma, na nna Ewuradze rema hɔn akwankyerɛ wɔ kwan no do. Ewiei no, Nephi dzii konyim mpɛn a otsĩa ebiasa no. Ɔkaa dɛ, “Na Sunsum no gyaa me kɔr hɔ a nna minnyim dza merekɛyɛ.” ⁵

Dɛm na Ewuradze si yɛ edwuma ber a yɛbɔ mbɔdzen na yedzi dwuma, mpo sɛ yɛnnyi ntseasee pefee wɔ dza ɔsɛ dɛ yɛyɛ no ho a. Ewuradze kyerɛɛ Nephi dza ɔnyɛ: kɔ na kɛgye mprɛtse no. Naaso Ɔannkyerɛ Nephi mbrɛ onsi nyɛ no. Ogyaa maa Nephi dɛ ɔnhwehwɛ na ombisa Ewuradze no mboa—na dɛm na Ewuradze si taa dzi dwuma wɔ hɛn abrabɔ mu. Sɛ yedzi dwuma wɔ gyedzi mu a, Ewuradze weɔn na Ɔma hɛn akwankyerɛ.

3 Nephi mu no, esũafo no kãa kyerɛɛ Agyenkwa no dɛ ekyingye esi nkorɔfo no mu a ɔfa Asɔr no ne dzin ho. Nyiano mu no, Agyenkwa no kyerɛkyerɛɛ fapem a noho hia ber a obisaa dɛ, “Ana wɔnnkenkaan kyerɛwsɛm no?” ⁶ Tserɛ adzesũa so yɛ adze tsitsir a ɔma ebɛyɛ Jesus Christ no osũanyi pa. Mpaabɔ na kyerɛwsɛm no nsũae nam kor. Wɔyɛ edwuma bɔ mu ma hɛn mfaso. Iyi nye kwan a Ewuradze ahyehyɛ ato hɔ. “Hom mmee wɔ Christ ne nsɛm mu, na hwɛ, Christ ne nsɛm no bɛkã ndzɛmba nyinara a ɔsɛ dɛ hom yɛ akyerɛ hom.” ⁷

Agyenkwa no kyerɛkyerɛe so dɛ nnyɛ dɛ yesũa kyerɛwsɛm no nko, mbom ɔwɔ dɛ yɛkyerɛkyerɛ fi mu so, dɛ mbrɛ Ɔkyerɛɛ Nephifo no: “Na afei ɔbaa dɛ ber a Jesus siansian kyerɛwsɛm no a wɔakyerɛw dɛ adze kor mu wiei no, ɔhyɛɛ hɔn dɛ wɔnkɛkyerɛkyerɛ ndzɛmba a oesiansian mu akyerɛ hɔn no.” ⁸

Iyi nye siantsir kor a nna ohia kɛse dɛ Nephi san ekyir kɔ kɛgye ayewa mprɛtse no: nna n’ebusua hia kyerɛwsɛm no ma wɔaboa hɔn, nnyɛ wɔ hɔn akwantu kɔ anohoba asaase no do nkõ mbom ma wɔaboa hɔn so ma wɔakyerɛkyerɛ hɔn mba. Otwar dɛ hɛn so yɛhwehwɛ akwankyerɛ fi kyerɛwsɛm no mu wɔ hɛn akwantu mu, na otwar dɛ yɛkyerɛkyerɛ fi mu wɔ hɛn efiefi na hɛn Asɔr ɔfrɛ horow mu.

Mpɛn pii mpaabɔ nyiano remmba amonmu ara. Naaso ɔwɔ dɛ yenya gyedzi dze kɔ do, dzi dwuma wɔ tsenenee mu, na yesi nketse tse dɛ Nephi ber a nna ɔrobɔ mbɔdzen dɛ obenya ayewa mprɛtse no. Ewuradze bɛkyerɛ hɛn nkakrankakra; ber a yesũa kyerɛwsɛm no, Ewuradze bɛma hɛn nyiano anaa ahoɔdzen a ohia ma yɛdze edua dakor so, dapɛn kor so mu, na dɛ yɛasan abɔ mbɔdzen esi do bio. Elder Richard G. Scott kãa dɛ: “Ma w’enyi nsɔ dɛ ɔtɔfabi a Nyankopɔn ma eper mber tsentsen ansaana dɛm nyiano no aba. Dɛm no ma wo gyedzi nyin na wo suban tu mpon.” ⁹

Ɔnam mpaabɔ na kyerɛwsɛm adzesũa do, daa daa Ewuradze ama me ahoɔdzen a medze dzi dwuma na mosɔw kɔ dakor so, dapɛn kor so, na mobɔ mbɔdzen si do bio. Mpɛn pii nyiano no ammba amonmu ara. Mowɔ nsɛmbisa a minnyaa ho nyiano seisei, naaso mokɔ do bisa na musũa, na m’enyi gye dɛ Ewuradze da ho ma me ahoɔdzen a medze dzi dwuma ber a motweɔn nyiano.

Elder Scott so kãa dɛ, “Ber a ikodur wo ntseasee n’egya no dze kɔ kan wusuwusu a ntseasee nnyi mu no, edze gyedzi ridzi dwuma no, begya wo akɔ nyiano ho a nkyɛ ɔnntse dɛm a nkyɛ nnkenya.” ¹⁰

Ama abɛyɛ Agyenkwa Jesus Christ No sũanyi pa no yɛ ɔbra santsen mu akwantu, na hɛn nyina wɔ gyinabew horow mu a, nsonsonee da ahoɔhar a yɛdze rokɔ no mu. Ɔwɔ dɛ yɛdze hyɛ hɛn adwen mu dɛ iyi nnyɛ akansi, na yɛwɔ ha dɛ yɛbɔdɔ na yɛaboaboa hɛnho nkorkor. Ohia dɛ yedzi dwuma ama yɛama Agyenkwa no kwan dɛ ɔnye hɛn nyɛ edwuma wɔ hɛn abrabɔ mu.

Ɔrekasa kyerɛ Sidney Rigdon no, Ewuradze kãa nsɛm yi: “Mahwɛ ɔwo nye wo ndwuma. Matse wo mpaabɔ, na mesiesie wo ama edwuma kɛse bi.” ¹¹ Megye dase dɛ Ewuradze tsie na Oyi hɛn mpaabɔ ano; Onyim hɛn; na Ɔwɔ edwuma kɛse bi dze ma hɛn mu kor biara. Yerudua mpaabɔ, kyerɛwsɛm adzesũae na dwumadzi do no, yebotum ebuei ɔsor nhyira na yɛabɛyɛ Agyenkwa Jesus Christ N’esũafo apapa.

President Dallin H. Oaks kyerɛkyerɛɛ dɛ “Atsɛmbu a Odzi Ewiei no nnyɛ hɛn ndzeyɛɛ pa na ndzeyɛɛ bɔn ho nkontaabu ara—dza yɛayɛ no. Ɔyɛ hɛn ndzeyɛɛ na adwendwen no ho nsunsuando a woebodwir hɛn—onyia yɛaba abɛyɛ no.” ¹²

M’enyi sɔ nkɔnhyɛfo, adzehufo, na nyikyerɛfo ho; hɔn nye aweɔmfo wɔ abantsentsen no do. Wohu ndzɛmba a yennhu. Megye dase dɛ ɔnam hɔn nsɛm do, yebotum abɛyɛ Agyenkwa Jesus Christ N’esũafo apapa na hɛn nsa akã hɛn hyɛbea. Megye dase dɛ Christ tse ase na Onyim hɛn mu kor biara. Iyi nye N’Asɔr. Jesus Christ ne dzin krɔnkrɔn no mu, amen.