Tūriam̧o eo an Rilo̧mo̧o̧r

Juon iaan pedped ko rekabwilōn̄lōn̄ kar katakin jān Rilo̧mo̧o̧r eo ilo jerbal in kwaļo̧k eo An kar kōm̧m̧an em̧m̧an n̄an ro jet kōn tūriam̧o. Jen m̧ōk ļōmņak kōn pedped im imminene eo n̄an mour kake n̄an ļōmņake bwebwenato eo kōn loļo̧k eo an Rilo̧mo̧o̧r n̄an m̧weo im̧ōn Simōn Riparisi eo.

Gospel Luk ej kwaļo̧k bwe juon kōrā, ļōmņak kake e rijerawiwi, ekar deļōn̄ ilo m̧weo im̧ōn Simōn ke Jisōs ekar pād ijo. Ilo wāween ettā, kōrā eo ekar jibadōkļo̧k Jisōs, im kar katutu neen kōn dānnin kōmjaaļaļ, im kōṃōrāiki kōn kooḷan bōran, im mejenmaik neen, im kapiti kōn men in kapit eo.¹ Armej eo, eo ekar ļōmņak ippān make eutiejļo̧k jen kōrā eo, kar ļōmņak ippān make kōn jum̧ae im utiej, “Armej in, eļan̄n̄e E ri kanaan, Enaaj kar jeļā wōn im kōjkan kōrā in ej un̄n̄ūr E, bwe e rijero̧wiwi.”²

Parisi ro rej ļōmņak rewānōkļo̧k jen bar jet rekar lale ilo bōd jim̧or Jisōs im kōrā eo. Ak ilo An jeļā, Rilo̧mo̧o̧r ekar jeļā ļōm̧ņak eo an Simōn im, ilo jeļā eļap, im kajim̧we m̧wiļ kōmeletlet eo an Simōn, ekar barāinwōt rōjan̄ e kōn an likjab in kōdeļo̧n̄tok armej ro an rejenoļo̧k āinwōt Jisōs n̄an m̧weeo im̧ōn. Ilo m̧ool, Jisōs ekar kipel Parisi ro rekar jerbal āinwōt rikam̧ool bwe Jisōs em̧ool ekar epād menin letok ko an kanaan im bwe kōrā in, kōn bōro im jetōb ettā, ekar ukweļo̧k im kar jeo̧rļo̧k jerawiwi ko an.³

Ilo aolep men ko jet ilo jerbal in kwaļo̧k eo an Jisōs, bwebwenato in ej kōmeļeļeiki jerbal in tūriam̧o eo eļap an Rilo̧mo̧o̧r n̄an aolep ro renaaj itok n̄an E—jekdo̧o̧n m̧wiļ rot—im eļaptata n̄an ro rej aikuj jipan̄ eo An. Kōn būrom̧ōj im ajļo̧k kōrā in ekar kwaļo̧k iakwe n̄an Jisōs ekar menin kam̧ool kōn ukweļo̧k eo an em̧ool im kōņaan bōk juon jeo̧rļo̧k in jerawiwi ko an. Ijoke, Simōn kōn an utiej jen ro jet, ekar kapen būruwōn,⁴ kōm̧m̧an bwe en jab kwaļo̧k iakwe n̄an jetōb eo ej ukweļo̧k, im ekar ba n̄an Rilo̧mo̧o̧r eo an laļ in kōn bōd im jab errā. Mwiļ eo An ekar kwaļo̧k wāween an mour ekar jab ļapļo̧k jen jon̄an im kar lale kien ko im men ko rej waļo̧k ilik kōn an tōmak kōn kōmjāje im bōd.⁵

Tūriam̧o im jerbal in kwaļo̧k eo an Jisōs ilo bwebwenato in ej kwaļo̧k juon jon̄ak eo eweppān ilo wāween ad maron̄ iaio̧ ippān riturid. Ilo jeje ko rekwojarjar ewōr ie waanjon̄ak ko kōn Rilo̧mo̧o̧r eo, em̧akūt kōn tūriam̧o eļap, mour ippān armej ro ilo tōre ko An im kar jipan̄ ro raar en̄taan im ro raar “mōk, im kar jeplōklōk āinwōt sip ko ejjeļo̧k aer seperd.”⁶ E ekar kwaļo̧k pein tūriam̧o eo An n̄an ro raar aikuj etal jen eddodo ko aer, jim̧or ilo kanniōk im jetōb.⁷

Mwil tūriam̧o eo an Jisōs ej tōt okran ilo iakwe em̧ool,⁸ etaer, ej iakwe eo An em̧ool im erreeo , eo im eaorōk ilo katok in pinmuur eo An. Tūriam̧o ej juon pedped in katak eo an ro rej kajjieon̄ in jeraam̧m̧an, im juon ippān riKūrjin ro jet n̄an jan̄ ippān ro rej jan̄ im m̧wiļ eo eaorōk ej bōk iakwe, tūriam̧o, im jouj.⁹ Kwaļo̧k tūriam̧o n̄an ro jet, em̧ool, eaorōk ilo gospel eo an Jisōs Kraist im juon kōkkaļļe em̧ool kōn mour in jetōb eo ad n̄an epaakeļo̧k Rilo̧mo̧o̧r eo. Kōn menin, ej kwaļo̧k jon̄an im̧we eo Ippān ilo wāween ad mour n̄an kwaļo̧k aorōk in jetōb eo ippād.

Elukkuun wōr tokjen n̄an lale bwe Jisōs ekar kwaļo̧k jerbal in tūriam̧o ejjab wōt jet iien ak men ko kōm̧m̧ani pedped ioon laajrak in jerbal ko bwe ren dedeļo̧k, ak aolep raan ekar kwaļo̧k iakwe eo An erreeo n̄an Anij im n̄an ro Nejin im An kōņaan n̄an jipan̄ er.

Jisōs ekar maron̄ kile aikuj ko an armej ro men̄e ettoļo̧k. Aaet, ejjab kabwilōn̄lōn̄, n̄an waanjon̄ak, ālkin kar kōmour rijerbal eo,¹⁰ Jisōs ekar etetal jān Capernaum n̄an jikin eo ņaetan Nain. Ekar ijo me Jisōs ekar kōm̧m̧ane juon men ekabwilōn̄lōn̄ ilo jerbal in kwaļo̧k eo An ke Ekar kōjerkak likao eo emej, ļaddik eo ej make wōt nejin kōrā eo emej pāleen, kōjerkak n̄an mour. Jisōs ekar jab jeļā wōt en̄taan eo eļap an kōrā in ak bar men ko reppen ilo mour eo an, im E ekar tūriam̧o kake e.¹¹

Āinwōt kōrā eo ejerawiwi im kōrā eo emej pāleen ilo Nain, elōn̄ armej ro ilubwiljid rej kappukot aenōm̧m̧an, jipan̄, kea, im jabdewōt jipan̄ eo jemaron̄ leļo̧k n̄an er. Jemaron̄ aolep kein jerbal ilo pein Irooj n̄an kwaļo̧k tūriam̧o n̄an ro rej aikuj jipan̄, āinwōt kar Jisōs.

Ijeļā kajjien juon leddik eo ekar ļotak tok nan̄inmej eļap ilo lon̄iin. Ekar aikuj in bōk elōn̄ m̧wijm̧wij ko ilo raan eo kein karuo ilo mour eo an. Em̧akūt kōn juon tūriam̧o n̄an ro raar en̄jake ejjab apan̄ in, leddik in im jinen im jemen rekar kappukot n̄an leļo̧k jipan̄, meļeļe, im jipan̄ an ro jet me rekar pen ioon menin. Rekar je ilo ba n̄an eō: “Jen apan̄ in an leddik in nejum̧, ekar wōr am̧ iien em̧m̧an n̄an ioon armej ro rem̧m̧an ro rekar aikuj kaenōm̧m̧an, im peran. Jet iien remootļo̧k, leddik eo nejum̧, eo ej 11 iiō rūttoon, ekar bwebwenato ippān ro jinen im jemen juon nin̄nin̄ kōn ejjab apan̄ eo an wōt. Ilo bwebwenato in, leddik eo nejum̧ ekar utik meej eo ekar kōņake kōn wōn nan̄inmej bwe ro jinen im jemen ren lo ke ewōr kōjatdikdik, men̄e nin̄nin̄ in ej to wōt an deļo̧n̄ ilo iiō ko rej itok n̄an jerbale jorrāān eo. Jen lukkuun kam̧oolol kōn iien em̧m̧an bwe jen leļo̧k iakwe n̄an ro rej en̄taan, āinwōt kar Rilo̧mo̧o̧r eo n̄an kōj. Jej ļōmņak ejako ad metak aolep iien n̄e jej joļo̧k metak ko an ro jet.”

Ro jera rejitenbōro, ilo ad kajjieon̄ kwaļo̧k mour in tūriam̧o ilo mour in ad, āinwōt waanjon̄ak eo jen Rilo̧mo̧o̧r, jenaaj jino ļōmņak kōn aikuj ko an armej ro. Kōn ļōmņak in, en̄jake ko an itok-limo im iakwe renaaj im̧we aolep men ko jej kōm̧m̧ani. Irooj enaaj kile kijejeto ko ad, im jenaaj lukkuun in jeraam̧m̧an kōn iien ko rem̧m̧an n̄an kein jerbal ilo pein Irooj kōmeraikļo̧k bōro ko n̄an leļo̧k jipan̄ n̄an ro me “pā ko rej … allitoto.”¹²

Jisōs ekar kipel Simōn Parisi eo ebar kalikar bwe jej aikuj jab kapenpen im ekajete ro riturid, kōnke jej aolep aikuj rkōn meļeļe im tūriam̧o kōn jab wānōk ko ad jān Jemedwōj Ilan̄ eo ej iakwe. Ejjab ke jejjet ta eo Rilo̧mo̧o̧r ekar kwaļo̧k ilo bar juon iien ke Ekar ba, “Im etke kwōj kallimjek pelo̧k edik ilowan mejān jeōṃ im jatūṃ, a jab ļōmmņak kōn wōjke ilowan mejōm̧?”¹³

Jej aikuj ļōmņak bwe ejjab pidodo n̄an meļeļe aolep jekjek me ej iokļo̧k m̧wiļ im kōm̧m̧an ko an ro jet. Men ko ilik emaron̄ koote im jet iien eban kwaļo̧k jon̄an m̧wiļ eo ippān ro jet. Ejjab āinwōt kwe im n̄a, Kraist ej maron̄ lo aolep jekjek otemjeļo̧k.¹⁴ Men̄e ejeļā aolep m̧ōjņo̧ ko āinwōt kar An, Rilo̧mo̧o̧r eo ejjab kipel kōj ak ej kijenmej ippād kōn tūriam̧o aolep iien, jipan̄ kōj n̄an kōm̧akūt pelo̧k ko jen mejed. Jisōs eaar aolep iien lale bōro ko im ejjab kōn men eo ilikin.¹⁵ E ekar make ba, “Koṃwin jab ekajet kōn men eo ilikin.”¹⁶

Kiiō, ļōmņak kōn kapilōk in an Rilo̧mo̧o̧r n̄an rijilōk ro jon̄oulruo an riNipai ro kōn kajjitōk in:

“Im kom̧in jeļā bwe kom̧ naaj riekajet ro an armej rein, ekkar n̄an ekajet eo inaaj lewōj n̄an kom̧, eo enaaj jim̧we. Kōn menin, armej rot kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij.”¹⁷

“Kōn menin I kōņaan bwe kom̧in weeppān āinwōt N̄a, ak Jemāmi eo ej pād ilo lan̄ e weeppān.”¹⁸

Ilo naan in, Irooj ej jerbali ekajet ko ioon ro rej bōk ioer make n̄an ekajet likjab ko an ro jet rebōd. N̄an kōkarbab kōj make n̄an ekajet ko rejim̧we, jej aikuj kajjieon̄ in erom̧ āinwōt Rilo̧mo̧o̧r im kappukot jab wānōk ko an kajjojo kōn tūriam̧o, em̧ool kōn mej ko Mejen. Ļōmņak bwe eto wōt ad tōpar wānōk, bōlen enaaj em̧m̧anļo̧k n̄e jej jijet ilo neen Jisōs im akweļap kōn tūriam̧o kōn jab wānōk ko ad make, āinwōt kar kōrā eo ekar ukwaļo̧k ilo m̧weeo im̧ōn Parisi eo, im jab joļo̧k eļap ien im kajoor n̄an jerbale jab wānōk ko an ro jet.

Ro jera rejitenbōro, Ij kam̧ool bwe ilo ad kajjieon̄ in kappukot tūriam̧o eo an Rilo̧mo̧o̧r kōn waanjon̄ak n̄an mour ko ad, ad maron̄ in nōbar wānōk an ro riturid enaaj ļapļo̧k im ad ļōmņak in ekajet kōn bōd ko aer enaaj dikļo̧k. Jemdoon eo ad ippān Anij enaaj ļapļo̧k, im mour ko ad renaaj em̧m̧anļo̧k, en̄jake ko ad renaaj jouj ļo̧k, im jenaaj lo juon lem̧ōņōņō eo ejjeļo̧k jem̧ļo̧kin. Naaj jeļā kajjien rikōm̧m̧an aenōm̧m̧an,¹⁹ naan ko rejouj āinwōt m̧ōļawi in jibbon̄.

Ij jar bwe enaaj ļapļo̧k ad jouj im jeļā kajjien ro jet bwe tūriam̧o an Irooj enaaj, ilo ettā eo ewānōk, enaaj kalur jab kijenmej eo ad ippān jab wānōk ko aer. En̄in ej kūr eo an Rilo̧mo̧o̧r n̄an kōj. Ij kam̧ool bwe E emour. E ej waanjon̄ak eo eweeppān kōn jouj im rikaļoor eo ekijenmej. Ij kwaļo̧k aō naan in kam̧ool kōn m̧ool kein ilo āt ekwojarjar etan Jisōs Kraist, amen.