Keememej ro Rekwōjarjar Ren̄taan Am̧, O am Anij

Karōk in m̧ōņōņō eo an Jemedwōj Ilan̄ ekoba mour wabanban in ijo aolep ro Nejin renaaj mālijon̄ n̄an jelm̧ae apan̄ ko.¹ Ļalem iiō remootļo̧k ikar nan̄inmej kōn kāānjōr. Ikar en̄jake im ij en̄jake wōt metak in m̧wijm̧wij ko, baijin, uno ko, kakōlkōl ko, im men ko rej waļo̧k jen uno ko. Ikar en̄jake apan̄ kein rellōn̄ ilo aō jab kiki elōn̄ bon̄. Uwaak in taktō ko rej kwaļo̧k ke imaron̄ bōlen m̧ōkaj aō mej jen mour in, em̧m̧akūt jān, ium̧win juon tōre, juon baam̧le eo eļap tokjāer n̄an n̄a.

Jekdoon ia eo kwoj pād ie, en̄taan ilo ānbwin ak en̄jake kōn juon apan̄ im m̧ōjņo ko an kanniōk me rekar waļo̧k, ej kiiō, ak juon raan enaaj m̧ōttan mour eo am̧.

En̄taan ilo kanniōk emaron̄ itok jen rūttoļo̧k, nan̄inmej ko jab jeļā kaki, im itaak in wa ko, kwole ak ajimakeke; ak kakkure, m̧akūtkūt in kakkure, im tariņae.

En̄taan ilo en̄jake emaron̄ in itok jen m̧ōk ak eddodo; riab an ro ripālele, ro jinen im jemen, ak ritōl ro; jikin jerbal ak jāān; jab jim̧we kōm̧m̧an jen ro jet; kālet ko an ro m̧ōttad, ajri ro, ak ro jet uwaan baam̧le; kakkure ilo elōn̄ kain jekjek; ettōņak ko kōn m̧are rekar jab kūrm̧ool ak ajri ro; nan̄inmej enana ak mej an em̧ōkaj an ro rejitenbōro; ak elōn̄ kain men ko jet.

Elmen am̧ maron̄ dipuk en̄taan kein me jet iien remaron̄ waļo̧k n̄an kōj?

Kam̧m̧oolol, kōjatdikik ej waļo̧k ilo gospel eo an Jisōs Kraist, im kōjatdikdik emaron̄ bar m̧ōttan mour eo am̧. Rainin ikōņaan kwaļo̧k emen pedped ko kōn kōjatdikdik me rej itok jān jeje ko rekwojarjar, katak in kanaan ko, elōn̄ loļo̧k in jerbal in karejar, im jen ājmour eo aō make. Pedped kein rejjab men bajjōk ak rej lukkuun m̧ool.

Kein kajuon, en̄taan ejjab meļeļein Anij ejjab m̧ōņōņō ilo mour eo am̧. Ruo taujin iiō ko remootļo̧k, rijilōk ro an Jisōs rekar lo juon em̧m̧aan epilo ilo tampeļ eo im kar ba, “Rabbai, wōn e ar jerọwiwi, armej in, ak jemān im jinen, bwe ear ḷotak im pilo?”

Rijilōk ro An rekar jab tōmak, bar āinwōt elōn̄ armej rainin, bwe aolep kaen̄tanaan im en̄taan ilo mour in rej itok jen jerawiwi. Ak Rilo̧mo̧o̧r ekar uwaak “Armej in ear jab jerọwiwi, ak jemān im jinen; a bwe jerbal ko an Anij ren waḷọk kōn e.”²

Bwe jerbal eo an Anij n̄an kakūrm̧ool jab wabanban im mour indeeo eo ad.³ Ak elmen apan̄ ko im en̄taan—eļaptata en̄taan ej waļo̧k jen ro jet kōn jerawiwi in kōjerbal anemkwoj⁴—āliktata ilo jerbal in an Anij?

Irooj ekar ba n̄an armej in bujen ro An, “Iar karreoik eok …; Iar mālejjon̄ eok ilo upaaj in jorrāān.”⁵ Jekdo̧o̧n en̄taan rot eo am̧, Jemedwōj Ilan̄ emaron̄ kōkāāl jetōb eo am̧.⁶ Kōkāāl jetōb emaron̄ joļo̧k eddodo ko an ro jet kōn iakwe em̧ool im tūriam̧o.⁷ Kōkāāl jetōb an ro rekar itok “jān en̄taan eļap” raar pojak n̄an mour m̧ōņōņō im̧aan Anij indeeo, im “Anij enaaj kōmōrāik dānnin kōmjaaļal otemjej jān mejeir.”⁸

Kein karuo, Jemedwōj Ilan̄ ej lukkuun jeļā kōn en̄taan eo am̧. Ilo apan̄ kein, emaron̄ bōd ad ļōmņak bwe Anij ettoļo̧k im ejjab jeļa kōn metak ko ad. Aaet Rikanaan Josep Smith ekar kwaļo̧k en̄jake in kōn mour eo an. Ke eaar kalbuuj ilo Liberty Jail ilo an taujin Armej ro Rekwojarjar ilo Raan ko Āliktata kar kadiwōjļo̧k er jen m̧oko im̧weer, Josep ekar kappukot meļeļe ilo jar: “O Anij, kwo pād ia? Im ia eo em̧ nuknuk eo ej kalbubu jikin tilekek eo Am?” Eaar akweļap kōn naan kein: “Keememej ro rekwōjarjar ren̄taan Am̧, O am Anij.”⁹

Irooj eaar uwaake kajjitōk eo an Josep im aolep ro rekar en̄taan:

“Neju maan, Aenōm̧m̧an n̄an jetōb eo am; inebata im jorrāān kein am rej n̄an wōt jidik iien;

“Innām, eļan̄n̄e kwonaaj kijenmej kaki, Anij enaaj lelōn̄ļo̧k eok n̄an ijo ilan̄.”¹⁰

Elōn̄ Rikwojarjar ro ren̄taan me rekar kwaļo̧k n̄an eō ewi jon̄an aer kar en̄jake iakwe eo Anij ilo apan̄ ko aer. Ij make keememej en̄jake eo aō make ilo juon poin ilo aō dipuk kāānjōr eo aō ke taktō ro rekar jab jeļā ekōm̧m̧an metak. Iaar jijet ippān kōrā eo ippa, ilo amro kōjeraam̧m̧an m̧ōn̄ā in kōrālep eo am̧ro. Ijoke, men eo imaron̄ kōm̧m̧an ej jan̄, “Jemedwōj Ilan̄, jouj jipan̄ eō. Ikanooj nan̄inmej.” Ilowaan wōt 20 n̄an 30 minit, ikar jepooļ kōn iakwe eo An. Kar letok n̄an eō ke ejjeļo̧k unjen nan̄inmej eo aō, ejjeļo̧k uwaakin, im ejjeļo̧k eddodo jān metak eo. Iaar en̄jake iakwe eo An, im ekar lukkuun in bwe.

Ij kam̧ool bwe Jemedwōj Ilan̄, eo ejeļā kōn sparro ko rej wōtļo̧k, ejeļā kōn en̄taan eo am̧.¹¹

Kein kajilu, Jisōs Kraist ej letok kajoor eo An eļap n̄an jipan̄ eok bōk kajoor n̄an dipuk en̄taan eo am̧. Kajoor in ej kōm̧m̧an jen Pinmuur eo An.¹² Ij mijak n̄e elōn̄ membōr ro an Kabun̄ in rej ļōmņak n̄e reripen, remaron̄ make bōkļo̧k metak ko aer make. Epen menin n̄an kōm̧m̧ane. Bajjōk kajoor in am̧ eban keidi n̄an kajoor in jipan̄ eo ekwojarjar an Rilo̧mo̧o̧r n̄an kōkāāl jetōb eo am̧.¹³

Bok in Mormon ej kwaļo̧k bwe Jisōs Kraist ekar “bōk Ioon” metak ko ad, nan̄inmej ko, im jeļā ekōjkan An jipan̄ kōj.¹⁴ Elmen am̧ maron̄ likūt ioon kajoor eo bwe Jisōs Kraist en jeļā ekōjkan jipan̄ eok im kōkajoorļo̧k eok ilo iien en̄taan kein? Kii eo ej n̄an lukwōj eok make ippān Rilo̧mo̧o̧r ilo kōjparok bujen ko kwaar kōm̧m̧ani Ippān. Jej kōm̧m̧ani bujen ko ilo ad bōk kain̄i ko an priesthood.¹⁵

Armej ro an Alma raar deļo̧n̄e juon bujen in peptaij. Tokālik rekar en̄taan ilo kōm̧akoko im raar bōjrak jen aer kabun̄jar im jar. Aaet raar dāpij wōt bujen ko aer jon̄an wōt aer maron̄ ilo aer jar ilo būruweer. Āinwōt juon uwaak, kajoor ekwojarjar ekar itok. “Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen.”¹⁶

Ilo tōre in ad, Rilo̧mo̧o̧r ej kūr, “Reitok n̄an Eō ilo ļōmņak otemjeļo̧k; jab pere, jab mijak.”¹⁷ N̄e jej kōjparok bujen kwojkwoj eo ad n̄an iien otemjej keememej E, E ej kallim̧ur bwe Jetōb eo An enaaj pād ippād. Jetōb ej kōkajoorļo̧k kōj n̄an diput apan̄ ko n̄an kōm̧m̧ane ta eo jeban kōm̧m̧ane n̄an kōj make. Jetōb emaron̄ kōmour kōj, ilo an Būreejtōn James E. Faust kar kwaļo̧k, “Jet iaan kōmour kein remaron̄ bōk jikier ilo laļ eo juon.”¹⁸

Jej bar jeraam̧m̧an kōn bujen im kain̄i ko an tampeļ, ijo “kajoor in āinwōt anij ej waļo̧k.”¹⁹ Iaar loļo̧k juon kōrā eo eaar mej leddik eo nejin ilo juon itaak in wa, innām tokālik ļeo ippān kōn kāānjōr. Iaar kajjitōk elmen an maron̄ eļļā jen mej im en̄taan in. Liin eaar uwaak bwe kajoor eaar itok kōn jetōbin kaenōm̧m̧an kōn juon baam̧le indeeo em̧ōj an kōm̧m̧an ilo tampeļ. Āinwōt kar kallim̧ur, kain̄i ko ilo tampeļ raar leļo̧k n̄an e kōn kajoor eo an Anij.²⁰

Kein kemān, kālet n̄an kappukot lan̄lōn̄ kajjojo raan. Ro emakijkij aer en̄taan kōn metak eo ejjeļo̧k jem̧ļo̧kin, metak eo enaaj itok wōt. EMMAN jan̄.²¹ Aaet, n̄e kwoj en̄jake ippam̧ make kōn metak, n̄an kālet tōmak eo kwomaron̄ m̧ōņōņō kake ilo jibbon̄.²²

N̄an waanjon̄ak, iaar loļo̧k juon m̧am̧a eo em̧m̧an ded me ekar kāānjōr, ettōn̄dikdik kōn metak jen jiea eo an im an ejjeļo̧k ko̧lin bōran. Iaar ioon jet ripālele rōm̧m̧an ded relem̧ōņōņō rej jerbal āinwōt ritōl ro an jodikdik men̄e ekar jab wōr nejierro. Iaar jijet ippān juon kōrā eo ejitenbōro me jibwier im jinen, im ļeo pālele—eo ekar mej ilowaan wōt jejjo̧ raan, em̧ool dānnin kōmjaaļal ekar ļap ippān baam̧le eo im kar juon iien em̧ļo̧ke.

En̄taan kein an ro Rekwojarjar rej waanjon̄ak ko me ta eo Būreejtōn Russel M. Nelson ekar kwaļo̧ke:

“Lan̄lōn̄ eo jej en̄jake edik jetņakin ilo wāween mour ko ad im aolep men otemjej jej kōm̧m̧ani ilo ad mije mour ko ad.

“N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad.”²³

Ij kam̧ool²⁴ bwe Jemedwōj Ilan̄ ej keememej Rikwojarjar ro ren̄taan, iakwe eok, im lukkuun kea kake eok. Ad Rilo̧mo̧o̧r ejeļā am̧ en̄jake. “Em̧ool Eaar ineek en̄taan ko ad.”²⁵ Ijeļā—āinwōt juon armej²⁶—kōjparok bujen ko ej kōpeļļo̧k kajoor in pinmuur in en̄taan eo an Jisōs Kraist n̄an letok kajoor im lan̄lōn̄ n̄an eo ej en̄taan.

N̄an aolep ro rej en̄taan, ij jar, “Anij en lewōj n̄an kom̧ bwe eddo ko ami ren mera, kōn lan̄lōn̄ an Nejin.”²⁷ Ilo etan Jisōs Kraist, amen.