Kōppopo n̄an Itok eo Kein Karuo an Kraist

Āinwōt kar rekooti ilo Bok in Mormon, jiljino iiō m̧okta jān ļōtak eo an Jisōs Kraist, Samuel, Rileman eo eweppān, kar kanaan n̄an juon kumi in Rinipai, ro ilo tōre eo rekar wōtlo̧k im pād ilo marok,¹ kōn kakōļļe ko im̧aan in ļōtak eo an Rilo̧mo̧o̧r eo. Būrom̧ōj, eiten aolep Rinipai ro rekar kajekdoon kakōļļe kein kōnke ekar “ej jab ekkar bwe juon armej āinwōt in Kraist [enaaj] itok.”²

Ajļo̧k eo, ekkar n̄an rekoot ko ilo jeje ko rekwojarjar, elōn̄ iaan Riju ro, ilo ejja wāween in wōt, kar jab bōke em̧m̧aan in etan Jisōs, jān juon jikin edik ilo Galilee, kar aaet Messaia eo eto kar kōttare.³ Jisōs, eo ekar itok n̄an kakūrm̧ool elōn̄ kanaan ko kōm̧m̧an jān rikanaan ro an Hibru, kar kajekdoon im em̧ool kar debwāāl kōnke, ilo an rikanaan Jekab ilo Bok in Mormon katakin, Riju ro rekar “reilo̧k jān kōkaļļe eo” Kōn menin, Jekab ekar kam̧ool bwe “Anij Eaar bōkļo̧k alikkar eo An jān er, im bōkļo̧k elōn̄ men ko rejjab maron̄ meļeļe, kōnke raar kōņaan e. Im kōnke raar kōņaan e Anij Eaar kōm̧m̧ane, bwe ren maron̄ tipn̄ōl.”⁴

Āinwōt an kabwilōn̄lōn̄, ejjeļo̧k katak, ejelok kabwilōn̄lōn̄, im ejjeļo̧k waļo̧k jān enjeļ ro ilo ilan̄, āinwōt kar kam̧ool jān Leman im Lemuel,⁵ ekwaļo̧k juon kajoor n̄an kam̧ool n̄an jejjo armej n̄an ukōt aer katak, aer lale, ak tōmak ke juon men ej m̧ool. Menin eļaptata ilo iien ko n̄e katak ko im kabwilōn̄lōn̄ ko rejjab errā ippen oktak ko rejidimkij, kōņaan, im ļōmņak ko an juon armej.

Jouj bōk jidik iien n̄an lale oktak ko an eoon kein ruo, eo kein kajuon jān Rijiļo̧k Paul ej kōnono kōn raan kein āliktata, kōmeļeļeiki ilo wāween ko an armej, im eo kein karuo jān rikanaan Alma ej kwaļo̧k wāween an Anij kōm̧m̧ane jerbal eo An ilubwiljin armej ro. Moktata jān Paul:

“A kwōn jeļā men in, bwe ilo raan ko āliktata iien ko re nana renaaj waļo̧ktok.

“Bwe armej ro renaaj yokwe er make, im renaaj ri arōk m̧weiuk, ri juwaļōn̄ļōn̄, ri kajjirere, im ro rej kipiliia n̄an jemeir im jineir, im ro rej jab kam̧moolol, im ri nana,

“Im ro re jab yokwe ro nukier, im ro re lāj, im ro rej kōnnaan naan in riab, ro re jab kōmmaanwa, rawiia, ro rej dike em̧m̧an,

“Ro ri ketak, ro rej kōm̧m̧an jet men m̧okta jān aer ļōmņak kake, ro ri kōmmejāje, im ro rej yokwe men in kabun̄būrueir eļap jān aer yokwe Anij; …

“Katak iien otemjej im re jab maron̄ tōpar jeļā m̧ool jabdewōt iien.”⁶

Im kiiō jān Alma, ej kwaļo̧k juon pedped in katak eo an gospel eo an Jisōs Kraist: “Kiiō kwo m̧aron̄ kōtmāne bwe men in ebwebwe ilo n̄a; a lo ij ba n̄an eok, bwe jān men ko reddik im reļam waan men ko reļļap rej kūrm̧ool; im wāween ko reddik ilo elōn̄ wāween ko rej kapok eo emālōtlōt.”⁷

Jej mour ilo laļ in rainin obrak kōn eļap mālōtlōt im eļap jeļā. Mekarta, men kein ekkā aer kabinjak pedped eo epidodo im rej ekkal ioon. Kōn menin, rejjab tōlļo̧k n̄an lukkuun m̧ool eo im n̄an Anij im kajoor eo n̄an bōk revelesōn ko, bōk jeļāļo̧kjen ilo jetōb, im kōlapļo̧k tōmak ilo Jisōs Kraist eo ej tōl n̄an lo̧mo̧o̧r.⁸

Eļap an kakeememej kōj kōn naan ko an Irooj n̄an Thomas im Rijilōk ro jet ilo joteen in pinmuur in en̄taan eo An: “Jisōs e ba n̄an e, N̄a iaḷ, im ṃool, im mour: ejjeḷọk armej ej itok n̄an Jema, eļan̄n̄e jab kōn Eō”⁹

N̄an ro ewōr mejeer n̄an loe, lo̧jiln̄ier n̄an ron̄, būruweer n̄an en̄jake, eļapļo̧k jān kar m̧okta jej aikuj kwaļo̧k n̄an m̧ool eo bwe jepaake Itok eo Kein Karuo an Jisōs Kraist. Mool, men ko repen rej kōttar ro ilo laļ in ilo ro̧o̧ltok eo An, bōtaab ilo menin, ro rej tōmak ren jab mijak.

Kiiō ij kwaļo̧k jidik jān Unin Tōl ko an Kabun̄ in ium̧win jeje ņe “Itok eo Kein Karuo an Jisōs Kraist”:

“N̄e Rilo̧mo̧o̧r eo enaaj bar itok, Enaaj itok kōn kajoor im aiboojoj n̄an bōke laļ in āinwōt aelōn̄ eo An. Itok eo An Kein Karuo enaaj make jinoin Juon taujin iiō.

“Itok eo Kein Kauro enaaj juon iien mijak, būrom̧ōj n̄an ro rijerawiwi ro, ak enaaj juon raan in aenōm̧m̧an n̄an ro rewānōk. Irooj eaar kwaļo̧k:

“‘Bwe ro remālōtlōt im rekar bōk m̧ool eo, im rekar bōk Jetōb Kwōjarjar bwe en aer ritōl, im rekar jab po ilo m̧oņ—em̧ool Ij ba n̄an kom̧, rejamin naaj juoklaļļo̧k er im joļo̧k er ilo kijeek eo, ak renaaj mour ilo raan eo.

“‘Im laļ in naaj leļo̧k n̄an er bwe en aer jolōt; im renaaj wōrļo̧k im kanooj kajoor, im ro nejier renaaj eddōkļo̧k ilo ejjeļo̧k jero̧wiwi n̄an lo̧mo̧o̧r.

“‘Bwe Irooj enaaj pād ilubwiljier, im An aiboojoj enaaj pād ioer, im E naaj aer kiin̄ im aer rileļo̧k kakien’ (Katak im Bujen Ko 45:57–59).”¹⁰

Ilo kapopo eo ad n̄an Itok eo Kein Karuo an Jisōs Kraist, Ij lewaj juon ennaan in kaenōm̧m̧an n̄an ro rej tōmak bōke jān rikanaan Amos jān Kallim̧ur Mokta: “Irooj e jab kōm̧m̧an jabdewōt, ak Ej kwaļo̧k pepe eo An n̄an ri karijeran ri kanaan ro.”¹¹

Ilo jetōb in, rikanaan eo rainin an Irooj n̄an lal in, Būreejtōn Russell M. Nelson, kar letok n̄an kōj ko̧o̧njeļ eo ekāāl tata: “Gospel eo an Jisōs Kraist ej gospel in ukweļo̧k. Kōn Pinmuur eo an Rilo̧mo̧o̧r eo, gospel eo An ej letok juon karuwainene n̄an jab bōjrak in oktak, eddōkļo̧k, im erom̧ erreo. Ej juon gospel in kōjatdikdik, kōmour, im eddōkļo̧k. Mekarta, gospel eo ej juon ennaan in lan̄lōn̄! Jetōb ko ad rej lan̄lōn̄ kōn aolep bun̄tōn ko reddik jej būki.”¹²

Ij kadedeļo̧k kam̧ool kōn im rikam̧ool kōn m̧ool eo an Anij im kabwilōn̄lōn̄ ko aolep raan jān armej ro jān jim̧ōr ettā im uteij ilo jadewōt jekjek in m̧our in. Mool, elōn̄ en̄jake ko rekwojarjar edik ekōnono kaki, ilo jidikin kōnke kōn aer aorōk im ekwojarjar im emaron̄ waļo̧k jān kajirere an ro jet rejjab jeļā em̧m̧anļo̧k.

Kōn menin, rikanaan eo āliktata ilo Bok in Mormon, Moronai, ekar kakeememej kōj:

“Im bar juon alen ij kōnono n̄an kom̧ ro rej kariab mōdānļo̧k ko an Anij, im ba bwe em̧ōj juļo̧k, bwe ejjeļo̧k mōdānļo̧k ko, ak kanaan ko, ak mennin leļo̧k ko, ak kōmour, ak kōnono kōn lo ko, im ukok in lo ko;

“Lo ij ba n̄an kom̧, e eo ej kariab men kein ej jab jeļā gospel eo an Kraist; aaet, eaar jab kōnono jān jeje ko rekwōjarjar; eļan̄n̄e āindein, e ej jab meļeļe er.

“Bwe jej jab ke kōnono jān jeje ko rekwōjarjar bwe Anij ej āinwōt juon inne, rainin, im indeeo, im ilo E ejjeļo̧k irlo̧k ak ellor in ukoktak?”¹³

Ij kōjemļo̧k kōnono kein aō kōn juon ennaan jān Rikanaan Josep Smith, kar leļo̧k epaakeļo̧k jemļo̧k in an jerbal ilo an reim̧aanļo̧k n̄an Itok eo Kein Karuo an Jisōs Kraist: “Jej jab ke wōnm̧aanļo̧k kōn juon un em̧m̧an? Bun̄m̧aanļo̧k im jab kelik. Kom̧in peran, ro jeiū im jatū m̧aan [im, imaron̄ ke kobaik, kōrā ro]; im wōnm̧aanļo̧k, wōnm̧aanļo̧k n̄an anjo̧! Būruōmi ren lan̄lōn̄, im m̧ōņōņō otem m̧ōņōņō.”¹⁴ Eo me ij kobaiki kam̧ool eo aō ilo etan Jisōs Kraist, amen.