Mour Erreo Ejjab Meļeļein Ejjeļo̧k Likjab

Juon iien iaar jilkinļo̧k juon ennaan n̄an leddik eo nejū im ļeo pāleen ilo aō kar maron̄ kōnono im taļboon eo ej jeiki naan ko aō. Iaar ba, “Hey kom̧ro. Ij iakwe kom̧ro.” Meļeļe eo rekar tōbare, “Idike kom̧iro. Aikuj iakwe komiro.” Elukkuun ke kabwilōn̄lōn̄ an oktak im bōd an diwōjlo̧k juon m̧eļeļe eo em̧man. Jet iien ej āindein ennaan eo an Anij kōn ukweļo̧k im erreo.

Jet rej bōd aer bōke m̧eļeļe in ke ukweļo̧k im oktak rejjab menin aikuj. Ennaan eo an Anij ej ba bwe men kein raorōk.¹ Ak ta Anij ejjab iakwe kōj mekarta likjab ko ad? Aaet! Ewāppen An iakwe kōj. Ij iakwe ajri ro jibū, ilo jab wānōk ko aer im ko eirļo̧k wōt, ak ejjab m̧eļeļein bwe ijjab kōņaan bwe ren kate er n̄an em̧m̧anļo̧k im erom̧ ta eo rej kōņaan. Anij ej iakwe kōj kōn aolepān ad, ak ej barāinwōt lukkuun iakwe kōj n̄an kōjekdoon kōj ilo jekjek eo jej pād ie.² Eddōkļo̧k ilo Irooj ej pedped eo eļap an mour in.³ Oktak ej unin Pinmuur eo an Kraist. Kraist ekar jab wōt jerkakpeje, karreo, kaenōm̧m̧an, im kōmour kōj, ak ilo aolep men kein wōj, E emaron̄ ukōt kōj bwe jān maron̄ in āinwōt E.⁴

Jet rej bōd aer bōke meļeļe in ke ukweļo̧k ej bōk jikin juon wōt kōttan. Ennaan eo an Anij ej bwe, āinwōt an Būreejtōn Russell M. Nelson kar katakin, “Ukweļo̧k … ej juon jerbal.”⁵ Ukweļo̧k ej bōk iien im an emakijkij jerbal,⁶ kōn menin bōjrak jān jerawiwi⁷ im en “jab bar itok wōt in kōm̧m̧an nana, ak n̄an kōm̧m̧an em̧m̧an wōt”⁸ rej kōttōbar ko ilo mour in.⁹

Mour in ej āinwōt juon iien ito itak eo kwoj kattōr jinoin āneo n̄an jem̧ļo̧kin āneo. Jejjab maron̄ in tōbarļo̧k mejān kajjik eo kōn juon wōt tāān̄ in kiaaj. Jej aikuj tein̄i kiaaj eo elōn̄ allen. Ilo ad bōk kwojkwoj eo ej āinwōt ilo ad bōjrak ļo̧k m̧ōn kiaaj eo. Ilo ad ukweļo̧k im kōkāāle bujen ko ad, jej kallim̧ur ke jenaaj kōjparok kien ko, im Anij im Kraist renaaj kōjeraam̧m̧an kōj ilo aer letok Jetob Kwojarjar eo.¹⁰ Ilo tukadu in, jej kallim̧ur bwe jenaaj wōnm̧aanļo̧k wōt ilo iaļ in, im Anij im Kraist rej kallim̧ur n̄an kanne wōt tāān̄ ko ad.

Jet rej bōd aer meļeļe im rej lōm̧ņak bwe rejjab erreo n̄an bōk koņaer ilo jerbal in Gospel in kōnke rejjab maron̄ in lukkuun anjo jān iminene nana ko. Ennaan eo an Anij ej bwe mour erreo ejjab meļeļein ejjeļo̧k likjab.¹¹ Mour erreo ej ilo am̧ m̧ool im kate eok. Jej aikuj m̧ool n̄an Anij, ritōl ro ilo doulul eo an priesthood, im ro jet rej iakwe kōj,¹² im jej aikuj wonm̧aanļo̧k wōt n̄an kōjparok kien ko im jab ebweer kōnke jej jirilo̧k im bōd.¹³ Elder Bruce C. Hafen ekar ba bwe ilo ad kajjieon̄ in āinwōt Kraist “aorokļo̧k bwe jān kijenmej im niknik jān ad kajjieon̄ bwe en ejjeļo̧k ad likjab.”¹⁴ Irooj eaar ba bwe menin letok ko an Jetob Kwojarjar rej “liwōji n̄an jeraam̧m̧an eo an ro rej iakwe Eō im kōjparok aolep kien ko Aō, im eo ej kappukot āindein n̄an kōm̧m̧ane.”¹⁵

Juon likao em̧m̧an dettan, Damon eaar jeje, “Iaar rittoļo̧k ilo aō kar kajjieon̄ jelm̧ae jorrāān in pija ko renana. Ilukkuun kanooj kar ļap aō jook ilo an jab wōr men ij kōm̧m̧ane ejim̧we.” Jabdewōt iien Damon ej jirilo̧k im bōd, eaar lukkuun lap an inepata ilo an ekajete e make ilo an jab mour erreo n̄an bōk tiriamo, jeorļo̧k bōd, ak juon bar allen nan kajjieon̄ jān Anij. Eaar ba, “Iaar ļōmņak bwe ij aikuj wōt bwe en nana aō mour. Iaar ļōmņak bwe Anij ej dike eō kōnke ijab maron̄ in anjo jān menin kōnke ijjab m̧ōņōņō in buuļ jerbal im anjo̧ jān menin juon kōttan im n̄an llukkuun in bōjrak. Jet iien ej em̧m̧an ium̧win juon wiik, jet iien juon allōn̄, innām ij pād im ļōmņak, “ilukkuun ban em̧m̧an im kein ta aō kate eō?”

Ilo juon tōre eo eaar kanooj m̧ōjņo̧ tok, Damon eaar ba n̄an ritōl eo an doulul eo an priesthood, “ Bōlen ij aikuj in bōjrak jān aō itok im jar. Im̧m̧ōk in m̧oņe n̄a make.”

Ritōl eo an eaar uwaake im ba: “Kwojjab m̧oņe eok bwe ewōr juon am̧ iminene eo enana im kwoj kajjieon̄ anjo jene. Kwoj m̧oņe eok make eļan̄n̄e kwoj ņooje, riab, im kajjieon̄ ba ippem ke jorrāān eo ej tok jān Mōnjar eo bwe rej lelōn̄ļo̧k jon̄ok ko aer. Ilo am̧ m̧ool kōn kōm̧m̧an ko am̧ im bōk bun̄tōn ko n̄an wōnm̧aanļo̧k, kwojjab m̧oņe jabdewōt. Ej erom juon rikaļoor.”¹⁶ Ritōl in eaar kouti Elder Richard G. Scott eo im eaar katakin, “Irooj ej loe m̧ōjņo ko ad āinjuon ļo̧k jān An loe ad jum̧ae. … Ilo an Irooj kōnono kōn m̧ōjņo̧ ko, aolep iien ej meanwōd.”¹⁷

Kōļmenļo̧kjeņ in eaar lelo̧k kōjatdikdik n̄an Damon. Eaar jeļā bwe Anij eaar jab pād ilan̄ im ba menin, “Damon em̧ōj an bar kōm̧m̧an bōd.” Ijjelo̧kin, E eaar maron̄ in ba menin, “Lale mōk jon̄an an Damon kate.” Ļaddik in ejamin bar bōk bōran kōn jook im pukōt wāween ko n̄an jekpen ņae kōm̧m̧an ko an. Eaar kapukōt jipan̄ jān eo ijo eutiejtata, im ekar loe.¹⁸

Damon ekar ba: “Iien eo wōt iaar oktak n̄an Anij ilo kar mour eo aō ej ilo aō kajjitōk kōn jeorļo̧k bōd, ak kiiō iaar maron̄ bar kajjitōk kōn tiriam̧o— eo An ‘ej kajoor in kōmaron̄’ [Bible Dictionary, “Grace”]. Ijan̄in kar kōm̧m̧an āinwōt in kar mokta. Ilo raan kein iaar maron̄ in kar joļo̧k eļap iien n̄an inepata kōn kōm̧m̧an ko aō im bōk aō iien n̄an kwaļo̧k aō iakwe Jisōs kōn ta eo Ekar kōm̧m̧ane.”

Lōm̧n̄ak kake jon̄an aetokin an kar Damon jelm̧ae apan̄ eo an, ekar jab lukkuun jipan̄ im jejjet ilo an ro jinen im jemān im ritōl ro rej jipan̄ e naaj kar ba n̄ane “kwon jab bar” ilo juon tōre eo em̧ōkaj ak n̄an aer leļo̧k bun̄tōn ko n̄an bōbrae bwe en maron̄ in “mour erreo.” Ijjelo̧kin, rekar ijino kōn kōttōbar ko redik im pidodo n̄ane. Rekar bōjrak jān aer kōtmāne ke enej bōjrak iien eo em̧ōkajtata im pedped wōt ilo an jidik jidik im eddōkļo̧k, im ekōm̧m̧an bwe Damon en wōnm̧anlo̧k im kōm̧m̧ane jet bun̄tōn ko renej jipan̄e ijjelōkin an naaj kar jab tōbrak.¹⁹ E, āinwōt kar armej in Limai ro im rej rikamakoko, ekar lo bwe emaron̄ “bōk eļap kōjeraam̧m̧an.”²⁰

Elder D. Todd Christofferson eaar katakin: “Ilo ad jelm̧ae juon men eo eļap, jej aikuj in jerbale im ijino kōn jet jon̄ak ko remerra im iddik kajjojo raan. … Ilo ad joļo̧k jet iminene ko renana ej meļeļein bwe jej bōk ijo koņaad rainin im naaj ilju im bar eo tok juon, im bōlen ilo elōn̄ raan ko, im emaron̄ bar allōn̄ im iiō ko barāinwōt. … Ak jemaron̄ in kōm̧m̧ane kōnke je maron̄ in kajjitōk jipan̄ jān Anij… n̄an jabdewōt ad aikuj kajjojo raan.”²¹

Kiiō, ro jeū im jatū, nan̄inmej in COVID-19 in ejjab pidodo n̄an kōj wōj aolep, bōtaab ilo ad kōttoļo̧k kōj jān doon im kōjparok doon, ekōm̧m̧an bwe en lukkuun pen n̄an ro im rej jelm̧ae apan̄ ko in iminene ko renana. Keememej bwe oktak ej maron bōk jikin, ukweļo̧k ej juon men eo ebbōk iien, im ilo ad mour erreo ejjab m̧eļeļein bwe jejjab likjab. Elukkuun aorōk bwe jān, keememej bwe Anij im Kraist rej m̧ōņōņō in jipan̄ ijin im kiiō.²²

Jet rej bōd im ļōmņak bwe Anij ej kōttar in jipan̄ ālkin ad ukweļo̧k. Anij ej jiron̄ kōj bwe E enej jipan̄ kōj ilo ad ukweļo̧k. Jouj eo an ej kōm̧m̧an bwe en maron̄ jipan̄ “jekdoon ia eo jej pād ie ilo ad pokake.”²³ Elder Dieter F. Uchtdorf eaar ba: “Anij ejjab aikuj armej ro im ejjeļo̧k aer bōd. Ej pukōt ro im renaaj lelo̧k ‘būruer im aolep aer ļōmņak’ [Katak im Bujen Ko 64:34], im E enaj kōm̧m̧an bwe ren ‘weppen āinwōt Kraist’ [Moronai 10:32–33].”²⁴

Elōn̄ ro im em̧ōj aer metak im jorrāān itok wōt jān ken̄taan jemjerā ko aer im kōn menin epen aer tōmak ilo tiriam̧o eo an Anij im ejjeļo̧k jem̧ļo̧kin. Ej pen aer loe Anij kōn wōn E—juon jemed eo ej kabwe aolep ad aikuj²⁵ im ejeļā ilo an letok “men ko rem̧m̧an n̄an ro im rej kajjitok n̄ane.”²⁶ Jouj eo an ejab juon juon nōbar n̄an ro wōt im rej erreo. Ej juon jipan̄ eo “ejeļo̧k jem̧ļo̧kin” E ej letok bwe en jipan̄ kōj bwe jān maron̄ bōk mour erreo. Ejab juon menin nebar n̄an ro wōt im rej jim̧we. Ej juon menin “letok eo ekwojarjar kōn kajoor eo an” E ej letok n̄an jipan̄ kōj mour jim̧we.²⁷ Jejjab etetal wōt ilo ad jibadōk Anij im Kraist. Jej etetal wōt Ippaer.²⁸

Ilo Kabun̄ in, jodikdik ro rej kwaļo̧k unin tōl ko an jiron̄ ro ilo Unin Tōl ko an Doulul eo an Jiron̄ ro im Doulul eo an Priesthood eo an Aron. Jān New Zealand n̄an Spain n̄an Ethopia n̄an Japan, jiron̄ ro rej ba, “Inaaj kōjparok menin letok eo kōn ukweļo̧k.” Jān Chile n̄an Guatemala n̄an Moronai, Utah, likao ro rej ba,“llo aō kajjieon̄ jerbal, kōjerbal tōmak, ukweļo̧k, im em̧m̧anļo̧k kajjojo raan, inaaj karbab n̄an bōk kōjeraam̧m̧an ko an tampeļ im n̄an niknik lan̄lōn̄ kōn gospel in.”

Ij kallim̧ur bwe menin kejeram̧m̧an ko im m̧ōņōņō rej jet men ko rem̧ool im ej ped ilubūdin pein ro rej kōjparok kien ko im “eo ej kappukot n̄an kōm̧m̧an āinwot in.”²⁹ Ilo am̧ en̄jake bwe elōn̄ wōt iien kwoj bōd im kwojjab bar maron̄ kajjieon̄, keememej pinmuur eo an Kraist im jouj eo an ekōm̧m̧an bwe aolep men ren em̧m̧an.³⁰ “[An] pein tiriam̧o eo ej peļļo̧k n̄an kwe.”³¹ Kwoj jitōn bōro—rainin, ilo 20 iiō ko, im indeeo. Ilo etan Jisōs Kraist, amen.