N̄an Erom̧ juon Rikaļooran Kraist

Ilo ekkatak jeje ko rekwojarjar eo aō make, ikar m̧weiur kōn oktak eo an Saul in Tarsus eo, eo tokālik kar jeļā kajjien āinwōt Paul, āinwōt kōmeļeļeik ilo Baibōļ eo.

Paul ekar juon em̧m̧aan eniknik kakkure Kabun̄ eo im Rikūrjin ro. Bōtaab kōnke kōn kajoor in lan̄ im Pinmuur eo an Jisōs Kraist, ekar dipio an kar oktak, im erom juon iaan rijerbal ro an Anij. Ļōmān mour eo an ekar āinwōt eo an Jisōs Kraist.

Ilo juon iaan katak ko an Paul n̄an Rikornt ro, ekar kajjitōk ippāer n̄an erom rikaļoor ro āinwōt e make ekar juon rikaļooran Kraist (lale 1 Korint 11:1). Menin ej juon kūr em̧ool im jetjet jān iien eo an Paul n̄an rainin: n̄an erom juon rikaļooran Kraist.

Ikar jino kejekļo̧kjeņ kōn ta meļeļe in n̄an erom juon rikaļooran Kraist. Im eo aorōkļo̧k, ikar jino kajjitōk, “Ilo wāween ta ij aikuj in arin E?

N̄an erom juon rikaļooran Kraist ej n̄an kajjieon̄ kajejjet jerbal ko ad, m̧wilid, im mour ko ad n̄an ko an Rilo̧mo̧o̧r eo. N̄an erom rikaļooran jej bōk wānōk. Ej n̄an erom juon m̧ool in rikaļooran Jisōs Kraist.

Ikar ekaktak kōn jet m̧wil ko an mour eo an Rilo̧mo̧o̧r, im ikar bōk, āinwōt m̧ōttan ennaan eo aō rainin, emān iaan bōnjān ko An me ij kajjieon̄ anōki im bwe in kwaļo̧ki ippāmi.

Bōnjān eo m̧oktata an Rilo̧mo̧o̧r eo ej ettā. Jisōs Kraist ekar lukkuun ettā būruon jān mour eo m̧okta. Ilo Ko̧o̧njeļ eo ilo Lan̄, Ekar kile im kōtļo̧k bwe an kilan Anij ej anjo̧ ilo karōk in lo̧mo̧o̧r eo n̄an aolep armej. Ekar ba, “Jema, Ankilam en kōm̧m̧an, im aiboojoj eo en Am̧ indeeo” (Moses 4:2).

Jejeļā bwe Jisōs Kraist ekar katakin ilo ettā bōro im kar kōttāik E make n̄an kaiboojoj Jemen.

Jen mour ilo ettā bōro kōnke ej bōktok aenōm̧m̧an (lale Katak im Bujen Ko 19:23). Ettā bōro ej bōktok aiboojoj, im ej bōktok jouj an Anij iood: “Aet, kom̧ otemjej kom̧win kōņak ettā bōro āinwōt juon nuknuk: Anij ej jum̧ae ro ri juwa, a Ej leļo̧k jouj n̄an ro ri ettā būrueir” (1 Piter 5:5). Ettā bōro ej bōktok uwaak ko rem̧m̧an. E ej unjen juon m̧wil jim̧we.

Elder Dale G. Renlund ekar katakin:

“Kajjojo armej ro rej etetal ettā ippān Anij rej keememej ta eo Jemedwōj Ilan̄ im Jisōs Kraist rekar kōm̧m̧ane n̄an er.”

“Jej m̧akūtkūt jim̧we ippān Anij ilo ad etetal ettā Ippān” (“Jerbal Jim̧we, Iakwe Tūriam̧o, im Etetal Ettā ippān Anij,” Liaona, Nob. 2020, 111, 109).

Bōnjān eo kein karuo an Rilo̧mo̧o̧r eo ej peran. N̄e ij ļōmņak kōn Jisōs Kraist ke ekar 12 iiō dettan jijet ilo tampeļ eo an Anij ilubwilijin taktō ro an kien im katakin er men ko rekwojarjar, ij kile bwe ekar wōr Ippān kadede, ilo jinoin tata ilo mour eo An, juon peran em̧m̧an, juon peran āinjuon. Ilo an elōn̄ wōt kar kōtmene n̄an lo an juon ļaddik edik katain jān taktō ro an kien, E ekar katakin er āinwōt “rekar ron̄jake Jisōs im kajitūkini E kajjitōk ko” (Josep Smith Ukok, Luk 2:46 [ilo Luk 2:46, footnote c]).

Kōm kar jerbale juon mijen edipio ilo Democratic Republic of the Congo Mbuji-Mayi Mijen eo jān 2016 n̄an 2019. Wāween eo n̄an ilo̧k ilo mijen eo jān juon zone n̄an bar juon ekar kōn iaļ. Juon jekjek kar waļo̧ktok ilo eria jab eo kōn riko̧o̧t ro ewōr ippāer bakbōk im jāje ko raar luko̧rko̧r e armej ro ilo iaļ eo im kakkure an ritotak ro ito itak.

Ļalem mijenede ro raar ilo̧k jān juon zone n̄an bar juon ejja m̧ōttan wōt kōm̧akūtkūt eo raar jorrāān jān kiiojaļjaļ kein. Āinwōt ro raar jorrāān jān jekjek in kōm make jet iien remootļo̧k, kōm kar jino mijak kōn mour ko im ineem̧m̧an eo an aolepām wōj, em̧ool pere n̄an ilo̧k ilo iaļ kein n̄an loļo̧k mijenede ro im kōm̧m̧ani kweilo̧k ko an zone. Kōm kar jab jeļā ewi aitokan an menin naaj kōm̧m̧an. Ikar kōm̧m̧ane juon riboot, eo ikar jilknļo̧k n̄an Eria Būreejtōnji eo, im ikar kwaļo̧k en̄jake ko aō kōn mijak kōn wōnm̧aanļo̧k wōt n̄an ito itak ilo iaļ eo ekar wāween eo de eo n̄an tōpar mijenede ro am.

Ilo uwaak eo an, Elder Kevin Hamilton, eo ekar Būreejtōn eo am an Africa Southeast Eria eo, ekar jeje tok n̄an n̄a: “Kapilōk eo aō ej kōm̧m̧ane ijo em̧m̧an tata kwomaron̄ e. Kwon mālōtlōt im jar. Am̧ jab jeļā elikūt eok make im mijenede ro am̧ ilo kauwōtata, ak ilo iien eo wōt bun̄ m̧aanļo̧k ilo tōmak. ‘Bwe Anij ear jab letok n̄an kōj jetōb in lōln̄o̧n̄; a jetōb in kajoor im iokwe im kajim̧we’ (2 Timote 1:7).”

Naan in kōperan in ekar kanooj kōkajoorļo̧k kōm im kōtļo̧k bwe kōmin wōnm̧aanļo̧k wōt im ito itak im jerbal kōn peran m̧ae jem̧ļo̧k in mijen eo am, kōnke kōm kar ron̄ tōl eo jān Jemedwōj ilo Lan̄ kōn eoon jab in.

Ilo jeje ko rekwojarjar raan kein, jej riiti naan ko reim̧we an Rikanaan Josep Smith kejekļo̧kjeņ kōn kōketak eo an Irooj n̄an kōj: “Ro jeiū im jatū, ta jeban bun̄m̧aanļo̧k ilo juon jibadbad eļap ke? Bun̄m̧aanļo̧k im jab jenliklik. Peran, ro jeiū im jatū; im wōnm̧aanļo̧k, wōnm̧aanļo̧k n̄an anjo̧!” (Katak im Bujen Ko 128:22).

Jen bōk peran in n̄an kōm̧m̧ane ta eo ejim̧we jekdo̧o̧n n̄e ejjab bun̄bun̄—peran eo n̄an bōbrae tōmak eo ad im n̄an jerbal kōn tōmak. Jen bōk peran in n̄an ukweļo̧k aolep raan, peran eo n̄an bōk an kilan Anij im pokake kien ko An. Jen bōk peran in n̄an mour jim̧we im n̄an kōm̧m̧ane ta eo kōtmene jān kōj ilo eddo ko im jerbal ko ad roktak jān doon.

Bōnjān eo kein kajilu an Rilo̧mo̧o̧r eo ej jeorļo̧k bōd. Ilo tōre in jerbal in karejar eo An, Rilo̧mo̧o̧r eo ekar bōbrae kōrā eo me ekar pād ilo ļōn̄ jān aer kade. E ekar kakien liin n̄an “ilo̧k, im jab bar jero̧wiwi” (Jon 8:11). Menin ekar kōm̧akūt liin n̄an ukweļo̧k im āliktata jeorļo̧k an bōd, bwe āinwōt an jeje ko rekwojarjar ļo̧o̧ke, kōrā eo ekar kaiboojoj Anij jān awa eo im tōmak ilo etan (Josep Smith Ukok, Jon 8:11 [ilo Jon 8:11, footnote c]).

Ilo juon iien nokon an Kūrijm̧ōj ilo Tijem̧ba 2018 eo, rikanaan eo ad ejitōnbōro Būreejtōn Russell M. Nelson ekar kōnono kōn emen menin letok ko jaar būki jān Rilo̧mo̧o̧r eo. Ekar ba bwe juon iaan menin letok ko Rilo̧mo̧o̧r eo ej letok ej maorn̄ eo n̄an jeorļo̧k bōd:

“Jān Pinmuur eo Eļap, komaron̄ jeorļo̧k an ro rekar kōmetak eok bōd im ro me reban bōk eddo kōn nana eo aer n̄an eok.

“Elukkuun pidodo n̄an jeorļo̧k an juon bōd eo ej m̧ool im ettā pukot jeorļo̧k bōd eo am̧. Ak Rilo̧mo̧o̧r eo enaaj lewaj maron̄ eo n̄an jeorļo̧k an jabdewōt bōd ro rekar jab em̧m̧an kōm̧m̧an n̄an kwe ilo jabdewōt wāween” (“Emān Mennin Leļo̧k ko: Me Jisōs Kraist Ej Lewaj n̄an Kom̧” [Nokon in Jota an Kūrijm̧ōj an Būreejtōnji eo Ken Kajuon, Tij. 2, 2018], broadcasts.ChurchofJesusChrist.org).

Jen m̧ool in jeorļo̧k an doon bōd n̄an bōk jeroļo̧k bōd eo an Jemed. Jeorļo̧k bōd ej kanemkwoj kōj im kōm̧m̧an bwe jen erreo n̄an bōk m̧ōttan kwojkwoj eo. Jeorļo̧k bōd ej menin aikuj n̄an kōj n̄an erom rikaļoor ro rem̧ool an Jisōs Kraist.

Bōnjān eo kein kemān an Rilo̧mo̧o̧r eo ej katok. Ej m̧ōttan wōt gospel eo an Jisōs Kraist. Rilo̧mo̧o̧r eo ekar letok katok eo eļap tata kōn mour eo An n̄an kōj bwe en maron̄ lo̧mo̧o̧ren kōj. En̄jake metak in katok eo, E ekar kajjitōk ippān Jemen n̄an bōkļo̧k kab eo, bōtaab E ekar kōm̧m̧ane aolep men ko aikuj n̄an kōjem̧ļo̧k katok eo indeeo. En̄in ej Pinmuur eo an Jisōs Kraist.

Būreejtōn M. Russell Ballard ekar katakin menin “Katok eo ej kōmeļeļe [eo] ej kwaļo̧k iakwe eo erreo. Dettan iakwe eo ad n̄an Irooj, n̄an gospel eo, im n̄an ro m̧ōttad emaron̄ jon̄e jān ta eo jej m̧ōņōņō in katoke n̄an er” (“The Blessings of Sacrifice,” Ensign, May 1992, 76).

Jemaron̄ kaarmejete iien eo ad n̄an kōm̧m̧an jerbal in karejar, n̄an jerbal n̄an ro jet, n̄an kōm̧m̧an em̧m̧an, n̄an kōm̧m̧an jerbal in menmenbwij an baam̧le, im n̄an kōļapļo̧k kūr eo ad ilo Kabun̄ in.

Jemaron̄ leļo̧k jeraam̧m̧an eo ad ikkijien jāān kōn kōļļā juon m̧ōttan jon̄oul, joortak in jitlo̧k ko, im jipan̄ ko jet n̄an kalōk aelōn̄ in kiin̄ eo an Anij ioon laļ in. Jej aikuj in kaarmejete n̄an kōjparok bujen ko jaar kōm̧m̧ani ippān Rilo̧mo̧o̧r eo.

Jar eo aō ej bwe jān ļoor Jisōs Kraist im pedped ioon kōjeraam̧m̧an ko an Pinmuur eo An, en ļapļo̧k ad ettā, ļapļo̧k ad peran, ļapļo̧k ad jeorļo̧k bōd, im ļapļo̧k ad kaarmejete n̄an aelōn̄ in kiin̄ eo An.

Ij kam̧ool bwe Jemedwōj Ilan̄ ej mour im bwe E ejeļā kajjiedwōj kajjojo, bwe Jisōs ej Kraist eo, bwe Būreejtōņ Russell M. Nelson ej rikanaan eo an Anij rainin. Ij kam̧ool bwe Kabun̄ eo an Jisōs Kraist im Armej ro Rekwojarjar ilo Raan Ko Ālikatata ej aelōn̄ in kiin̄ eo an Anij iion laļ in im Bok in Mormon ej m̧ool. Ilo etan Jisōs Kraist, ad Ripinmuur, amen.