Aenōm̧m̧an eo an Kraist ej Joļo̧k Kōjdāt
N̄e iakwe an Kraist ej ļap ilo mour ko ad,18jej kōjekdo̧o̧n iakwāālel kōn ettā, kijenmej, im jouj.
Ro jeiū im jatū rejitenbōro, ilo juon iien kakkōlkōl menono, menono eo ej ļapļo̧k an jerbal. Menono eo emaron̄ jipan̄ ilo etetal ak jidik en̄taan n̄an jipan̄ kōņaan eo ad n̄an ettōr lōn̄ļo̧k ioon toļ ko. Ilo wāween in, kakkōlkōl in emaron̄ kwaļo̧k nan̄inmej ko me epen aer waļo̧k. Jabdewōt kakōlkōl emaron̄ waļo̧k n̄an kōm̧adm̧ade m̧okta jen aer lukkuun kōm̧m̧an jorāān ilo kajjojo mour.
COVID-19 em̧ool ej juon nan̄inmej in teej eo ipeļaakin laļ in. Teej in ej kwaļo̧k oktak in tōprak ko. Uno ko n̄an bōbrae im rewājabdik em̧ōj loi im kōm̧m̧ani.1 Taktō ro retijem̧ļo̧k, rūkaki ro, rikōjparok ro, im ro jet rekar kaarmejete—n̄an kōm̧m̧ane wōt menin. Elōn̄ armej rekar kwaļo̧k jouj im meanwōr—rekar kōm̧m̧ane wōt menin. Em̧ool, elōn̄ ekar nana tam̧m̧win rekar waļo̧k. Armej ro rem̧ōjņo rekar en̄taan—rekar wōnm̧aanļo̧k wōt. Ro rekar jerbal n̄an kōnono kōn men kein jej nōbar im kam̧oolol er.
Nan̄inmej in eajedeed ej bar juon teej ilo jetōb n̄an Kabun̄ in an Rilo̧mo̧o̧r eo im membōr ro ie. Waļo̧k ko rekar āinwōt ekkārere. Mour ko ad rej jeraam̧m̧an kōn jerbal in karejar ilo juon “eutiejļo̧k im kwojarjarļo̧k,”2 ilo Itok, Ļoor Eō bok in katak eo, im io̧lepen m̧weeo, rie Kabun̄ in n̄an ekkatak gospel in. Elōn̄ rekar leļo̧k jipan̄ in tūriam̧o im kaenōm̧m̧an ilo iien kein reppen im wōnm̧aanļo̧k im kōm̧m̧an āindein.3
Aaet, ilo jet waanjon̄ak, jetōb in mālijjon̄ ej kwaļo̧k iakwelel im jebel bōro. Bwe en̄in ewōr ad jerbal n̄an kōm̧m̧ane n̄an ukōt būruwōd im n̄an juon wōt āinwōt rijilōk ro rem̧ool an Rilo̧mo̧o̧r eo. Ejjab juon mālijjon̄ eo ekāāl, ak ej juon eo ekauwōtata.4
Ke Rilo̧mo̧o̧r ekar loļo̧k RiNipai ro, E ekar kwaļo̧k, “En ejjeļo̧k akwāālel ko ilubwiljimi. … Eo ewōr jetōb in jum̧ae ilo e ejjab jān Eō, ak ej jān devil, eo ej jemān jum̧ae, im ej pukwōj būruōn armej n̄an aitwerōk kōn illu, ippān doon.”5 N̄e jej jum̧ae doon ilo illu, Setan ej m̧ōņōņō im Anij ej būrom̧ōj.6
Setan ej m̧ōņōņō im Anij ej būrom̧ōj kōn ruo un ko. Juon, jum̧ae ej kam̧ōjņo̧ikļo̧k ad rikam̧ool n̄an laļ in kōn Jisōs Kraist im bwe lo̧mo̧o̧r eo ej itok kōn An “tōllo̧ke, … tūriam̧okake, im jouj.”7 Rilo̧mo̧o̧r eo ekar ba: “Kien ekāāl Ij lewōj n̄an kom̧, Bwe kom̧win yokwe doon āinwōt Iar yokwe kom̧. … Ilo men in armej otemjej renaaj jeļā bwe kom̧ij rikaļoora, eļan̄n̄e kom̧ij yokwe doon.”8 Menin ebar m̧ool—aolep jeļā bwe jejjab An rikaļoor n̄e jejjab kwaļo̧k iakwe n̄an doon. Jerbal eo An eban ajedeed n̄e jum̧ae im kōjdāt9 epād ilubwiljin rikaļoor ro An.10 Ruo, jum̧ae ej jetōb in m̧ōjņo̧ n̄an kōj kajjojo. Jej dāpij aenōm̧m̧an, lan̄lōn̄, im bōjrak, im ad maron̄ n̄an en̄jake Jetōb ebōjrak.
Jisōs Kraist ekar kōmeļeļeiki bwe katak eo An ejjab n̄an, “pukwōj būruōn armej kōn illu, ippān doon; a en̄in ej unleplep in katak eo [An] bwe men rot kein rej aikuj jako.”11 N̄e em̧ōkaj aō illu ak uwaak n̄an ļōmņak ko roktak im jino illu ak ekajet, Ij “likjab” jetōb in mālijjon̄. Likjab in ejjab meļeļein bwe ejjeļo̧k tokja. Ak, ej kwaļo̧k ke ij aikuj in oktak. Im en̄in ej em̧m̧an bwe jen jeļā.
Ālkin an Rilo̧mo̧o̧r loļo̧k Amedka kan, armej ro rekar juon wōt; “eaar ejjeļo̧k epelon̄lon̄ ilo aolepān āneo.”12 Kwoj ļōmņak armej ro rekar juon wōt kōnke rekar aolep juon wōt, ak kōnke ejjeļo̧k epelon̄lon̄ ippāer? Ijjab errā. Ijoke, jum̧ae im kōjdāt ekar jako kōnke rekar likūt aer rikaļooraņ ilo Rilo̧mo̧o̧r ilōn̄in men otemjeļo̧k. Oktak ko aer ekar jako ilo aer kar kwaļo̧k iakwe n̄an Rilo̧mo̧o̧r, im rekar juon wōt n̄an “rijolōt e aelōn̄ in Anij.”13 Bwe tōprak eo ekar “ejjeļo̧k bar armej rem̧ōņōņōļo̧k … armej ro otemjej kar ejaak jān pein Anij.”14
Juon wōt ebōk iien.15 Ej ļapļo̧k n̄e jej bōk iakwe eo an Anij ilo būruwōd16 im jej mijōk wōt mejān kajjik eo ad indeeo.17 Jej juon wōt ilo paoktok eo ad, āinwōt ajri ro nejin Anij18 im kallim̧ur eo ad n̄an m̧ool ko an gospel in em̧ōj an jepļaaktok. N̄an ukōtļo̧k, ad iakwe n̄an Anij im ad rikaļooraņ Jisōs Kraist ej kōm̧m̧an bwe jen jeļā ņae ro jet. Jej kaorōk kōm̧m̧an ko an ro jet, paoktokier, im taļōn ko.19 N̄e jeban likūt ad rikaļooraņ ippān Jisōs Kraist ilōn̄in itok limo im kōņaan ko ad, jej aikuj bar etale kōņaan ko ad m̧oktata im oktak.
Jemaron̄ kōņaan im ba, “Aaet jemaron̄ juon wōt—n̄e kwe wōt kwoj errā ippa!” Juon jibadbad em̧m̧anļo̧k ej kajjitōk, “Ta imaron̄ kōm̧m̧an bwe en wōr juon wōt? Elmen aō maron̄ jipan̄ armej in epaakeļo̧k Kraist? Ta imaron̄ kōm̧m̧an n̄an kadikļo̧k jum̧ae im kōļapļo̧k tūriam̧o im riKabun̄ eo ej kea ilo jukjukinpād?”
N̄e iakwe an Kraist ej ļap ilo mour ko ad,20 jej kōjekdo̧o̧n iakwāālel kōn ettā, kijenmej, im jouj.21 Edikļo̧k ad inepata kōn en̄jake ko ad make im ļapļo̧k kōn ro riturid. Jej “kappukot jokkun im juon wōt.”22 Jen jab bōk kuņaad ilo “kajjitōk ko re pere,” ekajete ro jejjab errā ippāer, ak kajjieon̄ bwe ren tūbbo̧k.23 Ijoke, jej kile bwe ro jejjab errā ippāer rej kōm̧m̧ane ijo em̧m̧antata remaron̄e kōn imminene in mour ko ippāer.
Kōrā eo ippa ekkar ekkatak kōn kien enan̄in 20 iiō ko. Āinwōt juon ļoar, emakijkij an jerbal ippān ro jet rej jurake jum̧ae ko jet. Ak ekkar jeļā bwe en jab illu ilo an jab errā. Emaron̄ kar ba n̄an rijum̧ae eo, “Imaron̄ lo bwe jeban errā ilo menin. Ijjab dike eok. Ij rie ļōmņak eo am̧. Ij kōtmene ke kwonaaj bar letok ejja en̄jake in.” Emakijkij an menin waļo̧k n̄an kautiej im m̧ōttāiki oktak ko.
Kōjdāt ko m̧okta remaron̄ bar juon wōt ilo aer rikaļooran Rilo̧mo̧o̧r.24 Ilo 2006, iaar pād ilo aje eo an Helsinki Finland Temple n̄an kautiej jema im ro jibu im jim̧m̧aō, ro rekar oktaktok m̧oktaļo̧k n̄an Kabun̄ in ilo Finland. Finns, ekoba jema, ekar ettōņake juon tampeļ ilo Finland elōn̄ iiō ko. Ilo tōre eo, tampeļ district eo ekobain Finland, Estonia, Latvia, Lithuania, Belarus, im Russia.
Ilo aje eo, iaar jeļā jet men rekabwilōn̄lōn̄. Raan eo jinointata in jerbal eo eļap rekar kōjenolo̧k membōr in Russian ro n̄an kōm̧m̧ane kain̄i ko an tampeļ. Ekar pen n̄an kōmeļeļeiki elmen an kar kōm̧m̧an. Russia im Finland rekar ire elōn̄ tariņae ko elōn̄ iiō ko. Jema ekar inepata im kar dike ejjab Russia ak aolep armej in Russia. Ekar kwaļo̧k an inepata, im an en̄jake āinwōt armej in Finland kōjdāt Russia. Ekar kakkilōklōk e juon poem me ekar jeje 19th-century kōn tariņae ikōtaan Finns im Russia. En̄jake ko an ilo Pata eo Kein Karuo, ke Finland im Russia rekar bar jino dike doon, ejjeļo̧k men ekar ukōt ļōmņak ko an.
Juon iiō m̧oktaļo̧k jen aje eo an Helsinki Finland Tempel, tampeļ kamiti eo, kobain membōr ro ilo Finland, rekar kōnono kōn karōk ko n̄an iien aje eo. Ilo kweilo̧k in, juon ekar jeļā ke Armej ro Rekwojarjar jān Russia renaaj itok raan kane tok n̄an kobatok ilo aje eo im kōtmene bwe renaaj bōk tampeļ kōjeraam̧m̧an ko aer m̧okta jān aer rool. Jeban kamiti eo, Brother Sven Eklund, ekar ba ke armej in Finns ro renaaj kōttar jidik, bwe armej in Russia ro ren maron̄ membōr ro jinoin n̄an kōm̧m̧ani kain̄i ko ilo tampeļ. Aolep membōr in kamiti eo rekar errā. Armej in Finland ro Rekwojarjar ilo Raan ko Āliktata rekar karum̧wijļo̧k tampeļ in kōjeraam̧m̧an ko aer n̄an jipan̄ Armej ro Rekwojarjar jān Russia.
Eria Būreejtōn eo me ekar pād ilo tampeļ kamiti kweilo̧k eo, Elder Dennis B. Neuenschwander, ekar je: “Ijjan̄in kar en̄jake m̧ōņōņō eļap āinwōt āinwōt armej in Finland jen ke ikar pād ilo iien in. Bwebwenato in Finland epen ippān ro riturin … im aer m̧ōņōņō bwe em̧ōj an ekkal [juon tampeļ] ilo laļ en aer make kar kōjenoļo̧ke. Kōtļo̧k an armej in Russia ro deļo̧n̄e jinoin tampeļ eo [ekar] juon ennaan in iakwe im kaarmejjet.”25
Ke ij kwaļo̧ke jouj in n̄an jema, būruwōn ekar ļur im kar jan̄, ekar juon iien em̧m̧an n̄an Finn. Jān iien eo m̧ae iien eo ekar mej jilu iiō tokālik, ekar jab bar kwaļo̧k naan ejjab em̧m̧an kōn Russia. Kar im̧we kōn waanjon̄ak an armej in Finland ro m̧ōttan, jema ekar kālet bwe en likūt an rikaļooran ippān Jisōs Kraist ilōn̄in aolep kōttōbar ko jet. Armej in Finland ro ekar jab jej tokjeer; armej in Russia ro ekar jab jej tokjeer, men̄e kurup ko rej kowaan m̧anit ko aer, bwebwenato ko, ak imminene ko n̄an joļo̧k kōjdāt. Rekar jab aikuji. Ijoke, rekar kālet n̄an kōm̧m̧an bwe aer rikaļooran Jisōs Kraist en jibadbad eo aer eļap.26
N̄e remaron̄ kōm̧m̧ane, jemaron̄ bar. Jemaron̄ bōktok jolet ko ad, m̧anit ko, im imminene ko n̄an Kabun̄ eo an Jisōs Kraist. Samuel ekar jab āliklik kōn jolet eo an āinwōt juon riLeman,27 im bar Mormon ekar jab āliklik kōn an riNipai.28 Ak kajjojo reaikuj likūt an rikaļooran ippān Rilo̧mo̧o̧r m̧oktata.
N̄e jejjab juon wōt, jejjab An.29 Ej aō kūr bwe jen peran n̄an likūt ad iakwe n̄an Anij im rikaļooran Rilo̧mo̧o̧r eo ilōn̄in iaan aolep kōttōbar.30 Jen dāpij bujen jolet in ad rikaļooran—bwe jen bujen juon wōt.
Jen ļoor waanjon̄ak ko an ro Rekwojarjar ipeļaakin laļ in ro rekar erom̧ rikaļooran Kraist. Jemaron̄ pedped ioon Jisōs Kraist, eo ej “aenōm̧m̧an eo ad, eo … ear rupe worwor in kōjepel kōtaerro; Ear kaļotļo̧k ilo kanniōkin [en̄taan in pinmuur] kōn kōjdat eo.”31 Ad kam̧ool kōn Jisōs Kraist n̄an laļin enaaj kajoorļo̧k, im jenaaj pād ilo kajoor ilo mour in jetōb.32 Ij kam̧ool bwe ilo ad “joļo̧kjum̧ae” im erom̧ ro Irooj ej ļōmņak kake im iake er n̄an juon wōt Ippān ilo tōmak,” aenōm̧m̧an eo An enaaj ad.33 Ilo etan Jisōs Kraist, amen.