Bar Lōke

Juon iien, ke ikar lukkuun in dik, ikar ļōmņak in ko jān m̧weo im̧ō. Ilo kōļmenļo̧kjeņ an juon ļaddik edik, ikar en̄jake bwe ejjeļo̧k juon ekar iakwe eō.

Lellap eo jinō ekar ron̄jake im ekar kwaļo̧k bwe ej iakwe eō. Ikar ineem̧m̧an ilo m̧weo.

Kwonan̄in ke n̄an jidik en̄jake āinwōt kwoj kōņaan ko jān m̧weo? Emakijkij, ko jān m̧weo ej meļeļe in bwe lōke eo em̧ōj an mejaļļo̧k ak rup—lōke eo ippād make, ippān kajjojo, ippān Anij. N̄e lōke eo ej idajon̄jon̄e, jej ļōmņak ekōjkan ad bar lōke.

Ennaan eo aō rainin ej, men̄e jej jepļaak n̄an m̧weo ak ilo̧k jān m̧weo, Anij ej itok im iioon kōj.¹ Ilo E jemaron̄ lo tōmak im peran, māletlet im maron̄ kile n̄an bar lōke. Ejja wōt, E ej kajjitōk ippād n̄an kabbōl wōt meram eo n̄an doon, n̄an kōļapļo̧k jeorļo̧k bōd im kadikļo̧k ekajet kōn kōj make im doon, bwe Kabun̄ eo An en maron̄ juon jikin eo me jej en̄jake āinwōt m̧weo, men̄e jej ilo̧k n̄ane ej kab kein kajuon ak bar ro̧o̧ltok.

Lōke ej juon jerbal in tōmak. Anij ej dāpij wōt tōmak ippād. Aaet, lōke an armej maron̄ in jelōke ak rup n̄e:

• Juon m̧ōttad, business associate, ak juon eo jej lōke ejjab tiljek, ekōmetak kōj, ak kōjerbal kōj n̄an kōjeraam̧m̧ane.²

• Rim̧are eo m̧ōttad ejjab m̧ool.

• Bōlen ilo jab kōtmene, juon eo ejitōnbōro ej jelm̧ae mej, jorrāān, ak nan̄inmej.

• Jej jelm̧ae juon kajjitōk kōn gospel eo jab kōtmene, bōlen juon men ikkijien bwebwenato an Kabun̄ in ak kakien ko an Kabun̄, im juon eo ej ba kabun̄ in ad ilo juon jekjek ej ņooj ak ejjab kwaļo̧k m̧ool eo.

Bar jet jekjek ko me remaron̄ in jab kanooj alikkar ak inepata kake jon̄an wōt.

Bōlen jejjab loe kōn kōj make ilo Kabun̄ in, jab en̄jake ad jetjet n̄ane, en̄jake an ro jet ekajete kōj.

Ak, men̄e jaar kōm̧m̧ane aolep men ko kar kōtmene, men ko rejjan̄in de jerbal. Kōjekdo̧o̧n en̄jake ko ad make ippān Jetōb Kwojarjar eo, jemaron̄ jab en̄jake ad jeļā bwe Anij emour ak gospel eo ej m̧ool.

Elōn̄ rainin rej en̄jake juon aikuj eļap n̄an bar kōjepļaaktok lōke eo ilo jemjerā ko an armej im jukjuk in pād an raan kein.³

Ilo ad kejekļo̧kjeņ kōn lōke, jejeļā Anij ej juon Anij in m̧ool im “jab maron̄ riab.”⁴ Jejeļā m̧ool eo ej juon jeļā kōn men ko āinwōt aer, kar, im renaaj itok.⁵ Jejeļā kōn wōnm̧aanļo̧k in revelesōn im im̧we ejetjet ilo m̧ool eo ejjab oktak n̄an ukōt jekjek ko.

Jejeļā bwe bujen ko rerup rej kwaļo̧k būrom̧ōj ko. “Ikar kōm̧m̧ani men ko rebwebwe,” ej ba. “Kwomaron̄ ke jeorļo̧k aō bōd?” Ļeo im lio pālele remaron̄ jibwe pein doon, kōjatdikdik n̄an bar lōke. Ilo juon jekjek eoktak, juon rikalbuuj ej kejekļo̧kjeņ, “Eļan̄n̄e in kar kōjparok wōt Naan in Mālōtlōt, iban kar pād ijin rainin.”

Jejeļā bwe lan̄lōn̄ eo ilo iaļ in bujen eo an Irooj im kūr ko n̄an jerbal ilo Kabun̄ eo An rej juon kūr n̄an en̄jake lōke im iakwe an Anij n̄an kōj im ro jet. Membōr ro an Kabun̄ in, ekoba rūtto ro ejjeļo̧k pāleer, ekkā aer jerbal ilo aolepān Kabun̄ in im ilo jukjuk in pād ko ad.

Kōn im̧we, juon bisoprik ej kūr juon ripālele edik n̄an jerbal ilo ward nursery eo. Ilo jinoin, ļeo pālele ej jijet ilo kona eo, eļļo̧k im kōttoļo̧k. Jidik kōn jidik, ej jino ettōn̄ dikdik ippān ajri ro. Tokālik, ripālele ro rej kwaļo̧k kam̧m̧oolol. M̧oktaļo̧k, rej eo ej ba, lio pālele ekar kōņaan neji; ļeo pālele ekar jab. Kiiō, jerbal ekar ukōt im kobaik er. Ekar barāinwōt bōktok lan̄lōn̄ kōn wōr ajri ilo m̧are eo aer im m̧weo.

Ilo bar juon jikin, juon m̧am̧a edik kōn ajri ro reddik im ļeo pālele ekar bwilōn̄ im ļo̧kjen an bōtaab bōk ke liin ekar kūr n̄an jerbal āinwōt juon būreejtōn an Doulul eo an Kōrā ro an ward eo. Ejjab to tokālik, lan̄ in ice ko rekar kune jarom, ekōm̧m̧an bwe en ejjeļo̧k kobban jāļōb ko ilo im̧ōn wia eo im im̧ōko raar m̧ōļo āinwōt icebox ko. Kōnke ekar wōr aer jarom im kein kōmāņāņ, baam̧le in edik ekar jouj im kōpeļļo̧k kōjām in m̧weo im̧weer n̄an jejjo baam̧le ko im kajjojo armej ro n̄an kōļo̧k lan̄ eo.

Lōke ekar jino m̧ool in ke kōm kar kōm̧m̧ani men ko reppen kōn tōmak. Jerbal in jipan̄ im kaarmejete ekōļapļo̧k maron̄ eo im bar karreo bōro ko. Lōke ilo Anij im doon ej bōktok kōjeraam̧m̧an ko an lan̄.

Ālkin an mour jān kāānjōr, juon brother etiljek kar dibōje jān juon waan ettōr. Ijello̧kin en̄jake būrom̧ōj kōn e make, ekar kajjitōk ilo jar, “Ta eo imaron̄ ekkatak jān en̄jake in?” Ilo intensive care unit eo an, ekar im̧we ilo an kar en̄jake ilo an kile juon nōōj eo ekar inepata kōn ļeo pāleen im ajri ro nejin. Juon rinan̄inmej ej pād ilo metak ej lo uwaak ko ilo an lōke Anij im pukōtļo̧k ro jet.

Āinwōt juon brother kōn inepata ko kōn pija nana ej kōttar inam̧ōj in opiij eo an stake būreejtōn eo an, stake būreejtōn eo ej jar n̄an jeļā ekōjkan an jipan̄. Juon en̄jake ealikkar ej itok; “Kōpeļļo̧k kōjām eo im kadeļo̧n̄waj brother eo.” Kōn tōmak im lōke bwe Anij enaaj jipan̄, priesthood ritōl eo ej kōpeļļo̧k kōjām eo im atbakwōj brother eo. Erro jim̧or rej en̄jake iakwe eo ej ukōt im lōke eo n̄an Anij im n̄an doon. Kōn kōjparok, brother in emaron̄ jino ukweļo̧k im oktak.

Ilo an jekjek ko ad kajjojo ad make, pedped in katak ko an gospel eo im Jetōb Kwojarjar eo maron̄ jipan̄ kōj jeļā eļan̄n̄e, ekōjkan, im n̄āāt eo n̄an lōke ro jet bar juon alen. N̄e lōke ej rup ak kakkure, inepata im en̄jake in illu rej lukkuun in; kōn menin aikuj eo ej ke n̄an maron̄ kile n̄an jeļā n̄e tōmak im peran rej aikuji n̄an bar lōke ilo jemjerā ko an armej.

Aaet, kōn kautiej n̄an Anij im revelesōn eo an juon make, Būreejtōn Russell M. Nelson ej kam̧ool, “Kwojjab aikuj in ļōmņak wōn eo komaron̄ lōke e.”⁶ Jemaron̄ aolep iien lōke Anij. Irooj eļap an jeļā kajjied im ej iakwe kōj eļapļo̧k jān ad jeļā ak iakwe kōj make. An iakwe ejjeļo̧k jem̧ļo̧kin im jeļā eo an eweppāān kōn etto, kiiō, im jekļaj ekōm̧m̧an bwe bujen ko im kallim̧ur ko An rejjab oktak im rem̧ool.

Lōke ta eo jeje ko rekwojarjar rej ņa etan “ilo wōnm̧aanļo̧k in iien eo.”⁷ Kōn kōjeraam̧m̧an ko an Anij, wōnm̧aanļo̧k in iien, im wōnm̧aanļo̧k ilo tōmak im pokake, jemaron̄ lo uwaak eo im aenōm̧m̧an.

Irooj ej kaenōm̧m̧an:

“Jan̄ enaaj pād wōt ilo bon̄, a lan̄lōn̄ enaaj itok n̄e e jibboñ.”⁸

“Joļo̧k men in eddo ko aṃ [ioon] Irooj im lōke ilo kōjparok eo an ejjab bōjrak.”⁹

“Ejjeļo̧k būrom̧ōj an laļ in me lan̄ ejjab maron̄ kemouri.”¹⁰

Lōke Anij¹¹ im kabwilōn̄lōn̄ ko An. Kōj im kadkad ko ad remaron̄ oktak. Kōn Pinmuur eo an Kraist Irooj, jemaron̄ utūkļo̧k lōmņak kōn kōj make eo lukkuun ad im erom juon ajri nejin Anij, ettā im ettā bōro,¹² obrak kōn tōmak im lōke ejetjet. N̄e jej ukweļo̧k, n̄e jej kwaļo̧k ruōn im julo̧k jerawiwi ko ad, Irooj ej ba E ejjab kemeemej er n̄an jidik.¹³ Ejjab bwe E emeļo̧kļo̧ki; ijello̧kin, ilo juon wāween ekabwilōn̄lōn̄, ej āinwōt Ej kāālet n̄an jab keememej er, ak bar kōj.

Lōke im̧weo an Irooj n̄an maron̄ kile ilo lo̧ļe. Jemaron̄ jeorļo̧k an ro jet bōd ilo iien eo ejetjet im wāween eo. āinwōt an Irooj ba jej aikuj,¹⁴ ilo ad “mālōtlōt āinwōt jedpānit ko im jouj āinwōt m̧uļe ko.”¹⁵

Jet iien n̄e būruōd rej lukkuun in rup im ettā, eļapļo̧k ad peļļo̧k n̄an kaenōm̧m̧an eo im tōl eo an Jetōb Kwojarjar.⁵ Liakeļo̧k im jeorļo̧k bōd rej jim̧or jino kōn kile bōd eo. Emakijkij an liakeļo̧k eo pedped ioon etto. Jeorļo̧k bōd ej reim̧aanļo̧k kōn anemkwoj n̄an jekļaj. “Bwe Anij ear jab jilkintok Nejin n̄an laļ bwe En ekajet laļ; a bwe laļ en mour kōn E.”¹⁷

Rijilōk Paul ej kajjitōk: “Wōn enaaj kōjepel kōj jān yokwe an Kraist?” E ej uwaak, “e jab mej ak mour, … e jab utiej ak ṃwilaḷ … enaaj maron̄ in kōjepel kōj jān yokwe an Anij, eo ilo Kraist Jisōs ad Irooj.”¹⁸ Aaet, ewōr juon eo emaron̄ kōjepel kōj jān Anij im Jisōs Kraist—im bwe armej ej kōj, kōj make. Āinwōt an Aiseia ba, “Jero̧wiwi ko ami raar pinej turun mejān jān kom̧.”¹⁹

Kōn iakwe eo ekwojarjar im kien eo ekwojarjar, jej eddo kōn kāālet ko ad im kaje ko aer. Bōtaab pinmuur in iakwe eo an Rilo̧mo̧o̧r eo ej “indeeo im ejjeļo̧k jem̧ļo̧kin.”²⁰ N̄e jej pojak n̄an ro̧o̧ltok n̄an m̧weo, jekdo̧o̧n n̄e jej “ettoļo̧k wōt,”²¹ Anij ej pojak kōn jouj eļap n̄an karuwaineneik kōj, lan̄lōn̄ in letok men eo em̧m̧an ewōr An.²²

Būreejtōn J. Reuben Clark ekar ba, “Ij tōmak bwe Jemedwōj Ilan̄ ej kōņaan lo̧mo̧o̧ren aolep ajri ro nejin, … bwe ilo jim̧we im tūriam̧o kake eo enaaj letok n̄an kōj jinekjej eo eļap tata n̄an jerbal ko ad, letok n̄an kōj aolep men ko emaron̄ litok, im ilo jekjek eo juon, ij tōmak bwe enaaj likūt iood kaje eo edik me ej pidodo n̄an e n̄an kipel.”²³

Ioon debwāāl, em̧ool tūriam̧o kake eo an Rilo̧mo̧o̧r eo ej akweļap n̄an Jemen ekar jab kalijōkļo̧k “Jema, Kwon joļo̧k rueir” bōtaab ijello̧kin “Jema, Kwōn joļo̧k rueir; bwe rejaje ta eo rej kōm̧m̧ane.”²⁴ Anemkwoj in kāālet eo ad im anemkwoj eo ewōr meļeļeier kōnke jej bōk eddo in im̧aan Anij im im̧aad make kōn wōn kōj, kōn ta eo jejeļā im kōm̧m̧ane. Ilo kam̧m̧oolol, jemaron̄ lōke jim̧we eo eweppāān an Anij im tūriam̧o kake eo eweppāān n̄an ekajet ilo weppāān kōttōpar ko im jerbal ko ad.

Jej kōjem̧ļo̧k ilo ad ijjino—kōn meanwōd an Anij ilo ad kajjojo ro̧o̧ltok n̄an m̧weo n̄an E im n̄an doon.

Kwoj keememej ke būrabōļ eo an Jisōs Kraist kōn em̧m̧aan eo ewōr ruo nejin ļaddik?²⁵ Ļeo juon nejin ekar ilo̧k jān m̧weo im kakkure jolet ko an. Ke ej iōn̄aktok an make, ļein nejin ekar pukōt an bar ro̧o̧l n̄an m̧weo. Ļeo juon nejin, ej en̄jake bwe ekar kōjparok kein ko, “Lo, elōn̄ iiō kein,”²⁶ kar jab kōņaan karuwaineneik eo jatin n̄an m̧weo

Ro jeiū im jatū, kom̧ naaj ke ļōmņak kōn an Jisōs kajjitōk ippād n̄an kōpeļļo̧k būruōd, ad meļeļe, meanwōd, im ettā, im n̄an lo kōj make ilo jerbal kein jim̧or?

Āinwōt ļaddik eo ak leddik eo m̧oktata nejin, kōm̧m̧an bwe jen ļōmņak im tokālik pukōt n̄an bar ro̧o̧l n̄an m̧weo. Anij ej kōttar n̄an karuwaineneik kōj.

Im āinwōt ļaddik eo ak leddik eo bar juon nejn, Anij ej kajjitōk ippād n̄an lan̄lōn̄ ippān doon ilo an kajjojo iaad ro̧o̧ltok n̄an m̧weo Ippān. E ej kūr kōj n̄an kōm̧m̧ani jarlepju ko ad, doulul ko, kūlaaj ko, im m̧akūtkūt bwe ren peļļo̧k, lukkuun, ineem̧m̧an—m̧weo n̄an doon. Kōn jouj, meļeļe, im kautiej n̄an doon, kōj kajjojo jej ettā ilo pukōt Irooj im jar im karuwaineneik kōjeraam̧man ko an gospel eo An kar kōjepļaaktok n̄an aolep.

Iaļ ko ad ilo mour in rej an kajjojo, bōtaab jemaron̄ bar itok n̄an Anij eo Jemed im Nejin Jitōnbōro kōn lōke ilo Anij, n̄an doon, im kōj make.²⁷ Jisōs ej kwaļo̧k, “Kwōn jab lōļn̄o̧n̄, kwōn tōmak wōt.”²⁸ Ejja wōt an kar Rikanaan Josep kōm̧m̧ane, jen lōke ilo kōjparok eo an Jemedwōj Ilan̄ ilo jab ebbweer.²⁹ M̧aan ro, kōrā eo jeiū im jatū jitōnbōro ro m̧ōtta rejitōnbōro, jouj im bar pukōt tōmak im lōke—juon kabwilōn̄lōn̄ E ej kallim̧uri kom̧ rainin kake. Ilo āt eo ekwojarjar etan Jisōs Kraist, amen.