Ejjeḷọk Wūno ilo Giliad ke?

Jidik iien tokālik in mijen eo aō, ilo aō kar juon rijikuuļ in Brigham Young University, jema ekar ko̧o̧ļe eō io taļboon. Ekar ba n̄an n̄a bwe em̧ōj an bōk juon nan̄inmej in kāānjōr in aj im bwe men̄e jon̄an eo n̄an an bar mour ekar jab em̧m̧an, ekar ben wōt ippen ke enaaj bar ājmour im bar ro̧o̧l im kōm̧m̧ane men ko ej kōm̧m̧ane ilo mour eo an. Ko̧o̧ļ eo ilo taļboon ekar juon iien eo ekabūrom̧ōjm̧ōj n̄an n̄a. Jema ekar juon bisop, juon m̧ōtta, im juon aō rikakpilōklōk. Āinwōt an jinō, ro jeiū im jatū, im n̄a ļōmņak kōn ilju im jakļaj, ekar ejjeļo̧k kōjatdikdik. Ļadik eo jatū, Dave ekar jerbale mijen eo an ilo New York im ekar bōk koņaan ilo iien kein reļļap im eppen an baam̧le in ilo an pād ettoļo̧k.

Rilale ro ilo jikin ājmour ilo tōre ko rekar letok juon ļōmņak n̄an m̧wijm̧wij n̄an kajjeon̄ kadikļo̧k an ajedeed kāānjōr eo. Baam̧le eo am raar kijejeto ilo aer jitlo̧k im jar kōn juon kabwilōn̄lōn̄. Ikar en̄jake bwe ekar ļap tōmak eo ippām bwe jema en maron̄ mour. Ak m̧okta jān iien m̧wijm̧wij eo, ļaddik eo jeiū, Norm im n̄a, kom̧ro kar leļo̧k juon kōjeraam̧m̧an n̄an jema. Ippānļo̧k aolepān tōmak ko kōm maron̄ kobaik, kōm kar jar bwe en mour.

Kar karōke iien m̧wijm̧wij eo bwe en aitok kitien, ak ālikin wōt jidik iien ekadu, taktō ro rekar itok n̄an ruum̧ in kōttar eo n̄an ekōnono ippān baam̧le eo am. Ekar ba n̄an kōm bwe ke rej jinoe m̧wijm̧wij eo, rekar maron̄ loe bwe kāānjōr eo em̧ōj an ajedeed ilo aolepān ānbwinin jema. Ekkar n̄an ta eo rekar loe, jema ekar wōr wōt jejjo allōn̄ in an mour. Ekar lukkuun nana amim mour.

Ke jema ekar rūj jān iien m̧wijm̧wij eo, ekar kijooror n̄an jeļā eļan̄n̄e m̧wijm̧wij eo ekar ļap tōprak in. Kōm kar kwaļo̧k n̄an e enaan eo enana.

Kōm kar wōnm̧aanļo̧k wōt n̄an jitlo̧k im jar kōn juon kabwilōn̄lōn̄. Ilo an ājmour eo an baba m̧ōkaj an nanaļo̧k, kōm kar jinoe jar bwe en maron̄ bwe en eļļā jān metak. Āliktata, ke jon̄an eo ej pād ie ekar nanaļo̧k, kōm kar kajjitōk ippān Irooj n̄an kōtļo̧k an m̧ōkaj an jako. Jejjo wōt allōn̄ ālkin m̧wijm̧wij eo, āinwōt kar ba jān rim̧wijm̧wij ro, jema ekar mej.

Eļap iakwe im kea rekar lutōkleplep ioon baam̧le eo am jān ward membōr ro im ro jeran im m̧ōttan baam̧le eo am. Ekar juon iien ilomej eo aiboojoj me ekar kautiej mour eo an jema. Ilo an iien eļļāļo̧k, mekarta, n̄a im baam̧le eo aō kōm kar jinoe en̄jake metak in an jako jema, ikar jinoe ļōmņak etke jema ekar jab mour jān nan̄inmej eo? Ikar ļōmņak eļan̄n̄e tōmak eo aō ekar jab bwe an kajoor. Etke jet baam̧le rekar bōk juon kabwilōn̄lōn̄, ak baam̧le eo am ekar jab? Ikar ekkatak ilo mijen eo aō n̄an jitļo̧k n̄an jeje ko rekwojarjar n̄an bōk uaak ko, kōn menin ikar jinoe kappukot ilo jeje ko rekwojarjar.

Kallim̧ūr M̧okta ej katakin kōn juon kōn̄ajn̄aj ak oiļ, kar kōjerbale n̄an kōmour kinej ko me kar kōm̧m̧ane jān juon mar me ej eddōk ilo Giliad. Ilo tōre ko ilo Kallim̧ūr M̧okta oiļ ko kar jeļā kaki āinwōt “wūno in Giliad.”¹ Rikanaan eo Jeremaia ekar būrom̧ōj kōn jorrāān ko ekar loe ilubwilijin armej ro an im kar kōjatdikdik kōn kōmour. Jeremaia ekar kajjitōk, “Ejjeḷọk wūno ilo Giliad ke? Ak ejjeḷọk taktō ie ke?”² Ilo jeje, al, im jin̄n̄a ko, ekkā ekōnono kake Rilo̧mo̧o̧r Jisōs Kraist āinwōt Wūno in Galilad kōn kajoor in kōmour eo an ekabwilōn̄lōn̄. Āinwōt Jeremaia, ikar ļōmņak, “Ejjeḷọk wūno ilo Giliad n̄an baam̧le eo an Nielson?”

Ilo Mark jebta 2 in Kallim̧ūr Ekāāl, jej loe Rilo̧mo̧o̧r ilo Kaperneum. Enaan eo kōn kajoor in kōmour an Rilo̧mo̧o̧r ekar ajedeed ilo aolepen āne eo, im elōn̄ im lōn̄ armej ro rekar jibadōkļo̧k Kaperneum n̄an bōk kōmour jān Rilo̧mo̧o̧r eo. Ekar lōn̄ im lōn̄ ro rekar kuk ippān doon ipeļaakin m̧weo ijo Rilo̧mo̧o̧r eo ekar pād ie jon̄an ekar ejjeļo̧k ruum̧ n̄an an tōpar aolepāer. Emān em̧m̧aan ro rekar kotake juon em̧m̧aan eo ejaje em̧akūtkūt bwe Rilo̧mo̧o̧r en kōmour e. Rekar jab maron̄ eļļā ibūļōņ jarlepju eo, im kōn menin rekar kōppeļo̧k ioon m̧weo kajjeen wōt ijo Rilo̧mo̧o̧r ej pād ie im kar lelaļļo̧k em̧m̧aan eo n̄an ippān Rilo̧mo̧o̧r eo.

Ke ikar riiti bwebwenato in, ikar bwilōn̄ kōn ta eo Rilo̧mo̧o̧r ekar ba ke Ej ioon em̧m̧aan in “Nejū, e jako jerọwiwi ko aṃ.”³ Ikar ļōmņak bwe eļan̄n̄e ikar juon iaan em̧m̧aan ro rekar kotakeļo̧k em̧m̧aan in, imaron̄ kar ba n̄an Rilo̧mo̧o̧r eo, “Ilo m̧ool kōm kar boktok ļein n̄an kōmour e”. Ij ļōmņak Rilo̧mo̧o̧r emaron̄ kar ba, “Ikar kōmour e.” Emaron̄ kar ke bwe ikar jab likkuun meļeļe—bwe kajoor in kōmour eo an Rilo̧mo̧o̧r eo ekar jab wōt maron̄ eo An n̄an kōmour ābwinūd, ak bōlen em̧ool aorōkļo̧k, maron̄ eo An n̄an kōmour bōro ko rerub ad im an baam̧le eo aō?

Rilo̧mo̧o̧r eo ekar katakin juon katak eaorōk kōn wāween in ilo An kōmour em̧m̧aan in ilo ānbwin kanniek. Ekar alikkar n̄an eō bwe ennaan eo An ekar bwe E emaron̄ jibwe mej ko mejān ro rebilo, im remaron̄ loļo̧kijeņ. Emaron̄ jibwe lo̧jiln̄in ro rejaron̄ron̄, im remaron̄ ron̄ļo̧kijeņ. Emaron̄ jibwe ne ko neen ro rejjab maron̄ etetal, im remaron̄ etetal. Emaron̄ kōmour mej ko mejād im lo̧jiln̄ud im need, ak eo aorōktata iaan aolep, E emaron̄ kōmour būruwōd ilo An karreoik kōj jān jerawiwi im ļōn̄aj kōj ilo māllijon̄ ko reppen.

Ke Rilo̧mo̧o̧r eo ekar waļo̧k n̄an armej ro ilo Bok in Mormon ālikin Jerkakpeje eo An, E ekar bar juon alen ekōnono kōn kajoor in kōmour eo An. Rinipai ro rekar ron̄ ainikien an ba jān lan̄ “Kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak bwe in maron̄ kōmour kom̧??”⁴ Tokālik, Rilo̧mo̧o̧r eo ekar katakin, “Bwe kom̧ij jab jeļā eļan̄n̄e ak ta renaaj ro̧o̧l im ukeļo̧k, im itok n̄an Eō kōn aolepān kōttōpar in bōro, im Inaaj kōmour er⁵ Rilo̧mo̧o̧r eo ekar jab ekōnono kōn kōmour ilo ānbwin ak ijjelo̧kkin juon kōmour ilo jetōb in jetōb ko aer.

Moronai ej boktok kakkobaba in meļeļe ilo an kwaļo̧k naan ko an jemen, Mormon. Ālkin an ekōnono kōn kabwilōn̄lōn̄ ko, Mormon ej kōmeļeļe, “Im Kraist eaar ba: Eļan̄n̄e kom̧ naaj tōmak ilo N̄a kom̧ naaj wōr ami kajoor n̄an kōm̧m̧an jabdewōt men emennin aikuj ilo N̄a.”⁶ Ikar ekkatak bwe pedped eo an tōmak eo aō aikuj in ilo Jisōs Kraist, im bwe ij aikuj bōk ta eo ekar menin aikuj n̄an E ilo aō kōjerbal tōmak ilo E. Imeļeļe kiiō bwe jako eo an jema ekar menin aikuj n̄an karōk eo an Anij. Kiiō, ilo aō likūt peiū ioon uliej eo an bar juon n̄an kōjeraam̧m̧an e, tōmak eo aō ej ilo Jisōs Kraist, im ikar meļeļe bwe juon armej emaron̄ im enaaj mour ilo ānbwin kanniek eļan̄n̄e emenin aikuj ilo Kraist.

Pinmuur eo an Rilo̧mo̧o̧r, eo ej kōm̧man bwe jim̧ōr pinmuur eo An im kajoor in kōmaron̄ eo An, ej kōjeraam̧m̧an eo eļaptata me Jisōs Kraist ej letok n̄an aolep. Ilo ad ukweļo̧k kōn aolepān būruwōd, Rilo̧mo̧o̧r ej karreoik kōj jān jerawiwi. Ilo ad m̧ōņōņō in leļo̧k kilaad n̄an Jemed, men̄e ilo iien ko eļap er eppen, Rilo̧mo̧o̧r eo enaaj ineek eddo ko ad im kōm̧m̧an bwe ren mera.⁷

Ak en̄in ej katak eo eļap ikar ekkatak. Ikar bōd ilo aō tōmak bwe kajoor in kōmour eo an Rilo̧mo̧o̧r eo ekar jab jerbal n̄an baam̧le eo am. Ilo aō reilikļo̧k kōn mej ko rerūtto im eļap aer jeļā, ij loe bwe kajoor in kōmour eo an Rilo̧mo̧o̧r eo ekar alikkar ilo mour ko an kajjojo ro uwaan baam̧le eo aō. Ikar ļōmņak wōt kōn kōmour ilo ānbwin kanniek jon̄an ikar likjab n̄an lo kabwilōn̄lōn̄ ko me rekar waļo̧k. Irooj ekar kōkajoorļo̧k im ļōn̄aj m̧am̧a ilōn̄inļo̧k maron̄ eo an ilo iien in eppen, im ekar mour juon mour aitok im jeraam̧m̧an. Ekar juon waanjon̄ak eo eļap an em̧m̧an n̄an ro nejin im ro jibun. Irooj ekar kōjeraam̧m̧an eō im ro jeiū im jatū kōn iakwe, juon wōt ippān doon, tōmak, im kijejeto eo ekar erom̧ juon m̧ōttan eo aorōk ilo mour ko am im ej wōnm̧aanļo̧k wōt rainin.

Akō jema? Āinļo̧k wōt ippān aolep ro renaaj ukweļo̧k, kar kōmour e ilo jetōb ilo an kar kappukot im kar bōk kōjeraam̧m̧an ko repeļļo̧k kōn Pinmuur eo an Rilo̧mo̧o̧r eo. Ekar bōk jeorļo̧k bōd in jerawiwi ko an im kiiō ej kōttar kabwilōn̄lōn̄ in Jerkakpeje eo. Rijilōk Paul ekar katakin, “Bwe āinwōt ilo Adam ro otemjej rej mej, āindein barāinwōt ilo Kraist ro otemjej re naaj mour.”⁸ Kwoj loe, ikar ba n̄an Rilo̧mo̧o̧r eo, “Kōm ekar boktok jema n̄an Eok bwe Kwōn kōmour e,” im ealikkar kiiō n̄an eō bwe Rilo̧mo̧o̧r ekar kōmour e. Wūno ilo Giliad ekar jerbal n̄an Nielson baam̧le—ejjab ilo jekjek eo kōm ekar kōtmene, ak ilo juon jekjek eo eaorōkļo̧k me ekar kōjeraam̧m̧an im ej wōnaam̧ļo̧k n̄an kōjeraam̧m̧an mour ko am.

Ilo Jon jebta 6 in Kallim̧ūr Ekāāl, Rilo̧mo̧o̧r eo ekar kōm̧m̧ane juon kabwilōn̄lōn̄. Ippān wōt jejjo ek ko im jejjo bilawe ko, Rilo̧mo̧o̧r ekar naajidik 5,000. Em̧ōj aō kar riiti bwebwenato in elōn̄ kattōn, ak ewōr juon m̧ōttan menin me ikar likjab jene me kiiō eļap meļeļein n̄an eō. Ālikin an Rilo̧mo̧o̧r kar naajidik 5,000, Ekar kajjitōk ippān rikaļoor ro An n̄an aini m̧ōttan m̧ōn̄a ko, bwe ko, ko rekar kobrak 12 iep ko. Ikar ļōmņak etke Rilo̧mo̧o̧r eo ekar joļo̧k iien n̄an an kōm̧mane men eo. Ekar allikar n̄an eō bwe katak eo jemaron̄ ekkatak jene jān iien in ej menin: E emaron̄ naajidik 5,000 im ekar wōr bwe. “Aō jouj ebwe n̄an aolep armej.”⁹ Kajoor in pinmuur im kōmour an Rilo̧mo̧o̧r emaron̄ pinej jabdwōt jerawiwi, kinej, ak māllijon̄—jekdoon eo jon̄an ļap in ak pen in—im ewōr bwe. An jouj ebwe.

Kōn jeļā in, kwe im n̄a jemaron̄ wōnm̧aanļo̧k kōn tōmak, jeļā bwe n̄e iien ko reppen renaaj itok—im em̧ool renaaj itok—ak n̄e jerawiwi ej jepooļ mour ko ad, Rilo̧mo̧o̧r ej jutak kōn “kemour ilo pein,”¹⁰ karuwaineneik kōj n̄an itok n̄an E.

Ij kwaļo̧k aō kam̧ool n̄an eok kōn Wūno in Giliad, Rilo̧m̧o̧o̧r Jisōs Kraist, ad Ripinmuur, im kōn kajoor in kōmour eo An ekabwilōn̄lōn̄. Ij kwaļo̧k aō kam̧ool kōn ikdeleel eo An n̄an kōmour eok. Ilo etan Jisōs Kraist, amen.