Kōn Kajoor in Anij ilo Aiboojoj Eļap

Enan̄in jilu iiō ālkin Visōn eo Moktata, ilo kar bon̄n̄in Jeptōm̧ba 21, 1823, Josep Smith ekar jar n̄an bōk jeorļo̧k in bōd kōn jerawiwi ko an im bwe en jeļā ia eo etōbare bwe en maron̄ jutak maan mejen Anij.¹ Juon armej eaar waļo̧ktok iturin peet eo an, kūr Josep kōn etan, im kwaļo̧k bwe “ekar juon rikwojmeļan jilkintok jān im̧aan mejān Anij … im bwe etan in Moronai.” Eaar kōmeļeļe “bwe Anij ekar wōr juon an jerbal n̄an [Josep] bwe en kōm̧m̧ane”² innem kōmeleleiki e kōn itok eo an Bok in Mormon eo. Kōn jerbal aorōk in, Bok in Mormon eo ej juon iaan ennaan ko an Moronai m̧oktata.

Bok in Mormon ej bar juon kallim̧ur kōn Jisōs Kraist im ej juon kein jerbal eo eļap n̄an ukōt armej ro ilo raan kein aliktata. Unin ad kajedeed e gospel in ej n̄an kūr tok aolep bwe ren itok n̄an Jisōs Kraist,³ n̄an bōk menin kōjeraam̧m̧an ko ilo gospel in em̧ōj an jepļaaktok, im niknik n̄an jem̧ļo̧kin ilo ad tōmak ilo Rilo̧mo̧o̧r eo.⁴ Jipan̄ kajjojo armej bwe ren maron̄ in en̄jake em̧m̧an in oktak in buruo eo eļap⁵ im kakkobaiki er make ippān Irooj ilo bujen kwojarjar ko im kain̄i ko me rej unleplep in jibadbad eo n̄an kwaļo̧k naan in gospel eo.

Moronai eaar kwaļo̧k kadkadin Bok in Mormon n̄an Josep Smith bwe en jinoe jerbal in lo̧mo̧o̧r im mour ijo eutiejtata n̄an kōj kajjojo ilo nabwōj in rōn̄ōl eo ilo juon tōre in bōk eddo an tarlep in iien ko.

Eaar wōnm̧aanļo̧k wōt kōn kōmeļeļe ko an n̄an Josep, Moronai eaar kout jān bok in Malakai ilo kallim̧ur M̧okta, kōn jidik wōt oktak ewōr tokjān ilo kajin eo kar kōjerbale ilo King James Version eo:

“Lo, Inaaj kwaļo̧k n̄an kom̧ Priesthood eo, jān pein Ilaija rikanaan eo, m̧okta jān itok eo an raan eo eļap im kaammijak an Irooj.

“… Im e naaj kalōlō ilo būruōn ro nejier kallim̧ur ko kar kōm̧m̧ani n̄an ro jim̧m̧aer, im būruōn ro nejier renaaj oktakļo̧k n̄an ro jemāer. Eļan̄n̄e en kar jab āindein, aolepān lal naaj kanooj ko̧kkure ilo itok eo An.”⁶

Unin ad ekkal tampeļ ej bwe en wōr jikin ko rekwojarjar n̄an bujen ko rekwojarjar im kain̄i ko n̄an kōm̧m̧ani bwe en wōr jikin lo̧mo̧o̧r im bwe armej ro ilo baam̧le ko ren maron̄ kōm̧m̧an bwe ren mour ijo eutiejtata, jim̧or n̄an ro remour im ro remej. Moronai ekar katakin Josep Smith kōn aorōk in jerbal eo an Elijah im kajoor eo an priesthood kar kōļļapļo̧k jerbal in lo̧mo̧o̧r im mour ijo eutiejtata ilo ron̄ōļ eo juon im jinoe ilo tōre in bōk eddo in ad jerbal eo n̄an armej ro remej ilo jait eo juon an ron̄ōļ eo.

Koba in aolep meļeļe ko, katak ko an Moronai ilo kar Jeptōm̧ba 1823 eo kōn Bok in Mormon im mijen eo an Ilaija me ekar ejake pedped in katak ko n̄an jerbal in lo̧mo̧o̧r im mour ijo eutiejtata ilo jim̧or jait ko ilo ron̄ōļ eo.

Katak eo Josep Smith ekar katak jān Moronai ekar jipan̄ e ilo kilen an kwaļo̧k naan. N̄an waanjon̄ok, ilo juon kweilo̧k ekwojarjar ilo Kirtland Temple ilo Eprōļ 6, 1837, Rikanaan eo ar ba, “Ālkin kar kwaļo̧k men otemjej, eddo eo eļap im aorōk tata ej n̄an kwaļo̧k Gospel eo.”⁷

Enan̄in kar jejjet in jiljilimjuon iiō tokālik, ilo Eprōl 7, 1844, Josep Smith ar kwaļo̧k kōn juon kōnono ej ņae etan King Follet Discourse. Ear ba ilo kōnono in, “Eddo eo eļaptata ilo lal in me Anij eaar door iood ej n̄an pukōt rimej ro ad.”⁸

Ak ewi wāween an men kein jim̧or kwaļo̧k gospel eo im pukōt ro nukid me emōj aer jako eddo ko im jerbal ko reļļap Anij eaar likūt iood? Ij tōmak bwe Rikanaan Josep Smith eaar kōmeļeļe ilo jeje kein jim̧or kōn m̧ool in bujen ko, ilo an deļo̧n̄e ļo̧k kajoor in kain̄i in priesthood, remaron̄ kobaiki ļo̧k kōj ippān Irooj Jisōs Kraist im rej unleplep in jerbal in lo̧mo̧o̧r im mour ijo eutiejtata ilo aolepān jait ko jim̧or an rōn̄ōļ eo.

Mijenede im tampeļ im jerbal in menmenbwij an baam̧le rej jipan̄ doon ilo jerbal in im juon wōt ilo juon jerbal ļapļap me ej pedped ioon bujen kwojarjar ko im kain̄i ko me rej jipan̄ kōj bwe jen maron̄ bōk kajoor eo an Anij ilo mour ko ad im, āliktata, ro̧o̧lļo̧k n̄an ippān Jemedwōj Ilan. Bōtaab, jeje kein ruo jān Rikanaan eo remaron̄ jab ippān doon lo meļeļe ko aer, ak ilo m̧ool, eaar kwaļo̧k lukkuun jejjet in nej jerbal in eļap ilo raan kein aliktata.

Rilo̧mo̧o̧r eaar ba:

‟Kom̧win bōk Aō ine im likūte iaerami, katak Ippa, bwe Ij ineem̧m̧an im ettā būruō: im kom̧ naaj lo ami kakkije.

“Bwe Aō ine ej emman, im men eo Ij ineke e mera.”⁹

Jej bōke ine eo an Rilo̧mo̧o̧r iood ilo ad ekkatak Ippān, bōke ilo ad erreo, im kautiej bujen ko im kain̄i ko rekwojarjar. Jej ekkejel ilo ineem̧m̧an n̄an im ippān Rilo̧mo̧o̧r ilo ad keememej ilo tōmak im kōm̧m̧ane ijo em̧m̧an tata ippād n̄an mour ekkar n̄an eddo ko jaar būki. Im jem̧jerā in Ippān ej un eo an kajoor ilo jetōb im dim eo ilo aolep jekjek ko an mour ko ad.

Ij kajjitōk ippemi n̄an ļōmņak kōn kōjeraam̧m̧an ko raar kallim̧ur n̄an rikaļoor ro an Jisōs Kraist ro rej kōjparoki bujen ko. N̄an waanjon̄ok, Nipai “eaar lo Kabun̄ eo an Lam in Anij [ilo raan kein āliktata], im oran ro ie eaar iiet, … ro rekwojarjar an Anij, eaar barāinwōt kobrak mejān lal; im teln̄an eo aer … eaar dik.”¹⁰

Eaar barāinwōt, “lo kajoorin Lam an Anij, bwe ekar bun̄ ioon armej ro rekwojarjar ilo an mōn jar eo an Lam eo, im ioon armej in bujen ro an Irooj, … im rekar ro me raar pojak kōn jim̧we im kōn kajoor in Anij ilo aiboojoj eļap.”¹¹

Kōnono eo “ej bojak kōn jim̧we im kōn kajoor an Anij ilo aiboojoj eļap” ejjab lukkuun juon ļōmņak em̧m̧an ak waanjon̄ak in kajin jeje ko rekwojarjar me aibojooj. Bōtaab, kōjeraam̧m̧an kein rekar pojak ilo iien mour ko an armej ro ilo raan kein aliktata me jejjab maron̄ bwini im raar rikaļoor an Irooj.

Eddo in aō āinwōt juon eo uwaan doulul eo an Jon̄oulruo ej bōk ļo̧k eō n̄an aolepān laļ in. Iaar maron̄ in jeraam̧m̧an kōn aō kar ioon im katak jet katak ko jeban meļo̧kļo̧k jān elōn̄ iami. Ij kam̧ool bwe armej in bujen ro an Anij rainin repojak kōn jim̧we im kōn kajoor eo an Anij ilo aiboojoj eo eļap. Im emōj aō kam̧ool bwe tōmak, peran, kijejeto, niknik, im lan̄lōn̄ eo me em̧ootļo̧k im ļe jān jon̄an mour in—im Anij wōt emaron̄ letok.

Ij kam̧ool kōn jim̧we eo im kajoor eo an Anij ilo aiboojoj eo, jej bōke ilo ar tōmak ilo bujen ko im kain̄i ko, ilo mour eo an juon jodikdik eo ej uwaan Kabun̄ in eo im ejjab maron̄ etetal kōn an kar jorrāān jān juon itaak in wa eo me elukkuun kaam̧ijak. Ālkin allōn̄ ko reppen n̄an an armej in bar ājmourļo̧k im n̄an kaminene kōn oktak in mour in an kōn an jab maron̄ in m̧akūtkūt, ikar ioone im kōnono ippān armej peran in. Ilo iien eo kōmro ar bwebwenato iaar kajjitōk, “Ta eo kwaar katak jān menin eaar waļo̧k?” Eaar mōkaj im uwaak im ba “ijjab būrom̧ōj. Ijjab illu. Aolep men renaaj EMMAN.”

Ij kamool ke jim̧we im kajoor eo an Anij ilo aiboojoj eo eļap, ej itok ippān bujen ko im kain̄i ko, ilo mour ko an ro rej kab peptaij im emōj kapen er bwe ren uwaan Kabun̄ in. Rein me rej kab oktaktok rar lukkuun kōņaan ekkatak im jerbal, raar kōņaan ak ekkā wōt aer jab jeļā kilen kōjenolo̧k kar imenene ko aer im imenene ko me repen, ak bōtaab rekijon̄ mōnōnō in “jemjerāiki rikwojarjar ro, im armej in mweo imōn Anij.”¹²

Ij kam̧ool kōn jim̧we eo im kajoor eo an Anij ilo aiboojoj eo eļap, ej itok ilo tōmak ilo bujen ko im kain̄i ko, ilo mour ko an juon baam̧le eo me ej lukkuun kea kōn eo pāleen im jinen im jemen eo me ejjab maron̄ mour jen nan̄n̄inmij eo an. Rikaloor rein me relukkuun kajoor rej kemeļeļe kōn ien ko me baam̧le kein aer rar lemnak remake iaeer—im kōn ien ko me rejeļā ke pein Irooj ar kotak im kakkajoor ir. Baam̧le in ar kwaļo̧k aer lukkuun kamolol kōn men kein rebben rej waļo̧k ilo mour in me rar ekatak kake me ar kōm̧m̧an menin aer errōklok im bwe ren maron̄ āinwōt Jemedwōj Ilan̄ im ad Ripinmuur, Jisōs Kraist. Anij ar lale im kejeramōn baam̧le in kōn menin letok eo an Jetōb kwojarjar im kōm̧m̧an bwe mweo mweiur en juon jikin kwojarjar n̄an aer kone āinwōt tampōl eo.

Ij kam̧ool kōn jim̧we eo im kajoor eo an Anij ilo aiboojoj eo eļap, ej itok ippān bujen ko im kain̄i ko, ilo mour ko an ro uwaan Kabun̄ eo me rar ione metak in būruwō rot en rar kōmman pepa in jebel. Jetōb im buromōj eo an sister in ar lukkuun jorren kōn jab jim̧we in jejjet in jerbal ko an leo pāleen eo im ar bar kakkure bujen ko im rube pād eo aerro. Kōrā eo ar kōnan kajim̧we im bwe en bōk eddo.

Ke kōrā in me eļap tōmak ippān ar en̄taan kōn ta ko rar waļo̧k n̄an e, elukkuun lab an lale im mol in katak im kōļmenļo̧kjeņ kōn pinmuur eo an Rilo̧mo̧o̧r eo eļap jen aolepen an mour. Jidik lok jidik, ar tal im lukun mwilal melele eo an kōn mijen in pinmuur eo an Kraist jon̄an mwilal in jela in ebed lo aolepen an kōrā in—en̄taan eo An kōn jerawiwi ko ad im barāinwōt metak ko ad, mōjno ko ad, inebata ko ad, im en̄taan ko ad reļļap. Im ekar itok ippān make bwe en kajjitikin e make kōn juon kajjitōk pen: Kōnke emōj kōļļāiki wōņāān jerawiwi ko, komaron̄ ke akweļap bwe ren kōļļāiki wōņāān ruo kōttan? Ej kab kile ke enaaj kar jim̧or jim̧we ak kōn tūriam̧o.”

Kōrā in ar ekkatak ke ilo an kepaake ļo̧k Rilo̧mo̧o̧r kōn bujen im kain̄i ko ekōm̧m̧an bwe en mo kinej ko me raar waļo̧k jen bar juon armej ilo aer kōm̧m̧ani men ko rejjab jim̧we ilo kōm̧m̧ane anemkwoj in kālet eo an kanniek im ar kōm̧m̧an bwe en pukōt kilen jolok bōd im bōk aenōm̧m̧an, tiriamo, im iakwe.

Bujen kallim̧ur ko im jeraam̧m̧an ko raar maron̄ waļo̧k kōn Rilo̧mo̧o̧r eo ad, Jisōs Kraist. Ej kūr kōj bwe jen reilo̧k n̄an E,¹³ itok n̄an E,¹⁴ katak kōn E,¹⁵ im leļo̧k kōj n̄an E¹⁶ kōn bujen eo im kain̄i ko an gospel eo An me emōj an jepļaaktok. Ij kam̧ool im kallim̧ur bwe ne jej kōjparok bujen ko enaj kōpooj kōj kōn jim̧we im kōn kajoor in an Anij ilo aiboojoj eo eļap. Im ij kam̧ool bwe Irooj Jisōs Kraist ej mour ej ad Rilo̧mo̧o̧r. Kōn men kein rem̧ool ij lan̄lōn̄ im kam̧ool ilo āt eo ekwojarjar etan Jisōs Kraist, amen.