Afio Mai Faalua o Iesu Keriso

Ao afio ae Iesu Keriso i le lagi i le faaiuga o Lana galuega i le lalolagi, na tautino atu e ni agelu se toalua i Ana Aposetolo, “O Iesu lena, ua aveina ae nai ia te outou i le lagi, e faapea ona toe afio mai o ia, pei o lona afio atu i le lagi ua outou vaavaai i ai” (Galuega 1:11). Mai i lena taimi, o e talitonu ua tulimatai atu i le Afio Mai Faalua o Iesu Keriso.

Pe a toe afio mai le Faaola, o le a Ia afio mai i le mana ma le mamalu e avea le lalolagi ma Lona malo. O Lona Afio Mai Faalua o le a faailoga ai le amataga o le Meleniuma.

O le Afio Mai Faalua o le a avea o se taimi matautia, ma faanoanoa mo e amioleaga, ae o le a avea o se aso o le filemu mo e amiotonu. Na fetalai mai le Alii:

“Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a lē tatuuina i latou i lalo ma lafo i le afi, ae o le a latou gafatia le aso.

Ma o le a tuu atu ia te i latou le lalolagi e fai mo so latou tofi; ma o le a latou uluola ma solo malolosi, ma o le a tutupu aʼe i le olataga a latou fanau e aunoa ma le agasala.

“Ona o le a i ai le Alii i lo latou lotolotoi, ma o le a i ai lona mamalu i luga o i latou, ma o le a avea o ia ma o latou tupu ma o latou faitulafono.” (Mataupu Faavae ma Feagaiga 45:57–59).

E lei faaali tonu mai e le Alii po o afea o le a Ia toe afio mai ai: “O le itula ma le aso e leai se tagata na te iloaina, po o agelu i le lagi, pe latou te iloaina seia oo ina afio mai o ia” (Mataupu Faavae ma Feagaiga 49:7). Ae ua Ia faaali atu i Ana perofeta mea e tutupu ma faailoga o le a muamua mai i Lona Afio Mai Faalua. Faatasi ai ma mea e tutupu ma faailoga na valoia o le:

Liliuese mai upumoni o le talalelei (tagai Mataio 24:9–12; 2 Tesalonia 2:1–3).

Le Toefuataiga o le talalelei, e aofia ai le toefuataiga o le Ekalesia a Iesu Keriso (tagai Galuega 3:19–21; Faaaliga 14:6–7; Mataupu Faavae ma Feagaiga 45:28; 133:36).

Le toefuataiga o ki o le perisitua (tagai Malaki 4:5–6; Mataupu Faavae ma Feagaiga 110:11–16).

Le oo mai o le Tusi a Mamona (tagai Isaia 29:4–18; 3 Nifae 21:1–11).

Le talaiga o le talalelei i le lalolagi atoa (tagai Mataio 24:14).

O se taimi o le amioleaga, taua, ma le vevesi (tagai Mataio 24:6–7; 2 Timoteo 3:1–7; Mataupu Faavae ma Feagaiga 29:17; 45:26–33; 88:91).

Faailoga i le lagi ma luga o le fogaeleele (tagai Ioelu 2:30–31; Mataio 24:29–30; Mataupu Faavae ma Feagaiga 29:14–16; 45:39–42; 49:23; 88:87–90).

O e amiotonu e lē tatau ona matataʼu i le Afio Mai Faalua po o faailoga na e muamua mai ai. O upu a le Faaola i Ana Aposetolo e faatatau ia i latou uma e saunia mo Lona afio mai ma tulimatai atu i ai ma le olioli, “Aua tou te atuatuvale, aua, a faataunuuina nei mea uma, o le a mafai ona outou iloa o le a faataunuuina folafolaga na fai atu ia te outou” (Mataupu Faavae ma Feagaiga 45:35).

Tusifaamaumau Ou Lagona Uunai

Savali Faaopoopo