Molimau

O se molimau o se molimau faaleagaga lea e tuuina mai e le Agaga Paia. O le faavae o se molimau o le malamalama lea o loo soifua le Tama Faalelagi ma e alofa i Ana fanau; o loo soifua Iesu Keriso, o Ia o le Alo o le Atua, ma na Ia faataunuuina le Togiola e le iu; o Iosefa Samita o le perofeta a le Atua na valaaulia e toefuatai mai le talalelei; o Le Ekalesia a Iesu Keriso o le Au Paia o Aso e Gata Ai o le Ekalesia moni a le Faaola i le lalolagi; ma e taitaiina le Ekalesia e se perofeta soifua i aso nei. Faatasi ai ma lenei faavae, e tupu se molimau e aofia ai mataupu faavae uma o le talalelei.

O tagata o Le Ekalesia a Iesu Keriso o le Au Paia o Aso e Gata Ai ua i ai le avanoa ma le tiutetauave paia o le mauaina o a latou lava molimau. Pe a mauaina se molimau, ua i ai i tagata taitoatasi se tiute ia faafaileleina i le olaga atoa. O le fiafia i lenei olaga ma le faavavau atoa e faalagolago tele lava pe o ni tagata e “totoa i le molimau ia Iesu” (Mataupu Faavae ma Feagaiga 76:79; tagai foi i le Mataupu Faavae ma Feagaiga 76:51, 74, 101). E faatupulaia le molimau i le faaaogaina o mataupu faavae nei:

O le sailiga mo se molimau e amata i se manao amiotonu, ma faamaoni. Ao talanoa atu i se vaega o tagata e lei maua ni molimau o le talalelei, na aoao ai Alema; “Afai tou te ala mai, ma fafagu o outou mafaufau e oo i le tofotofo i a’u upu, ma faaaoga sina vaega itiiti o le faatuatua, ioe, e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe, seia oo lava ina ia e talitonu ai i se ala e mafai ai ona e tuu ane o se avanoa mo se vaega o aʼu upu” (Alema 32:27).

E oo mai le molimau i le uunaiga filemu a le Agaga Paia. O taunuuga o se molimau e mafai ona ofoofogia ma suia ai le olaga, ae o le meaalofa o le molimau e masani lava ona oo mai o se mautinoa filemu, e aunoa ma ni faaaliga ofoofogia o le mana o le Atua. E oo lava ia Alema, lea na asia e se agelu ma na vaai i le Atua o nofo i Lona nofoalii, na manaomia le anapogi ma le tatalo ina ia mafai ona ia maua se molimau e ala i le mana o le Agaga Paia (tagai Alma 5:45–46; 36:8, 22).

E tupu malie le molimau e ala i aafiaga. E leai se tasi e mauaina se molimau atoa i le taimi e tasi. E tupu ao faaalia e tagata le naunau e auauna i le Ekalesia ma suesue, tatalo, ma aoao. E faateleina ao usiusitai tagata i poloaiga a le Atua. E tupu le molimau ao faasoa atu.

O se vaega o le atiina ae o se molimau e oo mai pe a faasoa atu. I le Ekalesia, e faasoa soo atu le molimau i sauniga anapogi ma molimau, i vasega i le Ekalesia, ma i talanoaga ma tagata o aiga ma uo.

Tusifaamaumau Ou Lagona Uunai

Savali Faaopoopo