Sauaga Faatautala

O le sauaina faatautala o le agaleaga lea po o le tuulafoaiina o isi (e pei o se tamaitiiti po o se toalua, tagata matutua, po o tagata e i ai manaoga faapitoa) i se auala e mafua ai ona afaina faaletino, faalelagona, pe faalefeusuaiga. O le tulaga o le Ekalesia e le mafai ona taliaina le sauaga faatautala i soo se ituaiga, ma o i latou e faia sauaga, o le a tali atu i latou lava i luma o le Atua” (tagai Mataio 18:6; Mareko 9:42; Luka 17:2).

Ua faamoemoeina i tatou e le Alii ina ia faia mea uma tatou te mafaia e taofia ai sauaga faatautala ma ia puipuia ma fesoasoani atu ia i latou ua afaina ai. E leai se tasi e faamoemoeina e onosaia amioga sauā faatautala.

E le tatau lava ona tafitafiese lipoti e uiga i sauaga faatautala. E tatau i tagata uma ona tatou tali atu ma le agaalofa ma sila’imalama i tagata ua afaina ai ma o latou aiga. O i latou ua aafia i sauaga faatautala e tatau ona faalogoina ma lagolagoina.

A silafia loa pe masalomia e epikopo ma peresitene o siteki ni sauaga faatautala, e tatau ona latou vave valaau atu i le laina telefoni fesoasoani a le Ekalesia mo sauaga faatautala ua faavaeina i lo latou atunuu po o le latou ofisa o le eria. O le a latou maua ai ni faatonuga e fitoitonu i auala e fesoasoani ai i tagata ua afaina ai, puipuiga e faasaga i ni sauaga faatautala i le lumanai, ma faafetauia ai soo se tiute mo le lipotiga.

O sauaga faatautala e faapea foi ona solia ai ia tulafono a atunuu. E fautuaina e le Ekalesia le lipoti atu o sauaga faatautala i puleaga faalemalo, ma e tatau i taitai ma tagata o le Ekalesia ona faataunuuina matafaioi uma faaletulafono e lipoti atu sauaga faatautala. I nisi o atunuu, o taitai ma faiaoga o e auauna atu i tamaiti e alagatatau faaletulafono ona lipotia sauaga faatautala o tamaiti i puleaga faalemalo. I isi atunuu, o soo se tagata e silafia e uiga i sauaga faatautala o tamaiti, o tagata matutua, po o tagata e i ai manaoga faapitoa e alagatatau faaletulafono ona ta’u atu i pulega o tagata lautele e uiga i le sauaga faatautala.

E tatau i taitai, tagata o aiga, ma uo ona fai taumafaiga uma e taofi ai sauaga faatautala, saili le saogalemu mo le tagata afaina, ma fesoasoani i le tagata afaina e saili le faamalologa. O nisi o tagata afaina e ono manaomia le fesoasoani i le lipotiga o le sauaga faatautala i le malosiaga faaletulafono po o i auaunaga mo puipuiga. E ono manaomia foi e tagata afaina le fesoasoani i le aluga o le faagasologa o lo latou faamalologa mai tagata tomai faapitoa, e aofia ai fomai ma faufautua.

O le toatele lava o tagata afaina sa sauaina faatautala e tagata latou te iloa. O tagata faapena o taitoalua, tagata o aiga, paaga eva faamasani, uo, po o isi tagata e masani ai. E tatau ona faamautinoa atu i tagata afaina, e le tuuaia i latou mo amioga faataumaoi a isi—e tusa lava po o ai e sauaina i latou. O se tagata afaina e le ta’usalaina.

E ui o nisi o sauaga faatautala e ono afua ai ni afaina faaletino, ae o ituaiga uma o sauaga faatautala e aafia ai le mafaufau ma le agaga. O tagata afaina i sauaga faatautala e masani ona tauivi ma lagona o le fenumia’i, masalosalo, ta’usalaina, le faatuatuaina, ma le fefe. Latou te ono lagona le leai o se laveai, leai o se malosiaga, tuuatoatasi ma le vavaeesea. Latou te ono fesiligia foi le alofa o le Tama Faalelagi ma lo latou lava taua e faavavau. Ae e mafai ona faamautinoa atu i tagata afaina ma i latou e lagolagoina i latou e faapea, e ala i Lana Togiola e le iu, o loo faaloaloa mai ai le fesoasoani, faamalologa, ma le mana o le Faaola (tagai Alema 7:11–12; 34:10).

E mafai e tagata afaina ona maua le lagolelei i le sailia o le taitaiga faaleagaga ma le lagolago mai taitai o le Ekalesia a o faamaloloina i latou. O le tiutetauave muamua o taitai o le Ekalesia o le fesoasoani atu ia i latou o e na sauaina, ma ia puipuia i latou o e e ono mafai ona toe sauaina foi i le lumanai. E mafai e taitai ona tagai i le counselingresources.ChurchofJesusChrist.org mo nisi faamatalaga.

O mataupu faavae i le “O Le Aiga: O Se Folafolaga i le Lalolagi” o loo faatulaga ai le tulaga faatauaina mo le ala e tatau ona tatou taulima ai le tasi ma le isi. O le mulimuli ai i nei mataupu faavae e taitai atu ai i tatou i le fausia o ni mafutaga malolosi ma maloloina. O matua, taitoalua ma tagata o aiga e mafai ona faaaogaina nei mataupu faavae e iloilo ai auala latou te fesootai atu ai i le tasi ma le isi ma taulima ai le tasi ma le isi.

Tagai i le abuse.ChurchofJesusChrist.org mo nisi faamatalaga.

Tusifaamaumau Ou Lagona Uunai

Savali Faaopoopo