Ositaulaga

O le ositaulaga o le tuuina atu lea o se mea taua pe pele, e masani lava ma le faamoemoe o le faataunuuina o se faamoemoega po o se sini sili atu. O le ositaulaga sa avea lava o se vaega o le talalelei a Iesu Keriso O se faamanatuina o le taulaga togiola sili a Iesu Keriso mo i latou uma na soifua pe o le a soifua i le lalolagi. Ae lei faia le galuega a Keriso, sa osia taulaga i manu mo lenei faamoemoe. Ina ua mavae le Togiola a Keriso, na amata e soo o Iesu Keriso—e ala i Lana taitaiga—ona ofo atu nai lo lena o se “loto momomo ma se agaga salamo” (3 Nifae 9:20), o se naunau e salamo i agasala ma se manao ia mulimuli ia Iesu Keriso ma ogatusa le olaga o se tasi ma Ana poloaiga.

O le Togiola a Iesu Keriso o le taulaga sili ma le faavavau i le totonugalemu o le talalelei (tagai Alema 34:8--16). Ae lei faataunuuina e le Faaola le Togiola, na ositaulaga Lona nuu o le feagaiga i manu o se faatusa o Lana taulaga. O lea faatinoga na fesoasoani ia i latou e tulimatai atu ai i le Togiola (tagai Mose 5:4--8). O le poloaiga e osi atu taulaga i manu na faamutaina i le maliu o Iesu Keriso. I le Ekalesia i aso nei, o le sauniga o le faamanatuga o se faamanatuga o le taulaga togiola a le Faaola.

E faaopoopo atu i le manatuaina o le taulaga togiola a Iesu Keriso, e osi atu e tagata o le Ekalesia a latou lava taulaga: o se loto momomo ma se agaga salamo. Na fetalai mai le Faaola, “ Ma ia outou le toe osia mai ia ia te au se taulaga i le faamaligiina o le toto; ioe, o a outou taulaga ma a outou taulaga mu ia faauma ese. … Ma ia outou osi mai mo se taulaga ia te au le loto momomo ma le agaga salamo. Ma o soo se tasi e sau ia te au ma le loto momomo ma le agaga salamo, o ia lea o le a ou papatisoina i le afi ma le Agaga Paia” (3 Nifae 9:19–20).

Ina ia maua se loto momomo ma le agaga salamo o le lotomaualalo ma le taliaina o le finagalo o le Atua ma fautuaga a i latou ua Ia valaau e taitai Lana Ekalesia. O lona uiga foi ia lagona le faanoanoa loloto mo agasala ma se naunautaiga faamaoni ina ia salamo. Na faamamafa mai e le perofeta o Liae le taua o le ofoina atu o lenei taulaga: “Faauta, ua ofo atu e ia o ia lava o se taulaga mo agasala, e tali ai iuga o le tulafono, mo i latou uma o e ua i ai le loto momomo ma le agaga salamo; ma ua leai ni isi e ese mai ai e mafai ona tali ai iuga o le tulafono” (2 Nifae 2:7).

O i latou e faaalia lo latou naunau e ositaulaga e pei ona poloai mai ai le Alii o le a taliaina e Ia. Na Ia aoao mai: “O i latou uma … o e ua latou iloa ua faamaoni o latou loto, ma ua momomo, ma ua salamo o latou agaga, ma ua loto e tausi a latou feagaiga e ala i le taulaga—ioe, o taulaga uma e poloaiina e Aʼu, o le Alii—e taliaina i latou e aʼu” (Mataupu Faavae ma Feagaiga 97:8).

Tusifaamaumau Ou Lagona Uunai

Savali Faaopoopo