Alofa Mama

O le alofa mama o le alofa le pona lea o Keriso. O le alofa lea o loo ia Keriso mo le fanauga a tagata, ma e tatau ona i ai i le fanauga a tagata mo le tasi ma le isi. O le ituaiga o alofa silisili ona maualuga, malualii, ma malosi ma e aupito sili ona olioli ai le agaga (tagai i le 1 Nifae 11:23).

O le alofa mama “o le alofa le pona lea o Keriso” po o le “alofa tumau-faavavau” (Moronae 7:47; 8:17). Na aoao mai le perofeta o Mamona: “O le alofa mama e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava, e le faaitagofie, e le mafaufau i se mea leaga, ma e le olioli i le amioletonu ae olioli i le upu moni, e onosaia mea uma, e talia mea uma, e faamoemoe i mea uma, e onosai i mea uma” (Moronae 7:45; tagai foi i le 1 Korinito 13:4–7).

O Iesu Keriso o le faataitaiga atoa o le alofa mama. O Lana galuega i le olaga nei, sa le aunoa ona Ia “femaliuai ma agalelei,” i le aoaoina atu o le talalelei ma faaali atu le agaalofa mo e matitiva, mafatia, ma le atuatuvale (tagai i le Mataio 4:23; Mareko 6:6; Galuega 10:38). O le faatumutumuga o le fa’aaliga o Lona alofa mama o Lana Togiola e le iu. Na fetalai o Ia, “E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo” (Ioane 15:13). O le faatinoga aupito maoae lenei o le loa ona talitiga, agalelei, ma le le manatu faapito o le a tatou iloa.

E finagalo le Faaola ia maua e tagata uma Lona alofa ma ia faasoa atu i isi. Sa Ia folafola atu i Ona soo: “O le poloaiga fou ou te tuu atu ai ia te outou, Ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:34–35). I sootaga ma tagata o aiga ma isi, o soo o Keriso e vaai atu i le Faaola e avea ma o latou faataitaiga ma taumafai ia alofa e pei ona alofa o Ia, ma le lē mavae o le agaalofa, faapalepale, ma le alofa mutimutivale.

Tusifaamaumau Ou Lagona Uunai

Savali Faaopoopo