Aufono Faaleaiga

O aufono faaleaiga e fesoasoani ai i tagata o le aiga e sailia ai le finagalo o le Alii i le lotogatasi ma le faatuatua. I se fonotaga faaleaiga, e talatalanoa faatasi ai le aiga, fefaasoaa’i lagona ma manatu, ma malilie faatasi i se fuafuaga e faatino.

O fonotaga faapena sa faalauiloaina mai i lo tatou muai olaga (tagai Mataupu Faavae ma Feagaiga 121:32; Aperaamo 4:26; 5:1–3). Ua aoao mai taitai o le Ekalesia e faapea, sa tatou auai i se aufono faaleaiga i le muai olaga, a o tatou nonofo faatasi ai ma o tatou matua faalelagi o ni a Laua fanau agaga.

O le mulimuli ai i lenei mamanu e faavavau e mafai e aiga ona faaaoga aufono e faatutu ai ni sini, foia ai luitau, talanoaina ai mea tautupe, faia fuafuaga, lagolago ma faamalosia le tasi ma le isi, tuuina atu molimau, atinae le lotogatasi, ma tatalo mo le tasi ma le isi. E sili atu ona faamanuiaina fonotaga faaleaiga pe a valaaulia le Alii e ala i le tatalo ina ia avea ma se vaega o [aufono]. Ua fautuaina i tatou e tusitusiga paia ia “filifili faatasi ma le Alii i [a tatou] mea uma e fai, ma o le a ia taitai [tatou] mo le lelei” (Alema 37:37).

E mafai ona faia fonotaga faaleaiga i soo se taimi e manaomia ai. Atonu e filifili nisi o aiga e fai a latou fonotaga i se faatulagaga fai soo, ae o isi atonu e faia pe a manaomia. O nisi taimi, atonu e mananao ai matua e fai se fonotaga faaleaiga i le Sapati pe e fesootai ma le afiafi faaleaiga.

O aufono faaleaiga e masani ona aofia ai le aiga atoa ae e mafai foi ona aofia ai na’o le tama ma le tina, matua uma e toalua ma se tamaitiiti e toatasi, po o se matua e toatasi ma se tamaitiiti e toatasi. O aufono e mafai ona faia i soo se nofoaga lea e mafai ai ona maua se talanoaga anoa, e oo lava i fafo atu o le fale.

O le faaaloalo mo manatu ma lagona o isi e taua i le manuia o aufono faaleaiga (tagai Tusitaiala mo le Aiga [2006], 10). O matua e taitai i se aufono faaleaiga, ae e masani ona tele atu lo latou faalogo atu nai lo o le tautala. Latou te fesoasoani i tagata uma o le aiga ia auai ai ma le alofa, faaaloalo, agalelei, ma le onosai. A faatumulia aufono faaleaiga i le alofa faaKeriso ma taialaina e le Agaga o le Alii, o le a fesoasoani lea e puipuia tagata o o tatou aiga mai mea leaga o le lalolagi.

Mo nisi faamatalaga e uiga i le faiga o se fonotaga anoa, tagai i le tusiga Autu o le Talalelei “Aufono o le Ekalesia.”

Tusifaamaumau Ou Lagona Uunai

Savali Faaopoopo

“Aufono Faaleaiga”