Filemu

E toatele tagata e mafaufau o le filemu o le leai o ni taua. Ae e mafai lava ona tatou lagona le filemu i taimi o taua, ma e mafai ona leai se tatou filemu i taimi e le o vevesi ai se taua. O le filemu e sau e ala mai i le talalelei—e ala mai i le Togiola a Iesu Keriso, o le auaunaga a le Agaga Paia, ma lo tatou lava amiotonu, salamo faamaoni, ma auaunaga maelega.

E tusa lava pe i ai le lalolagi o loo siomiaina i tatou i le le mautonu, e mafai ona tatou maua le faamanuiaga o le filemu i totonu [o o tatou loto]. O lenei faamanuiaga o le a faaauau pea ma i tatou a o tatou tumau faamaoni i la tatou molimau o le talalelei ma pe a tatou manatua e alolofa le Tama Faalelagi ma Iesu Keriso ia i tatou ma leoleo mai ia i tatou.

E faaopoopo atu i le lagonaina o le filemu e i tatou lava, e mafai ona avea i tatou ma se faatosinaga o le filemu i totonu o o tatou aiga, o tatou lotoifale, ma i le lalolagi. Tatou te galulue mo le filemu pe a tatou tausia poloaiga, tuu atu auaunaga, tausia tagata o aiga ma tuaoi, ma faasoa atu le talalelei. Tatou te galulue mo le filemu i soo se taimi tatou te fesoasoani ai e faamatuuese mafatiaga o se isi tagata.

O fetalaiga nei a le Faaola e aoao ai tatou i auala e mafai ona tatou maua ai le filemu lea e aumaia e le talalelei:

“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.

“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:26–27).

“Aua le fefefe e fai mea lelei, oʼu atalii e, auā o soo se mea e te lua lulu, o lena foi o le a oulua seleseleina; o lea, afai lua te luluina le lelei o le a oulua selesele foi le lelei mo o oulua taui.

“O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo.

“Faauta, ou te le tausalaina oulua; o ia i o oulua ala ma aua le toe agasala; ia fai ma le faautauta le galuega na ou poloaiina ai oulua.

“Ia faalagolago ia te au i manatunatuga uma; aua le masalosalo, aua le fefe.

“Matau i manuʼa ua tuia ai loʼu itu, ma tulaga fao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi” (Mataupu Faavae ma Feagaiga 6:33–37).

“Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).

A o tatou manatuaina le Faaola ma mulimuli ia te Ia, e mafai moni lava ona tatou loto tetele. E mafai ona tatou maua le filemu moni, ma tumau i taimi uma. E mafai ona tatou maua le faamoemoe i uluai fetalaiga a le Faaola i Ona soo ina ua mavae Lona Toetu: “Ia outou manuia” (Ioane 20:19).

Tusifaamaumau Ou Lagona Uunai

Savali Faaopoopo