Vaetamaga

E tele ituaiga faaosofiaga eseese e ala ai ona finagalo tagata e vaetama se tamaitiiti, ma o lena faaosofiaga e mafai ona faia se matafaioi sili ona taua i malosiaga i le aafiaga o le vaetamaga. Ae peitai, o se fautuaga e tasi e tumau lona sa’o e uiga i le faaosofiaga: o le vaetamaga e tatau ona faamanuia ai e le aunoa le olaga o le tamaitiiti. O lenei fautuaga e aofia ai le usitai a’ia’i i tulaga manaomia faaletulafono o le vaetamaga i lou atunuu ma le faigamalo faalelotoifale. O vaetamaga i va o atunuu e sili atu ona faatonutonuina nai lo o vaetamaga e faia i totonu o le atunuu lava ia. E fautuaina malosi le galulue e ala atu i tautua mo vaetamaga ua laiseneina, ma faatagaina (sooupu mo vaetamaga, loia mo vaetamaga, ma isi mea faapena). Faamolemole tagai i le Tusitaulima 2: Taitaiina o le Ekalesia, 21.1.4.

O le vaetamaga o se tamaitiiti o le a avea o se tasi o faaiuga aupito taua tou te faia i lou olaga, ma atonu foi o le faaiuga aupito tele lea e tasi i le olaga o le tamaitiiti. Ia suesue i ai i o outou mafaufau, ona saili lea o se faamaoniga a le Agaga e ala i le anapogi ma le tatalo (tagai Mataupu Faavae ma Feagaiga 9:7–8). Ia filifili ma le Alii, ma o outou loto atoa (tagai i le Alema 37:35–37).

Ina ia saunia outou lava, saili atu i tali i le tele o fesili e siomia ai le vaetamaga, e pei o:

• O le a faapefea ona aafia lo maua sootaga faalefaaipoipoga ona o le vaetamaga?

• O le a le mea e manaomia ona tatou iloa e avea ai ma ni mātua vaetama faamanuiaina?

• O a taui ma luitau e o mai faatasi ma le vaetamaina o se tamaitiiti.

Faafesootai se tagata tomai faapitoa i vaetamaga (sooupu mo vaetamaga, loia mo vaetamaga, tagata ua laiseneina mo vaetamaga) e vaai ai po o a mea e manaomia e avea ai ma se mātua vaetama. Afai o i ai le Auaunaga mo Aiga i la outou eria, e mafai ona e faafesootaia i latou mo se tautua e faasino atu. I le Iunaite Setete, o loo i ai foi punaoa a le malo o loo maua.

O vaetamaga e maualuga lava le faatonutonuina ma e eseese foi mea e manaomia. E tatau ona e malamalama i mea e manaomia mo lou eria ma ia tausisi i ai.

A ua e saunia loa faaleatamai ma faalelagona, ma ausia ia mea uma e manaomia e tatau ai e agavaa ai e vaetama se tamaitiiti, ona mafai loa lea ona e amatalia le faagasologa o le sailia o se tamaitiiti e vaetama.

O le sailia o se tamaitiiti e vaetama e mafai ona luitauina. O le tele lava o lou fitoitonu e uiga i le matua, itupa, ma le maloloina faalelagona ma faaletino o le tamaitiiti, o le tele foi lea o le luitauina o le a i ai le faagasologa. Ia fatufatua’i a o e sailia se tamaitiiti o sē e fetaui lelei ma lou aiga. Ia manatua e valaau atu i le Alii e fesoasoani ia te oe i lau sailiga o le tamaitiiti e finagalo o Ia lua te tausia ma faamauina ia te oulua. O punavai o faamatalaga atonu e aofia ai:

• Tagata tomai faapitoa mo vaetamaga

• Isi matua vaetama

• O le initoneti

• O le tou faletusi mo tagata lautele

O le a e toe manaomia foi se fesoasoani a se tagata tomai faapitoa i vaetamaga (sooupu mo vaetamaga, loia mo vaetamaga, tagata ua laiseneina mo vaetamaga) ia mautinoa ai ua e ausia tulaga manaomia e alagatatau i le faamae’aina o lau vaetamaga. O le a latou faamalamalama atu pepa o galuega ma laasaga faaletulafono e manaomia e faamae’a ai le vaetamaga.

A e ausiaina loa ia tulaga manaomia uma faaletulafono ma ua faamae’aina le vaetamaga e ala i le faamasinoga, ona mafai loa lea ona outou galulue ma le epikopo e fai fuafuaga mo le faamauina o le tamaitiiti ia te oulua.

“Tau ina ia faamanuia pea e lo tatou Tama Faalelagi nei tagata lelei, nei uo faapitoa a le Matai” (Thomas S. Monson, “Fanau Faapelepele—O Se Meaalofa mai le Atua,” Oke. 1991 konafesi aoao).

• Mataio 16:19

• Mataio 18:18

• Roma 8:15–16

• Kalatia 3:26–29

• Kalatia 4:5–7

• Efeso 1:13

• Mosaea 5:7

• Alema 37:35–37

• Mataupu Faavae ma Feagaiga 9:7–8

• Mataupu Faavae ma Feagaiga 124:93

• Mataupu Faavae ma Feagaiga 132:46

• Mataupu Faavae ma Feagaiga 138:47–48

Alison Baugh, “Adoption: Including the Whole Family,” Ensign, Aperila 2010

“The Gift of Adoption,” Ensign, Fepuari 2009

Rebecca M. Taylor, “Why Adoption?” Ensign, Ianuari 2008