Olngeseu loba Klisichel a Dios

Betik er a renguk el rodam er ngak, kom mesulang er a blakerreng er kemiu el mo er a Rubak me a chedaol lurelel. Ng kmal dmeu a renguk el lobengkemiu. Tial ngerchelam el beches el First Presidency, ea ki oureng a suliu er a nglunguchiu me a odbechiu. Aki mereng a saul er a klengar er kemiu me a ureliu el mo er a Rubak. Blakerreng er a ngercheliu me a ngelsuiu a kmal klou a belkul er a okedong er kemiu el diuai a okedong er kemam. Chelsel a klengar el meruul a urelel a Ikelesia, eak mla mo medengei el kmo ngkmal diak a belkul el kmo ngera ke olngeseu er ngii. Sel Rubak a kerekikl el kirel a kmo ke mekerang a omolngeseu.

Ak kureng a dmolech el omereng el saul el mo er a President Thomas S. Monson, el ngii a mle okesiu el merngak el okeim el rak. Me a re counselor er ngii, el President Henry B. Eyring me a President Dieter F. Uchtdorf, ak kuchotii a dmolech el chetengakl el kirir. Ak chemat er tir el kirel a urelir el mo er a Rubak me a reprofet er Ngii. Tirkal lungil mesiou a mla ngmai a beches el ngerchelir. Te melemolm el loureor loba blakerreng me a ducherreng. Ak menguul er tir e betik a renguk er tir.

Ng chetengakl el klengeltengat sel dolngeseu er a merang e kiei el Ikelesia er a Rubak loba sel Klisichel. A olutel a priesthood er a Dios, luldimukl er a kiis er a priesthood, ochotii a techall el mo er a reklikiid el Uriul-klebesei el Santo el ngii a kot el klou a ututelel er a aikel chedaol klengeltengat. Kede mes aikal klengeltengat el moterekokl el mo er a redil, resechal, me a rengalek el meliuekl er a beluulechad.

Kede mesterir a mekedung el redil el medengelii sel klisiich el ngara okedong er tir me a endowment me a chedoal ruoll er a templo. Tirkal redil a medengei el mekerang a lomekedong er sel klisichel a babeluades melongeluolu e lolisiich er a rebecherir, rengelkir, me a rebebil el betik a rengrir er tir. Tirka tirkel mesisiich el chedaol redil el mengetikaik, olisechakl, e olngeseu er a okedong er tir loba klisichel a Dios!¹ Ak mereng a sulir!

Osisiu, kid a mesterir a mekedung el sechal el klikiid el kiei mel ngai aikel klengeltengat sel loba priesthood. Te oungerachel e olngeseu loba teletelel a Rubak el beltikelreng, ungilreng, me a kelouelreng. Te omekngeltengat, omekrael, mengeluolu, e melisiich er a rebebil lokiu sel klisichel a preisthood lobang. Te olecholt a ongasireng el mo er tirkel chad longeseu er tir e osisiu el taem te mengeluolu a chebechilir me a telungalek er tir. Te oltngakl a mekngit e mesisiich el elders er a Israel.² Ak meral loureng a sulir!

Me chelechang, eng di ungil ak kuchais ak simbai el kirel? Ng tiakid: Ng betok el rodam me a rodos a diak lungil medengelii sel lurelel a klisichel a priesthood. Te meruul er a teletael el ngarsel sorir a rengrir e bai diak lousbech er a klisichel a Dios el mo omekngeltengat er a Rengelekel.

Ak bekikl el kmo kmal betok el rodam me a rodos er kid diak el lodengei aikel chetengakl el sebechel mo er tir.³ Rebebil er a rodam, el uai tial okesiu, a teletelir uai lolechotel a kmo diak lodengei el kmo ngerang a priesthood e ngerang sebechel ngusuterir el remuul. Soak louchais er a tal tokubets el okesiu.

Ng diak el meketeket el taem, eak mla er a sakrament miting el beches el tolechoi a lebol besang a ngklel me a klengeltengat er a chedam. Ngkal ngeasek el chedam a milngebechabl er ngkal tolechoi el ngelekel, e milsang a ngklel, e solang e melekinga a ungil ngluguuch. Ngka dimlak el besang a klengeltengat el mo er ngikal tolechoi. Ngikal klebokel tolechoi el redil a mlo er ngii a ngklel engdi dimlak a klengeltengat el mo er ngii! Ngkal elder a dimlak lodengelii a klekakerous er a nglunguuch me a klengeltengat er a priesthood. Meng ngoba klisichel a priesthood, eng mle sebechel omekngeltengat er a tolechoi er ngii, engdi dimlak. Ak kulmedasu el kmo, “Ng miltom er tial techall!”

Soak louchais a bebil er a okesiu. Kid a medengterir a rodam el chedolii a rodos el mo er a Primary, Young Women, malechub eng Relief Society el meredel e sensei engdi diak el lomekngeltengat er tir—lomekngeltengat er tir loba klisiich el mo meruul er a okedongir. Te di mesterir a omellach me a omengedereder. Kede mesang a klikiid el chedam el diak lebsang a klengeltengat er a priesthood el mo er a bechil me a rengelkel el ngii sel lousbech er ngii. A klisichel a priesthood a mla lemuut el mera beluulechad, engdi betok el rodam me a rodos a mosoisb er a olibesongel er a klengar e dimlak lenguu a merang el klengeltengat er a priesthood. Ng kmal kerior! Tiang a kerior el ngii a sebeched el torbengii.

Rodam, kid a obang a chedaol priesthood er a Dios! Kid a oba kengei er Ngii el mo omekngeltengat er a Rechedal. Ka momdasu er sel lungil menglou el reng el Rubak a milskid sera lolekoi el kmo ngidil ngera el mo mekngeltengat e Ngak a mo omekngletengat.⁴ Nglunguled el mo meruul a teletael loba ngklel a Jesus Kristo el mo omkengeltengat er a rengelkel a Dios el loiak er sel Telbilel el mo er tir. A re stake president me a rebishop, mungil mesang el kmo bek el chedal a quorum el ngara chederdelem a medengei el kmo mekerang a lomesang a klengeltengat er a priesthood—luldimukl er a telkelel a chad el klikiid me a chedaol omengedmeklel el kirir remuul mebol sebechir mui lousbech er a klisichel a Dios.⁵

Mo er a rokui el rodam el lobang a priesthood, Ak siotai er kau mebo molngeseu er a rechad er a ikelesia el loltirakl a telbilir, omeksengerengel e meluluuch, mesuub a chedaol llechukl, menguul er a chelsel a templo, e olngeseu loba klaumerang el sechal ma redil er a Dios. Ng sebeched lolngeseu er a rokui el lomes loba mad er a klaumerang el kmo a keldung me a llemalt a mo olsesei er tir el mo kmeed e ra Jesus kristo, meng mo sebecherir el loutkeu er a keldemel a Chedaol Reng e mo medengelii a deureng er a klengar!

A teletelel a merang e kiei el Ikelesia er a Rubak a blechoel el keldmokl, omekrael a ngeseu el mo olngeseu tirkel derta el ngelekel a Dios me a retelungalek er tir.⁶ Eleng tiang a Ikelesia er Ngii, ea ngercheled el Mesiungel a mo olngeseu el mo er a chimol chad, el uaisel Rirelii.⁷ Kid a mo olngeseu loba Ngklel, Klisichel, me a ungil Llomerolel.

A okesiu el krirelii er a mla chemoit a okolem el rak sera kngar a Boston a ulsisecheklak el kmo kmal ua ngera klisichel a olngeseu a sebechel mo er ta-me a- tang. Seikid el taem e ngak a milsuub el mo chad er a botk er sel Massachusetts General Hospital—el loureor er a bek el sils, bebil el klebesei, ma bebil lesandei. Ng kmal telekael a temek lobengkel a bechik, me a reteuang rengelekek, me a tekoi er a Ikelesia. Engdi, a branch president a milskak a ngerchelek el mo oldingel er a Wilbur me a Leonora Cox el lungulir el kmo Brother Cox boluut lomais el mera Ikelesia. Ngii me a Leonora a mla merenged er a templo.⁸ Engdi Wilbur a mla mo betok el rak el diak lebo ra Ikelesia.

Ngak me a bechik a mlo er a blirir. Sera kimsoisb, ea Sister Cox a mle outkeu er kemam,⁹ engdi, a Brother Cox a di mle mereched el merael el mo soiseb er a tara delmerab e osmerii a chesimer.

Ak mlo er tial chesimer mak melengod. Telkib el taem, eak rongesii a kekerei el ngor el uasei “Bem tuu.” Ak mekengeii a chesimer e mesang a Brother Cox el dengchokl er a bita ra betok el donguu er a rasio. Chelsel tial kekerei el delmerab, eng mocha melokou a dekool. Ng dimlak el soal a kuldingel er ngii.

A kumes el meliuekl er tial delmerab e dulang, “Brother Cox, ngak a kmal soak el mesuub el kirel urelel a rasio. Ng sebechem el mo osisecheklak el kirel? Mosubes eng diak el sebechek el meketeket el kiei, engdi sebechek el mei er a tara taem?”

Mle telkib el lomai er a rengul engdi dilu choi. Tiang a mle uchelel a ungil klsechelei. Ak liluut el mong meng ulsisecheklak. Ak mocha oubeltikelreng e menguul er ngii. Ngokiu aikal taem el ki moldingel, ea ungil teletelel a mlo chemolt. Aki kmal mlo ungil klsechelei, me a rebechemam el dirrek. E sola, cherengel a taem, ea telungalek er ngak a millukl el mo cheroid. A remeredel a milemolm el lolngeseu er tial telungalek era Cox.¹⁰

Uriul er a eai el rak er a uriul sel mle kot lodingelam, e sel Boston Stake a mlo er ngii.¹¹ Ng sebechem el melangch el kmo ngtechang a mlo kot el stake president er ngii? Choi! Ng Brother Wilbur Cox! Aikel rak ruchei er tiang, e ngii a dirrek el mle mission president me a temple president.

Betok el rak ra mla memong, serak chedal a Chelechad er a Teruich me a terung el Apostol, ak miltutk el mo omuchel er a beches el stake el ngara Sanpete County, Utah. Sel temel a interview, eak kilbetiekl er a kisang ngkal betik er a renguk el sechelik el Brother Cox! Ak kulmelchesuar er a odbechel a Chedaol Reng el mo omekedong er Ngii el mo beches el stake patriarch. Uriul e rak chedolii, ea ki mle kebechull e kaididengelangel. A rechad el mla er tial delmerab a ulmdednger el kmo ngera uchul me tirkal terung el meklou el chad a kaididengelangel. Engdi kemam a mle medengei. Me a Sister Cox meng medengei. Aika mle langel er a deureng! Aki melbedebek er sel omerael er a beltikelreng me a ouchel reng el lulemuchel er a okedi el rak er a mla memong, er a tal kesus er a blirir.

Tial cheldecheduch a diak dil blol merek er sei. A Brother me a Sister Cox a mlukeroul luldimukl er a tedei el rengelkir, 20 el rengelkir a rengelkir, me a 54 el rengelkir a renglkir a rengelkir. Modekiar aikel leriruul el mo er a redart el missionari, me a lemuut el telael el ngara templo, me a lemuut el redart el ngilai a patriarchal blessing el mlara chimal a Wilbur Cox. Tial omerolel ngii me a Leonara a melemolm el mo betok el telcheroll el meliuekl er a beluulechad.

Okesiu el uaikang el ua Wilbur me a Leonora Cox a dubech er a bek el sandei—oureng, el bek el sils—el ngara chelsel tial Ikelesia. Blak a rengrir el mesiungel a Rubak el Jesus Kristo a meruul a Urelel, loba Klisichel.

Rodam, ngar ngii a chesimer el sebeched el mok, klengeltengat er a priesthood el sebeched lodars, reng el sebeched lomekungil, beraod el sebeched el chemol, klaumerang el sebeched el smisiich, klengar el sebeched losobel, me a deureng el sebeched lotuu er a blirir a Uriul-klebesei el Santo—eleng kid loba a priesthood er a Dios. Kid a resechal el mla mokedong e milkedmokl er a uchelel a beluulechad lokiu a klaumodengei er a Dios e leng mesisiich el klaumerang er kid el mo meruul er tial lureor.¹²

Tonight I invite you literally to rise up with me in our great eternal brotherhood. When I name your priesthood office, please stand and remain standing. Deacons, please arise! Teachers, arise! Priests! Bishops! Elders! High priests! Patriarchs! Seventies! Apostles! Chelechal kesus eak siotai er kau el mo dechor lobengkek el ngar tial klou e diak a ulebengelel rodam. Sel kdelii a ngklel a urelem er a priesthood, e kulengit bom dechor e melemolm el dechor. Deacons, kulengit me bekiis! Teachers, bekiis! Priests! Bishops! Elders! High Priests! Patriarchs! Rokeuid! Re Apostol!

Chelechang, e rodam, ngsebechemiu el melemolm el dechor e mteloi er a rechad er a chelitakl el mengitakl aikel kldei el bades er a Bom Dechor Lobengkel a Resechal er a Dios.¹³ Mesel mongitakl, momdasu a ngerchelem el mesisiich el armi er a Dios el lolngeseu mengedmokl er a beluulechad el kirel a Ongeru el Beltel a Beluulechad er a Rubak. Tiang a ngercheled. Tiang a chetangkl el merkid. Ak kuchais loba ngklel a Jesus Kristo, amen.