Ngerang Kirir el mo Medengei a Rebek Loba Aaronic Priesthood
A oterkeklem el mo er a Aaronic Priesthood a klou a belkul el kirel a ngesou el mo er a rengelekel a Dios meng sebechir el nguu a klisichel a tngakgireng er a Kristo.
Rodam, ng techall el me obengkemiu er tial mora reksi el ongdibel. Sera bok beches el mission president, e ak mle semeriar el ngoititerir a re mle kot el cheldellir a re misionari. Sera longedmokl a rebebil er a di mla misionari el mo oumiting lobengterir e ak kulemes e te ngilai a kingellir a remekekerei el ngalk el mo blechobech el kmeed el iliuekl.
“Ngera chised er a ikal mekekerei el kingall?” a kuleker.
Tirka el missionari, a kora mle merur e uase, “Ng mo er tirka el beches el misionari.”
A kumdasu e a osenged sel domes er a rebebil a sebechel ngodechii osengir el kirir me a ikel sebecherir el mo uiangii.1 Tirka el beches el misionari er kemam a mlo dengchokl a kingellir a remeklou el chad er sel sils.
A lebebil ra taem, e ak suebek a renguk, el ua domesterir a rengeasek er a Aaronic Priesthood a kingellir a rengalek el bol dengchokl, e diak dolngeseu er tir el mesa sel Dios a mla mesterir el chedaol ngerachel el mo meruul a meklou el ureor.
A President Thomas S. Monson a milelach er kid el kmo a rengeasek el chad e kirir el moungil medengelii el kmo “ngera a belkul … sel de urekoled er a priesthood er a Dios. Ng kirir el moungil mukrael el mo medengelii a cheledolel tial ngerachel el ngiluu.”2
Chelechang, e ak meluluuch me a Chedaol Reng a mo omekrael er kid el moungil medengelii a klisichel me a chedolel tial Aaronic Priesthood e mo omekellomes a rengud el meral moungil mes a ngercheled er a priesthood. A klemechek a mora rokui lolab a Aaronic Priesthood, uldimukl er tirkel olab a Melchizedek Priesthood.
A Elder Dale G. Renlund a ulsisechakl el kmo a moktek er a priesthood a mo omesterir a rengelekel a Dios a techall er a klisichel a tngakireng er a Jesus Kristo.3 Sel mo nguu a klisichel a tngakireng er a Kristo er a klengar er kid, eng kired loumeang Ngii, ouchel a rengud ra kngtid, meruul e mengeluolu a chedaol telbil lokiu a chedaol ruoll, e nguu a Chedaol Reng.4 Aikang a diak el osisechakl el doruul el di ta el taem; aika bai, dmak loureor, el melisiich e meleketek er a tang e melemolem el teletael el ngoikid el mo ra ngarbab el dauch el “mei el mora Kristo, e mo mecherrungel er ngii.”5
Me, ngera urerel a Aaronic Priesthood er chelsel tiang? Ng mekera lengesouid el nguu a techall er a klisichel a tngakireng er a Kristo? A kuumerang el kmo a nger a ngara kiis er Aaronic Priesthood—el kiis er a reanghel mesiou me a uchelel ebangkelio.6
Reanghel Mesiou
Ka me domuchel er a tara teletelel a reanghel mesiou. Uchei er a rengelekel a Dios bol sebechir el ngarngii a klaumerang er tir er a Jesus Kristo, eng kirir el mo medengelii e mosisechakl er a ebangkelio er Ngii. El ua ikel dilung a Apostol Paulus:
“Ng mekera bo loumerang er ngii a lak el renges a chisel? e mekera lorrenges a lak a olisisechakl?
“E mekera lolisechakl, a lak loldurokl er tir? …
“Me a klaumerang a mei sel dorrenges, el orrenges a tekingel a Dios.”7
Sera uchelel, e a Dios a mla oldurokl ra reanghel el me mesiou er a rengelekir a rechad, el molecholt sel lemei a Krito.”8 A reanghel a chad er a babeluades lolab a klemechel a Rubak.9 A uchelel a tekoi er a Hebru ma Greek, el anghel a oderuchel.”10
Ngokiu a osisiu el teletael ea re anghel a oba ngerachel el oderchelel a Dios el mo omerk a tekingel el meleketek a klaumerang, me kid loba Aaronic Priesthood a mla mechedaol el mo “olsisechakl, e oleker er a rokui el mei er a Kristo.”11 A osisecheklel a ebangkelio a ngerchelel a priesthood. Me a klisiich lobengkel tial ngerachel a diak el di lebora re profet malechub el dil bora remisionari. Tiang a mo er kau!12
Ng mekera denguu tial klisiich? Ng mekera 12 a rekil el deacon—malechub a ngiidil ta er kid—a lenguu a klaumerang er a Kristo el mora rengrir a rengelekel a Dios? Kede omuchel el mo ngmai a tekingel me a klisichel a me er kid.13 Ng mla yaksok el kmo sel de relii tiang, e kede mo medengei a dolekoi er e sel temel.”14 Altang techall lolisechakl er a miting er a quorum malechub e koldingel a blid a chedal a ikeleia. Ng sebechel lokiu omeruul ra bek el sils, el ua sel omkadecheduch kau ma sechelim malechub a rechad ra blim. Ngii di el teletael, alsekum me kede kldmokl, eng sebeched el olisechakl ra ebangkelio el ua re anghel: lokiu a klisichel a Chedaol Reng.15
Ak dirk rirengesii a Jacob, el oba Aaronic Priesthood er a Papua New Guinea, el ouchais er a klisichel a Babier er a Mormon el ngilsouir el odngakl a mekngit e oltirakl er a Chedaol Reng. A tekingel a mle smisichii a klaumerang er ngak me a rebebil. A klaumerang er ngak a dirrek el mla mukeroul er a kurrenges er a re olab a Aaronic Priesthood el olsisechakl e sioning er a chelsel a miting er tir.
Rengeasek el chad, kemiu a oba ngerachel el oderuchel. Ngokiu a tekingem ma omerellem, e ke nguu a klaumerang er a Kristo el mora rengrir a rengelekel a Dios.16 El ua ikel lulekoi a President Russell M. Nelson el kmo, “Sel denguu er tir e kau ea mesiou el anghel.”17
Uchelel Ebangkelio
A merael mo mesisiik el klaumerang er a Kristo a blechoel ngoikid el mo soad el obult malechub e ke douchel.18 Meng chatarimai el kiis er a re anghel lolsisechakl a mobengkel a kiis er a uchelel ebangkelio, “el ebangkelio er a ouchel reng me a techolb chelid, ma melubet a kngtid.”19
Me sel mosuub a ngercheliu er a Aaronic Priesthood, e ke mesang el bleketakl el odurch el mo oleker er a rebebil el mo ouchel e melasem el moungil.20 Tia diak el belkul a kmo kede mo dechor ra bkul a rael el oldiu, “Bo mouchel!” Ng bai blechoel, el belkul a kmo kid a mo ouchel, kid a ousubes, mesel bo dolsisechakl er a rebebil, e kede mesterir a urungulir me a budech el ouchel reng a meskid—e le kid el mla morngii el tekoi.
Ak mla obengterir a robang a Aaronic Priesthood er a loldingel er a rebebil er tir. Ak mla mes ra medak el ulekereuir a domedemek a reng meng ngosuterir a rodam er tir el mo melchesuar er a beltkil a rengul a Dios. Ak rirengesii a ta ra ngeasek el ullecholt a loumerang er a klisichel a ouchelreng el mora re ta el basech. Se ra lochotii, ea reng a mlo medemedemek, me a telbiil a le kilngei, e a omekungil klisichel a Kristo a blo lomelchesiu er ngii.
A President Gordon B. Hinckley a ulsisechakl: “Ng tara tekoi el bo douchel. E kuk tara tekoi el kngtid a mo mousubes. A klisiich el mo kudmeklii tiang a debetik er ngii er a Aaronic Priesthood.”21 A ruoll er a techolb chelid me a chedaol belsoil a sioning el churrengelii a ouchelreng el kirel a ngebetel a kngtid.22 President Dallin H. a silodii el uaitiang: Kid a mla modurch el mo ouchel a rengud er a kngtid e mora Rubak loba klangiou el reng ma delmedemek el reng e melai er a chedaol belsoil. … Me sel domekbeches a telbiled er a techolbechelid el uaisei e a Rubak a omekbeches er sel omengikiid el ngara techolb chelid el dengiluu.”23
Rodam, tiang a chedaol techall el mo mengedmokl a chedaol ruoll el ngii a msang a ngebetel a klengit el mora rouchel a rengrir lokiu a klisichel a tkangireng er a Osobel.24
Te dirk ulechais er ngak er a priest, el meringel er ngii a mengedecheduch, el ketengel lomekngeltengat chedaol belsoil. Sera loruul er ngii, e a mesisiich el reng a mlo er ngii ma re mlara ikelesia. Uriul ra miting, eng ulechais er a di beot el klaumerang er ngii er a klisichel a Dios el ble lolechesuar er ngii er sel chedaol ruoll.
Ngara Sydney, Australia, ea re teua ra priest a millecholb ra rechedal a telungalek ra Mbuelongo. A delal a ta er tirka el priest a uluchais er gnii el tekoi el kmal silbechii a rengul a ngelekel. Tirka el priest a mlo ungil medengelii a belkul a “mlodurch er a Jesus Krito.”25
Ko medengei, a re priest a mla mo sebechir el oungerachel a techolbchelid el kirir a re mla mad er chelsel a templo. A 17 a rekil ngelekek a dirk millecholb er ngak el kirir a rebeldekam. A ki oba dmolech lomereng el saul el kirel a Aaronic Priesthood me a techall el oureor el kirel osebelir a rengelekel a Dios.
Rengeasek el chad, sel om blak a rengmiu el meruul a ngercheliu er a preisthood, e ko mo obengkel a Dios er a Urerel mengedmok el kirel a chad el melemolem el ngar me a diak a ulebengelel klengar er a chad.”26 Teletael el uai tiang a mo a smisichii a klemeriar reng er kau e mo kudmeklau el misionari el molisechakl a ouchel reng e melecholb er a robult.
Johanes el Techolb, Okesiu el mei er Kid
Kid a roba Aaronic Priesthood, a techelled e ngercheled el mo mesiou el diua Johanes el Techolb. A Johanes a mlodurokl loba ngerachel el oderuchel el olecholt el kirel a Kristo e oleker er a rokui el mouchel e mo metecholb—uaise, a ngii a mle oureor loba kiis er aAaronic Priesthood el bla de sodii. A Johanes a dilu el kmo, “Ngak a melecholb er kau loba ralm el kirel ouchelreng: engdi ngikei el oeak uriul el mei a ngarbab a deruchellel er ngak … : ngii a mo melecholb er kau loba Chedaol Reng, me a ngau.”27
Meng uaiei, a Aaronic Priesthood, el oba kiis er a mesiou el anghel mea uchelel a ebangkelio, a mengedmokl ra rolel a rengelekel a Dios el mo melai, lokiu a Melchizekek Priesthood, a sengk er a Chedaol Reng, el kot el ngarbab el sengk er tial klengar.28
Ng meral tmolech el ngerachel a Dios a mla msang a rolab a Aaronic Priesthood!
Ongit me a Yaksok
Roungalek me a roungerachel er a re priesthood, ng sebechiu el mesa sel klou lultutelel a osisecheklel a President Monson el mo olngeseu er a rengeasek el chad el mo medengelii “a belkul a …oba priesthood er a Dios”?29 Sel moungil medengelii e kudmeklii a Aaronic Prieshood a kot el ungil omengedmokl el de besterir el mo blak a rengrir el obaMelchizedek Priesthood, mui er a klisiich el misionari, e melemalt el bechiil el chad e chedam. Ngokiu a urerir, e te moungil medengei e omelchesiu er a meral klisichel a priesthood, el klisiich el mo ouedikel loba ngklel a Kristo el kirel a osobelir a rengelekel a Dios.
Ngeasek el chad, a Dios a ngarngii a urerel el kau a momeruul.30 A mechedaol er kau el mora Aaronic Prieshood a klou a ultutelel er a olengeseu er a rengelekel el mo melai er a klisichel a tngakireng er a Kristo. Ak yaksok er kau el sel omngai a ikal chedaol ngerachel mora klengar er kau, e ke mo omelchesiu ra klisichel a Dios el lemuut el mesisiich ra ngaramong. E kau a moungil medengelii el kmo ke meral ngelekel a Dios el sechal, el mlokedong er a chedaol okedong el mo meruul a urerel. El ua Johanes el Techolb, e ke mo olengeseu el kudmeklii a rael el kirel a luut er a Ngelekel. Aikal klemerang a kuuchais e sioning el ngara ngklel a Jesus Kristo, amen.