Nguu a Chedaol Reng el mo Omekrael er Kau
Ng ongasireng el sengk el mo er tirkel lotuil a klaumerang er tir er a Jesus Kristo. Tial sengk a Chedaol Reng.
Chelecha el Baskua, ea uldesued a bedul Okisel a Rubak el Jesus Kristo me sel bechachau el debull el ngii a mesterir a rokui el oumerang aikel loureng leng Kristo el mlo mesisiich er a kodall. A kuumerang, lobengkel a Apostol Paul, el kmo a Dios “el ulkisii a Kristo er a kodall [meng] [Ngii] a mo okisii [a] bedenged lokiu a Reng er ngii el nga er [kid].”1
A okisii a belkul a kmo ng mo ngar. El diua Kristo lokiis a bedenged el mo ngar ruriul er a le mad lokiu a klisichel a Okisel, meng dirrek el Ngii a sebechel lokisid, malechub eng meskid a klengar meng diak de bora kodall er a reng.2 Ngara hong er a Moses, e kede menguiu el Adam a siliseb er tial teletael er a okiis: “A [Adam] a miltecholb, me a Reng er a Dos a miltengel el mo er ngii, seikid eng mlechell er a Reng, e mlengodech a rengul.”3
Ng ongasireng el sengk el mo er tirkel lotuil a klaumerang er tir er a Jesus Kristo. Tial sengk a Chedaol Reng el meskid sel lomekedong er ngii er a Beches el Renged el “klengar el ngara Kisto.”4 Engdi kid sel bebil ra taem e kede kora diousubes er ngii el sengk?
Re odam me a rodos, tia klou el chetengakl el kid a mo oba … Chedaol Reng el mo omekrael er [kid],”5 el ngii a mocholt lokiu tial cheldecheduch.
Sera Mekemad era Korea, Ensign Frank Blair a ulureor er a diall el mlara Siabal lolengemai ra resoldau.6 Tial diall a dimlak el klou meng dimlak lou badrei, me a kabitei a ullengit er a Brother Blair al mo oungerachel er tial deruchall, leng mla mesang ngika el ngeasek el chad el ngarngii a klaumerang er ngii ma loltirakl, te ullengesenges er ngii a rokui el chad er tial diall.
A Ensign Blair a milluches: “A dillam a siliseb er a klou el eolt. A chedesaol a mle ngara 45 tsubo [14m] el ngarbab. Ngak a milengkar … seikid el taem ea kldei era mesil a mlo diak loureor e ngak a ngiluu a chais el belngel a diall a ulrael. Ng di mle teblo el mesil a medechel, a ta er ngii a milrael tedobech a klisichel. Ng kengaol tekoi a ki mlara chelsel.”
A Ensign Blair a rirekir a urerel el mengkar meng mlora dukkelel er a kabitei bo lolengod ra chesmerel. Nguleker, “Ng sebechem meluluuch el kirel tial diall?” A dang, ng kilengei a Ensign Blair.
Taikid el taem ea Ensign Blair a di mle sebechel di meluluuch, “Chedam ra Babeluades, kulengit me bo mo mekngeltengat em sebecheklii a dillam,” e mo bad. Ng ka bai, miluluuch el mo medeng alsekum ngar ngii a sebechel rulii el molengeseu el sobecheklii tial diall. A nger el mora nglunguchel a Brother Blair, a Chedaol Reng a milekrolii el mora lengarngii a kabitei, el mo mengedecheduch er ngii me bo lodengei a lmuut el bebil. Ng mlo medengei el kmo a kabitei a ulemelbult ra uldesuel el kmo ng mo olrrael el mo bekerurt malechub eng diak a ikal lungil mesil. A Ensign Blair a liluut el mora cabin er ngii el mo meluluuch.
Ng miluluuch, “Ngerang sebechek el rulii el mo ngosouir tial telemellel a mesil?”
A nger el morngii, ea Chedaol Reng a milkrolii el kirel mo merael meliuekl er tial diall e omes meng mo medengei a lmuut el bebil. Meng liluut el mora kabitei e ulengit me bo lorael el liueklii bebul a diall. Meng, mle llechotel a sengchel, eng tilobed el mora lengar ngii a ses el eolt.
Ng dilechor ra uriul ra diall e ulemes er a ikal meklou el brobera sel bel dum sel bora bebul a chedesaoch tial diall. Ng di mle chimong a mle ungil loureor, e mle bekerurt el meliuekl. Uriul er a lomes, ea Ensign Blair a liluut el meluluuch. A bleketakl el nger el ngiluu a kmo a ikal merael mesil a uldirekork a urerel meng kirel mo soro. Meng, liluut el mora kabitei e silbedii. A kabitei a mle mechas a rengul, e uluchais er ngii el kmo a engineer a dilii a kuk ngodech —el kmo lorretii aika lungil mesil mel sebechir el mocheroid er a eolt. Meng uaisei, ea kabitei a mlo oltirakl er a tekingel a Ensign Blair meng ngilai a mesil el mo soro. Tutungang, e tial diall a mla mora meiusech el daob.
Di mle erul sikang ruriul, ea ikal lungil merael mesil a miltemall. Di le tal sel mesil di tedobech a rretel oureor, tial diall a mle sebechel mekekokil el mora lomak a diall er ngii.
A kabitei a dilu er a Ensign Blair, “Alsekum meng dimlak de relii a mesil el mo soro er seikid el taem, e ng mle sebechel metemall er a dengar a chelsel a ses el eolt.”
A bolak lorael a mesil, eng diak el sebechel lobesiul a diall. Tial diall a ual bol meuitech e ruchorch. Ng kal kabitei a uluureng a sulel ngkal ngeasek el LDS e dilu ngoumerang el kmo sel mlo oltirakl er a chedaol ulekrael el ngilai a Ensign Blair a uchul me tial diall a silobel ngii me a klengar er a rechad el mlar ngii.
Tial cheldecheduch a kora kmal smiich. Me kid a ua lak bo desiseb er a chouata el kengaol teletael, tial cheldecheduch a ngarngii a meklou a belkul kerbai el beskid el kmo ng mekerang e mo sebeched el blechoel el melai a ulekrael er a Chedaol Reng.
A kot, sel denguu er a ocholt, eng kired el ngmai a klengar rekid el mo chemau a babeluades. A Ensign Blair a mle kiei el kedung e klikiid a klengar er ngii. Alsekum eng dimlak lolengesenges, eng dimlak el sebechel klou a rengul meluluuch el kirel a selbecheklel tial diall e nguu a ulekrael el kirel. Ng kired el blak a rengud el ngmai a klengar er kid el mo oltirakl a llechul a Dios me bol sebeched el melai aikel lomeskid.
Sel bebil ra taem eng diak derenges olangch ra babeluades e leng diak de kedung. A ouchelreng me a olengesenges a rael el mo sebeched el lemuut el melai a mechelings el tekoi el kired. A tekoi el ouchelreng el ngara Uodel el Renged a belkul a kmo “mo ikrii” malechub “obitokl.”7 Sel momelchesiu el cheridang ra Dios, ea di tal tekoi el mousbech er ngii a mo tibir el mo ikrii a klengit, e mo chemau a Osobel, el kau a mo metik er Ngii el mengiil er kau, el blerk a chimal. Ng semeriar el mo omekrael er kau, ng kmal di ta el nglunguuch a ngoikau el lemuut el mo nguu a omekrael.8
Ongerung, Ensign Blair a dimlak el di lolengit ra Rubak mel sumechokl a telemall. Nguleker el kmo ngera kirel el meruul me bol sebechel dirrek el sumechokl. Ngosisiu eng sebeched loker, “Rubak,ngera kirek el meruul me bok betik er a semecheklel?” Bai lak di doluches a telemall e olengit ra Rubak el mo mesemechokl, ng bai kired lomdasu a dousbech e omtab a beches, el teletael el melai er a ngelsuir a Rubak el kirel, e tibir el mo oltirakl a ulekrael er a Chedaol Reng.
Ngar ngii a ongedei el klou a ultutelel suobel er tial cheldechedechal a Ensign Blair . Ngii ng kol locha mle sebechel meluluuch alsekum eng dimlak el nguu a ulekrael er a Chedaol Reng er a mla memong el taem? Sel lemei a sesel eolt eng diak a taem el dirk dosiik er a Chedaol Reng e dosuub lousbech er ngii. Ngkal ngeaesk el buik a bleketakl el ultirakl er a teletael el ngii a mla ousbech er ngii el betok el taem, luldimukl er a le misionari. Kid a ousbech er a Chedaol Reng el lomekrael er kid sel le meiusech a daob, meng sebeched el rongesii sel temel a mesisiich el sesel eolt.
A rebebil omdasu ng diak el kired el melai a ulekrael ra bek el sils er a Chedaol Reng ele a [Dios] a diak el kirel di melekoi er kid ra rokui el tekoi,” e le kede mo mesaik el mesiou.9 Tial bades, a millekoi, el kirir a remle kot el misionari el lulelngit er a Joseph Smith bol ngai a ocholt el ngii a mle kirel el mo er tir. Sel ongingil tial bades, ea Rubak melekoi tir me lemei er tial beluu “me te mo katekoi lokiu a delongelir me a Rubak.”10
Tirka el misionari a mle sorir a bleketakl el ocholt el kirel a teletelel a omerolir. Ng dirkak el bo lodengei el losiik a teleltelel a omrolir kirel a klengar er tir. A Rubak a ulemekedong er tial blekeradel el: saikereng. A ruchelel a Ikelesia a mle ungil a rengrir lobengkel a meral profet me te mla ra chetituokel el blekeradel el mo diak el sebecherir el mesuub el mo di tir el melai ocholt el kirir. Mo mesisiich er a chedaol tekoi a sel mo sebeched el di kid el rongesii a Rubak lokiu a Reng er Ngii el kirel a klengar er kid.
A Alma a milellach er a ngelekel el mo” blechoel el melai er a omellach er a Rubak chelsel ra rokui el loruul.”11 A klengar el uai tiang—a doleker er ngii el kmo “kiei loba Cheaol Reng”—tia ngarbab el klungiaol. A obengkel tiang a delmedemek me a klou el reng me a dirrek el redechel a Reng, el reua beltikelreng, deuelreng, me a budech.12
A dechal a Ensign Blai el nguu a ocholt a ulsebelii ngii me a ledak el ngara diall er a mesisiich el eolt. Bebil ra bedengel a sesel eolt a mesisiich el melokou er chelechang. A cheldecheduch el ngara Babier er a Mormon er a kerrekar ra klengar13 a meskid a mesisiich el siasing el kmo ng mekera bode selbechakl er a choua tia el beluulechad. Tial berrous a chouchais er a rerengel a ilkolk el milrael el melemall er a rechedal a Ikelesia el merael er tial rael el lemuut el mora Dios.14
Sel kumdasu er tial siasing, e ak mesterir a rebetok el chad el merael er tial rael, a bebil a mesisiich lorreked er a iron rod, e a rebebil a kuk di oltirakl er a bekesir a remerael er mederir. Tial bedengel omerael a diak lousbech a uldasu ma blakelreng. Ng sebechem el kuk di meruul e omdasu a loruul e lomdasu a rebebil. Tia lureor diungil sel meringel a sils. Eng di a sesel eolt ra omengeuid me a rerengel a telingaol a di keberuul el morngii. Chelsel a ikaikid el taem, ea klengar ma lechub a kodall e kmal di iior er a medengelii a ngerel a Chedaol Reng.
A mesisiich el yaksok er a Nephi a uase “ngikel lorrenges a tekingel a Dios, e … urekodel er ngii el di mereched … a diak bol riid; ma ongetikaik ma belechel a cherarou a ka bol mesisiich el ngoititerir el mora ilkolk, el melai er tir el mo melemall er tir.”15
A oltirakl a blekeklel a chad el ngar medam loak a rael a diak di tiaikid e lungiang. Ng diak el sebeched el meruul e omdasu a loruul e lomdasu a rebebil; ng kired el kiei er a mukrael el klengar. Ng kirel a derta er kid el chimal a orreked er tial iron rod. E seikid e kede mora Rubak loba klengariou e klou el reng, el medengei el kmo Ngii a mo omekrael er [kid] loba chimal, e [meskid] a nger el mora nglunguched.”16 El ngara ngkel a Jesus Kristo, amen.